Mu Gonopiy Rogon ni Ga Be Wereg e Pi Babyor Rodad

I fil Jesus ngodad ni gaar: “Ke yog ngomed nda mpied puluwon, ere mpied ndab ni pi’ puluwon ngomed.” (Mt 10:8) Gad ma fol ko re fonow ney, ya darur dogned ko girdi’ ni ngar pied puluwon e Bible ara pi babyor nib puluw e thin riy ko Bible ni gad ma pi’ ngorad. (2 Ko 2:17) Yugu aram rogon ma pi babyor rodad ney e bay e tin riyul’ riy ni kan fek ko Thin rok Got. Rib gel e maruwel ni yima tay ko pi babyor ney ma boor e salpiy ni yima fanay ngay ya nge yag ni ngan ngongliy min pi’ ko pi ulung u ga’ngin yang e fayleng. Ere susun ni ngad feked chi urngin ni ir e gad ra fanay.

Thingar mu gonopiy rogon ni ga ma pi’ e babyor ko girdi’ nib muun ngay u nap’an ni ga be machib ko yungi n’en ni ma muulung e girdi’ ni yoor ngay. (Mt 7:6) Mu gay rogon ni ngam non ngak e piin ni ga be mada’nagrad u nap’an e machib, ya nge yag ni ngam nang ko riyul’ ni yad baadag ni ngar beeged e babyor fa danga’, ko bin ni kemus ni ngam wereg e babyor ko girdi’ ni yugu demtrug. Rayog ni nga mog e arrogon nga reb ko fapi deer ni baaray u lan e kahol, fa? Faanra der yag ni ngam nang ko riyul’ ni baadag be’ ni nge beeg reb e babyor rodad, ma rayog ni kemus ni ngam pi’ bang e tract ngak. Machane, faanra ke yog ni baadag ni ngan pi’ reb e magazine ara yugu reb e babyor ngak, mag pi’.​—Pr 3:27, 28.