Kaam Denen nib Togopuluw ko fare Kan ni Thothup, Fa?

“Ba’ e denen ni ma fekey ko yam’.”​—1 JOHN 5:16.

1, 2. Uw rogon ni gad ra nang nrayog ni ngad denengad nib togopluw ko fare kan ni thothup?

“KE MAGAWON e tafinay rog ya sana kug denen nib togopluw ko fare kan ni thothup.” Rogon ni yoloy reb e ppin nu Chiyamen, ni yugu aram rogon ni be pigpig ku Got. Rayog nra denen reb e Kristiano nib togopluw ko kan ni thothup rok Got, ara gelngin?

² Arrogon, rayog ni ngan denen nib togopluw ko kan ni thothup rok Jehovah. I yog Jesus ni gaar, ‘Demtrug e re denen ni kar rin’ed ara n’en nib kireb ni ka rogned ma rayog ni nge n’ag Got fan rorad; machane en nra yog e thin nib kireb nib togopluw ngak fare kan ni thothup e dabi n’ag Got fan rok.’ (Matthew 12:31) Kan ginangdad: “Ya dakuriy reb e maligach nra chuweg e denen ni faanra da lemniged ni nguud denengad i yan u tomuren ni kan weliy ngodad e tin riyul’ kad nanged. Ra er rogon me ere n’en ni ke magey ni ngan rin’ e ngan tamdag ko n’en ni bayi m’ug: ni aram e pufthin.” (Hebrews 10:26, 27) Ke yoloy apostal John ni gaar: “Ba’ e denen ni ma fekey ko yam’.” (1 John 5:16) Machane ba mil fan ngak e en ke denen nib ubchiya’ ni nge nang ko fare denen ni ke rin’ e ra ‘fek i yan ko yam’ fa danga’’?

Kalngan’ e Ra N’ag Fan e Kireb

3. Ba ga’ ni mange be dag ni kari kireban’dad nbochan ba denen ni kada rin’ed?

³ Jehovah e ir e tomur ni ra pufthinnag e piin ma rin’ e kireb. Riyul’, ni gadad gubin nra bagadad ma nge weliy ngak Got e n’en ni i rin’, ma gubin ngiyal’ ni ma rin’ Got e tin nib mat’aw. (Genesis 18:25; Roma 14:12) Jehovah e ra turguy ni kada rin’ed reb e denen ndabiyog ni nge n’ag fan, ma aram e ra chuweg e kan ni thothup rok rodad. (Psalm 51:11) Machane, faanra kari kireban’dad ngay nbochan ba denen ni kad rin’ed, ma bod ni rriyul’ ni kad kalgadngan’dad. Ere mange bin riyul’ e kalngan’?

4. (a) Uw rogon ni ngam weliy fan e kalngan’? (b) Mange ri ma fal’eg lanin’uy ni bay ko Psalm 103:10-14?

⁴ Ngan kalngan’uy e be yip’ fan ni ngad thilyeged e ngongol rodad ko pi n’en nib kireb ni uda rin’ed kafram. Fan ere n’em e ngari kireban’dad ngad pied keru’dad ko denen ni kada rin’ed. Faanra kada rin’ed reb e denen nib ubchiya’ ma kada rin’ed ban’en ni nge dag ni kada kalgadngan’dad, ma rayog ni fal’eg lanin’dad e thin ko fare psalmist ni: “Der ma gechignagdad [Jehovah] nrogon ni ba’ rogon ni nge gechignagdad, ara pi’ ngodad wenegan e denen rodad nge kireb rodad nrogon. Rogon feni ga’ thilin e fayleng nge lan e lang, e aram ga’ngin nrib t’uf rok Somol e piin ni yad be par ni bay madgun Somol u wan’rad. Rogon feni mal’af thilin e ngek nge ngal, e aram rogon nra chuweg e denen rodad nge mal’afnag rodad. Rogon feni gol ba matam ngak pi fak, e aram rogon feni gol Somol ngak e piin ni yad be par ni bay madgun u wun’rad. Manang e n’en nni ngongliydad ngay; ma manang ni gadad e fiyath.”​—Psalm 103:10-14.

5, 6. Mu weliy e tin ni ba ga’ fan e thin ni bay ko 1 John 3:19-22, ma ga weliy fan e thin rok fare apostal.

⁵ Thin rok apostal John e ku ma fal’eg lanin’uy ni gaar: “Ereray rogon ma gadad nang ni gadad mmuun ko tin riyul’. Ereray rogon me pagan’dad u p’eowchen Got. Ya faanra yog lanin’dad ngodad ni gadad ba kireb, ma kad nanged ni Got e ka ba ga’ nga lanin’dad, ni gubin ban’en ma manang. Pi tafager rog, faanra dabi yog lanin’dad ngodad ni gadad ba kireb ma ba pagan’dad u p’eowchen Got. Demtrug e n’en ni gadad ra ning ngak ma ma pi’ ngodad, ni bochan e gadad be fol ko tin ni ke yog ngodad ma gadad be rin’ e tin nib m’agan’ ngay.”​—1 John 3:19-22.

⁶ Gad “manang ni da bad ko tin riyul’” ya gadad be dag e t’ufeg ko walag ma gathi gadad be denen i yan. (Psalm 119:11) Faan gad ra thamiy ni kad olobochgad u boch ban’en, ma ngada lemnaged ni “Got e ka ba ga’ nga gum’irchadad ni manang urngin ban’en.” Jehovah e be dag e runguy rok nbochan e manang ni ‘gadad be par nrib t’uf rodad e piin ni gadad ni ke mich Kristus u wan’rad,’ ere gad be cham ko denen, ma gadad be athamgil ni ngada rin’ed e tin nib m’agan’ ngay. (1 Peter 1:22) Dabi “magawon” lanin’dad ni faanra i pagan’dad ngak Jehovah, ma gad be dag e t’ufeg ko walag ma dabi par ni nguud denengad ni lanin’dad. Ma ba “puf rogodad ni ngada nonad ngak Got” u fithik’ e meybil, ma ra fulweg taban ya bochan ni gadad be fol ko pi motochiyel rok.

Piin Kar Denengad nib Togopuluw ko fare Kan ni Thothup

7. Mange ra dugliy ko yira n’ag fan reb e denen fa danga’?

⁷ Mang boch e denen ndab nn’ag fan? Ra ngan fulweg e re deer ney, ma ngada lemnaged boch ban’en ni i rin’ e girdi’ ni bay u lan e Bible. Re n’ey e ra fal’eg lanin’dad ni faan gad ra kalngan’dad ngad pied keru’dad ko denen ni kada rin’ed nib ubchiya’ ma ka be kireban’dad. Gad ra guy ni gathi ri bochan e miti denen ni ke rin’ be’; ya be yan u rogon ko mang fan ni rin’, nge rogon laniyan’, nge feni adag ni nge rin’ e ba muun ko yira n’ag fan rok fa danga’.

8. Uw rogon ni denen boch e tayugang’ ko teliw nu Jew nib togopluw ko fare kan ni thothup ko bin som’on e chibog?

⁸ Pi tayugang’ ko teliw nu Jew ko bin som’on e chibog e ra togopuluwgad nib gel ngak Jesus Kristus ni aram e denen nib togopuluw ko fare kan ni thothup. Kar guyed gelngin Got ni be maruwel u pa’ Jesus u nap’an ni be fal’eg e maang’ang ni be n’uf Jehovah. Machane, pi toogor rok Kristus ney e u rogned ni aram gelngin Satan ni Moonyan’. Ma rogon ni yog Jesus, e piin ni yad be yog e thin nib kireb nib togopuluw ko fare kan ni thothup rok Got e ke rin’ reb e denen ni “dabiyog ni nge n’ag Got fan rok e chiney fa biid.”​—Matthew 12:22-32.

9. Mang fare thin ni be darifannag Got, ma mange yog Jesus u murung’agen?

⁹ Thin ni be darifannag Got ara blasphemy e aram e t’ar e thin nga daken, ara thin nib kireb. Bochan Got e ir Tabolngin fare kan ni thothup, ere yira yog e thin nib togopuluw ko re kan ni thothup rok ma bod ni ka nog e thin nib togopluw ngak Jehovah. Ra dab ni kalngan’uy ko miti nem e thin ma dabiyog ni nge n’ag Got fan. Thin rok Jesus ni murung’agen e re denen nem e be dag ni be weliy Jesus murung’agen e piin ni kar togopuluwgad ko kan ni thothup ni lem rorad. Bochan ni gelngin Jehovah e be maruwel u pa’ Jesus machane pi toogor rok e rogned ni re gelngin ney e yib rok Moonyan’, ma aram e denen ni be darifannag nib togopluw ko fare kan ni thothup. Aram fan ni gaar Jesus: “En nra yog e tin nib kireb nib togopluw ko fare Kan ni Thothup e ri dabi n’ag Got fan e denen rok, ya ke rin’ reb e denen ndabi m’ay machan biid.”​—Mark 3:20-29.

10. Mang fan ni ke yog Jesus ni Judas e “fak e magothgoth”?

¹⁰ Ku mu lemnag e n’en ni rin’ Judas Iskariot. Ba kireb e ngongol rok, me iring e salpiy u tafen e salpiy ni ir e ma chaariy. (John 12:5, 6) Tomur riy me yan Judas ngak e piin ma yog e thin rok yu Jew ngar puruy’gad u rogon ni nge pi’ Jesus ngorad, mar pied 30 yang e silber ngak ni puluwon. Arrogon, ke kireban’ Judas u tomren ni ke egnag Jesus, machane de kalngan’ ko denen ni ke rin’. Ere, angin e dariy rogon ni nge fos Judas ko yam’. Arfan ni ke yog Jesus ni “fak e magothgoth.”​—John 17:12, NW; Matthew 26:14-16.

Piin ni Daani Denen nib Togopuluw ko fare Kan ni Thothup

11-13. Uw rogon ni ke denen David ni Pilung nib l’ag ngak Bathsheba, ma mang e ke rin’ Got ngorow nra fal’eg lanin’uy?

¹¹ Yu ngiyal’, ma pi Kristiano ni yad ma yog e denen nib ubchiya’ ni kar rin’ed me ayuwegrad e piin piilal u lan e ulung e sana ka be magawon lanin’rad ko kireb ni kar rin’ed kafram nib togopuluw ko motochiyel rok Got. (James 5:14) Faanra aray rogodad, ma rayog ni yib angin fapi thin nu Bible ngodad ni ka nog ni fan ko piin ke n’ag Got fan e denen rorad.

¹² David ni Pilung e ke denen nib ubchiya’ ya ke chag ngak Bathsheba ni leengin Uriah. Ke yaliy e re pin ney ni rib pidorang ni be maluk u nap’an ni sap nga but’ u daken e chigiy ko naun rok, me mol’og David ngan fek i yib nga tafen e pilung mar pirew. Me munmun me nang ni ke diyen fare pin, me lemnag ni nge yib Uriah, ni figirngin ni ngar molow ya nge mith fare ngongol nib kireb ni kar rin’ew. Nap’an ni de m’ag fare n’en ni ke lemnag, me guy rogon fare pilung ni ngan li’ Uriah ko mahl nge yim’. Tomur riy, me mang Bathsheba leengin David me gargeleg ba bitir nge yim’.​—2 Samuel 11:1-27.

¹³ Jehovah e ke rin’ e tin ni nge rin’ ko n’en ni rin’ David nge Bathsheba. Ke n’ag Got fan rok David, nib tamilang nbochan ni ke kalngan’ nge fare m’ag ko Gil’ilungun ni kan fal’eg ni fan ngak. (2 Samuel 7:11-16; 12:7-14) Bathsheba e riyul’ ni ke kalngan’, ya kan tow’athnag ke mang chitiningin Solomon ni Pilung me mang reb e labthir rok Jesus Kristus. (Matthew 1:1, 6, 16) Faan gad ra denen, ma dab da paged talin ni ma guy Jehovah gelngin e kalngan’ ni gad ma tay.

14. Uw rogon feni gel e n’ag fan e kireb ni ke ta’ Got ni kan dag ko n’en ni rin’ Manasseh ni Pilung?

¹⁴ Gelngin ni ma n’ag Jehovah fan e kireb e kan guy nib tamilang ko n’en ni buch rok Manasseh ni Pilung nu Judah. Ke rin’ e tin ba kireb u p’eowchen Jehovah. Ke fal’eg boch e altar ni fan ku Baal, mi i tay fan “urngin fapi n’en ni bay u lan e lang,” miki fal’eg boch e altar ni fan ko tin nde riyul’ e Got u lan l’agruw e yoror ko tempel. Me urfiy pi fak ni nge mang maligach, me ta’ ir ko girdi’ rok ni ngar uned ko ngongolen e moonyan’, me k’aring e girdi’ nu Judah ngu Jerusalem “ngar ngongolgad nib gel e kireb riy ko tin ni i rin’ e pi nam ni ke thangrad Jehovah u p’eowchen yu Israel.” Dar motoyilgad nga rogon ni ginangrad e pi profet rok Got. Me munmun, me fek fare pilung nu Assyria Manasseh ngan kalbusnag. Nap’an ni bay Manasseh u kalbus, ma ri kalngan’ nib gel ni kari sobut’ laniyan’ ni yugu be meybil ku Got, me n’ag fan rok me sulweg ko liw rok u Jerusalem, ni aram e gin i mon’ognag e bin riyul’ e liyor riy.​—2 Kronicles 33:2-17, NW.

15. Mange n’en ni buch rok apostal Peter ni be dag ni Jehovah e ‘ri’ n’ag fan e kireb rok?

¹⁵ Bokum miriay e duw nga tomuren, me denen apostal Peter nib ubchiya’ ya ke yog nde nang Jesus. (Mark 14:30, 66-72) Machane, Jehovah e ‘ri’ n’ag fan rok Peter. (Isaiah 55:7) Mang fan? Bochan ni Peter e riyul’ ni kari kalngan’. (Luke 22:62) Bay e mich riy ni ke n’ag Got fan ya tomuren 50 e rran u nap’an e Pentekost, min tow’athnag Peter nge machibnag murung’agen Jesus ni de rus. (Acts 2:14-36) Bay tapgin ni nge mich u wan’uy ni Got e gathi ri ma n’ag fan e kireb ko pi Kristiano ni kar kalgadngan’rad e ngiyal’ ney? I tang fare psalmist ni gaar, “Faan mange mu tay ngan’um e kireb ni gamad be rin’, me mini’ e rayog rok ni nge thay ndab ni gechignag? Machane ga be n’ag fan romad.”​—Psalm 130:3, 4.

Ra Achignag e Magafan’ ni Bochan e Denen

16. Bochan e mang ma ra n’ag Got fan e denen ni kada rin’ed?

¹⁶ Pi n’en ni kad weliyed ni ke rin’ boch e girdi’ e ra ayuwegdad nge achignag e magafan’ nbochan ni kan denen nib togopluw ko kan ni thothup. Pi n’ey e be dag ni Jehovah e ri ma n’ag fan e denen ko piin ni kar kalgadngan’rad. Tin ba ga’ fan e ngar ni meybil ngak Got u fithik’ e yul’yul’. Faanra kad denengad, ma rayog ni ngada wenigniged ngan n’ag fan u daken fare biyul ni ognag Jesus, nge runguy rok Jehovah, nge denen ni ke af ngodad, nge yul’yul’ rodad ko pigpig ngak. Gad ra nang e runguy rok Jehovah, ma rayog ni nge pagan’dad nra n’ag fan e denen ni kada rin’ed.​—Efesus 1:7.

17. Mange gad ra rin’ faanra kad denengad ma ba t’uf e ayuw rok Got?

¹⁷ Uw rogon faanra kad denengad ma dabiyog ni ngada meybilgad ya kad wargad nbochan e denen ni kada rin’ed? Re n’ey, e yog James ni gachalpen ni gaar: “Faanra ba’ [be’ ni aram rogon] ma nge pining e piin ni yad piilal ko galesiya ngar bad ngak, ngar yibiliyed ngak Got mi yad liyef e gapgep nga daken u fithingan Somol. Re meybil ney ni yira tay u fithik’ e michan’ ngak Got e ra golnag fare m’ar; i Somol e ra chuweg e m’ar rok, ma pi denen ni ke ngongliy e ra n’ag Got fan.”​—James 5:14, 15.

18. Mang fan ni denen rok be’ e gathi dabiyog ni ngan n’ag fan ni ku ra kan tharbog ko ulung?

¹⁸ Mus ngak be’ ni faanra rin’ e kireb ndabi kalngan’ ma kan chuweg ko ulung, ma dabiyog ni nga nog ni denen rok e dabiyog ni ngan n’ag fan. Rogon murung’agen reb e Kristiano ni kan dugliy u Korinth ni kan tharbog nbochan e denen ni ke rin’, e yoloy Paul ni gaar: “Fare gechig ni ke ta’ boor i gimed ngak faanem e ke gaman. Ere chiney e ngam n’iged fan u wan’med e tin ni ke rin’ mi gimed pi’ e athamgil nga laniyan’, ya ri gel e kireban’ rok nge pag ir.” (2 Korinth 2:6-8; 1 Korinth 5:1-5) Machane, ra nge fel’ thilrad Jehovah, ma ba t’uf e ayuw ni bay u lan e Bible ni ayuw rok e piilal ni Kristiano mar micheged nriyul’ ni kar kalgadngan’rad. Thingar ra daged ni kar “pied keru’rad ko denen ni yad be rin’.”​—Luke 3:8.

19. Mange ra ayuwegdad ngad pared nib “yal’uw rogon” e michan’ rodad?

¹⁹ Mang ban’en nra k’aringdad ngad lemnaged ni kad denengad nib togopluw ko fare kan ni thothup? Rayog ni nge k’aring e meewar laniyan’ ara de fel’ fithik’ i dowey. Faanra aram rogon, ma meybil nge toffan e ra ayuwegey. Dab da paged Satan ni nge warnag lanin’dad, ngad talgad ko pigpig ngak Got. Bochan nde felfelan’ Jehovah ngay ni nge yim’ be’ nib kireb, ma riyul’ ndabi felfelan’ ngay ni nge mul reb e tapigpig rok. Faanra gad be rus ni kad denengad nib togopluw ko kan ni thothup, ma thingar da ul’ulgad i fil e Thin rok Got, nib muun ngay bayang ni bay ko Psalms. Ma ba t’uf ni ngada uned ko pi muulung nge fare maruwel ni ngan machibnag Gil’ilungun. Gad ra rin’ ni aram rogon ma ra ayuwegdad nge “yal’uw rogon” e michan’ me chuweg e magafan’ nbochan ni kan rin’ reb e denen ndabiyog ni ngan n’ag fan.​—Titus 2:2.

20. Mange pi n’en nra ayuweg be’ nge nang ndawori denen nib togopluw ko fare kan ni thothup?

²⁰ Piin be rus ni ke denen nib togopluw ko fare kan ni thothup e ngar fithed yad: ‘Kug ngongol nib togopuluw ko fare kan ni thothup fa? Riyul’ ni kug pi’ keruug ko denen rog? Bay e michan’ rog ni ra n’ag Got fan e denen, fa? I gag be’ ni kug digey e tin riyul’ ma kugu pag e tamilang rok Got fa?’ Girdi’ ni aram rogon e sana yad ra lemnag ni riyul’ ndawora ngongolgad nib togopuluw ko fare kan ni thothup rok Got, ma dawor ra manged e piin ni kar digeyed e tin riyul’. Kar kalgadngan’rad, ma yad be lemnag ni Jehovah e ra n’ag fan e kireb rorad. Faanra aram rogon, ma dawor ra denengad nib togopluw ko kan ni thothup rok Jehovah.

21. Mang boch e deer ni gad ra weliy ko bin migid e article?

²¹ Ri gad ra felfelan’ ni gad ra nang ndawor da denengad nib togopluw ko fare kan ni thothup! Machane, bochan e re n’ey, ma bay boch e deer ni ngada weliyed ko bin migid e article. Baaray rogon, ngad fithed gadad: ‘Riyul’ ni be pow’iyeg fare kan ni thothup rok Got fa? Ba gagiyel wom’engin e kan ni thothup ko yafas rog fa?’

Mange Fulweg Rom?

• Mang fan nrayog ni nga nog nrayog ni ngan denen nib togopluw ko fare kan ni thothup?

• Mang be yip’ fan e kalngan’?

• Mini’ e ke denen nib togopluw ko kan ni thothup u nap’an ni immoy Jesus u fayleng?

• Uw rogon nrayog ni ngan gel ngak e kireban’ ko denen ni yibe lemnag ni kan rin’ ndabiyog ni ngan n’ag fan?

[Picture on page 15]

Piin ka rogned ni be fal’eg Jesus e maang’ang u gelngin Satan e aram e denen nib togopluw ko kan ni thothup rok Got

[Picture on page 16]

Yugu aram rogon ni yog Peter ni de nang Jesus, ma gathi aram e denen ni dab nn’ag fan