Mang e Rayog ni Ngam Fil Rok e Piin Ke N’uw Nap’rad ko Tin Riyul’?

U lan e ulung rodad e bay e pi walag riy ni ke n’uw nap’an ni kar pigpiggad ngak Jehovah. Rayog ni ngad filed rogon ni kar pared ni yad be taga’ ngak Jehovah. Ku rayog ni ngad fithed yad u murung’agen e tin ke buch u lan e ulung rok Jehovah ni kab kafram i yib, nge rogon e magawon ni u ranod u fithik’, nge rogon ni ke ayuwegrad Jehovah kar gelgad ko pi magawon ney. Ku rayog ni ngad pininged reb e pi walag ney ni ngar uned ngodad ko Fol Bible ni Tabinaw ya nge yag ni ngar weliyed boch ban’en ni ke buch rorad.

Faanra gur reb e Kristiano ni ke n’uw nap’am ko tin riyul’, ma nge m’agan’um ngay ni ngam weliy e tin ke buch rom u nap’an ni ga be pigpig ngak Jehovah ngak e pi walag ndawori n’uw nap’rad ko tin riyul’. I weliy Jakob nge Josef e tin ni buch rorow ngak pi fakrow. (Ge 48:21, 22; 50:24, 25) Ma boch nga tomuren, me tay Jehovah chilen ngak e pi matam ni ngar weliyed ngak pi fakrad rogon ni ayuweg Jehovah e girdi’ rok kakrom. (De 4:9, 10; Ps 78:4-7) Ma ngiyal’ ney e rayog ni nge weliy e piin gallabthir nge yugu boch e walag ngak e piin nib fel’ yangaren e tin nib fel’ ni kar guyed ni ke ngongliy Jehovah u lan e ulung rok.

NGAN YALIY FARE VIDEO NI KENGGIN E MAINTAINING UNITY UNDER BAN, NGEMU’ MIN PI’ E FULWEG KO PI DEER NI BAARAY:

• Uw rogon ni pi’ e branch u Austria e ayuw ngak e pi walag ni yad ma par u boch e nam ni kan taleg e machib riy?

• Uw rogon ni ayuweg e pi walag ko pi nam ney e michan’ rorad ni nge par nib gel?

• Mang fan ni digey yooren e pi tamachib u Romania e ulung rok Jehovah, ma uw rogon ni yag ni ngar sulod?

• Uw rogon ni ke gel e michan’ rom ni bochan e pi n’en ni buch rok e pi walag ney?