Rayog ni Ngan Faseg e Piin ni Kar M’ad ni Bochan fare Biyul ni Kan Pi’

Fare madnom ko Puguran ko yam’ ni tay Jesus e rayog ni nge ayuwegdad ni ngad fal’eged i lemnag e pi tow’ath ni bod fare athap ni fan ko piin ni kar m’ad nrayog ngodad boch nga m’on ni bochan fare biyul. Nap’an ni sunmiy Jehovah e girdi’ ma de lemnag ni ngar m’ad. Aram fan nrib gel e kireban’ ni gad ma tay u nap’an nra yim’ be’ nib t’uf rodad. (1Ko 15:26) Ke kireban’ Jesus u nap’an ni ke guy pi gachalpen ni yad be yornag Lazarus ni ke yim’. (Joh 11:33-35) Kireban’ ni tay Jesus e be dag rarogon e Chitamangin, ere rayog ni nge mudugil u wan’dad ni Jehovah e ku ma kireban’ u nap’an nra guy ni ke kireban’dad ni bochan ni ke yim’ be’ nib t’uf rodad. (Joh 14:7) Be yim’ Jehovah ni bochan e be athapeg e ngiyal’ nra faseg e pi tapigpig rok ni kar m’ad, ma susun ni ngki taareb rogon e lem rodad.​—Job 14:14, 15.

Jehovah e ir reb e Got nib yaram, ere nge pagan’dad ngay nib yaram rogon nra faseg e piin ni kar m’ad. (1Ko 14:33, 40) Ra boch nga m’on ma dakuriy e gum’eyag ya gad ra felfelan’ ni ngad mada’naged e piin ni kar m’ad. Ere gur, ga ma fal’eg i lemnag murung’agen e ngiyal’ ni yira faseg e yam’ nib ga’ nnap’an nra yim’ be’ nib t’uf rom, fa? (2Ko 4:17, 18) Ga ma pining e magar ngak Jehovah ni ke pi’ fare biyul ni fan ngodad ma ki tamilangnag ko thin rok u lan e Bible ni ku yira faseg e piin ni kar m’ad, fa?​—Kol 3:15.

• Chon mini’ ko pi tafager rom nge girdi’ rom e ri ga baadag ni ngkum mada’gad bayay?

• Chon mini’ e bay murung’agrad u Bible nri ga baadag ni ngam mada’nagrad boch nga m’on mag non ngorad?