Ngan Fal’eg Rogoy ni Fan ko fare Puguran u Fithik’ e Felfelan’
1. Nap’an nra chugur fare Puguran ngu tomuren, ma mang e n’en nrib ga’ fan ni ngad rin’ed?
1 Fare Puguran ni yira tay ko rofen ni L’agruw Fen e Maruwel, ko March 26, e ra bing e kanawo’ ni ngad felfelan’gad ni bochan e n’en ni rin’ Got ni nge ayuwegdad. (Isa. 61:10) Yugu aram rogon ndawori taw ko re madnom nem, ma rayog ni ngad fal’eged rogodad nib fel’ rogon nfaanra gad be par ni gad ba felfelan’. Ni uw rogon?
2. Mang e ma k’aringdad ni ngad fal’eged rogodad ni fan ko fare Puguran?
2 Ngan Fal’eg Rogoy ni Fan ko fare Madnom: Fare Abich ni Blayal’ rok Somol e rib ga’ fan, ma kub mom ni ngan madnomnag. Yugu aram rogon, mab t’uf ni ngan fal’eg i lemnag e pi n’en ni ngan rin’ u m’on riy ya nge dariy ban’en ni yira pag talin. (Prov. 21:5) Thingar ni mel’eg e tayim nge gin’en ni yira tay e re madnom ney riy. Mab t’uf ni nge yag fare wain nge flowa ni ngan fanay ngay. Maku thingar ni klinnag e gin’en ni yira tay e re madnom ney riy, min fal’eg rogon e tin nib t’uf. Faen nra pi’ e welthin e ba t’uf ni nge fal’eg rogon e welthin rok, ma kub t’uf ni ngan yarmiy e pi walag ni yad ra pi’ fare flowa nge wain nge piin ni yad ra ayuweg e girdi’ nra yib. Dariy e maruwar riy ni boor ko pi n’ey e kan mu’ i yarmiy. Bochan ni gadad ba felfelan’ ko fare biyul ni kan pi’ ni fan ngodad, ma re n’ey e ra k’aringdad ni ngad fal’eged rogodad ni fan ko re madnom ney.—1 Pet. 1:8, 9.
3. Uw rogon ni ngad fal’eged rogon lanin’dad ni fan ko fare Abich ni Blayal’ rok Somol?
3 Ngan Fal’eg Rogon Lanin’uy: Maku rib ga’ fan ni ngad fal’eged rogon lanin’dad ni nge yag ni ngad nanged fan fare Puguran. (Ezra 7:10) Ere, thingar da ted e tayim ni ngad beeged e thin nu Bible ni kan yarmiy ni ngan beeg u m’on nge u tomuren fare Puguran. Ma ngad fal’eged i lemnag e pi rran ni be chugur i yan ni nge yim’ Jesus. Ma ngad fal’eged i lemnag rogon ni i pag Jesus fan ir ma ra k’aringdad ni ngad folwokgad rok.—Gal. 2:20.
4. Mang angin fare biyul e ke yibnag e felfelan’ ngom nib gel?
4 Yam’ ni tay Kristus e ke tamilangnag mat’awun Jehovah ni nge gagiyeg. Miki ayuwegdad ni nge dab kud pared ni gadad e sib ko denen nge yam’. (1 John 2:2) Ma ke bing e kanawo’ ngodad ni nge fel’ e tha’ u thildad Got, ma nge yag ngodad e yafas ni manemus. (Kol. 1:21, 22) Maku ra ayuwegdad ni nge mudugil lanin’dad ni ngad lebuguyed e n’en ni kad micheged ngak Jehovah u nap’an ni kad ognaged gadad ngak, ma gad par ni gadad pi gachalpen Kristus. (Matt. 16:24) Nap’an ni ga ra fal’eg rogom, mag un ko fare madnom ko Puguran, ma dabisiy nra gel e felfelan’ rom i yan!