Pi Reference ni Fan ko fare Babyor ni Pi N’en ni Ma Rin’ e Piin Kristiano nge Machib ni Yad Ma Tay
February 6-12
BOCH E THIN NIB GA’ FAN KO THIN ROK GOT | ISAIAH 47-51
“Faan Gad Ra Fol rok Jehovah Ma Ra Yib Angin Ngodad”
ip-2-E 131 ¶18
Ma Skulnagdad Jehovah Ya Nge Yib Angin ko Yafos Rodad
“Faan Gomanga Gimed Ra Motoyil ko Pi Motochiyel Rog!”
18 Nap’an ni pi’ Jehovah gelngin Isaiah ni profet me tabab ni nge weliy e yiiy rok ni gaar: “Fare Got nib thothup nu Israel, fare Somol ni ayuwegmed e gaar: ‘I Gag Somol ni Got romed, faen baadag ni nge fil ngomed e tin nib fel’ me pow’iymed ko fare kanawo’ ni ngam marod riy.’” (Isaiah 48:16b, 17, BT) Re thin rok Jehovah ney e susun nra pi’ e pagan’ ngak piyu Israel nriyul’ ni ma lemnagrad Got ma ra chuwegrad u Babylon ni bochan ni ir e Ta Biyul rorad. (Isaiah 54:5) N’en nri baadag Jehovah e nge gay piyu Israel rogon ni nge fel’ e tha’ u thilrad bayay ma ngar folgad ko pi motochiyel rok. Ya bin riyul’ e liyor e be tor nga daken e fol ni yad ra tay. Dabiyog rok piyu Israel ni ngar mat’awgad u p’eowchen Got ni faanra dabi fil Got ngorad e ‘kanawo’ ni nga ranod riy.’
ip-2-E 131 ¶19
Ma Skulnagdad Jehovah Ya Nge Yib Angin ko Yafos Rodad
19 Baadag Jehovah ni nge fel’ rogon e par ko girdi’ rok ni faanra yad ra siyeg e pi n’en nrayog ni nge magawonnagrad. Be gaar e Bible: “Faan gomanga gimed ra motoyil ko pi motochiyel rog, ma gapas romed e ra bod lul’, ma tin nib mat’aw nra um rin’ed e ra bod e n’ew u maday.” (Isaiah 48:18, NW) Re thin ney ni ke yog faen Tasunmiy e ke yog ni bochan ni gadad ba t’uf rok. (Deuteronomy 5:29; Psalm 81:13) Rayog ni nge par piyu Israel u fithik’ e gapas ni gubin ngiyal’ ni bod rogon ba pa’ i lul’ nder melik’ ko bin ni ngan fekrad ngar manged kalbus. (Psalm 119:165) Ma rogon e pi n’en ni yad be rin’ nib mat’aw e ra bod urngin e n’ew u maday. (Amos 5:24) Riyul’ ni ma lemnag Jehovah piyu Israel ma ma dag ngorad e kanawo’ ni nga ranod riy u fithik’ e t’ufeg. Manga yugu ra folgad ko pi motochiyel rok!
ip-2-E 132 ¶20-21
Ma Skulnagdad Jehovah Ya Nge Yib Angin ko Yafos Rodad
20 Mang boch e tow’ath nra yag ngak piyu Israel ni faan yad ra kalngan’? Ke yog Jehovah ni gaar: “Piin owchemed e yad ra bod urngin e yan’, ma ra gu micheg ni dariy e ngiyal’ ni ngan thang owcherad.” (Isaiah 48:19, BT) Re thin ney ni yog Jehovah ko girdi’ rok e ku be puguran ngorad murung’agen fare thin ni ke micheg ngak Abraham nra yoornag e piin owchen ni bod urngin e “t’uf u lan e lang ara urngin e yan’ ni bay u dap’e l’ay.” (Genesis 22:17; 32:12) Machane, ke togopuluw e piin owchen Abraham ngak Jehovah, ere dariy mat’awrad ni nge yag fare tow’ath ni ke micheg Jehovah nra pi’ ngorad. Bin riyul’ riy e, rib gel e kireb ni ur rin’ed nib togopuluw ko fare Motochiyel rok Jehovah, ere susun ni ngan thang owcherad. (Deuteronomy 28:45) Machane, dabun Jehovah ni nge thang owchen e girdi’ rok, ara nge n’agrad.
21 Bay rogon e re kenggin e motochiyel ney ngak e piin yad ma pigpig ngak Jehovah e ngiyal’ ney. Jehovah e ir Enggin gubin e yafas, ma ir e manang rogon nthingar da fanayed e yafas rodad. (Psalm 36:9) Ke pi’ e motochiyel rok nrayog ni nge yib angin ngodad, ma gathi nge talegdad ko pi n’en nrayog ni ngad felfelan’gad ngay. Ere, ba m’agan’ e tin riyul’ e Kristiano ngay ni nge skulnagrad Jehovah. (Mikah 4:2) Pi motochiyel rok e ma ayuwegdad ko tirok Got ban’en, nge tha’ u thildad Jehovah, maku ma yororiydad ko pi ban rok Satan. Nap’an nra fel’ u wan’dad e pi kenggin e motochiyel rok Got, ma aram e gad ra nang ni ma skulnagdad Jehovah ya nge yib angin ngodad. Ma aram e nge tamilang u wan’dad ni pi motochiyel rok Jehovah ni ke yog ni “ngad rin’ed e gathi rib mo’maw’.” Ma faan gad ra fol riy ma rayog ni ngad mageygad ni gadad ba fos ndariy n’umngin nap’an.—1 John 2:17; 5:3.
Ngan Fal’eg i Gay Boch Ban’en nib Ga’ Fan ko Thin rok Got
Tin nib Ga’ Fan ko Babyor rok Isaiah—II
49:6—Uw rogon ni ke mang fare Messiah “ba magal ngak e pi nam” ni yugu aram rogon ni kemus ni pi fak yu Israel e ke machibnagrad? I buch e re n’ey u tomuren ni ke yim’ Jesus. Fare thin ni bay ko Isaiah 49:6 e be weliy murung’agen pi gachalpen Jesus. (Acts 13:46, 47) Ngiyal’ ney be ayuweg fare ulung nib ga’ e pi Kristiano ni kan dugliyrad ni ngar manged “ba magal ngak e pi nam,” ni aram e yad be pi’ e tamilangan’ ngak gubin e girdi’ “u fayleng ni ga’ngin.”—Matthew 24:14; 28:19, 20.
it-1-E 643 ¶4-5
Nge Dar e Mabgol
Kan Fanathinnag e Mabgol ni Ke Dar. Bay boch e thin nu Bible ni be fanathinnag murung’agen e mabgol. (Isa 54:1, 5, 6; 62:1-6) Ku be fanathinnag e Bible murung’agen e mabgol ni ke dar nge ngiyal’ nra yog reb e figirngiy ngak leengin ni nge chuw.—Jer 3:8.
Nap’an e duw ni 607 B.C.E., ma aram e ngiyal’ ni kan gel ngak fare nam nu Judah min gothey fare mach nu Jerusalem. Ma aram min fek e girdi’ riy nga Babylon ni yad ba kalbus. Boch e duw u m’on riy me yiiynag Jehovah e n’en nra buch rok piyu Jew ni gaar: “Gimed be finey ma gu n’agmed e girdi’ rog ni bod be’ ni n’ag leengin? Ere ba uw babyoren e machuw?” (Isa 50:1) Ba puluw fan ni ke n’ag Jehovah fare nam nu Israel ni ke mang “leengin.” Fan ni ke n’agrad e bochan ni dakur folgad ko pi n’en ni bay ko fare m’ag ko Motochiyel ni ke ngongliy u thilrad ma gathi bochan ni ke kirebnag Jehovah ban’en ko re m’ag nem. Yugu aram rogon ma bay boch piyu Israel ni kar kalgadngan’rad ma aram e ra weniggad ngak Jehovah u daken e meybil ni ngki fel’ e tha’ u thilrad bayay. Ere, nap’an ni ke gaman 70 e duw u tomuren ni kan kalbusnagrad me sulweg Jehovah e girdi’ rok ko nam rorad ko duw ni 537 B.C.E. Ma re n’ey ni ke buch e ba puluw ko n’en ni ke micheg maku bay rogon nga fithingan ni ngan thothupnag.—Ps 137:1-9; mu guy fare thin ni MARRIAGE.
February 13-19
BOCH E THIN NIB GA’ FAN KO THIN ROK GOT | ISAIAH 52-57
“Ke Gafgow Kristus ni Bochdad”
Tapigpig rok Jehovah e Kan “Maad’ad Ngak ni Bochan e Denen Rodad”
Kan ‘Dariyfannag’ ma Kan ‘Dabuy’
3 Mu beeg e Isaiah 53:3. Mu lemnag e n’en ke buch rok fak Got ni kari maagirag rok ni digey e felfelan’ rok ni ma pigpig ku Chitamangin ngeb nga fayleng. Keb ni nge pi’ e yafas rok ni maligach nge chuweg e girdi’ ko denen nge yam’! (Fil. 2:5-8) Maligach rok Jesus e riyul’ nra n’ag fan e denen ko girdi’, ya fare maligach ni gamanman ni un pi’ u nap’an Moses e kemus ni be dag yaan e re n’ey. (Heb. 10:1-4) Susun e ngan felfelan’ ni keb min tay fan, ni ba ga’ ni piyu Jew ya yad e ur sonnaged Kristus ni kan micheg nra yib. (John 6:14) Ma n’en ni rin’ e “dabuy” piyu Jew mar “dariyfannaged” ni bod ni ke yiiynag Isaiah. I yoloy apostal John ni gaar; “I yib ko nam rok, machane pi girdien e ra dabuyed ni ke yib ngorad.” (John 1:11) I gaar apostal Peter ngak piyu Jew: “Fare Got , . . . ni ir e Got rok e pi chitamangidad e ke ta’ fan e tapigpig rok i Jesus. Gimed e mpied nga pa’ e piin ni yad be yog e thin, mi gimed yog u p’eowchen Pilate ni dabumed Jesus, ni mus ko fa ngiyal’ nem ni dugliy Pilate ni nge pag Jesus. I ir e be’ nib thothup ma ba fel’, machane mogned ndabumed.”—Acts 3:13, 14.
4 Ki yiiynag Isaiah ni Jesus e ku ra nang e “gafgow” ko m’ar ni ma yib ngak e girdi’. Nap’an e machib ni i tay mab mudugil ni i magar yu ngiyal’ machane dariy murung’agen ni gafgow ko m’ar. (John 4:6) Ma i guy e m’ar ni ma yib ngak e girdi’ ni i machibnag, miri kireban’ ngorad me golnagrad. (Mark 1:32-34) Ere ke lebguy Jesus fare yiiy ni gaar: “Me athamgiliy fare gafgow ni susun e gadad e nge aw ngodad, nge amith ni susun e gadad e ngad pired nga fithik’.”—Isa. 53:4a; Matt. 8:16, 17.
Bod “Ba Gechig ni Got e Ke Pi’ Ngak”
5 Mu beeg e Isaiah 53:4b. Boor e girdi’ ko ngiyal’ ni immoy Jesus riy ni dar nanged ko mang fan e gafgow nge yam’ ni tay. I mich u wan’rad ni Got e ke gechignag ni bod ni ke pi’ ba m’ar ngak nib gel e kireb riy. (Matt. 27:38-44) Me yog piyu Jew ni Jesus e be n’ag fan Got. (Mark 14:61-64; John 10:33) Me Jesus e gathi be’ nib tadenen ara be’ ni ma n’ag fan Got. Ra lemnag ni be yog e girdi’ ni ngan li’ ngem’ ni bochan ni be n’ag fan Got, ma ri be kireban’ nib gel ni bochan e rib t’uf e Chitamangin rok. Yugu aram rogon, ma ri baadag ni nge rin’ e tin nib m’agan’ Jehovah ngay.—Matt. 26:39.
Tapigpig rok Jehovah e Kan “Maad’ad Ngak ni Bochan e Denen Rodad”
“Bod Ba Pi Fak e Saf ni Yibe N’en ni Ngan Li’ Ngem’”
10 Mu beeg e Isaiah 53:7, 8. Nap’an ni guy John ni Tataufe Jesus ni be yib, me gaar: “Baaram fare Fak e Saf rok Got ni ir e nge chuweg e denen rok e girdi’ nu fayleng!” (John 1:29) Nap’an ni be yog John ni Jesus e bod ba fak e Saf ma sana be lemnag fare thin rok Isaiah ni gaar: “Bod ba pi fak e saf ni yibe n’en ni ngan li’ ngem’.” (Isa. 53:7) Ki yiiynag Isaiah ni gaar, “Pi’ ir ngan li’ ngem’.” (Isa. 53:12) Ba puluw e re n’ey, ya fare nep’ ni tababnag Jesus fare madnom ni puguran ko yam’ ni tay me fek e wain me pi’ ngak fa 11 i apostal rok nib yul’yul’ ni gaar: “Ereray rachaeg ni ir e bayi micheg e m’ag u thilin Got nge girdi’, ni rachaeg ni bay map’ nga but’ ni fan ngak boor e girdi’ ni fan e nge n’ag Got fan e denen.”—Matt. 26:28.
Tapigpig rok Jehovah e Kan “Maad’ad Ngak ni Bochan e Denen Rodad”
Fare Tapigpig e Ra Ayuwegrad ‘Ngar Manged Girdi’ nib Mat’aw’
13 Mu beeg e Isaiah 53:11. Yog Jehovah murung’agen fare Tapigpig rok ni Ke turguy ni gaar: “I ir e tapigpig rog nib mat’aw; . . . me ngongliyrad ngar manged girdieg ni yad ba mat’aw.” Urngin pi fak Adam e kan gargelegrad ni yad bogi tadenen ma arfan ni ke yog ngorad “puluwoy ni yam’.” (Rom. 5:12; 6:23) Ba t’uf ni ngki fel’ e tha’ u thilin Jehovah nge girdi’ ni tadenen. Guruy ni 53 ko yiiy rok Isaiah e rib fel’ rogon ni ke weliy murung’agen Jesus ni yib nga thilin Got nge girdi’ ni tadenen ni gaar: “Ni maad’ad ngak ni bochan e denen rodad, min toy ni bochan e kireb ni kad ngongliyed. Gechig ni gafgow riy e ke golnagdad, dumow ni aw ngak e fasegdad ko maad’ad nda tayed.”—Isa. 53:5.
Ngan Fal’eg i Gay Boch Ban’en nib Ga’ Fan ko Thin rok Got
w06-E 3/15 11 ¶2
Reb e “Fanathin” ni Bay Rogon Ngodad
Ere mini’ e en ni be yip’ fan Sarah ni ka nog ni ir fare “pin ni gathi ir e sib”? Ma mini’ e be yip’ fan Isak ni fak? Ke weliy Paul ni fare ‘pin ndawori gargelnag e bitir’ ni aram Sarah e be yip’ fan faen ni ke mang leengin Got ni aram e ulung rok Got u tharmiy. Re ppin ney e immoy ndariy e bitir rok ni bochan e u m’on ni yib Jesus nga fayleng ma dariy e “bitir” rok ni kan dugliyrad u daken gelngin Got nib thothup. (Galatia 4:27; Isaiah 54:1-6) Machane, nap’an e Pentekost ko duw ni 33 C.E., min dugliy boch e pumoon nge ppin u daken gelngin Got nib thothup ni ngar manged pi fak e re ppin ney. Pi cha’ney ni kan pofrad e kar manged bang ko ulung rok Got u tharmiy ma yad ra un ngak Jesus Kristus ni ngar manged boch e pilung u tan fa bin beech e m’ag ni ke ngongliy Got. (Roma 8:15-17) Apostal Paul ni ir bagayad e piin ni kan dugliyrad e yoloy ni gaar: “Bin ba’ u tharmiy e Jerusalem e gathi ir reb e sib, me ir e chitiningdad.”—Galatia 4:26.
Ngan Gelnag e Sobut’an’ nib Riyul’
En Th’abi Fel’ Rogon ni Ke Dag e Sobut’an’
3 Jehovah e rib ga’ ma rib tolang, machane “changar rok e ma yan u fayleng i yan ni fan ni nge dag gelngin ni fan ngak e girdi’ ni rib t’uf Got rorad.” (2 Kronicles 16:9, NW) Ma mang e ra rin’ u nap’an ni ra pirieg e pi tapigpig rok nib sobut’an’rad ni kari kireban’rad nbochan e skeng ni keb ngorad? U daken e kan ni thothup rok, ma gowa be par rorad “ni fan ni nge gelnag e piin nib sobut’an’rad ma nge gelnag e piin ni kari kireban’rad.” (Isaiah 57:15, NW) Ere, pi cha’nem ni kan gelnagrad e ke bung rogorad ni ngar ululgad ko pigpig ngak ni yad ba felfelan’. Kari dag Got nrib sobut’an’!
February 20-26
BOCH E THIN NIB GA’ FAN KO THIN ROK GOT | ISAIAH 58-62
“‘Nga Nog ni Ke Taw Nga Nap’an ni Nge Chuweg’ Jehovah e Girdi’ Rok u Pa’ e Toogor Rorad”
ip-2-E 322 ¶4
Ra Sum e Ngongol nib Mat’aw u Lan Yu Zion
“‘Ke Taw Nga Nap’an ni Nge Chuweg’ Jehovah e Girdi’ Rok u Pa’ e Toogor Rorad”
4 I yoloy Isaiah ni gaar: “Fare Kan ni Thothup rok Somol ni Got e ke sugnigeg. Somol e ke turguyeg ke l’ugeg ni nggu fek e thin nib fel’ i yan ngak e girdi’ ni gafgow, ni nggu fal’eg laniyan’ e piin ni ke kireban’rad, mu gog ngak e piin ni kan fekrad nga reb e nam ni kar kalbusgad, nge piin ni yad bay u kalbus ni bay ni pagrad.” (Isaiah 61:1) Mini’ e en ni kan l’og ni nge fek fare thin nib fel’ i yan? Dabisiy ni Isaiah e ir e som’on nni thagthagnag nga laniyan’ ni nge yoloy murung’agen e re thin nib fel’ ney ni fan ngak e piin ni kan kalbusnagrad u Babylon. Machane i tamilangnag Jesus ni ke lebug e re yiiy rok Isaiah ney u daken ma aram e bin th’abi ga’ i fan ni kan lebguy e re yiiy ney. (Luke 4:16-21) Ere, Jesus e ir e kan l’og ni nge weliy murung’agen fare thin nib fel’ ngak e piin nib sobut’an’rad ma kan dugliy u daken gelngin Got nib thothup u nap’an nni taufenag.—Matthew 3:16, 17.
ip-2-E 326-327 ¶13-15
Ra Sum e Ngongol nib Mat’aw u Lan Yu Zion
13 Nap’an e Pentekost ko duw ni 33 C.E., me tabab Got ni nge dugliy boch e Kristiano ni ngar manged bang ko fare nam nib beech ni ke ngongliy ni aram fare “Israel rok Got.” Pi girdi’ ney e kan taarebrogonnagrad nga boch e “gek’iy” nib gagang’ ni Got e yung ni yad ba mat’aw. (Galatia 6:16, NW) Ere ka nap’an e ngiyal’ i n’em ke mada’ ko chiney, ma yu ke “gek’iy” ney e ka gaman 144,000 urngirad, ma be yib wom’engirad nib manigil ni be pining e sorok ngak Jehovah Got. (Revelation 14:3) Nap’an e duw ni 1919 me ayuweg Jehovah e tin ka bay ko fare Israel rok Got ara fa yu ke “gek’iy” ni Got e yung ya nge yag ni ngkur pigpiggad ngak bayay. Aram e ngiyal’ ni pi’ Jehovah e tin nib t’uf rorad ko tirok Got ban’en ma angin ni yib riy e ke yag ni nge yoor boch e pi girdi’ ney ni kar manged ba loway nib sug ko gek’iy nib gagang’ ni ma yib wom’engirad nib fel’.—Isaiah 27:6.
14 Ke tamilangnag Isaiah e maruwel ni nge rin’ fa yu ke “gek’iy” u nap’an ni yog ni gaar: “Bay ra fulweged nga rogon fapi binaw ni ke n’uw nap’an ni i par ni ke puth e naun riy. Maku yira toy bayay e yungi n’en ni ke puth ko fare mach ni kan kirebnag ni ke n’uw nap’an.” (Isaiah 61:4, NW) Nap’an ni mang Cyrus e Pilung u Persia me yog ngak piyu Jew nrayog ni ngar sulod nga Jerusalem. Aram e ngiyal’ ni sul e pi Jew ni yad ba yul’yul’ ngar toyed fare mach nu Jerusalem nge tempel riy ni ke n’uw nap’an ni kan pag. Re maruwel ney ni ngan sulweg boch ban’en ni bay rogon ko n’en nib m’agan’ Got ngay e ku aram e n’en ni buch u nap’an e duw ni 33 C.E. nge 1919.
15 Nap’an e duw ni 33 C.E., ma rib gel e kireban’ ni tay pi gachalpen Jesus ni bochan e nni kol Jesus min pufthinnag me tomur riy min li’ nge yim’. (Matthew 26:31) Machane, tomuren ni kan faseg ko yam’ me m’ug ngorad ma aram e n’en ni thilyeg e lem rorad. Ma nap’an ni yib gelngin Got nib thothup nga dakenrad ma aram mar tababgad ni ngar machibnaged fare thin nib fel’ u fithik’ e pasig ni kar tababgad “u lan yu Jerusalem, ngu lan yu Judea ni polo’, ngu lan yu Samaria, nge yan i mada’ ko yungi n’en ni yan i mus e fayleng ngay.” (Acts 1:8) Ere ke yag rorad ni ngar sulweged e bin riyul’ e liyor nga rogon. Re n’ey e ku aram e n’en ni buch ko duw ni 1919 nge mada’ ko ngiyal’ ney u nap’an ni ayuweg Jesus Kristus e tin ni ke magey ko pi Kristiano ni kan dugliyrad ni ngar fal’eged bayay e yungi n’en “ni kan kirebnag ni ke n’uw nap’an.” Ba t’uf ni ngar rin’ed e re n’ey ni bochan e boor e chibog ni ke yan ndar yag ko pi tayugang’ ko pi yurba’ i teliw ni googsur ni ngar filed e tin riyul’ u murung’agen Jehovah ngak e girdi’ ya n’en ni yad be fil ngorad e bogi yalen ko girdi’ nge boch e machib nde puluw ko Bible. Ere ke gay e piin ni kan dugliyrad rogon ni ngar chuweged boch e machib nde puluw ni ke sum ko pi yurba’ i teliw ni googsur ya nge yag ni ngar sulweged e bin riyul’ e liyor nga rogon. Ma tomuren e re n’ey mar tababnaged fare maruwel ni machib ni yira rin’ u ga’ngin yang e fayleng.—Mark 13:10.
Piin ni “Milekag” e Ke Taareban’rad ko Bin Riyul’ e Liyor
5 Boch e girdi’ e yad be lemnag ko mang e be yip’ fan e Isaiah guruy ni 61, ni be weliy murung’agen e yiiy ni ke lebug u lan e ulung ko Kristiano. Thin ni bay ko verse 6 ko re guruy ney e be weliy murung’agen e “pi prist rok Somol.” Machane verse 5 e be weliy murung’agen “girdien yugu boch e nam” nra maruwelgad u taabang e “pi prist” nem. Ere mang e be yip’ fan e re n’ey?
6 Fapi “prist rok Somol” e yad e pi Kristiano ni kan dugliyrad ni yad ra “fos ko yay nsom’on nra ni faseg e girdi’ ko yam’” ma yad ra mang “pi prist rok Got nge Kristus, ma bay ra uned ngak ko gagiyeg u lan bbiyu’ e duw.” (Rev. 20:6) Maku bay boor e Kristiano nib yul’yul’ ni yad be athapeg ni ngar pared u roy u fayleng. Ma yad be maruwel u taabang e piin ni bay e athap rorad ni nga ranod nga tharmiy. Piin ni bay e athap rorad ni ngar pared u roy u fayleng e gathi yad bang ko “fare Israel rok Got,” machane u reb e kanawo’, maku yad bod e milekag. Yad ba felfelan’ ni ngar maruwelgad u taabang e piin ni “prist rok Somol,” ni gowa yad be ‘wolduguy e but’’ ma ‘yad be ayuweg e yungi woldug ni grapes.’ Yad be ayuweg e pi Kristiano ni kan dugliyrad ni ngar pininged e sorok ngak Got u daken e maruwel rorad ni yad be machibnag e thin riyul’ ngak e girdi’. Ere piin Kristiano ni kan dugliyrad nge “yugu boch e saf” e yad be fil e thin riyul’ ngak e girdi’, ma yad be ayuwegrad ni ngar folgad riy.—John 10:16.
Ngan Fal’eg i Gay Boch Ban’en nib Ga’ Fan ko Thin rok Got
Mu Ayuweg fare Paradis ni Be Yip’ Fan Ban’en ni Nge Yan i Par ni Kari Gamog u P’eowchen Got
14 Boor e piin ni ke n’uw nap’rad u lan e ulung rodad ni kar guyed rogon ni kan thilyeg boch ban’en ko ulung rok Jehovah u fayleng ya nge yag ni nge gamog u p’eowchen. Ur moyed ko ngiyal’ ni baaram nra reb e ulung ma bay be’ riy ni ka nog e congregation servant ngak, ma dariy e piin piilal, ma pi branch ofis e bay be’ riy ni ka nog e branch servant ngak, ma dariy e Branch Committee, ma tochuch rodad e immoy e president riy ara en ni yima yog e president ko Watch Tower Society ngak ni ir e ma yog e thin, ma dawori sum fare Ulung ni Ma Pow’iyey ko Pi Mich Rok Jehovah. Yugu aram rogon ni immoy boch e walag ni ur ayuweged e pi walag nem, machane ngiyal’ nem e kemus ni taabe’ e ir e ma yog e thin u lan e ulung, nge pi branch ofis, nge tochuch rodad. Tomuren e duw ni 1970, ma aram min yarmiy ni nge yan i par ni gathi kemus ni taabe’ e ir e nga i dugliy e n’en ni ngan rin’, ya nge yan i par nib ulung i walag ni pumoon ni yad boch e piilal u lan e ulung.
15 Ere gur, ke yib angin ngodad e pi n’ey ni kan thilyeg? Arrogon. Ni mang fan? Ya bochan ni pi n’ey ni kan thilyeg e ba puluw nga rogon ni be tamilang boch e thin nu Bible u wan’uy. Chiney e gathi yigoo taabe’ e ir e ma dugliy e n’en ni ngan rin’, ya bay e piin piilal ara pi pumoon ni ‘tow’ath’ ni ke pi’rad Jehovah ni yad ma ayuweg e ulung, ma gubin e girdi’ ni ma yib angin e ayuw ni yad ma pi’ ngorad.—Efe. 4:8, 11; Prov. 24:6.
16 A kum lemnag boch ban’en ni kan thilyeg u rogon yaan e pi babyor rodad ni yibe ngongliy, nge pi n’en ni bay riy, nge rogon ni yibe wereg ko girdi’. Ri gad ba felfelan’ ngay ni gad ma wereg e pi babyor ney u nap’an e machib nib puluw e thin riy nga rarogon e par ko girdi’, maku yira adag ni ngan beeg. A kum lemnag rogon ni gad be fanay e computer nge Internet ni ngad wereged fare thin nib fel’ riy ko girdi’. Bod ni fare website rodad ni ka nog e jw.org ngay e be yag ni nge ayuweg boor e girdi’. Ere, pi n’ey ni kan thilyeg u lan e ulung rodad e be dag nriyul’ nib t’uf e girdi’ rok Jehovah ma ri ma lemnagrad.
17 Ku gad ba felfelan’ ko n’en ni kan thilyeg u rogon e ngiyal’ ni gad ma tay e pi muulung rodad ni bochan e nge yib e tayim ni ngaud ted e Fol Bible ni Tabinaw ara fol Bible ni goo gadad. Ku gad ba felfelan’ nga boch ban’en ni kan thilyeg u rogon ni yima tay e pi assembly nge convention rodad. Ba da ke gubin e duw ni be mon’og e pi n’ey i yan! Maku gad ba felfelan’ nga rogon ni ku yibe mon’ognag rogon e skul ni yibe tay ngodad u daken boch e skul ni ke ngongliy e ulung rok Got ni gad ma un ngay. Gubin e pi n’ey ni be m’ug riy ni Jehovah e ir e be pow’iy e ulung rok ma ka be ulul i mon’ognag e re paradis ney ni be yip’ fan ban’en ya nge yag ni nge yan i par ni kari gamog u p’eowchen!
Tin nib Ga’ Fan ko Babyor rok Isaiah—II
Fulweg u Boch e Deer ko Bible:
61:8, 9, NW—Mang fare “m’ag” ni dabi m’ay, ma mini’ “pi fak”? Ireray fare m’ag nib beech ni ke ngongliy Jehovah u thilrad e pi Kristiano ni kan dugliyrad. Ku bay bokum milyon e girdi’ ni kar folgad ko fare thin nib fel’ ni yad bang ko fare ulung ni yima yog e “yugu boch e saf” ngorad ni yad “pi fak” Jehovah.—John 10:16.
February 27–March 5
BOCH E THIN NIB GA’ FAN KO THIN ROK GOT | ISAIAH 63-66
“Gad Ra Felfelan’ ko Par u Lan e Bin nib Beech Lan e Lang nge Bin nib Beech e Fayleng”
ip-2-E 383 ¶23
“Ngari Mfelfelan’gad Ndariy N’umngin Nap’an ko Pi N’en ni Gag e Bay Gu Sunumiy”
23 Be weliy fare babyor ni Revelation murung’agen e n’en ni guy apostal John u nap’an nni pilyeg e changar rok nge guy e n’en nra buch u nap’an fare rran rok Jehovah. Ireray e ngiyal’ nra chuweg Jehovah e re m’ag nib kireb ney. Tomuren nra m’ay e pi n’en nra buch e ngiyal’ nem ma aram e yira kalbusnag Satan u lan fare low nib toar. (Revelation 19:11–20:3) Tomuren nni pilyeg e changar rok John nge guy e pi n’em me sul nge weliy e n’en ni yiiynag Isaiah murung’agen ni gaar: “Ma aram mu gguy reb e tharmiy nge reb e fayleng nib beech.” Pi verse ni bay nga tomuren e pi n’en ni guy John e be weliy murung’agen e ngiyal’ nra thilyeg Jehovah Got e pi n’en ni bay u roy u fayleng ni nge manigil. (Revelation 21:1, 3-5) Ere ba tamilang nnap’an ni weliy Isaiah murung’agen fare “fayleng nib beech nge reb e lan e lang nib beech” ma aram e be micheg ban’en nra lebug u lan e bin nib beech e fayleng! Nap’an nra gagiyegnag Gil’ilungun Got e re fayleng ney ma piin ni yad ba fel’ u wan’ Got e yad ra felfelan’ ko par u paradis ni ke fel’ e tha’ u thilrad Got miki fel’ fithik’ i dowrad. Rib manigil e re thin ney ni ke micheg Got ni “tin kakrom [ban’en nib muun e m’ar, nge gafgow, nge yugu boch e magawon ni ma mada’nag e girdi’] e ri bay ni pag talin.” Ere demtrug e n’en ni gomanga ra yib ngan’dad e ngiyal’ nem ma dabi k’aring e amith ara kireban’ ngodad ni bod e n’en ni ma buch rodad e chiney.
ip-2-E 384 ¶25
“Ngari Mfelfelan’gad Ndariy N’umngin Nap’an ko Pi N’en ni Gag e Bay Gu Sunumiy”
25 Ngiyal’ ney e ku be ngongliy Jehovah fa bin nib beech e Jerusalem ni nge mang ban’en ni nge yibnag e “felfelan’” ngodad. Ni uw rogon? Kad nanged ni ke gagiyeg Gil’ilungun Got ko duw ni 1914 ma ra munmun me un fare 144,000 ngak Jesus ngar gagiyegnaged e re am nem. Kan yiiynag murung’agen fare 144,000 ni yad fa “bin nib beech e Jerusalem.” (Revelation 21:2) Ireray fa Bin nib Beech e Jerusalem ni be weliy Got murung’agen u nap’an ni gaar: “Bin nib beech e Jerusalem ni bay gu sunumiy e bay i par nib sug ko felfelan’, ma girdi’ riy e bay ur pired ni yad ba felfelan’.” Ere ra fanay Got fa Bin nib Beech e Jerusalem ni nge yibnag e pi tow’ath nra pi’ ni fan ngak e piin ni yad ba yul’yul’ ngak. Nap’an nra taw ko re ngiyal’ i n’em ma dab kud rung’aged laman be’ ni be yor ya ireram e ngiyal’ nra pi’ Jehovah gubin e “tin ni ir e kari t’uf” rodad.—Psalm 37:3, 4.
Gapas U Lan Biyu’ E Duw Nge Tomuren!
‘BAY RA TOYED E NAUN MA BAY RA YUNGED E WOLDUG’
4 Urngin e girdi’ e yad baadag ni nge yag e naun ngorad nrayog ni ngar pared chon e tabinaw rorad riy ni yad ba pagan’. Machane ngiyal’ ney e ireray reb e magawon nib ga’ ni ma mada’nag e girdi’. Boor e mach ni kaygi pag urngin e girdi’ ni yad ma par riy. Ma boor e girdi’ ni yad be par u lan e naun nib war mab achichig ara reb e naun ni ke n’uw nap’an ma ba alit. Yad be athapeg ni reb e rran ma rayog ni nge yag ngorad reb e naun ni ngar pared riy.
5 U tan Gil’ilungun Got, ma rayog ni nge yag e naun ngak urngin e girdi’ ya ke yiiynag Isaiah ni gaar: “Girdi’ e bay ra toyed e naun mi yad par u lan, ma gathi yugu be’ e bay yib i par ngay. Bay ra yunged e woldug ni grapes me fel’ rogorad u logowen, ma gathi yugu boch e girdi’ e bay ur unumed.” (Isa. 65:21) Machane gathi kemus ni naun e yad be athapeg ni nge yag ngorad. Ngiyal’ ney, ma boor e girdi’ ni bay e naun rorad, ma ri in i yad ni bay e naun rorad nib ga’. Machane ke magafan’rad ya yad be lemnag ni dabkiyog ni ngar ayuweged e naun rorad. Ara yad be lemnag nra yan e moro’ro’ nga lan e naun rorad ngar iringed boch e chugum rorad. Nap’an nra gagiyeg Gil’ilungun Got ma dakuriy e magawon ni aram rogon. I yoloy Mikah ni profet ni gaar: “Gubin e girdi’ ni bayi be’ me par u fithik’ e gapas u tooben e woldug rok ni grapes nge woldug ni yu ke gek’iy ni fig, ma be par ndakuriy be’ nra k’aring e marus ngak.”—Mik. 4:4.
Ngan Fal’eg i Gay Boch Ban’en nib Ga’ Fan ko Thin rok Got
Tin nib Ga’ Fan ko Babyor rok Isaiah—II
63:5—Uw rogon ma damumuw rok Got e ke ayuweg ni nge rin’ e tin nib m’agan’ ngay? Nap’an nra damumuw Got ma ma gagiyegnag e damumuw rok. Ma rogon e damumuw rok e ma ayuweg ni nge pufthinnag e girdi’ nib mat’aw rogon.
Mu Pag e Fonow Rok Jehovah ni Nge Yal’uwegem
MA FANAY JEHOVAH MAT’AWUN NI BOD E EN NI MA NGONGOLIY E TH’IB NI BUT’
3 Be yog e Bible ni Jehovah e bod e en ni ma ngongliy e th’ib ni but’, ya bochan ni bay mat’awun ni nge gagiyegnag e girdi’ nge pi nam. Fare thin ko Isaiah 64:8 e be gaar: “Gur Somol e chitamangimad gur. Gamad bod e but’ ni yima ngongliy e th’ib riy, me gur e ga bod e en ni ma ngongliy e th’ib. Kam sunumiymad.” En ni ma ngongliy e th’ib ni but’ e demtrug ban’en nrayog ni nge ngongliy ko fare but’. Fare but’ e dabiyog ni nge dugliy e n’en ni nge rin’ fa en ni ma ngongliy e th’ib. Re n’ey e ku taareb rogon u thilin e girdi’ nge Got. Dariy mat’awundad ni nga dogned ngak Got rogon ni nge yal’uwegdad, ni bod rogon ndariy mat’awun fare but’ ni nge yog ngak fa en ni ma ngongliy e th’ib ko miti mang th’ib e ba fel’ ni nge ngongliy.—Mu beeg e Jeremiah 18:1-6.
4 Ma yal’uweg Jehovah piyu Israel ni bod rogon fa en ni ma ngongliy e th’ib ni but’. Machane, uw rogon nib thil Jehovah ngak fa en ni ma ngongliy e th’ib ni but’? Ke pi’ Jehovah fare tow’ath ni aram e puf rogon ngak e girdi’ ni ma ayuwegrad ni ngar dugliyed e n’en ni yad baadag ni ngar rin’ed. Ma de sunmiy boch e girdi’ nib fel’, nge boch e girdi’ nib kireb. Maku der ma fanay mat’awun ni nge towasariy e girdi’ ni ngar folgad rok. Ya, bin riyul’ riy e girdi’ e ngar dugliyed u wan’rad ni ngar paged e en ni Sunmiyrad ni nge yal’uwegrad.—Mu beeg e Jeremiah 18:7-10.
5 Ma uw rogon nfaanra bay be’ nib gelan’, ma dabun ni nge pag Jehovah ni nge yal’uweg? Uw rogon nra fanay Jehovah mat’awun ni bod fa en ni ma ngongliy e th’ib ni but’? Faanra ba mo’maw’ rok fa en ni ma ngongliy e th’ib ni nge ngongliy e re miti th’ib ni baadag, ma rayog ni nge dugliy ni nge fal’eg reb nib thil ara nge n’ag fare but’ ma dabki fanay. Ba ga’ ni ma buch e re n’ey ni bochan fa en ni ma ngongliy e th’ib ni but’ e de puluw rogon ni ke ngongliy fare th’ib. Machane Jehovah e gubin ngiyal’ nib puluw rogon ni ma yal’uweg e girdi’ rok. (Deut. 32:4) Faanra dabun be’ ni nge pag Jehovah ni nge yal’uweg ma ir e kireb rok. Ma thilyeg Jehovah rogon ni ma yal’uweg e girdi’ ni be yan u rogon ni yad be fol ko fonow. Faanra fol e girdi’ rok Jehovah ma rayog ni nge fanayrad. Ni bod ni piin Kristiano ni kan dugliyrad e yad e “piin ni be runguydad” ‘ni yima fanay ko tin ni ba ga’ fan ban’en.’ Machane girdi’ ndubrad ni ngar folgad ko fonow rok Got e ra “dag e damumuw” rok ngorad ma dabkiyog ni nge fanayrad ni ngar rin’ed ban’en.—Rom. 9:19-23.