Mang e Rayog ni Ngam Fil Rok e Bitir?

“GA BE ngongol ni bod reb e bitir!” Faanra yog be’ e pi thin nem ngodad ma sana ra k’aring e damumuw ngodad. Yugu aram rogon ni yad ba t’uf rodad, ma piin bitir e rib gagiyel ni de yoor ban’en ni yad manang, ma dariy e gonop rorad.​—Job 12:12.

Yugu aram rogon, ma immoy ba ngiyal’ ni yog Jesus ngak pi gachalpen ni gaar: “Mu ted fanmed i yan ko re bugithin ni baara’: Faanra dab mpiggad ngam boded e bitir, ma ri dabiyog ni ngam uned ko gagiyeg nu tharmiy.” (Matthew 18:3) Mang e be yip’ Jesus fan ko re n’ey? Mang boch e fel’ngin ni bay ko piin ni bitir ni thingari folwok e piin piilal riy?

Ngan Maruweliy e Sobut’an’ ni Bod e Bitir

Am lemnag e n’en ni buch ni ir e k’aring Jesus nge non ni aray rogon. Taw Jesus nga Kapernaum ni ke milekag nib n’uw yang, me fith ngak pi gachalpen ni gaar: “Mang e um tugthinniged u kanawo’?” Me par fapi gachalpen ni de rogned ban’en, ya ur tugthinniged u kanawo’ e arorad ni ir e th’abi tolang u fithik’rad. Tomur riy, e yog rorad ni ngar fithed Jesus nra gaargad: “Mini’ e en th’abi tolang ko gagiyeg nu tharmiy?”​—Mark 9:33, 34; Matthew 18:1.

Yira gin ngay ni ke chugur i dalip e duw ni ke un pi gachalpen Jesus ngak ma ka yad be chamnag ko mini’ e en nib tolang rorad. Machane, ni chuguliyrad ni yad bang ko teliw rok piyu Jew, ma re n’ey e ban’en nrib ga’ fan u wan’ e girdi’ ko re teliw nem. Rib gagiyel ni, ngongol ko re teliw nem nra bad riy, ni kub muun ngay ni der flontgad, e rin’ ban’en ko lem rok pi gachalpen.

Par Jesus nga but’ me pining pi gachalpen ngar bad ngak me gaar ngorad: “Aromed ni ba adag ni nge mang ir e m’on e thingari ta’ ir ni ir e ba tomur u fithik’med, me mang ir e tapigpig romed ni gimed gubin.” (Mark 9:35) Rib mudugil nra gin gad ko pi thin nem. N’en ni yog Jesus e rib thil ko n’en ni ma lemnag piyu Jew u murung’agen e cha’ nib tolang! Ere pining Jesus bochi tir nge yib ngak. I tamilangnag Jesus e n’en ni be yip’ fan u daken e t’ufeg ni dag ngak fa chi tir me gaar: “Mu ted fanmed i yan ko re bugithin ni baara’: Faanra dab mpiggad ngam boded e bitir, ma ri dabiyog ni ngam uned ko gagiyeg nu tharmiy. En nra yan i par ni ir e th’abi tolang ko gagiyeg nu tharmiy e en nra sobut’nag ir nge bod e chi tir ney.”​—Matthew 18:3, 4.

Uw feni rib gonop e biney e fonow u murung’agen e sobut’an’! Ay gu mu lemnag e re n’ey. Ba ulung i pumoon ni yad ba gagang’ ni kar liyeged bochi tir, ri yad be fal’eg i yaliy. Ke par fachi tir ni kari rus! Mi ri par ni de togopuluw ara rin’ ban’en ngak fapi cha’ nib kireb! Me par ni be fol rorad! Arrogon, fachi tir e be dag e sobut’an’ ni bod rogon Got.

Rib tamilang e n’en ni be yip’ fan Jesus. Gad gubin ni thingar da maruweliyed nge yog nda daged e sobut’an’ ni faanra gad baadag ni ngad manged bang ko fare Gil’ilungun Got. Dariy gil’ e tolangan’ u tan e gagiyeg rok Jehovah. (Galatia 5:26) Tin nriyul’ riy, e ireray boch ban’en ni k’aring ni nge togopuluw Satan ngak Got ko som’on. Arfan nri ma fanenikay Jehovah e pi n’ey!​—Proverbs 8:13.

Tin nriyul’ e Kristiano e yad nameg ni ngar pigpiggad, gathi ngar gagiyeggad. Demtrug ko de tolang fare maruwel ara ba sobut’ e en ni gad be machibnag, ma bin nriyul’ e sobut’an’ e ra k’aringdad ni ngad machibniged boch e girdi’. Sobut’an’ ni aray rogon e ra yibnag e tow’ath nib fel’. I gaar Jesus: “En nra ayuweg reb e pi bitir ney ni bochag e ke ayuwegeg; ma en nra ayuwegeg e gathi ke mus ni gag e be ayuwegeg, ya ku be ayuweg e en ni ir e ke l’ugeg ku gub.” (Mark 9:37) Faan yira maruweliy ni ngan dag e ngongol u fithik’ e sobut’an’ ni bod rogon e piin bitir ma ra fal’eg thildad fa En nth’abi tolang u Palpalth’ib nge Fak. (John 17:20, 21; 1 Peter 5:5) Gad ra t’ar wom’engin ni felfelan’ ni faan gad ra pi’ ban’en. (Acts 20:35) Maku ra fel’ lanin’dad ya kad ayuweged ni ngki ga’ e gapas nge taareban’ u fithik’ e girdi’ rok Got.​—Efesus 4:1-3.

Rayog i Fil Ban’en Ngorad Ma Ba Pagan’rad

Ki tamilangnag Jesus reb e fonow u murung’agen e piin bitir ni ku rayog ni nge fil e piin piilal ban’en riy ni gaar: “En ndabi bodnag ir bochi tir nge pag ir nga pa’ Got nge mang Got e i gagiyegnag e dabiyog nra yan ko gin nsuwon Got.” (Mark 10:15) Piin bitir e gathi kemus ni yad ba sobut’an’; ya ku yad baadag ni ngan fil ban’en ngorad. I gaar reb e matin: “Yad ma fek e llowan’ ni bod rogon e ran ni ke wanum nga fithik’ bangi warrum.”

Ere, faanra gad baadag ni ngad manged bang ko fare Gil’ilungun Got, ma thingar da filed fare thin nib fel’ ni murung’agen Gil’ilungun Got maku gad fol riy. (1 Thessalonika 2:13) Thingar da boded e bitir ni ka fin nni gargeleg, ‘ni gubin ngiyal’ ma be yib lamen e milik ngodad ni milik nib machalbog ni fan nga lanin’dad, ya ra ud unumed ma [gadad] ra ilal ngad thapgad ngak Got.’ (1 Peter 2:2) Ere, uw rogon, ni faanra ba mo’maw’ ni ngan nang fan reb e machib u lan e Bible? I yog be’ ni ma maruwel u bang ni yima ayuweg e bitir riy ni gaar: “Piin bitir e yad ra fith ko ‘Mang fan?’ nge taw nga nap’an ni ke fel’ u wan’rad e fulweg ni kan pi’ ko deer rorad.” Gad ba llowan’ ni faanra da folwokgad rorad. Ere mu ul’ul ko fol Bible. Mu non ngak e piin Kristiano ni kar ilalgad ko tirok Got ban’en. Mu ning e gonop ngak Jehovah. (James 1:5) Dariy e maruwar, ni ra fulweg taban e meybil rom ko ngiyal’ nib puluw.​—Matthew 7:7-11.

Machane boch e girdi’ e ra fith ni ra gaar, ‘Gathi piin ni rayog i fil ban’en ngorad e ba mom i bannagrad?’ Danga’ ni faanra bay ban’en ni be pow’iyrad nrayog ni nge pagan’rad ngay. Ni bod ni, piin bitir e gubin ngiyal’ ni yad ma sap ko gallabthir rorad ni ngan pow’iyrad. I yog reb e matam ni gaar: “Riyul’ nrayog ni nge pagan’ e piin bitir ko gallabthir rorad ya yad ma ayuweg e tabinaw rorad ni gubin e rran.” Ere riyul’ ni ku bay fan ni nge pagan’dad ngak e Chitamangidad ni bay u tharmiy, ni aram Jehovah. (James 1:17; 1 John 4:9, 10) Gubin ngiyal’ ni ma pi’ Jehovah e fonow nib fel’ ngodad u daken e Thin rok. Kan ni thothup rok nge ulung rok e ma fal’eg lanin’dad ma ma ayuwegdad. (Matthew 24:45-47; John 14:26) Ra da fanayed e pi n’em nib fel’ rogon ma ra ayuwegdad ni nge dabi kirebnagdad ban’en ko tirok Got.​—Psalm 91:1-16.

Ngan maruweliy e pagan’ ku Got ni bod rogon e piin bitir e ku ra pi’ e gapas laniyan’ ngodad. Be’ nib llowan’ ni ma fil murung’agen e Bible e gaar: “Nap’an ni ka gad bitir ma kad uned nga reb e milekag ni dad pied puluwon, maku dada nanged rogon ma gad taw ko gin gad be sor ngay, machane, de maruwaran’dad ni gallabthir rodad e rayog ni ngar feked gadad i yan ko gin ni gad be sor ngay.” Taareb rogon e pagan’ rodad ngak Jehovah u nap’an ni gad be milekag u lan e yafas rodad?​—Isaiah 41:10.

Pagan’ rodad ku Got e ma ayuwegdad ni ngad siyeged e ngongol nrayog ni nge kirebnag e tirok Got ni bay rodad. Ya, ba mich u wan’dad ni fapi thin ni yog Jesus ni manang e Chitamangidad nu tharmiy e tin ni kad rin’ed ma n’en nib ga’ fan e ngad mon’eged Gil’ilungun Got nge tin nib m’agan’ ngay, ma ra runguydad. Re n’ey e ra ayuwegdad ni ngad togopuluwgad ko pi n’en ni ra waliydad ko magafan’ ko chugum mad paged e tin nib mil fan ngodad ni fan ko tirok Got ban’en.​—Matthew 6:19-34.

‘Piin ni Dar Nanged Rogon i Ngongliy e Kireb’

Yugu aram rogon nni gargelegrad ni dar flontgad, ma piin bitir e ba machalbog gum’ircharad nge lanin’rad. Bochan e re n’ey, ma erfan ni be ginang e Bible e pi Kristiano ni gaar: “Ngam boded e piin bitir ndar nanged rogon i ngongliy e kireb.”​—1 Korinth 14:20.

Am lemnag e n’en ni yog Monique ni lal e duw rok ngak e chitiningin. I gaar: “Sarah, ni fager rog nib beech e kub m’ing m’ing piyan lolugen ni bod gag!” De weliy murung’agen raen dow nge gin ni be’ Sarah riy. Reb e gallabthir e gaar: “Bitir ni kab achig e dariy rogon ramaen ban’en u wan’rad. Dariy ban’en ni yad manang u murung’agen ramaen dow e girdi’.” Bochan e re n’ey, ma rib manigil rogon ni be dag e piin bitir e lem rok e Got rodad ni de laniyan’, mab t’uf rok e girdi’ u gubin e nam.​—Acts 10:34, 35.

Piin bitir e ku rayog rorad ni ngar n’aged fan ban’en u wun’rad. Reb e gallabthir e gaar: “Faanra cham Jack nge Levi ni fakmow, ma nap’an ni gamow ra yog ngorow ni ngar weniggow ngorow, ma nap’an nra taaboch ni gu sapgow ma yow be fafel ni bod ndariy ban’en ni ke buch. Darur lemnagew ara ra weliy bayay e n’en ni buch, ara rognew boch ban’en nthingari rin’ bagayow u m’on ni nge n’ag bagayow fan e kireb rok bagayow. Kemus ni nge fel’ bayay e thin rorow mi yow tabab bayay ko fafel.” Ireray ban’en nib fel’ ni nge folwok e piin piilal riy!​—Kolose 3:13.

N’en ni kub muun ngay, e piin bitir e ba mom ni nge riyul’ u wan’rad ni bay Got. (Hebrews 11:6) Yul’yul’ rorad e ir e ma k’aringrad ni ngar machibnaged e girdi’ ndab ra rusgad. (2 Kings 5:2, 3) Thin nib mom ni yib u gum’ircharad ni yad ma yog ko meybil rorad e rayog ni nge bit ngak e girdi’ ni yad ba gelan’. Ma nap’an ni yira wawliyrad, ma rayog ni ngar daged gelngirad ko ngongol nib fel’. Riyul’ ni piin bitir e yad e tow’ath nib tolang puluwon!​—Psalm 127:3, 4.

Ke Sul Gubin Ban’en Nga Rogon

Sana ga ra lemnag ko, ‘Rayog rok e piin piilal ni ngar lemnaged e pi fel’ngin ni immoy rorad u nap’an ni ka yad ba achig fa?’ Fulweg nib mom mab mudugil e arrogon! Riyul’ ni fare n’en ni motochiyelnag Jesus ni ‘ngad boded e bitir’ e be micheg ni rayog e re n’ey.​—Matthew 18:3.

Ngan dag rogon: Bogi girdi’ ni maruwel rorad e ngar fulweged ban’en nga rogon rayog ni ngar maruweliyed ni ngar fulweged bangi sasing nib tolang puluwon nga rogon. Nap’an ni yad be ngongliy e gi sasing nem, ma yad ra chuweg e fiyath riy nge boch ban’en ni ke kirebnag yaan. Tomuren e athamgil ni kar ted u fithik’ e gum’an’, ma fa gi sasing e ra sul bayay nga ki bod yaan aram ko som’on nrib fel’ yaan. Taareb rogon, ni faan gad ra ul’ul ko athamgil ni gad be tay, ma ayuw ko kan ni thothup rok Jehovah, nge ayuw ni ma pi e ulung ko Kristiano, e rayog ni nge k’aringdad ngad daged fapi fel’ngin nib fel’ ni ud daged u nap’an ni ka gad bitir.​—Efesus 5:1.

[Picture on page 5]

Piin bitir e ka rogorad ni yad ba sobut’an’

[Picture on page 4]

Piin bitir e der ma laniyan’, mab papey ni ngar n’aged fan ban’en ni dubrad u wan’rad mi yad pagtalin