Ma Pi Jehovah E Tin Bat’uf Rodad U Gubin E Rran

“Dabki magafan’med; ya . . . Chitamangimed e manang nib t’uf romed e pi n’en ney.”​—LUKE 12:29, 30, NW.

1. Uw rogon ni ma duruiy Jehovah e pi gamanman ni sunmiy?

KAAM guy reb e sparrow ara yugu boch e arche’ ni yugu be yip yip e but’? Sana ga be lemnag ko mang ggan e ra pirieg ya kemus ni be yip yip e but. Welthin rok Jesus u daken e Burey, e ke dag ni bay ban’en gad ra fil u rogon ni ma duruiy Jehovah fapi arche’. Ke yog ni gaar: “Amu guyed e arche’ ni yad be chachangeg u lang: darir yunged awochngin e woldug, fa ra kunuyed e woldug ni ke el ngar tiyed nga naun; ma Chitamangimed nu tharmiy e be ayuwegrad! Gathi ka ba ga’ famed ngak e arche’?” (Matthew 6:26) Ma pi’ Jehovah e ggan ko urngin e tin ni ke sunmiy u reb e kanawo’ ni yira ngat ngay.​—Psalm 104:14, 21; 147:9.

2, 3. Mang tirok Got e gad ra fil ko tin baaray ni ke fil Jesus ngodad ni nguud yibilayed e ggan rodad ni gubin e rran?

² Ere, mang fan, ni ke uneg Jesus ko fare meybil ni ngaun fol wok riy ni gaar: “Mu pi’ ngomad e daba’ e ggan ko daba’”? (Matthew 6:11, NW) Gad ra fil ban’en nib spiritual ko pi thin ney ni yibe ning ban’en. Som’mon, e be puguran ngodad ni Jehovah e ir e Tabolngin urngin ban’en nib t’uf rodad. (Psalm 145:15, 16) Girdi’ e rayog ni ngar yunged boch e woldug mu u ra ayuweged, machane goo Got e rayog ni nge ayuweg nge tugul boch ban’en, ni tin nib spiritual nge tin rayog ni ngan guy. (1 Korinth 3:7) Tin gad ma ka’ nge tin gad ma unum e ir e taw’ath ni yib rok Got. (Acts 14:17) Gad ra ning ni nge pi’ ngodad e tin nib t’uf rodad ni gubin e rran e be dag ni gathi gad be dariyfannag e pi n’en ney. Riyul ni, bochan e kad ninged ban’en e gathi be yip’ fan ni de t’uf ni ngad uned ko maruwel nfaanra rayog rodad.​—Efesus 4:28; 2 Thessalonika 3:10.

³ Bin l’agruw, bochan ni kada ninged e “ggan ni fan ko daba’” e be dag ni det’uf ni ngari magafan’dad ni fan ko gabul. Miki yog Jesus ni gaar: “Ere dabi magafan’med ni nge lungumed, ‘Mang e nggu ked’?’ ara, ‘Mang e nggu garbodgad ngay?’ ara, ‘Mang e nggon’ed?’ Ya ireray e pi n’en ni girdi’ nu fayleng e ri yad baadag ni nge yog ngorad. Ya Chitamangimed nu tharmiy e manang nib t’uf romed e pi n’ey. Ere ngam m’oneged u wan’med e gagiyeg rok Got nge tin nib m’agan’ ngay ni ngam rin’ed, ma aram me pi’ urngin e pi n’ey ngomed. Ere dabi magafan’med nga rogomed gabul; ya ba gaman e tin nra magafan’uy ngay ni ba’ riy.” (Matthew 6:31-34) Rogon ni yima yibilay ni nge yog e “ggan ni fan ko daba’” e be dag rogon e par nib mom ma be par “nib yul’yul’ ku Got ma ke fel’ u wan’ e tin ni bay rok.”​—1 Timothy 6:6-8, footnote.

Ggan nib Spiritual u Gubin e Rran

4. Mang e tin ke buch ko yafas rok Jesus nge piyu Israel ni be tamilangnag feni ga’ fan ni ngan kay e ggan nib spiritual?

⁴ Rogon ni gad ma yibilay ni nge yog ngodad e ggan ni gubin e rran e ku be puguran ngodad ni kub t’uf rodad e ggan nib spiritual ni gubin e rran. Yugu aram rogon ni ke yib e bilig ngak Jesus nib gel u tomren ni ke pag e abich nib n’uw nap’an, i togopuluw ngak Satan ko ngiyal’ ni ke wawliy ni nge non ko pi malang nge ngal’ ni flowa mi gaar: “Fare babyor nib thothup e be gaar, ‘Girdi’ e dabiyog ni yigoo flowa e ra i kay mi i par nib fos, machane urngin bug i thin ni be yog Got e ir e ra i tay e girdi’ nib fos ndabi yim’.’” (Matthew 4:4) U roy i fanay Jesus e thin rok Moses ni profet, ni i yog ngak piyu Israel ni gaar: “Me gagiyegnag [Jehovah] ngam pired ndariy ban’en ni gimed ra kay, me pi’ e mana ngomed ni ngam koyed, ni ggan ni gimed nge pi chitamangimed ni kakrom e dawor mu koyed biid. I rin’ e re n’ey ngomed ni fan e nge fil ngomed ni gathi goo ggan e ma tay e girdi’ nib fos, ya girdi’ e dabi siy ni nge yog ngorad urngin bugithin ni Somol e yib rok.” (Deuteronomy 8:3) Rogon ni pi’ Jehovah e mana ngak piyu Israel e i pi’ ngorad ni gathi kemus ni ggan nib riyul’ ya ku ke fil ngorad riy ban’en nib spiritual. Reb, e ka nog ngorad ni “gubin e rran ni nge yan e girdi’ ngar kunuyed nap’an e tin ni ngar kayed riy u reb e rran.” Faanra ngar kunuyed e ggan ni ke pag urngin e tin nib t’uf rorad u reb e rran, ma tin ka ba’ e ra mel me yib e fakl’ud ngay. (Exodus 16:4, 20) Machane, de buch ni aram rogon ko fa bin nel’ e rran u nap’an ni thingara kunuyed ni fan nga l’agruw e rran ma aram bay e ggan rorad u nap’an e Rran ko Toffan. (Exodus 16:5, 23, 24) Ere fare manna e ke fil ban’en ngorad ni thingara folgad ku Got ma yafas rorad e gathi kemus ni be tor nga daken e ggan ya be tor nga daken “urngin bugethin ni u l’ugun Jehovah.”

5. Uw rogon ni ma pi’ Jehovah ngodad e ggan nib spiritual u gubin e rran?

⁵ Maku ba t’uf ni nguuda ked u gubin e rran e ggan nib spiritual ni ke pi’ Jehovah u daken Fak. Bochan e re n’ey, i dugliy Jesus fare “tapigpig nib yul’yul’ mab gonop” ni nge pi’ e “ggan ko tayim nib puluw” ni fan ko tabinaw ni ke michan’rad. (Matthew 24:45) Fare tapigpig nib yul’yul e gathi kemus ni ma pi’ e ggan nib spiritual ni boor ni aram e tin ma ayuwegdad ngad nanged fan e Bible ya ku ma pi’ e athamgil nga lanin’dad ni nguuda beeged e Bible u gubin e rran. (Joshua 1:8; Psalm 1:1-3) Ni bod Jesus, ku rayog ni ngad gelgad ko tirok Got ni faan ngada athamgilgad ni ngad filed e tin nib m’agan’ Got ngay ni gubin e rran ma uda folgad riy.​—John 4:34.

Ngan N’agfan u Wan’uy e Denen

6. Mang malfith e gad ra ning ngan n’ag fan u wan’uy, ma wuin nib m’agan’ Jehovah ngay ni nge n’ag fan u wan’?

⁶ Bin migid ni kan ning ko meybil ni kan ta’ ni fan ni ngan fol riy e: “Ma ga n’agfan u wan’um e malfith romad, ni bod ni kug n’iged fan u wun’mad e malfith rok boch e girdi’ ngomad.” (Matthew 6:12, NW) De weliy Jesus u roy murung’agen e malfith ni salpiy. I lemnag murung’agen rogon ni ngan n’agfan e kireb rodad. Rogon ni yoloy Luke fare meybil ni kan ta’ ni fan ni nguun fol riy, e yibe wenignag ni gaar: “Ma ga n’ag fan u wun’um e denen romad, ya kug n’iged fan u wan’mad urngin e piin ni bay e malfith rorad romad.” (Luke 11:4, NW) Ere, nap’an ni kad denengad, bod ni kad ted e malfith ngak Jehovah. Machane Got rodad ni ma t’ufegey e ba m’agan’ ngay ni nge ‘n’agfan u wan,’ ara ngan thang, e re malfith nem u wan’ nfaanra ngad kalgadngan’dad u fithik’ e yul’yul’, ma ngada “chelgad” ngak, ma ngad ninged ni nge n’agfan e kireb rodad u daken e michan’ rodad ko biyul ni maligach rok Kristus.​—Acts 3:19; 10:43; 1 Timothy 2:5, 6.

7. Mang fan ni thingarda yibilayed ni ngan n’ag fan u wan’uy e kireb rodad u gubin e rran?

⁷ Maku reb, gad ra denen u nap’an ni de yog rodad ni ngad rin’ed e tin nib mat’aw ban’en nib puluw ko motochiyel rok Jehovah. Bochan e denen ni ke af ngodad, ma gadad gubin e gad ma oloboch ko thin, nge tin gad ma rin’, nge lem rodad ara de yog rodad ni ngad rin’ed e tin nib t’uf ni ngad rin’ed. (Eklesiastes 7:20; Roma 3:23; James 3:2; 4:17) Ere, demtrug ko gad manang ni kad denengad u lan reb e rran fa danga’, mab t’uf ni ngad uneged ko meybil ni gad ma ta’ u gubin e rran ni ngad ninged ni ngan n’agfan e denen rodad.​—Psalm 19:12; 40:12.

8. Meybil ni ngan n’agfan u wan’uy e kireb rodad e ra k’aringdad ni ngad rin’ed e mang, ma mang felngin?

⁸ Meybil ni be ning ni ngan n’agfan e denen e susun ni ngan rin’ u tomren ni ke yaliy be’ ir u fithik’ e yul’yul’, me kalngan’, me weliy e denen rok, u daken e michan’ ko racha’ ni ke puog Kristus ni bay gelngin ni nge biyuliyey. (1 John 1:7-9) Rogon ni ngan dag ni gad be meybil u fithik’ e yul’yul’, thingarda rin’ed ban’en ni nge dag ni riyul’ ni gad baadag ni ngan n’agfan e denen rodad ni aram e ngad “ngongliyed e pi n’en ni ir e ra m’ug riy ni kad pied keru’dad ko denen ni kad rin’ed.” (Acts 26:20) Ngemu’ rayog ni nge pagedan’dad ni ke m’agan’ Jehovah ngay ni nge n’agfan e denen rodad. (Psalm 86:5; 103:8-14) Ma angin ni ra yib riy e ra gapas lanin’uy ndariy ban’en nib taarebrogon ngay, ni aram “fare gapas rok Got ni kab tolang ko urngin e tafinay,” ni aram e n’en ni “ra yororiy [gum’ircha’dad] nge tafinay [rodad] u daken Kristus Jesus.” (Filippi 4:7) Machane fare meybil ni ke ta’ Jesus ni fan ni un fol riy’ e ri be fil ngodad boch ko mang e thingarda rin’ed ni fan ni ngan n’agfan e pi denen rodad.

Thingarda N’iged Fan e Kireb rok Be’, ni Fan ni Ngan N’agfan e Kireb Rodad

9, 10. (a) Mang thin e ke uneg Jesus ko meybil ni tay ni nguun folwok riy, ma mang e be tamilangnag? (b) Uw rogon ni kari dag Jesus ni rib t’uf ni nguud n’iged fan u wan’dad e kireb ni ke rin’ be’ ngodad?

⁹ N’en nib fel’ ni ngan lemnag, e aram fare bugithin ni “ma ga n’agfan u wan’um e malfith romad, ni bod ni kug n’iged fan u wan’mad e malfith rorad ngomad,” e kemus ni ir bang ko meybil ni ke weliy Jesus murung’agen. Tomren e meybil rok, me ulul ngay ni gaar: “Ya faanra mu n’iged fan u wan’med e kireb ni ke rin’ boch e girdi’ ngomed, ma ku er rogon e Chitamangimed nu tharmiy nra n’ag fan u wan’ e kireb ni kam rin’ed. Machane faanra dabmu n’iged fan u wun’med e kireb ni ke rin’ boch e girdi’ ngomed, ma ku er rogon e Chitamangimed nu tharmiy ndabiyog ni nge n’ag fan u wan’ e kireb ni kam rin’ed.” (Matthew 6:14, 15) Ere, i tamilangnag Jesus nra n’ag Jehovah fan u wan’ e kireb rodad nfaan manga ri ba m’agan’dad ngay ni ngad n’aged fan u wan’dad e kireb ni ke rin’ boch e girdi’.​—Mark 11:25.

¹⁰ Immoy ba ngiyal’, ni weliy Jesus reb e fanathin ni be dag nib t’uf ni nge m’agan’dad ngay ni ngad n’iged fan e kireb rok boch e girdi’ nfaanra gad be athapeg ni nge n’ag Jehovah fan u wan’ e kireb rodad. I weliy murung’agen e pilung ni kari n’ag fan u wan’ e malfith ni salpiy ni tay reb e sib. Tomur riy me gechignag fare pilung e re pumoon nem nib gel u nap’an ni dabuy ni nge n’ag fan u wan’ e malfith ni salpiy nrib buchuw ni tay yugu reb e sib. I museg Jesus e fanathin rok ni gaar: “Ereram rogon e n’en nra rin’ e Chitamag nu tharmiy ngomed ni faanra dabi bigimed me n’ag fan u wan’ e n’en nib kireb ni ke rin’ i walagen ngak.” (Matthew 18:23-35) N’en ni be fil ngodad riy e ba tamilang: Fare malfith ni aram e denen rodad ni ke n’ag Jehovah fan u wan’ e rib ga’ ni dawori chuchugur ko denen ni sana ke rin’ boch e girdi’ ngodad. Maku, ma n’ag Jehovah fan u wan’ e denen rodad ni gubin e rran. Ere ba tamilang, ni rayog ni ngad n’aged fan u wan’dad e kireb ni ma rin’ boch e girdi’ ngodad yu ngiyal’.

11. Mang fonow ni ke pi’ Paul ni apostal nfaanra gad be athapeg ni nge n’ag Jehovah fan u wan’ e denen rodad, ma mang felngin?

¹¹ Paul ni apostal e yoloy ni gaar: “Machane um golgad ngomed, me bigimed me munguy ngak bigimed, mu um n’iged fan u wan’med e tin nib kireb ni ke rin’ bigimed ngak bigimed, ni bod rogon Got ni bochan Kristus ma aram fan ni ke n’ag fan u wan’ e kireb ni kam rin’ed.” (Efesus 4:32) Rogon ni ra be’ ma nge n’ag fan e kireb ni ke rin’ be’ ngak e ma m’onognag e gapas u fithik’ e piin Kristiano. Miki yog Paul ni gaar: “Gimed girdien Got; ya gimed ba t’uf rok ma ke dugliymed ni ngam manged girdien. Aram fan ni runguy, nge gol, nge sobut’an’, nge sumunguy, nge gum’an’ e thingar mon’ed nga dakenmed nge mang mad romed. Nge bigimed mi i ayuweg bigimed ko meewar rok u fithik’ e runguy, mu um n’iged fan u wan’med e n’en ni manga ke kirebnag bigimed u laniyan’ bigimed ko re ngiyal’ i n’en ni ba’ ban’en ni ke dabuy bigimed ni ke rin’ bigimed ngak. Thingar um n’iged fan u wan’med e n’en ni ke rin’ bigimed ngak bigimed ni bod rogon ni ke n’ag Somol fan u wan’ e tin ni kam rin’ed nib togopuluw ngak. Nge rogon nib t’uf Got nge girdi’ romed e ngam puthuyed nga urngin e pi n’ey, ni ir e ma chugumiy urngin ban’en nga taabang nge par ni ke fel’ rogon.” (Kolose 3:12-14) Rayog ni ngan nangfan urngin e pi n’ey ko meybil ni ke fil Jesus ngodad: “Mu n’agfan e malfith romad, ni bod ni kug n’iged fan e malfith rorad romad.”

Yoror u Nap’an ni Yibe Wawliy ni Ngan Rin’ e Kireb

12, 13. (a) Mang e der yip’ fan e n’en nib m’on ko bin tomur ko tin ni kan ning ko meybil ni tay ni nguun folwok riy? (b) Mini’ e en ri Ma Wawliy lanin’uy ko kireb, ma mang fan e meybil rodad ni dabni fekdad iyib ko gin ni yira wawliydad riy?

¹² Bin migid ni kan ning ko meybil ni tay e be gaar: “Dabmu fekmad i yib ko gin yira wawliymad riy.” (Matthew 6:13, NW) Gur thin ni yog Jesus e be yip’ fan ni thingarda ninged ku Jehovah ni dabi wawliydad ngad denengad fa? Gathi aram rogon, ya kan thagthagnag ngak James ni gachalpen ni nge yoloy ni gaar: “Ma faanra yib e mit nem e skeng ngak be’ nrayog ni nge wawliy faanem nge denen, ma thingari dabi gaar u laniyan’, “Re n’ey ni be n’en ni nge wawliyeg nggu denen e yib rok Got.” Ya dariy ban’en nib kireb nrayog rok ni nge yan i guy rogon nge wawliy Got nge denen, mi Got e der rin’ ngak be’.” (James 1:13) Maku, i yoloy fare psalmist ni gaar: “Faan mang e mu tay ngan’um e kireb ni gamad be rin’, me mini’ e rayog rok ni nge thay ndab ni gechignag?” (Psalm 130:3) Jehovah e gathi be sonnag ngad denengad, mab mudugil ni dabi guy rogon ni nge wawliydad ngad denengad. Ere, mang e be yip’ fan e giney ko fare meybil ni ngaun folwok riy?

¹³ Faen be athamgil ngad olobochgad, ma be maruweliy ni ngad awgad ko pi ban rok, maku ra lunguydad e Satan ni fare Moonyan’. (Efesus 6:11, footnote) Ir e en ri ma Wawliyey ko kireb. (1 Thessalonika 3:5) Ngan meybil ni dabni fekdad i yib ko gin ni yira wawliydad riy, e gad be ning ku Jehovah ni dabi pag ni ngad mulgad u nap’an ni keb e skeng ngodad. Gad be ning ni nge ayuwegdad ni “dabiyog ni nge gel,” Satan ngodad. (2 Korinth 2:11) Gad ma meybil ni nguud pared “u tagil’ e en Th’abi Tolang,” nib mith ma rayog ni nge yog ngodad e ayuw ko tirok Got ni yibe pi’ ngak e piin ni yad ma tayfan e gagiyeg rok Jehovah ni th’abi tolang ko urngin ban’en ni yad ma rin’.​—Psalm 91:1-3.

14. Uw rogon ni ke micheg Paul ni apostal ngodad ni dabi digeydad Jehovah nfaanra ngad chugurgad Ngak u nap’an ni yibe wawliydad ko kireb?

¹⁴ Rayog ni nge mudugil lanin’dad ni faanra ireray e n’en ni ri gad be athapeg, ni kad daged ko meybil nge ngongol rodad, ma dabi pagdad Jehovah. Paul ni apostal e ke micheg ngodad ni gaar: “Urngin e n’en ni ma wawliy e girdi’ nge denen ni ke yib ngomed e ereyer e mit e n’en ni ka ma yib ngak e girdi’. Yi Got e dabi thiliyeg e tin ni ke yog nra rin’ ngodad, ma dabiyog ni nge pagmed nge yib ngomed e pi n’en ni ma waliy e girdi’ nge denen nge pag rogon ndabkiyog romed ni ngam taleged gimed riy; machane re ngiyal’ i n’em e ra pi’ gelngimed ngam k’adedan’med riy, ni aram e ke pi’ e kanawo’ ngomed ni ngam bad riy nga wuru’ e pi n’em.”​—1 Korinth 10:13.

“Ngam Ayuwegmad Rok Faanem nib Kireb”

15. Mang fan ni rib ga’ fan e chiney ni ngad yibilayed ni ngan ayuwegdad rok faanem nib kireb?

¹⁵ Rogon ni yog boch e manuscript ko fare Christian Greek Scriptures ni ri yima pagan’uy ngay, ma meybil ni tay Jesus ni un fol riy e kan museg ko pi thin ni gaar: “Ngam ayuwegmad rok Faanem nib kireb.”a (Matthew 6:13) Ayuw ni fan ni dabi gel fare Moonyan’ e rib ga’fan ko re tayim ko tomur ney. Satan nge pi moonyan’ rok e yad be cham ngak e piin ni kan dugliyrad ni ka ba’, ni “yad ma fol ko motochiyel rok Got ma yad be weliy murung’agen Jesus,” nge piin nib chag ngorad ni fare “ulung ni baga’.” (Revelation 7:9; 12:9, 17) I fonownag Peter ni apostal e piin Kristiano ni gaar: “Mu tedan’med mi gimed ayuwegmed! Yi moonyan’ ni ir e toogor romed e yugu be yan ni bod ba layon ni be tolul, ni be gayiy be’ ni nge longuy. Ere um pired nib mudugil e michan’ romed ngak Kristus mi gimed togopuluw ngak fare moonyan’.” (1 Peter 5:8, 9) Baadag Satan ni nge taleg e maruwel rodad ni ngan wereg e machib, ngu daken e piin ma ayuweg u roy u fayleng​—ndemtrug ko teliw, ara siyobay, ara political—​e be guy rogon ni nge rin’ ban’en ni ngeb e marus ngodad riy. Machane, faanra uda pared ni gad ba mudugil ma ra ayuwegdad Jehovah. James ni gachalpen i yoloy ni gaar: “Mpied gimed nga pa’ Got ngam paged famed ngak. Mi gimed togopuluw ngak fare moonyan’, me mil romed.”​—James 4:7.

16. Mang e rayog ni nge fanay Jehovah ni bay rok ni nge ayuweg e pi tapigpig rok ni keb e skeng ngorad?

¹⁶ I pag Jehovah ni ngan wawliy Fak ko kireb. Machane tomren ni ke togopuluw Jesus ko fare Moonyan’, ni be fanay e Thin rok Got ni nge ayuweg, me l’og Jehovah e pi engel ni nge pi’ e athamgil nga laniyan’. (Matthew 4:1-11) Maku arrogon, ma fanay Jehovah e pi engel rok ni ngar ayuweged gadad nfaan gad ra yibilay u fithik’ e michan’ ma ngad paged nge mang manaf rodad. (Psalm 34:7; 91:9-11) I yoloy Peter ni apostal ni gaar: “Ere Somol e manang rogon ni nge ayuweg e piin ni yad ma fol rok ko gafgow ni ma yib ngorad, nge rogon ni nge tay e piin nib kireb u tan e gechig rok nge yan i mada’ ko Chirofen ni bayi pufthinnagrad Got.”​—2 Peter 2:9.

Ke Chuchugur ni Ngan Thap Ngak Got ni Polo’

17. Rogon ni ke pi’ Jesus fare meybil ni ngaun folwok riy, uw rogon ni i yarmiy ban’en nrogon?

¹⁷ U lan fare meybil ni kan tay ni fan ni un fol riy, i yarmiy Jesus e thin riy nrogon. N’en ni ngad tedan’dad ngay som’mon e fare n’en ni ngan thothupnag fithingan Jehovah nib ga’ mab thothup. Bochan ni n’en ni ngan fanay ni fan ni ngan lebuguy e re n’en ney e Gil’ilungun Kristus, nguuda yibilayed ni ngeb ni nge thang urngin e gil’ilugun ko girdi’ ni de flont, ara am, min gagiyegnag ni ngari riyul’ e tin nib m’agan’ Got ngay u tharmiy maku arrogon u roy u fayleng. Athap rodad ko yafas ni manemus u paradis u fayleng e be tor nga daken ni ngan thothupnag fithingan Jehovah min ta’ fan e gagiyeg rok nth’abi tolang mab mat’aw u palpalth’ib. Tomren ni ngan yibilay urngin e pi n’en ney nib ga’ fan, ma rayog ni ngad yibilayed e tin nib t’uf rodad u gubin e rran, ma ngan n’agfan e denen rodad, min ayuwegdad ni dabda mulgad nbochan e n’en ni ma wawliy lanin’dad ko kireb nge ban rok faanem nib kireb i Satan ni fare Moonyan.

18, 19. Uw rogon ni nge ayuwegdad fare meybil ni tay Jesus ni ngaun folwok riy ni nguud pired ni gad ba od ma ngad maruweliyed nge par nib mudugil e athap rodad “nge mada’ ko tomur”?

¹⁸ Ba ngiyal’ ni ngan ayuwegdad ni polo’ rok faanem nib kireb nge birok e m’ag nib kireb e ke chuchugur. Ri manang Satan ni “ndaki n’uw nap’an ni nge par” ni nge dag e “damumuw rok” u fayleng, ni baga’ ni fan ngak e pi tapigpig rok Jehovah nib yul’yul’. (Revelation 12:12, 17) Fare pow ko “tomur ko fayleng” ni bay boor yang riy, i yiiynag Jesus boch ban’en nra buch, ma boch riy e dawori yib. (Matthew 24:3, 29-31) Nap’an ni kad guyed e re n’en ney ni be buch, ma athap rodad ni ngad mageygad nib fas e ke tamilang. I yog Jesus ni gaar: “Faanra tabab i m’ug e pi n’ey, mi gimed sak’iy ngam changargad nga lang, ya aram e ke chugur ni ngan chuwegmed u fithik’ e gafgow.”​—Luke 21:25-28.

¹⁹ Fare meybil nib ngoch ni tay Jesus ni un fol riy e kari pow’iydad ngad nanged ko mang e ngad uneged ko meybil rodad e chiney ni be chugur iyan e tomur. Yibe athapeg ni nguuda pagedan’dad ngay ni ra ulul Jehovah i pi’ ngodad e tin nib t’uf rodad u gubin e rran, ni tirok Got nge tin nib t’uf nga dowdad. Rogon ni uda pared nib od u fithik’ e meybil e ra ayuwegdad ni “ngada pired ni ke pagan’dad ngak Got nge yan i mada’ ko tomur ni bod rogon ni ud pired ko som’on.”​—Hebrews 3:14; 1 Peter 4:7.

[Footnote]

Ngan Sul nga Daken

• Mang e be dag riy ni gad ma yibilay nge yog ngodad boch e “ggan ni fan ko daba’”?

• Mu weliy fan fare meybil ni “mu n’ag fan e malfith romad, ni bod ni kug n’iged fan e piin bay e malfith rorad ngomad.”

• Mang e be yip’ fan u nap’an ni gad be ning ngak Jehovah ni dabi fekdad i yib ko gin ni yira wawliymad riy?

• Mang fan nib t’uf ni ngad yibilayed ni nguun ‘ayuwegdad rok faanem nib kireb’?

[Picture Credit Line on page 23]

Lydekker