Ngad Mon’oggad ko Machib—Nga Nog ara Ngan Fith Ban’en ni Yira Weliy ko Yay ni Migid ni Kan Sul ngak Be’

Fan nib Ga’ Fan: Nap’an ni gad ra mada’nag be’ ni baadag e machib, ma gad baadag ni ngad sulod ngak ko ngiyal’ ni bay u tafen ya nge yag nda rannaged awochngin e tin riyul’ ni kad yunged. (1 Kor. 3:6) Ere, faanra ngad sulod ngak be’ mab ga’ ni u m’on ni ngad chuwgad ma gad ma fith ngak ko wuin e rayog ni ngkud sulod bayay. Ma kub fel’ ni ngad fithed reb e deer ngak ni gad ra weliy ko yay ni migid ni gad ra sul. Re n’ey e ra k’aring facha’ ni nga i lemnag e rofen ni ka gad ra sul ni ngad guyed, ma faanra bay e fulweg ko fare deer ni kad fithed ngak u lan fare ke babyor ni kad pied ngak, ma dabisiy nra beeg u m’on riy. Maku reb, e faan gad ra yog ara da fithed ban’en ngak be’ ni ir e gad ra weliy ko yay ni migid ni gad ra sul ngak, ma ra mom ngodad ni ngkud sulod ngad guyed facha’ ni bochan e gad manang ko mang e gad ra weliy ko yay ni migid, maku arrogon facha’ ni ku manang ko mang e yira weliy. Ma ra yay ni migid ni gad ra sul ngak, ma rayog ni nga dogned ngak ni kad sulod ni ngad weliyed e fulweg ko fare deer ni kad fithed ngak ko yay nsom’on ni kad nonad.

Rogon ni Ngan Rin’:

Nap’an ni ga be fal’eg rogon e n’en ni nga mog u nap’an e machib, mu kum lemnag reb e deer ni ir e ga ra fith ngak u m’on ni ngam mu’gow ko non. Rayog ni ngam fith reb e deer nib puluw ko n’en ni bay ko babyor ni kam pi’ ngak, ara reb e deer ni bay u ba ken fapi babyor ni gad ma fil ko girdi’. Ma nap’an ni ga ra sul ko yay ni migid, mi gimew weliy.
U m’on ni ngam mu’gow facha’ ko non, ma gog ngak ni ga baadag ni ngkum man mu guy bayay ma ga fith fare deer ngak ni kam fal’eg rogon. Bay yu yang ni yima machib riy ni boor pa’ u puluwon e girdi’ riy ma sana rayog ni gathi ri yad baadag ni ngam dugliyew e rofen ni ngkum man mu guy bayay. Faanra aray rogon, ma rayog ni nge lungum ngak: “Ra biney e tayim ma ga bay u tabinaw? [Mmotoyil ko n’en nra yog.] Gu baadag ni nge binem e wik mu kug tal rom ngad weliyew e fulweg ko re deer ni baaray . . . Faanra gub ma bay ban’en ni ga be rin’, ma gog ngog.”
Faanra ka mog e ngiyal’ ni kag ra sul ni ngam guy facha’, ma ga sul ko ngiyal’ ni ka mog. (Matt. 5:37) U m’on ni ngam mu’gow ko non ko yay ni migid ni kam man mu guy, mu ku mog ara mu fith ban’en ni gimew ra weliy ko yay ni migid ni ga ra sul.

Mu Gay Rogon ni Ngam Rin’ e Re N’ey u Lan e Re Pul Ney:

Nap’an ni ga be lemnag e n’en ni nga mog u nap’an e machib, ma ga fal’eg rogon reb e deer ni ngam fith ngak be’ ni gimew ra weliy e fulweg riy ko yay ni migid ni ga ra sul ngak. Mog ngak e en ni gimew be machib u taabang ko mang deer e ga ra fith ngak facha’.