LIBRARY U ONLINE ni fan ko Wulyang ko Damit
Wulyang ko Damit
LIBRARY U ONLINE
Waab
  • BIBLE
  • PI BABYOR
  • PI MUULUNG
  • w20 July pp. 8-13
  • Ngari Mich u Wan’um ni Ga Bay ko Tin Riyul’

Dariy e video ko n'en ni kam mel'eg.

Wenig ngom, dabiyog ni nge load e re video ney.

  • Ngari Mich u Wan’um ni Ga Bay ko Tin Riyul’
  • Fare Wulyang ko Damit Ni Be Weliy Morngaagen Gil’ilungun Jehovah (Ken ni Ngan Fil)—2020
  • Pi Subheading
  • Boch Ban'en ni Ku Taareb Rogon Ngay
  • NGE YAG NGOM E BIN RIYUL’ E “TAMILANGAN’” NI YIB ROK GOT
  • NGARI “MICH U WUN’UM”
  • MU FAL’EG ROGOM NI NGAM AYUWEG E GIRDI’ NGE MICH E TIN RIYUL’ U WAN’RAD
  • MU FIL MURUNG’AGEN E PI YIIY U BIBLE
  • Ngari Mich u Wan’um ni Kam Pirieg e Tin Riyul’
    Fare Wulyang ko Damit Ni Be Weliy Morngaagen Gil’ilungun Jehovah—2021
  • Ngada Folwokgad Rok Fare Got Ko Tin Riyul’
    Fare Wulyang Ntagil’ E Damit Ni Be Weliy Morngaagen Gil’ilungun Jehovah—2004
  • Piin Gallabthir​—Mu Ayuweged Pi Fakmed ni ‘Nge Tamilangan’rad u Rogon ni Yima Thap ngak Got’
    Fare Wulyang ko Damit Ni Be Weliy Morngaagen Gil’ilungun Jehovah (Ken ni Ngan Fil)—2017
  • Um Man u Kanawoen e Tin Riyul’
    Fare Wulyang ko Damit Ni Be Weliy Morngaagen Gil’ilungun Jehovah (Ken ni Ngan Fil)—2020
Kum Guy Boch Ban'en
Fare Wulyang ko Damit Ni Be Weliy Morngaagen Gil’ilungun Jehovah (Ken ni Ngan Fil)—2020
w20 July pp. 8-13

ARTICLE NI NGAN FIL 28

Ngari Mich u Wan’um ni Ga Bay ko Tin Riyul’

“Nguum par ko tin nib riyul’ e thin ni kan fil ngom, ni ir e kari mich u wun’um.”​—2 TIM. 3:14.

TANG 56 Nge Mich e Tin Riyul’ u Wan’um

TIN YIRA WELIYa

1. Nap’an ni gad ra yog fare thin ni “tin riyul’,” ma mang e gad be yip’ fan?

“UW ROGON ni kam nang e tin riyul’?” “Gur be’ ni kan chuguliyem ko tin riyul’, fa?” “Ke uw n’umngin nap’an ni kam nang e tin riyul’?” Sana rayog ni kan fith e pi deer ney ngom ba ngiyal’, fa reb e kam fith ngak boch e girdi’. Ere nap’an ni gad ra yog fare thin ni “tin riyul’,” ma mang e gad be yip’ fan? Ba ga’ ni gad ma fanay e re thin ney u nap’an ni gad be weliy murung’agen e tin ke mich u wan’dad, nge rogon ni gad ma liyor ngak Got, nge rogon e par rodad. Piin yad bay ko “tin riyul’” e yad manang e n’en be fil e Bible ma yad ma fol ko pi kenggin e motochiyel ni bay riy. Bochan e re n’ey, ma aram fan ndaki mich u wan’rad e machib ko pi yurba’ i teliw ni googsur, ma yad be par ni yad ba felfelan’ ni yugu aram rogon ni ka yad be par u lan e re fayleng rok Satan ney.​—John 8:32.

2. Mang e rayog ni nge k’aring be’ ni nge adag ni nge nang e tin riyul’ ko som’on nrogon ni bay ko John 13:34, 35?

2 Mang e n’en ni k’aringem ni ngam adag ni ngam nang e tin riyul’ aram ko som’on? Sana rayog ni bochan rogon e ngongol nib manigil ni i dag e girdi’ rok Jehovah. (1 Pet. 2:12) Fa reb e sana rogon e t’ufeg ni yad ma dag. Boor e girdi’ ni yad ma guy e re t’ufeg ney ni kan dag ngorad ko yay nsom’on ni kar uned ko muulung, ma aram e n’en ma par u lanin’rad ma gathi pi n’en un weliy u nap’an e muulung. Dab da gingad ko re n’ey ya yog Jesus ni yira nang pi gachalpen ni bochan e t’ufeg ni bay u thilrad. (Mu beeg e John 13:34, 35.) Machane ka bay boch ban’en nib t’uf ni ngad rin’ed ni faanra nge gel e michan’ rodad.

3. Mang e rayog ni nge buch ni faanra kemus ni be tor e michan’ rodad ko t’ufeg ni bay u thilin e pi walag?

3 De gaman ni faanra kemus ni nge tor e michan’ rodad ko t’ufeg ni bay u thilin e girdi’ rok Got. Mang fan? Ya faanra kemus e n’en be tor e michan’ rodad ngay mab mom ni nge war e michan’ rodad. Bod ni faanra ke rin’ reb e walag, ara reb e piilal, ara reb e pioneer reb e denen nib ubchiya’ ma rayog ni ngad talgad ko pigpig ngak Jehovah. Ku rayog ni ngad talgad ko pigpig ni gad be tay ni faanra rin’ reb e walag ban’en ara yog ban’en ni ke kirebnag lanin’dad, fa reb e ke digey e bin riyul’ e liyor ma ke chel ke togopuluw ngay ma be yog nde riyul’ e pi n’en nib mich u wan’dad. Ere faanra gad baadag ni nge par e michan’ rodad nib gel ma thingari tor nga daken e tha’ u thildad Jehovah. Ya faanra danga’, ma dabiyog ni nge par e michan’ rodad nib mudugil. T’ufeg rodad ngak Jehovah nge girdi’ rok e rayog ni nge ayuwegdad ni nge gel e michan’ rodad, machane ri kub ga’ fan ni ngad filed e Bible nib fel’ rogon, ma gad guy rogon ni nge tamilang u wan’dad e tin gad be fil, ma gad gay murung’agen e pi n’em ya nge yag ni ngari mich u wan’dad ni gad be fil e tin riyul’ u murung’agen Jehovah. Ba t’uf ni ngari mich u wan’dad nriyul’ e tin be fil e Bible u murung’agen Jehovah.​—Acts 17:11.

4. Mang e ma rin’ boch e girdi’ u nap’an ni yira skengnag e michan’ rorad nrogon ni bay ko Matthew 13:3-6, 20, 21?

4 I yog Jesus ni bay boch e girdi’ ni yad ba ‘felfelan’’ ngay ni ngar nanged e tin riyul’, machane nap’an ni yad ra mada’nag e magawon ma ra war e michan’ rorad. (Mu beeg e Matthew 13:3-6, 20, 21.) Sana rayog nde tamilang u wan’rad ni piin yad ra fol rok Jesus e yad ra mada’nag e magawon. (Matt. 16:24) Fa reb e kar lemnaged nnap’an nra mang be’ reb e Kristiano ma aram e be yip’ fan ndariy ba ngiyal’ nra mada’nag e magawon, fa reb e gubin ngiyal’ nra i chuweg Got e magawon rok. Machane bochan ni ka gad be par ko re fayleng ney ma ra ud mada’naged e magawon. Rayog ni nge thil boch ban’en ko par rodad nra warnag e felfelan’ rodad.​—Ps. 6:6; Jas. 4:14.

5. Uw rogon ni be micheg yooren pi walagdad nib mich u wan’rad ni yad bay ko tin riyul’?

5 Yooren pi walagdad e yad be micheg nib mich u wan’rad ni yad bay ko tin riyul’. Mang fan nrayog ni nga dogned e re n’ey? Ya mus ni faanra ke rin’ reb e walag ban’en ngorad ara ke yog ban’en ni ke kirebnag lanin’rad, fa ke un nga boch e ngongol nder ma un e piin Kristiano ngay, ma der ma war e michan’ rorad. (Ps. 119:165) Gubin e skeng ni yad ma mada’nag e ma gelnag e michan’ rorad, ma gathi be warnag. (Jas. 1:2-4) Ere uw rogon ni ngam gelnag e michan’ rom ni aray rogon?

NGE YAG NGOM E BIN RIYUL’ E “TAMILANGAN’” NI YIB ROK GOT

6. Mang e i tor e michan’ ko pi Kristiano ko bin som’on e chibog ngay?

6 Pi Kristiano ko bin som’on e chibog e i tor e michan’ rorad nga daken e pi n’en kar filed u lan fare Babyor nib Thothup nge pi n’en ni i fil Jesus Kristus ngorad ni aram e “tin nib riyul’ ni ir fare Thin Nib Fel’ ni yib rok Got.” (Gal. 2:5) Pi machib ney nib riyul’ e be yip’ fan urngin ban’en nib mich u wan’ e piin Kristiano nib muun ngay murung’agen fare biyul ni maligach ni pi’ Jesus, nge fos ko yam’ ni tay. Rib mich u wan’ apostal Paul nib riyul’ e pi machib ney. Mang fan? Ya i fanay e thin u lan fare Babyor nib Thothup ni nge micheg ni “fare Messiah e thingari gafgow nge mu’ min faseg ko yam’.” (Acts 17:2, 3) Pi Kristiano ko bin som’on e chibog e m’agan’rad ko pi machib ney, mu ur taga’gad nga gelngin Got nib thothup ni nge ayuwegrad ni ngar nanged fan e Thin rok Got. Ur gayed murung’agen e pi machib ney ya nge yag nra guyed e mich riy nriyul’ nib puluw ko thin ni bay u lan fare Babyor nib Thothup. (Acts 17:11, 12; Heb. 5:14) Michan’ rorad e gathi kemus ni be tor nga daken e t’ufeg rorad ngak Jehovah nge girdi’ rok, maku da ur pigpiggad ngak Jehovah ni bochan e yad ma felfelan’ ni yad ma chag pi walagrad u taabang. Ya michan’ rorad e be tor nga daken e bin riyul’ e “tamilangan’” ni yib rok Got.​—Kol. 1:9, 10.

7. Faanra ba mich u wan’dad e tin riyul’ u Bible, ma mang e ra rin’ e re n’ey ngodad?

7 Tin riyul’ u lan e Thin rok Got e ri dabi thil. (Isa. 40:8) Bod ni, faanra ke yog ara ke rin’ reb e walag ban’en ni ke kirebnag lanin’dad ara ke rin’ reb e denen nib ubchiya’, ma tin riyul’ u lan e Bible e ka be par ni ka rogon. Ku dabi thil e tin riyul’ u lan e Bible u nap’an ni gad ra mada’nag e magawon. Ere ba t’uf ni ngad nanged e pi machib u lan e Bible nib fel’ rogon, me mich u wan’dad nriyul’ e pi machib nem. Faanra be tor e michan’ rodad ko tin riyul’ ni bay u Bible, ma aram e nap’an ni gad ra mada’nag e skeng ma rayog ni ngad pared ni gad ba mudugil ni bod e yiluy nrayog ni nge ayuweg bbowoch ni nge dabi man’ u nap’an ni keb e lang. Uw rogon ni ngari mich u wan’um ni ga bay ko tin riyul’?

NGARI “MICH U WUN’UM”

8. Uw rogon ni mich u wan’ Timothy ni bay ko tin riyul’ nrogon ni bay ko 2 Timothy 3:14, 15?

8 Rib mich u wan’ Timothy ni bay ko tin riyul’. Uw rogon ni ke nang e re n’ey? (Mu beeg e 2 Timothy 3:14, 15.) Chitiningin Timothy nge titaw rok e yow e som’on nra filew e “thin ni bay u lan fare babyor nib thothup” ngak. Machane dariy e maruwar riy ni ku i tay Timothy e tayim maku be athamgil ya nge yag ni fil e pi thin nem. Bochan e re n’ey, ma aram fan nri ‘mich u wan’’ nib riyul’ e pi thin nem. Boch nga tomuren mfini nang Timothy, nge chitiningin, nge titaw rok e machib ko piin Kristiano. Ba mudugil ni gin Timothy ko t’ufeg ni i dag pi gachalpen Jesus, ma baadag ni nge chag ko pi walag u lan e ulung ma be ayuwegrad. (Fil. 2:19, 20) Machane michan’ rok e der tor nga daken e t’ufeg rok ko girdi’, ya i tor nga daken e pi machib nib riyul’ ni ke chugurnag e tha’ u thilrow Jehovah. Ere ku arrogom nib t’uf ni ngam fil e Bible ya nge yag ni mich u wan’um e pi n’en be fil u murung’agen Jehovah.

9. Mang dalip e machib nib ga’ fan nib t’uf ni nge mich u wan’um?

9 Bay dalip e machib nib ga’ fan nib t’uf ni nge mich u wan’um. Bin som’on e, ba t’uf ni nge mich u wan’um ni Jehovah Got e ir e En Ke Sunmiy urngin ban’en. (Ex. 3:14, 15; Heb. 3:4; Rev. 4:11) Bin l’agruw e, thingari mich u wan’um ni Bible e aram e thin rok Got ni ke pi’ ni fan ko girdi’. (2 Tim. 3:16, 17) Ma bin dalip e, ba t’uf ni nge mich u wan’um ni ke yarmiy Jehovah ba ulung i girdi’ ni yad be pigpig ngak ni Kristus e be pow’iyrad, ma re ulung ney e aram e Pi Mich Rok Jehovah. (Isa. 43:10-12; John 14:6; Acts 15:14) Ra nge mich u wan’um e re dalip i machib ney, ma gathi be yip’ fan ni ngam nang urngin ban’en ni bay u Bible. Ya n’en ni ngam nameg e ngaum ‘sikengnag urngin ban’en’ ya nge yag ni mich u wan’um ni ga bay ko tin riyul’.​—1 Thess. 5:21.

MU FAL’EG ROGOM NI NGAM AYUWEG E GIRDI’ NGE MICH E TIN RIYUL’ U WAN’RAD

10. Mang e ba t’uf ni ngad rin’ed ko bin ni kemus ni ngad nanged e tin riyul’?

10 Nap’an ni ke mich u wan’um fare dalip i machib nib ga’ fan u murung’agen Got, nge Bible, nge girdi’ rok Got, mab t’uf ni ngam nang rogon ni ngam micheg e pi machib ney ngak yugu boch e girdi’ ni ga be fanay e thin nu Bible. Mang fan? Ya gadad e piin Kristiano e ba milfan ngodad ni ngad filed e tin riyul’ ngak e piin yad ra motoyil ngodad.b (1 Tim. 4:16) Nap’an ni gad ra athamgil ni ngad ayuweged e girdi’ ni nge mich u wan’rad nib riyul’ e n’en be fil e Bible, ma aram e ku rayog ni ngari mich u wan’dad e pi machib nem.

11. Mang kanawo’ e ke dag apostal Paul u rogon ni i fil e Bible ko girdi’ nrayog ni ngad folwokgad riy?

11 Nap’an ni i fil apostal Paul e Bible ko girdi’, ma i “guy rogon ni nge mich murung’agen Jesus u wun’rad ni be yog ngorad e tin ni ke yog e babyor nib thothup ni murung’agen ko gin ni baaram ni bay e Motochiyel rok Moses riy nge tin ni yoloy e pi profet.” (Acts 28:23) Ere uw rogon ni ngad folwokgad rok Paul u nap’an ni gad be fil e tin riyul’ ko girdi’? Gathi kemus ni ngad weliyed ngorad e n’en be fil e Bible. Ya thingar kud ayuweged yad ni ngar filed e pi machib u lan e Bible mu kur fal’eged i lemnag. Gad baadag ni nge m’agan’rad ko tin riyul’ ni bochan e kar filed e tin riyul’ e machib u murung’agen e Got rodad ni ma t’ufegdad ma kar nanged nib puluw, ma gathi bochan e yad baadag dakendad.

Ba matam, nge ba matin, nge ba pagel, nge ba rugod ni fakrow e yad be fil fare ke babyor ni ‘Pure Worship’ u taabang ni thin ni Meriken.

Piin gallabthir, mu ayuweged pi fakmed ni nge gel e michan’ rorad ni aram e ngam filed ngorad e “tin nda nnang ni ke m’ay i lemnag rok Got” (Mu guy e paragraph 12-13)d

12-13. Uw rogon ni nge ayuweg e piin gallabthir pi fakrad ya nge dab ra thaygad ko tin riyul’?

12 Gimed e piin gallabthir e ba mudugil ni gimed baadag ni nge par pi fakmed ko tin riyul’. Sana rayog ni ngam lemnaged ni faanra ur chaggad ngak boch e girdi’ u lan e ulung nib fel’ e ngongol rorad, ma aram e rayog ni nge gel e michan’ rorad. Machane faanra nge mich u wan’ pi fakmed ni yad bay ko tin riyul’, ma de gaman ni kemus ni ngaur chaggad ngak boch e girdi’ u lan e ulung nib fel’ e ngongol rorad. Ya ba t’uf ni nge fel’ e tha’ u thilrad Got, me mich u wan’rad nriyul’ e n’en be fil e Bible.

13 Faanra nge fil e piin gallabthir e tin riyul’ u murung’agen Got ngak pi fakrad, ma thingar ra daged e kanawo’ nrayog ni nge folwok pi fakrad riy ni aram e ngaur filed e Bible nib fel’ rogon. Thingar ur ted e tayim ni ngar fal’eged i lemnag e pi n’en yad be fil. Faan yad ra rin’ ni aray rogon, ma aram e rayog ni ngkur filed ngak pi fakrad rogon ni ngar rin’ed e re n’ey. Ba t’uf ni ngar filed ngak pi fakrad rogon ni ngaur fanayed yu ken e babyor rodad nge boch e video ni ngar gayed murung’agen boch ban’en riy ni bod rogon ni yad ma fil ngak e piin yad ma fil e Bible ngorad. Ra rin’ e piin gallabthir e pi n’ey, ma aram e rayog ni ngar ayuweged pi fakrad ni nge t’uf Jehovah rorad miki pagan’rad ni be fanay “fare tapigpig nib yul’yul’ ma ba gonop” ni nge ayuwegdad ni ngad nanged fan e thin nu Bible. (Matt. 24:45-47) Piin gallabthir, de gaman ni kemus ni ngam filed e tin nib mom e machib u lan e Bible ngak pi fakmed. Mu ayuweged yad ni nge gel e michan’ rorad ni aram e ngam filed ngorad e “tin nda nnang ni ke m’ay i lemnag rok Got” nrogon nib m’ag nga yangarrad nge tin rayog ni nge mit ngorad.​—1 Kor. 2:10.

MU FIL MURUNG’AGEN E PI YIIY U BIBLE

14. Mang fan nsusun e ngad filed murung’agen e pi yiiy u Bible? (Mu guy fare kahol ni kenggin e “Rayog ni Ngam Weliy Fan e Pi Yiiy Ney, Fa?”)

14 Pi yiiy u Bible e aram boch ban’en u lan e Thin rok Got nib ga’ fan ni ma ayuwegdad ni nge gel e michan’ rodad ngak Jehovah. Mang yiiy u Bible e ke gelnag e michan’ rom? Sana ga ra weliy fapi yiiy u murung’agen e “tin tomren e rran.” (2 Tim. 3:1-5; Matt. 24:3, 7) Machane ku mang boch e yiiy ni ke lebug nrayog ni nge gelnag e michan’ rom? Rayog ni ngam weliy rogon ni ke lebug fapi yiiy ni bay ko Daniel ko guruy ni 2 ara guruy ni 11 kafram nge rogon ni be lebug e chiney, fa?c Faanra be tor e michan’ rom ko thin nu Bible, ma aram e dabiyog ni nge war. Am lemnag e n’en ni buch rok boch e walag nib gel e gafgow ni un tay ngorad u Chiyamen u nap’an e Bin L’agruw e Mahl ko Fayleng. Yugu aram rogon ndawor ra nanged fan e pi yiiy u murung’agen e tin tomuren e rran nib fel’ rogon, machane rib mich e Thin rok Got u wan’rad.

RAYOG NI NGAM WELIY FAN E PI YIIY NEY, FA?

  • Revelation 11:3, 7-12. Ke machib “l’agruw ni’” u lan 1,260 e rran, min li’row, ma nga tomuren min fasegrow bayay.​—mwbr19.12 2.

  • Matthew 13:36-43. Fapi wheat nge pan.​—w13 7/1 15-20.

  • 1 Thessalonika 5:3. Yira yog ni “ke gapas ndariy ban’en nra buch.”​—w19.10 8-9.

  • Ezekiel 38:2, 10-20. Cham nra tay ‘Gog nu Magog.’​—w19.09 11-12.

Fare tabinaw ni faan kan weliy murung’agrad. Be sap fa gallabthir u winda nga wen ni yow be yaliy e polis ni bay u wuru’ e naun rorad ma bay fare pagel nge fare rugod ni fakrow ni yow be mithag e pi babyor rorad nib puluw e thin riy ko Bible ma kar parew ndarur rusgow.

Fol Bible ni gad ma tay nib muun ngay e pi yiiy ni gad ma fil e rayog ni nge ayuwegdad ni ngad pared ni gad ba mudugil u nap’an ni yibe gafgownagdad (Mu guy e paragraph 15-17)e

15-17. Uw rogon ni ayuweg e fol Bible e pi walag ni i gafgownagrad e pi Nazi ni ngar pared nib gel e michan’ rorad ma yad ba mudugil?

15 Nap’an ni i gagiyeg e am ko Nazi u Chiyamen ma bokum biyu’ e pi walag nni kalbusnagrad ko pi concentration camp. Hitler nge reb e tayugang’ ko am ni ka nog Heinrich Himmler ngak e dubrow daken e Pi Mich Rok Jehovah. I yog reb e walag nib pin ni yib Himmler i non ngak ba ulung e walag nib pin u reb e concentration camp ni gaar: “Jehovah ni Got romed e be gagiyeg u tharmiy, machane gamad e Nazi e gamad be gagiyeg u roy u fayleng! Bay gu daged ngomed ko mini’ e rayog ni nge par nib n’uw nap’an, gimed e Pi Mich Rok Jehovah fa gamad e pi Nazi!” Mang e ayuweg e girdi’ rok Jehovah ni ngar pared ni yad ba yul’yul’?

16 Pi walag nem ni ka nog e Piin Ma Fil e Bible ngorad e yad manang ni ke tabab Gil’ilungun Got ko gagiyeg ko duw ni 1914. Da ur gingad ko gafgow nib gel ni un tay ngorad. Machane ba mich u wan’ e girdi’ rok Jehovah ndariy reb e am ko girdi’ nrayog rok ni nge taleg Got ndabi lebguy e n’en nib m’agan’ ngay. Dabiyog rok Hitler ni nge thang e bin riyul’ e liyor fa sunmiy reb e am nib gel nga Gil’ilungun Got. Rib mich u wan’ pi walagdad nra munmun ma ra mus e gagiyeg rok Hitler.

17 Riyul’ e n’en nib mich u wan’ e pi walag nem. Ya in e duw nga tomuren, me puth e am ko Nazi ma faanem i Heinrich Himmler ni faani gaar “gamad e Nazi e gamad be gagiyeg u roy u fayleng” e milnag e pogofan rok. Nap’an ni be mil, me mada’nag reb e walag ni pumoon ni manang owchen ni ka nog Lübke ngak ni immoy nib kalbus. Bochan ni kari kireban’ e cha’ney i Himmler me fith ngak Brother Lübke ni gaar: “Gur e En ga ma un i Fil e Bible, mang e nge buch e chiney?” I yog Brother Lübke ngak Himmler ni Pi Mich Rok Jehovah e yad manang nra puth e am ko Nazi min pagrad u kalbus. Boor ban’en nib kireb ni i weliy Himmler u murung’agen e Pi Mich Rok Jehovah u m’on riy. Machane nap’an ni taw ko ngiyal’ nem ma daki nang ko mang e nge yog. De n’uw nap’an nga tomuren, me li’ ir nge yim’. Mang e gad be fil ko re n’ey? Fol Bible ni gad ma tay nib muun ngay e pi yiiy ni gad ma fil e rayog ni nge gelnag e michan’ rodad, miki ayuwegdad ni ngad pared ni gad ba mudugil u nap’an ni yibe gafgownagdad.​—2 Pet. 1:19-21.

18. Mang fan nib t’uf ni ngad nanged e “bin riyul’ i fan e thin rok Got” ma gad nang e “tin nib mat’aw ko tin nde mat’aw” ni faani yoloy Paul murung’agen nrogon nib puluw ko John 6:67, 68?

18 Ba t’uf ni ngaud daged e t’ufeg ya nge yag ni m’ug e mich riy ni gadad e tin riyul’ e Kristiano. Machane kub t’uf ni ngad nanged e “bin riyul’ i fan e thin rok Got” ma gad nang e “tin nib mat’aw ko tin nde mat’aw.” (Fil. 1:9) Ya faanra danga’, ma rayog ni ngaud uned u fon e pi “machib rok e girdi’ ni yad be bannag e girdi’” ni bod ni be fekdad e nifeng i yan nib muun ngay e piin kar digeyed e bin riyul’ e liyor ma kar chelgad kar togopuluwgad ngay. (Efe. 4:14) Nap’an ni tal boor i gachalpen Jesus ndakur leked, me micheg apostal Peter nib mich u wan’ ni Jesus e bay rok fapi thin “ni ir e ma pi’ e yafos ndariy n’umngin nap’an ngak e girdi’.” (Mu beeg e John 6:67, 68.) Yugu aram rogon ni ngiyal’ nem e dawori tamilang u wan’ Peter fan urngin e pi thin nem, machane i par nib yul’yul’ ni bochan e manang e tin riyul’ u murung’agen Kristus. Ku aram rogom nrayog ni ngam gelnag e michan’ rom ko tin be fil e Bible. Faan ga ra rin’, ma demtrug e n’en nra buch ma ra par e michan’ rom nib gel, mu kum ayuweg boch e girdi’ ni ngki gel e michan’ rodad.​—2 John 1, 2.

UW ROGON NI GA RA FULWEG?

  • Mang fan susun e gathi kemus ni nge tor e michan’ rodad ko t’ufeg ni bay u thildad e pi walag ni Kristiano?

  • Uw rogon ni ngari mich u wan’um ni ga bay ko tin riyul’?

  • Uw rogon ni nge ayuweg e pi tamachib e piin yad be fil e Bible ngorad ni ngar nanged fan e tin riyul’?

TANG 72 Ngan Weliy e Tin Riyul’ u Murung’agen Gil’ilungun Got

a Re article ney e ra ayuwegdad ni ngad nanged feni ga’ fan e tin riyul’ u Bible. Ku ra weliy boch e kanawo’ nrayog ni ngari mich u wan’dad nib puluw e tin ke michan’dad ngay.

b Mu guy fapi thin ni bay u tan fare article ni kenggin e, “Gimew Be Non e En ni Buguli Yoror Rom” ni bay u yu ken e Wulyang ko Damit ko duw ni 2010 nge mada’ ko 2015. Kenggin boch e pi thin ney e aram e, “Ba Mich Jesus u Wan’ e Pi Mich Rok Jehovah, Fa?” nge “Wuin e Tabab Gil’ilungun Got ko Gagiyeg?” Pi thin ney e ra ayuwegem ni ngam tamilangnag boch e machib u lan e Bible ngak e girdi’.

c Mu guy fa gal ke Wulyang ko Damit ko June 1, 2012 nge May 2020 ni be weliy murung’agen e pi yiiy ney.

d MURUNG’AGEN E SASING: Nap’an e fol Bible ni tabinaw, ma aram me fil l’agruw e gallabthir ngak gal fakrow e pi yiiy u Bible ni be weliy murung’agen fare gafgow nib ga’.

e MURUNG’AGEN E SASING: Nap’an nra yib fare gafgow nib ga’ ma dabi gin girdien e re tabinaw ney ko n’en nra buch.

    Yapese Publications (1984-2025)
    Mu Log Out
    Mu Log In
    • Waab
    • Mu Sharenag
    • Pi N'en Nrayog ni Ngam Mel'eg
    • Copyright © 2025 Watch Tower Bible and Tract Society of Pennsylvania
    • Rogon ni Ngan Fanay
    • Privacy Policy
    • Privacy Settings
    • JW.ORG
    • Mu Log In
    Mu Sharenag