Ke Chugur ni Nge Chuwegey Gil’ilungun Got ko Gafgow!

“Me yib gil’ilungum ngomad. Min rin’ e tin nib m’agan’um ngay u fayleng, ni bod rogon u tharmiy.”​—MATT. 6:10, NW.

1. Mang kenggin e machib rok Jesus?

NAP’AN ni pi’ Jesus Kristus fare welthin u daken e Burey, me uneg ba meybil ngay ni weliy e n’en kenggin e machib rok. I fil ngak pi gachalpen ni ngar yibilayed ku Got ni nge lungurad: “Me yib gil’ilungum ngomad. Min rin’ e tin nib m’agan’um ngay u fayleng, ni bod rogon u tharmiy.” (Matt. 6:9-13, NW) Jesus e “i yan u lan e pi binaw ni ba ga’ nge pi binaw ni ba achig, ni be machibnag ngak e girdi’ e Thin Nib Fel’ ni murung’agen e gagiyeg rok Got.” (Luke 8:1) I tay Jesus chilen ngak pi gachalpen ni gaar: ‘Ngam m’oneged u wan’med e gagiyeg rok Got nge tin nib m’agan’ ngay ni ngam rin’ed.’ (Matt. 6:33) Nap’an ni ga be fil e re article ney, mag yaliy boch e kanawo’ nrayog nim fanay u nap’an ni ga be yan ko machib. Bod ni, ngam lemnag rogon ni ga ra fulweg e pi deer ni baaray ni gaar: Uw feni ga’ fan fare thin ko Gil’ilungun? Mang nib t’uf ni ngan chuweg e girdi’ ko gafgow? Ma uw rogon nra chuweg Gil’ilungun Got e girdi’ ko gafgow?

2. Uw feni ga’ fan fare thin nib fel’ ko Gil’ilungun?

² Yog Jesus u m’on riy ni gaar: “Re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.” (Matt. 24:14) Rib ga’ fan fare thin nib fel’ ni murung’agen Gil’ilungun Got. Arrogon, ireray e re thin nth’abi ga’ fan u ga’ngin e fayleng! U lan e ulung ko Pi Mich Rok Jehovah ni boor ko 100,000 u ga’ngin e fayleng, e sogonap’an medlip e milyon e pi tapigpig rok Got ni yad be un ko machib, ma yad be weliy ngak boch e girdi’ ni ke m’ay i ngongliy fare Gil’ilungun. Re n’ey e ba thin nib fel’ ni bochan e ke sunmiy Got reb e am u tharmiy nra gagiyegnag e fayleng ni polo’. U tan e gagiyeg ko fare Gil’ilungun, e yira rin’ e tin nib m’agan’ Jehovah ngay u fayleng ni bod rogon ni yibe rin’ e tharmiy.

3, 4. Mang angin nra yib u nap’an ni yira rin’ e n’en nib m’agan’ Got ngay u fayleng?

³ Mang e ra buch ko girdi’ u nap’an ni yira rin’ e n’en nib m’agan’ Got ngay u fayleng? Jehovah e “bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith.” (Rev. 21:4) Dabki m’ar ara yim’ e girdi’ ni bochan e denen ni ke af ma dakun flont. Piin kar m’ad ni yad bay u wan’ Got e yad ra par ni manemus, ya micheg e Bible ni gaar: “Bayi faseg urngin e girdi’ ko yam’, ni tin nib fel’ nge tin nib kireb.” (Acts 24:15) Ra m’ay e mahl, m’ar, bilig, ma re fayleng ney e yira fal’eg nge mang paradis. Mus ko gamanman nib ta cham nra fel’ thilrad nge girdi’.​—Ps. 46:9; 72:16; Isa. 11:6-9; 33:24; Luke 23:43.

⁴ Bochan e pi tow’ath nrib fel’ nra fek fare Gil’ilungun i yib, ma arfan ni be weliy e yiiy ko Bible murung’agen e yafas ko re ngiyal’ nem ni aray rogon: “Piin ni yad mmunguy e bay ra tafanayed e fayleng, mu ur pired u fithik’ e gapas ni yad ba felfelan’.” Ma uw rogon e piin ni yad be ngongliy e kireb? Ke yog e Bible u m’on riy ni gaar: “Dab ki n’uw nap’an me yan e piin nib kireb nga bayang.” Machane, “piin ni be pagan’rad ngak Jehovah e yad ra tafanay e fayleng.”​—Ps. 37:9-11, NW.

5. Mang e bayi buch ko re m’ag n’ey?

⁵ U m’on ni nge buch e re n’ey, ma re m’ag ney nge pi am, nge pi teliw, nge pi siyobay riy e goo yira chuweg. Ma ireram e n’en nra rin’ e re am nu tharmiy nem. Kan thagthagnag ngak Daniel ni profet ni nge yog u m’on riy ni gaar: “Ngiyal’ ni bay i gagiyeg e pi pilung nem, e aram e bayi sunumeg Got nu tharmiy reb e gagiyeg ndariy e rofen nra mus. Ma binem e gagiyeg e dariy be’ nra gel ngay biid, machane bayi thirif u but’ urngin e pi pilung nem nge gagiyeg ni yad be tay me mang fa birok e gagiyeg e i par ndariy n’umngin nap’an.” (Dan. 2:44) Gil’ilungun Got​—nib am nib beech u tharmiy—​e ra gagiyegnag e girdi’ nu fayleng. Ra yib e “bin nib beech e lan e lang nge bin nib beech e fayleng, ni aram e tin nib mat’aw e ngongol e bay i par riy.”​—2 Pet. 3:13.

Rib T’uf ni Ngan Chuwegey ko Gafgow e Chiney

6. Uw rogon ni ke weliy e Bible e kireb ko re fayleng ni kireb ney?

⁶ Nap’an ni togopuluw Satan, nge Adam nge Efa ngak Got, ni bochan e yad baadag ni ngar turguyed rorad e tin nib fel’ nge tin nib kireb, ma aram nap’an ni tabab e kireb ko girdi’. U m’on ko fare Ran ni Tharey e fayleng, u tomren 1,600 e duw ma “kari gel e kireb rok e girdi’ u gubin yang, ni gubin ngiyal’ ma ba sug lanin’rad ko tin nib kireb.” (Gen. 6:5) Ma sogonap’an 1,300 e duw nga tomren, me ri guy Solomon ni kari gel e kireb me yoloy ni gaar: “Ku gog nib fel’ e piin ni kar m’ad ma gathi piin ni kab fos. Kab fel’ e erorow nde moy, ya der guy e tin ni yibe rin’ nib kireb.” (Ekl. 4:2, 3, NW) Sogonap’an 3,000 e duw nga tomren ma aram e ngiyal’ rodad ney, ni ke garer e kireb.

7. Mang fan nrib t’uf ni nge chuwegey Got ko gafgow e chiney?

⁷ Yugu aram rogon nib riyul’ ni ke n’uw nap’an ni ke par e kireb, ma ka bay fan nib t’uf ni nge chuwegey Gil’ilungun Got ko gafgow e chiney. Rarogon e par fa 100 nem e duw ni ke yan e ke gel e kireb riy, ma ka be gel e kireb riy i yan. Bod ni, fare Worldwatch Institute e ke yog ni gaar: “Dalip yay ni ke mun nga oren e girdi’ ni kar m’ad ko mahl ko [bin 20] e chibog nga oren e girdi’ ni ka i yim’ ko mahl ko bin som’on e chibog AD ngeni mada’ ko 1899.” Ka nap’an e 1914 ma ke pag 100 milyon e girdi’ ni kar m’ad ko mahl. Reb e encyclopedia e ke susunnag ni sogonap’an 60 milyon e girdi’ ni yim’ u nap’an e Bin L’agruw e Mahl ko Fayleng. Ma chiney ni bay boch e nam ni bay talin e cham rorad ni bay e nuclear riy, e ke mab e kanawo’ ngak e girdi’ ni ngar lied boch e girdi’ ni boor u fayleng ni ga’ngin. Mus ko science ni ke mon’og nge falay ni ke yoor mit, ma gubin e duw ma sogonap’an lal e milyon e bitir ni be yim’ ni bochan e bilig.​—Mu guy e guruy ni 9 ko fare babyor ni What Does the Bible Really Teach? (Mang e Ri Be Fil e Bible?)

8. Mang e be micheg rogon e gagiyeg ko girdi’ ni ke yan bokum e duw?

⁸ Athamgil ni be tay e girdi’ e ku dar yog ni nge chuweg e tin kireb. Am, siyobay, nge pi yurba’ e teliw ko re fayleng ney e dar yog rorad ni ngar pied e ayuw ko girdi’ ni fan ko gapas, nge salpiy, nge tin nib t’uf ko dowef. Pi ulung ney e dar yog ni ngar chuweged e magawon ko girdi’, ya fin yad be munnag daken. Rriyul’, ni urngin biyu’ e duw ni ke gagiyeg e girdi’ e ke micheg feni riyul’ fapi thin ni gaar: “De milfan ngak e girdi’ kanawo’rad. De mil fan ngak e girdi’ ni be yan ni nge gagiyegnag rogon i wuf ay.” (Jer. 10:23, NW) Arrogon, “ma gagiyegnag e girdi’ boch e girdi’ me yib e magawon ngorad.” (Ekl. 8:9, NW) Maku, “urngin e tin ni ke sunumiy Got e be gel’gel’ ko amith ni bod rogon e amith ko gargel.”​—Rom. 8:22.

9. Mang e pi n’en ni manang e pi Kristiano nra i buch e chiney ko “tin tomren e rran”?

⁹ Ke weliy e Bible murung’agen e ngiyal’ rodad ney ni gaar: “Tin tomren e rran e ri bay mo’maw’ ni ngan par nrogon e tin riyul’ ni girdien Kristus.” Tomren ni ke weliy rarogon e tin tomren e rran u tan e gagiyeg ko girdi’, me gaar fare yiiy: “Girdi’ nib kireb nge piin ni yad be dake girdien Kristus e bayi gel farad kireb.” (Mu beeg e 2 Timothy 3:1-5, 13.) Aram e n’en ni manang e pi Kristiano ni bayi buch, ya “tin ni ka ba’ e girdi’ nu fayleng e ke suweyrad Faanem nib Kireb,” ni aram Satan. (1 John 5:19) Machane, n’en nib fel’ riy e dabki n’uw nap’an ma piin nib t’uf Got rorad e bay ni chuweg ko gafgow. Yira chuwegrad ko re fayleng ney, ni be gel e kireb riy i yan.

N’en ni Rayog ni Chuwegdad ko Gafgow

10. Mang fan ni kemus ni Yigoo Jehovah e rayog ni nge pagan’dad ngak nra chuwegdad ko gafgow?

¹⁰ Nap’an ni ga be wereg fare thin nib fel’, mag tamilangnag ni kemus ni Yigoo Jehovah e rayog ni chuwegey ko gafgow. Kemus ni yigoo ir e bay gelngin maku ba m’agan’ ngay ni nge chuweg e pi tapigpig rok ko gafgow. (Acts 4:24, 31; Rev. 4:11) Rayog ni nge mudugil u wan’dad nra ayuweg Jehovah e girdi’ rok me lebguy e n’en nib m’agan’ ngay, ya ke micheg ni gaar: ‘Rogon ni kug lemnag, e aram rogon nra buch.’ Urngin bug e thin ni ke yog e ‘dabiyog ni nge dabi rin’ e tin ni ke m’ay i lemnag [rok].’​—Mu beeg e Isaiah 14:24, 25; 55:10, 11.

11, 12. Mang e ke micheg Got ngak e pi tapigpig rok?

¹¹ Ke micheg Jehovah nra ayuweg e pi tapigpig rok u nap’an nra pufthinnag e piin nib kireb. Nap’an ni l’og Got Jeremiah ni profet ni nge non ngak e pi tadenen, me gaar: “Dab mu tamdag ngorad.” Mang fan? “Ya bay ug un ngom nguug yoror rom.” (Jer. 1:8) Ku arrogon, nnap’an ni chugur ni nge gothey Jehovah fare binaw nib kireb ni yu Sodom nge Gomorrah, me pi’ l’agruw i engel ni nge ayuweg Lot nge tabinaw rok ngar chuwgad nga ranod nga bang ndariy e riya’ riy. “Me pag Somol e sulfur ni be yik’ nge mul . . . nga daken yu Sodom nge yu Gomorrah.”​—Gen. 19:15, 24, 25.

¹² Rayog ni nge ayuweg Jehovah e piin ni yad be rin’ e tin nib m’agan’ ngay u ga’ngin e fayleng. Nap’an ni gothey e bin kakrom e m’ag u daken e ran ni pi’ nge tharey e fayleng, ma “ke mus ni piin ni ayuwegrad ndar uned ko yam’ e Noah, ni i machibnag e tin nib mat’aw, nge ku medlip i girdi’.” (2 Pet. 2:5) Jehovah e ku ra ayuweg bayay e piin ni yad ba fel’ u nap’an nra gothey e re fayleng ni kireb ney. Thin rok e be gaar: “Mu gayed Jehovah, gimed e piin nib sobut’an’ u fayleng. Mu gayed e tin nib mat’aw ban’en, mu gayed e sobut’an’. Ma sana rayog ni mmithgad u nap’an fare rran ko damumuw rok Jehovah.” (Zef. 2:3, NW) Angin e re magothgoth nem ni yira tay u ga’ngin e fayleng e, ‘piin nib fel’ e ngongol rorad e yad ra par u fayleng, machane piin ni yad ba kireb, e ran thirifrad u but’.’​—Prov. 2:21, 22.

13. Uw rogon ni yira ayuweg e pi tapigpig rok Jehovah ni kar m’ad?

¹³ Machane, boor e pi tapigpig rok Got ni kar m’ad ni bochan e m’ar, nge gafgow ni yibe tay ngorad, nge ku boch ban’en. (Matt. 24:9) Ere, uw rogon, ni yira chuweg gubin e pi n’ey? Rogon ni ka nog faram e, bay ni “faseg e girdi’ ko yam’, ni . . . piin nib mat’aw.” (Acts 24:15) Rra fel’ lanin’dad ni ngad nanged ndariy ban’en nra taleg Jehovah ndabi chuweg e pi tapigpig rok ko gafgow!

Ba Am nib Mat’aw

14. Mang fan nib pagan’dad ngay ni Gil’ilungun Got e ba am nib mat’aw?

¹⁴ U nap’an e machib rom, ma rayog ni ngam weliy ni Gil’ilungun Jehovah u tharmiy e ba am nib mat’aw. Aray rogon ni bochan e be dag pi fel’ngin Got, ni bod e yal’uw, mat’aw nge t’ufeg. (Deut. 32:4; 1 John 4:8) Ke tay Got Gil’ilungun nga pa’ Jesus Kristus, ni ir e en nri bay rogon ni nge gagiyegnag e fayleng. Kub m’agan’ Jehovah ngay ni yira mel’eg 144,000 e Kristiano u fayleng ngan fekrad nga tharmiy ni ngar uned ngak Kristus i gagiyegnag e fayleng.​—Rev. 14:1-5.

15. Mog e thil u thilin e gagiyeg u Gil’ilungun Got ko gagiyeg ko girdi’.

¹⁵ Rib gel e thil u thilin e gagiyeg rok Jesus nge fare 144,000 ko gagiyeg rok e girdi’ nde flont! Piin ni yad be gagiyegnag e re m’ag ney e yad ba kireb ma kar feked e piin ni yad be maruwel u tan pa’rad ni ngar uned ko mahl, ma angin ni keb e yam’ ni be tay bokum milyon e girdi’. Arfan ni be fonownagdad e Bible ndab da pagedan’dad ko girdi’ “ya dabiyog ni ngar ayuweged e yafas”! (Ps. 146:3) Machane Jesus e ra gagiyeg u fithik’ e t’ufeg! I gaar Jesus: “Mired ngog, ni gimed gubin e piin ni ke aw parowmed i fek e n’en nib tomal ni gimed be fek, mu gu pi’ e toffan ngomed. Mfeked e mat’ rog ngam tiyed nga pomed, mi gimed folwok rog, ya gub munguy ma gub sobut’an’; mi gimed pirieg e toffan. Ya re mat’ ni gu ra pi’ ngomed e mmom, ma tomalngin e re n’en ni gu ra tay nga pomed e bbaud.”​—Matt. 11:28-30.

Ke Chugur ni Nge Mus e Tin Tomren e Rran!

16. Uw rogon nra mus e tin tomren e rran?

¹⁶ Re fayleng ney e ke par ko tin tomren e rran, ara ‘tungun e re m’ag ney’ ni ka nap’an e duw ni 1914. (Matt. 24:3) Dabki n’uw nap’an, ma n’en ni yog Jesus e ‘gafgow ni ba ga’’ ngay e bayi yib. (Mu beeg e Matthew 24:21.) Re gafgow nib ga’ nem e ra chuweg e re fayleng rok Satan ni kireb ney. Machane uw rogon nra tabab e re gafgow nib ga’ nem? Ma uw rogon nra mus?

17. Mang e be yog e Bible nra buch u tabolngin fare gafgow nib ga’?

¹⁷ Fare gafgow nib ga’ e ra tabab nib tomgin. “Ya ri gimed manang ni fare rran rok Jehovah e ra yib ni bod be’ nib mororo’ ni yib nnep’. Nap’an ni bay ra gaargad: ‘Ke yib e gapas nge pagan’!’ Ma aram e yira thang e pogofan rorad nib tomgin ni bod e amith ni ma yib ngak be’ ni ppin ni be n’en ni nge gargel.” (1 Thessalonika 5:2, 3, NW.) Fare gafgow nib ga’ ni kan weliy u m’on riy e ra tabab u nap’an nra lemnag e pi nam ni ke chugur ni ngar pithiged e pi magawon rorad nib ga’. Magothgoth ni yira tay nib tomgin ko fare “Babylon nib Gilbuguwan,” ni aram e pi yurba’ e teliw ni googsur u fayleng, e yira gin ngay. Pi pilung nge ku boch e girdi’ e yad ra gin u nap’an ni yira pufthinnag fare Babylon nib Gilbuguwan.​—Rev. 17:1-6, 18; 18:9, 10, 15, 16, 19.

18. Uw rogon ni ma rin’ Jehovah ban’en ko togopuluw ni ma tay Satan ko girdi’ Rok?

¹⁸ Ra taw nga ba ngiyal’, ma ra m’ug e “pow ni bayi m’ug u mit e yal’, ngu mit e pul, ngu mit e pi t’uf,” miki “m’ug e pow ko en ni Fak e Girdi’ u lan e lang.” Ma aram e rayog ni ngad ‘sak’iygad ngad changargad nga lang, ya aram e ke chugur ni ngan chuwegdad u fithik’ e gafgow.’ (Luke 21:25-28; Matt. 24:29, 30) Satan, ara Gog, e ra togopuluw ngak e girdi’ rok Got. I weliy Jehovah murung’agen e piin ni yad be togopuluw ngak e pi tapigpig rok Jehovah ni gaar: “En nra math ngomed e be math nga tiren owcheg.” (Zek. 2:8, NW) Ere, dabiyog ni nge gotheyrad Satan. Mang fan? Bochan ni fare Somol Nth’abi Tolang ni Jehovah e ra rin’ ban’en ni fan e nge chuweg e pi tapigpig rok ko gafgow.​—Ezek. 38:9, 18.

19. Mang nrayog ni pagan’dad ni pi salthaw rok Got e yad ra thang e m’ag rok Satan?

¹⁹ Nap’an nra rin’ Got ban’en nib togopuluw ko pi nam, ma ‘bay ra nanged ni ir Jehovah.’ (Ezek. 36:23) Ra l’og e pi salthaw rok ni ngar mahlgad bokum biyu’ e pi kan ni yad be un ngak Kristus Jesus​—ni ngar gotheyed e gin ni ka bay ko m’ag rok Satan u fayleng. (Rev. 19:11-19) Nap’an nra yib ngan’dad fare n’en nu lan taareb e nep’ ma taareb e engel e “thang e fan rok 185,000” e pi toogor rok Got, ma rayog ni nge pagan’dad ni pi salthaw nu tharmiy e yad ra gothey e gin ni ka bay ko re m’ag rok Satan ney u fayleng ma fare gafgow nib ga’ e ra mus ko Armageddon. (2 Ki. 19:35; Rev. 16:14, 16) Yira kalbusnag Satan nge pi moonyan’ rok u lan bbiyu’ e duw. Tomur riy, ma yira gotheyrad.​—Rev. 20:1-3.

20. Mang e ra rin’ Jehovah u daken Gil’ilungun?

²⁰ Fayleng e yira chuweg e tin nib kireb riy, ma girdi’ nib mat’aw e yad ra par u ga’ngin e re fayleng ney ni manemus. Ra micheg Jehovah ni ir e En ni Ma Chuwegey ko Gafgow. (Ps. 145:20) U daken Gil’ilungun e ra tolangnag mat’awun ni nge gagiyeg, me thothupnag fithingan, me lebguy e n’en nib m’agan’ ngay ni fan ko fayleng. Manga yugu mu felfelan’ ko machib ni ga be tay ni aram e ga be wereg e re thin nib fel’ ney ma ga be ayuweg e piin “ke mel’egrad Got ni nge yog e yafas ndariy n’umngin nap’an ngorad” ngar nanged ni ke chugur ni nge chuwegey Gil’ilungun Got ko gafgow!​—Acts 13:48.

Ka Ga Manang?

• Uw rogon ni gagiyelnag Jesus feni ga’ fan fare Gil’ilungun?

• Mang fan nib t’uf ni ngan chuwegdad ko gafgow ni ka chiney?

• Mang boch ban’en nra buch u nap’an fare gafgow nib ga’?

• Uw rogon ni Jehovah ir e En Th’abi Ga’ ni ma Chuwegey ko Gafgow?

[Pictures on page 16, 17]

Thin rok Got e ke yog u m’on riy ni yira machib u ga’ngin e fayleng ko ngiyal’ rodad ney

[Picture on page 19]

Rayog ni nge ayuwegdad Jehovah, ni bod rogon ni ayuweg Noah nge tabinaw rok

[Picture on page 20]

Jehovah e ‘bayi n’ag urngin e lu’ u owcherad . . . , ma dab ku unim’.’​—Rev. 21:4