Mang fare Thin nib Fel’?

1. Mang fare thin nib fel’ ni yib rok Got?

Baadag Got ni nge par gubin e girdi’ u fayleng ni yad ba felfelan’. Ke sunmiy e fayleng nge gubin ban’en ni bay riy ni bochan e ba t’uf e girdi’ rok. Dabki n’uw nap’an me rin’ boch ban’en nib fel’ ni fan ngak urngin e girdi’ u ga’ngin yang e fayleng. Ra chuweg e pi n’en ni ma k’aring e gafgow ko girdi’.​—Mu beeg e Jeremiah 29:11.

Dariy reb e am ni ke yog rok ni nge taleg e cham, fa chuweg e m’ar, ara yam’. Machane, bay e athap rodad. Dabki n’uw nap’an me chuweg Got e am ko girdi’ me mang birok e am e par ni be gagiyeg. Girdi’ u tan e re am nem e yad ra par u fithik’ e gapas mab fel’ fithik’ i dowrad.​—Mu beeg e Isaiah 25:8; 33:24; Daniel 2:44.

2. Mang nib ga’ fan fare thin nib fel’?

Fin ngiyal’ nra chuweg Got e girdi’ ni kireb u fayleng e ra mus e gafgow. (Zefaniah 2:3) Mingiyal’ e ra buch e re n’ey? Thin rok Got e ke yiiynag e pi n’en ni be buch e ngiyal’ ney ni be gafgownag e girdi’. Pi n’ey ni be buch e be micheg ni ke chugur ni nge thang Got e piin nib kireb.​—Mu beeg e 2 Timothy 3:1-5.

3. Mang e thingar da rin’ed?

Thingar da filed murung’agen Got ko Thin rok u Bible. Bible e bod bangi babyor ni yoloy reb e matam ngak pi fak. Ra ayuwegdad ngad nanged rogon ni ngad pirieged e felfelan’ e ngiyal’ ney nge rogon ni nge yog e yafas ni manemus ngodad u fayleng boch nga m’on. Riyul’ ni sana bay boch e girdi’ ni dubrad ni yibe ayuwegem ni ngam nang fan e thin nu Bible. Machane, bochan ni baadag Got ni nge yog e bin nib fel’ e yafas ngodad, ma thingar dab da paged boch e girdi’ ngar taleged gadad ko fol Bible.​—Mu beeg e Proverbs 29:25; Revelation 14:6, 7