Ir e Gubin Ma Rayog Rok ma Ri Ma Lemnag Rarogodad

1, 2. (a) Mang e n’en nib thil u rogon ni ma ngongol Jehovah ngak e girdi’ nga rogon ni ma ngongol e piin nib ga’ lungurad ngak e piin ni bay u tan pa’rad? (b) Mang e gad ra weliy ko re article ney?

PIIN nib gel gelngirad e yad ma gagiyegnag e girdi’ ma yu ngiyal’ e yad ma gafgownag e piin ni yad bay u tan pa’rad. (Matt. 20:25; Ekl. 8:9) Rib thil rogon ni yad ma ngongol ngak e girdi’ nga rogon ni ma ngongol Jehovah ngak e girdi’! Yugu aram rogon ni Jehovah e Gubin Ma Rayog Rok, machane ri ma lemnag rarogon e girdi’ ndawor ra flontgad. Ba gol ma ma lemnag rarogorad. Ku ma dag ni ma lemnag rogon lanin’dad, nge pi n’en nib t’uf rodad. Der ma yog ngodad ni ngad rin’ed boch ban’en ndabiyog rodad ya “manang ni gadad e fiyath.”​—Ps. 103:13, 14.

² Boor ban’en ni be weliy e Bible u rogon ni ke dag Jehovah ni ma lemnag rarogon e pi tapigpig rok kakrom. Ngad weliyed dalip ko pi n’ey. Bin som’on e, rogon ni i lemnag Jehovah rarogon Samuel ni kab bitir u nap’an ni ayuweg ni nge weliy ngak Eli ni ir e Prist Nth’abi Tolang murung’agen e gechig rok. Bin l’agruw e, rogon ni i gum’an’nag ir u nap’an ni be yog Moses ndabiyog ni nge pow’iy piyu Israel. Ma bin dalip e, rogon ni dag Jehovah ni be lemnag rarogon piyu Israel u nap’an nra chuwgad u Egypt. Nap’an ni gad be fil murung’agen e pi n’ey, ma gad fal’eg i lemnag ko mang e be fil ngodad u murung’agen Jehovah mad guyed ko mang e rayog ni ngad filed riy.

I LEMNAG GOT RAROGON BOCHI PAGEL

3. Mang e n’en ni buch rok Samuel reb e nep’ ndawori buch rok bayay? Ma mang deer e rayog ni ngad fithed gadad riy? (Mu guy e sasing ni bay u tabolngin e re article ney.)

³ I tabab Samuel ni nge “pigpig” ngak Jehovah ko fare tabernacle u nap’an ni kab bitir. (1 Sam. 3:1) Bay reb e nep’ ni mol me buch ban’en rok ndawori buch rok bayay.a (Mu beeg e 1 Samuel 3:2-10.) I rung’ag laman be’ ni be pining me lemnag ni Eli ni ir e Prist Nth’abi Tolang ni ke pilibthir e ir e be pining. Ere mil i yan me gaar ngak: “Kam piningeg, ere gub aray.” Me gaar Eli ngak: “Dawor gu piningem.” Machane nap’an ni buch e re n’ey nge gaman dalip yay, ma aram e ke nang Eli ni Got e ir e be pining Samuel. Ere yog ngak rogon ni nge fulweg lungun Got ma aram e n’en ni rin’ Samuel. Mang fan nde tamilangnag Jehovah ko som’on ni ir e be pining Samuel? Der yog e Bible fan, machane rayog ni rin’ Jehovah ni aray rogon ni bochan e be lemnag rogon laniyan’ Samuel.

4, 5. (a) Mang e rin’ Samuel u nap’an ni yog Jehovah ngak ni nge yan i yog e thin rok ngak Eli? (b) Mang e gad ra fil u murung’agen Jehovah ko re n’ey ni be weliy e Bible murung’agen?

⁴ Mu beeg e 1 Samuel 3:11-18. Be yog e Motochiyel rok Jehovah ni piin bitir e ngaur ted fan e girdi’ nib piilal ngorad, nib ga’ ni piin ni yad ma yog e thin. (Ex. 22:28; Lev. 19:32) Ere aram fan nib mo’maw’ ni ngad lemnaged rogon Samuel ni kab bitir ni nge od ni kakadbul nge yan i weliy ngak Eli murung’agen e gechig ni bayi tay Got ngak. Ku be yog e Bible ni “be rus ni nge weliy ngak Eli e tin ni ke weliy Somol ngak.” Machane i tamilangnag Got ngak Eli ni Ir e be pining Samuel. Aram fan ni yog Eli ngak Samuel ndabi mithag e tin ni ke yog Got ngak. Ere fol Samuel rok Eli nge ‘weliy ngak urngin’ e tin ni ke yog Got.

⁵ De gin Eli ko n’en ni yog Samuel ngak ni bochan e ba puluw e pi thin nem ni yog ko tin ni yib i yog “ba profet” rok Got u m’on riy. (1 Sam. 2:27-36) Re n’ey ni be weliy e Bible murung’agen e gad be fil riy rogon ni ma lemnag Jehovah rarogon e girdi’ nge rogon feni gonop.

6. Mang boch ban’en nrayog ni ngad filed u rogon ni ke ayuweg Jehovah Samuel u nap’an ni kab bitir?

⁶ Gur be’ ni ka gab bitir, fa? Faanra arrogon me ere re n’ey ni be weliy e Bible murung’agen ni buch rok Samuel u nap’an ni kab bitir e ra ayuwegem ni ngam nang ni manang Jehovah e pi magawon ni ga be yan u fithik’, nge rogon lanin’um. Rayog ni gur be’ ni ga ma tamra’ ma kub mo’maw’ ngom ni ngam machibnag e piin ni yad ba ilal ngom ara ngam par ni gab thil ko pi taab yangar rom. Machane rayog ni nge pagan’um ni baadag Jehovah ni nge ayuwegem. Ere mu meybil ngak ngam weliy ngak rogon e pi n’en ni bay u lanin’um. (Ps. 62:8) Mu fal’eg i lemnag murung’agen boch e bitir ni bod Samuel ara boch e fel’ yangaren ni bay murung’agrad u lan e Bible. Maku rayog ni ngam nonad e pi walag ni gimed taab yangar ara yad ba ilal ngom nrayog ni kar gelgad nga boch e magawon ni taareb rogon ko magawon rom. Ya rayog ni ngar weliyed ngom murung’agen e ngiyal’ ni ke ayuwegrad Jehovah riy u reb e kanawo’ nsana dar lemnaged nra buch.

I DAG GOT NI BE LEMNAG RAROGON MOSES

7, 8. Uw rogon ni ke dag Jehovah nri be lemnag rarogon laniyan’ Moses?

⁷ Nap’an ni ke gaman 80 e duw rok Moses, me pi’ Jehovah ngak ba maruwel nib mo’maw’. Re n’ey e aram e nge pow’iy piyu Israel nga wuru’ yu Egypt. (Ex. 3:10) Ba mudugil ni gin Moses ko re n’ey ni bochan e ke gaman 40 e duw ni ke par u lan fare nam nu Midian ni be gafaliy e gamanman. Aram fan ni yog Moses ni gaar: “I gag mini’ ni nggu wan ngak Farao nggu fek piyu Israel nga wuru’ yu Egypt?” Ere micheg Jehovah ngak ni gaar: “Bay gu un ngom.” (Ex. 3:11, 12) Miki micheg ngak nra motoyil e piin ni yad ma yog e thin u Israel ko ‘tin ni bay i yan i yog ngorad.’ Machane ki fith Moses ni gaar: “Faanra dabi mich u wan’ piyu Israel e tin ni ku gog ngorad, mi yad pag ndab ra motoyilgad ko tin ni ku gog?” (Ex. 3:18; 4:1) N’en ni yog Moses e be m’ug riy ni be lemnag nde riyul’ e n’en ni yog Jehovah! Yugu aram rogon me gum’an’ Jehovah u puluwon Moses. Ki pi’ gelngin ni nge ngongliy boch e maang’ang. Bin riyul’ riy e, Moses e ir e en th’abi som’on ni weliy e Bible murung’agen nni pi’ gelngin ni nge ngongliy e maang’ang.​—Ex. 4:2-9, 21.

⁸ Yugu aram rogon miki tawey Moses nge yog nde salap ko welthin u fithik’ e girdi’ ni yoor. Ere yog Got ngak ni gaar: “Mman ya bay gu ayuwegnem ngam welthin, ma bay gog ngom e n’en ni nga mog.” Ere gur, aram e ke pagan’ Moses e chiney nrayog ni nge rin’ e n’en ni yog Got ngak, fa? Danga’ ya yog ngak Got ni nge pi’ yugu be’ nge yan! Ke damumuw Jehovah ko re n’ey, machane ka be lemnag rarogon laniyan’ Moses. Ere yog ngak Aron ni nge yan i non ni pa’ Moses.​—Ex. 4:10-16.

9. Bochan ni gum’an’ Jehovah u puluwon Moses ma be ngongol ngak u fithik’ e gol, ma uw rogon ni ayuweg Moses e re n’ey ni nge pow’iy e girdi’ rok Got nib fel’ rogon?

⁹ Mang e gad ra fil u murung’agen Jehovah ko re n’ey ni buch ni be weliy e Bible murung’agen? Rayog ni nge fanay Jehovah gelngin ni nge k’aring e marus ngak Moses ni nge fol rok ni bochan e ir en Gubin Ma Rayog Rok. Machane de rin’ e re n’ey ya gum’an’nag ir u puluwon Moses me ngongol ngak u fithik’ e gol ni bochan e be guy rogon ni nge pi’ e pagan’ ngak Moses ni ir be’ nib sobut’an’ ma bay e gin ni nge mus riy ni nge nang nra ayuweg. Ere gur ke yib angin e n’en ni rin’ Jehovah? Arrogon! Ke yag ni nge pow’iy Moses e girdi’ rok Got nrib fel’ rogon. Ma bochan e re n’ey ma ma gay Moses rogon ni nge sumunguy ngak e girdi’ miki nang rarogon lanin’rad ni bod rogon ni i rin’ Jehovah ngak.​—Num. 12:3.

10. Uw rogon nra yib angin ngodad ni faan gad ra folwok rok Jehovah u rogon ni ma lemnag rogon laniyan’ e girdi’?

¹⁰ Mang e rayog ni ngad filed ko re n’ey? Faanra gur en figirngiy, ara gallabthir, ara piilal, ma aram e bay mat’awum nrayog ni ngam gagiyegnag boch e girdi’. Bochan e re n’ey ma rib ga’ fan ni ngam folwok rok Jehovah ni aram e ngam lemnag rarogon laniyan’ e ppin nge bitir rom, nge girdi’ u lan e ulung, mag ngongol ngorad u fithik’ e gol nge gum’an’. (Kol. 3:19-21; 1 Pet. 5:1-3) Faan ga ra athamgil ni ngam folwok rok Jehovah Got nge Jesus Kristus ni Ir e Kab Ga’ ngak Moses, ma aram e rayog ni ngam momnag ngak e girdi’ ni nge non ngom, maku rayog ni ngam pi’ e athamgil nga lanin’rad. (Matt. 11:28, 29) Ku rayog ni ngam dag e kanawo’ ngorad nib fel’ nrayog ni ngar folwokgad riy.​—Heb. 13:7.

BA GEL GELNGIN MA MA LEMNAG RAROGODAD U NAP’AN NRA AYUWEGDAD

11, 12. Uw rogon ni ke ayuweg Jehovah piyu Israel ni nge pagan’rad ndabi buch ban’en rorad u nap’an ni pow’iyrad ngar chuwgad u Egypt?

¹¹ Sana gonap’an boor ko dalip biyu’ e girdi’ nu Israel nra chuwgad u Egypt u lan fare duw ni 1513 B.C.E. nib muun e piin bitir nge pilibthir nge yugu boch e girdi’ nib m’ar ara yad ba marwoth ngay. Ere ba t’uf be’ ni ma t’ufeg e girdi’ ma ma lemnag rarogorad ni nge Pow’iy e re ulung i girdi’ ney. Aram fan ni pi’ Jehovah Moses ngorad ni nge mang ir e nge pow’iyrad. Ere angin ni yib e ke pagan’ piyu Israel ni ngar n’aged taferad u Egypt ni yugu aram rogon ni kemus e gin ni yad manang.​—Ps. 78:52, 53.

¹² Ere uw rogon ni ayuweg Jehovah e girdi’ rok ni nge pagan’rad ndabi buch ban’en rorad? Ke yarmiy e re nam nu Israel nem ni nga ranod ni “bod barba’ i salthaw” u nap’an nra chuwgad u Egypt. (Ex. 13:18, NW) Ma bochan nri yad ba yaram ma aram fan nrayog ni ngar guyed ni Got e ir e ba fel’ rogon ni be gagiyegnag urngin ban’en. Miki tay Jehovah “bangi manileng” ni nge pow’iyrad ni rran ma nra nep’ “ma ramaen ba nifiy” e ir e nge pow’iyrad ya nge puguran ngorad ni bay rorad ni be pow’iyrad ma be ayuwegrad. (Ps. 78:14, BT) Ere ba t’uf ni nge mich u wan’ fare nam nu Israel e re n’ey ni bochan e n’en ni bayi buch ni migid.

13, 14. (a) Uw rogon ni ayuweg Jehovah piyu Israel u nap’an ni yad bay ko fagi day ni Red Sea? (b) Uw rogon ni ke dag Jehovah nib gelngin ngak piyu Egypt?

¹³ Mu beeg e Exodus 14:19-22. Am lemnag ni susun e ga bay rok piyu Israel e ngiyal’ nem, ndakuriy e gin ni ngam man ngay, ya bay e salthaw nu Egypt nga tomur ma fagi day ni Red Sea e bay nga m’on. Ma aram me yigi rin’ Got ban’en nib tomgin. Ya fagi manileng ni bay nga m’on e sul nga tomur nge yib i par nga thilmew yu Egypt. Ere chiney e kar pared u fithik’ e lumor ma gimed e gimed be par u fithik’ e tamilang! Ma aram mag guy Moses ni ke k’iyag pa’ nga daken e day me yib bangi nifeng nib gel u lan e ngek nge yib i sey fagi day nge ruw raba’ nrayog ni ngan yan u langgin nga barba’. Ere chiney e rayog ni ngam marod chon e tabinaw rom nge gamanman romed ngam uned ko tin ka bay e girdi’ ni aram e ngam marod nib yaram u lan fagi day. Kam gin ngay nde tabarbar ara tamasirgig e but’ riy, ya ba melik’ mab el ere ba mom ni ngan yan u daken. Ere bochan e re n’ey ma mus ko en nib sowath ko yan ma rayog ni nge yan nge thap nga barba’ ndariy ban’en nra buch rok.

¹⁴ Mu beeg e Exodus 14:23, 26-30. Ma nap’an ni be buch e pi n’ey, ma aram me tabab Farao ni nge lol’ogmed piyu Israel ni bochan e ir be’ nib tolangan’ mab balyang. Ngemu’ ma aram me k’iyag Moses pa’ nga daken fagi day bayay ma aram me sul e day nga taabang nge tharey Farao nge salthaw rok. Ere dariy bagayad ni magey nib fos!​—Ex. 15:8-10.

15. Mang e ga be fil u murung’agen Jehovah ko re n’ey ni buch ni be weliy e Bible murung’agen?

¹⁵ Re n’ey ni be weliy e Bible murung’agen e ku be fil ngodad ban’en u murung’agen Jehovah. Ir reb e Got nib yaram gubin ban’en ni ma rin’, ma re fel’ngin ney ni bay rok e be ayuwegdad ni nge pagan’dad ndabi buch ban’en rodad. (1 Kor. 14:33) Rogon ni ma ayuweg Jehovah e girdi’ rok ko tin nib t’uf rorad e bod rogon be’ ni ma gafaliy e saf ni be ayuweg e pi saf rok ni nge dabi buch ban’en rorad, miki ayuwegrad ko toogor rorad. Ma re n’ey e be pi’ e pagan’ ngodad maku be fal’eg lanin’dad u nap’an ni gad be chugur i yan ko ngiyal’ ni ngan thang e re m’ag ney.​—Prov. 1:33.

16. Faan gad ra sul ngad lemnaged rogon ni ayuweg Jehovah piyu Israel, ma mang angin nra yib ngodad?

¹⁶ Ngiyal’ ney e ku ma ayuweg Jehovah e girdi’ rok ni yad ba ulung. Ma ayuwegrad ni nge par e tha’ u thilrad nib fel’ miki ayuwegrad u pa’ e pi toogor rorad. Maku ra ulul ni nge ayuwegrad u nap’an fare gafgow nib ga’ ni be chugur i yib. (Rev. 7:9, 10) Ere dabi rus e girdi’ rok Got u nap’an fare gafgow nib ga’ ndemtrug ko yad bbitir ara kar pilibthirgad ara ba fel’ fithik’ i dowrad ara yad marwoth.b Ya ra yib ngan’rad fapi thin ni yog Jesus ni gaar: ‘Mu sak’iygad ngam changargad nga lang, ya aram e ke chugur ni ngan chuwegmed u fithik’ e gafgow.’ (Luke 21:28) Ere mus nga nap’an nra cham Gog ni aram e be yip’ fan ba ulung i nam ngorad, machane ba pagan’rad nra ayuwegrad Jehovah ni yugu aram nib gel gelngin e re ulung nem ngak Farao. (Ezek. 38:2, 14-16) Mang fan? Bochan e yad manang ni Jehovah e dabi thil. Ere nap’an e ngiyal’ nem e ku ra micheg bayay ni ir Faen ni Ma Thapeg e girdi’ rok ni yad ba t’uf rok u nap’an nra ayuwegrad.​—Isa. 26:3, 20.

17. (a) Uw rogon nra yib angin ngodad ni faan gad ra fil murung’agen e piin ni be weliy e Bible murung’agrad ni be dag rogon ni ma ayuweg Jehovah e girdi’ rok? (b) Mang e gad ra weliy ko bin migid e article?

¹⁷ U lan e re article ney e kad weliyed murung’agen boch e girdi’ ni be weliy e Bible murung’agrad ni be dag rogon ni ma lemnag Jehovah rarogon e girdi’ rok, nge rogon ni dag nib gol ngorad u nap’an ni be ayuwegrad ma be pow’iyrad ndabi buch ban’en rorad. Nap’an ni ga be fal’eg i lemnag e pi n’ey, mag guy rogon ni ngam gay ban’en nib beech u murung’agen Jehovah nrayog ni ngam fil ban’en riy nsana da mu tiyan’um ngay ko yay som’on. Ya nap’an nra yoor ban’en nim fil u murung’agen pi fel’ngin Jehovah nrib manigil, ma aram e ra gel e t’ufeg nge michan’ rom ngak. Bin migid e article e gad ra fil riy boch e kanawo’ u rogon nrayog ni ngad folwokgad rok Jehovah u nap’an ni gad ra guy rogon ni ngad lemnaged rarogon e girdi’ u lan e tabinaw, nge ulung, nge nap’an e machib.