Mu Dugliy ni Ngam Pigpig Ku Jehovah e Chiney Ni Kab Fel’ Yangarem
“Nguum par ko tin nib riyul’ e thin ni kan fil ngom, ni ir e kari mich u wan’um.”—2 TIM. 3:14.
1. Uw rogon u wan’ Jehovah e pigpig ni be tay e pi Mich rok nib fel’ yangarrad?
RIB GA’ fan e pigpig ni be tay e piin fel’ yangaren u wan’ Jehovah ma ke thagthagnag ba yiiy u murung’agrad. I tang fare psalmist ni gaar: “Rofen ni ga ra mahl ngak e pi toogor rom e ra un e tirom e girdi’ ngom nra bagayad me ir e ra ognag ir. Rogon e waangchal ni bay nri kakadbul, e aram rogon e piin ni pagel ni girdi’ rom ni bay ra bad ngom nga daken fapi burey nib thothup.” (Ps. 110:3) Arrogon, rib ga’ fan u wan’ Jehovah e pi fel’ yangaren ni yad baadag ni ngar pigpiggad ngak.
2. Mang boch ban’en ni fan ko gabul nge langlath ni ma magawonnag e pi fel’ yangaren e ngiyal’ ney?
2 Gimed e piin fel’ yangaren u lan e ulung ko Kristiano, kam ognaged gimed ngak Jehovah? Sana boor e piin fel’ yangaren ni kar pirieged nib mo’maw’ ni ngar mel’eged ko ngar pigpiggad ngak Jehovah fa danga’. Pi ga’ ko siyobay, nge sensey, ma yu ngiyal’ e girdi’ nu tabinaw nge fager e yad ma yog ko piin fel’ yangaren ni ngar nameged e tin nra fel’ rogorad riy. Ba’ boch e girdi’ nu fayleng ni yad ma moningnag e pi fel’ yangaren ni be nameg e tirok Got ban’en. Machane, riyul’ riy e, ngan pigpig ku Got e aram e bin nth’abi fel’ e kanawo’ nrayog ni ngad nameged ko yafas. (Ps. 27:4) Mu lemnag dalip e deer u murung’agen e re n’ey: Mang fan ni ngan pigpig ku Got? Yugu demtrug e n’en nrayog ara rin’ boch e girdi’, ma uw rogon ni ngam mon’og ni gur be’ ni kam ognagem ngak Jehovah? Mang boch i kanawoen e pigpig nib fel’ nrayog ni mab ngom?
Pigpig ku Jehovah e Aram e N’en nib Mat’aw ni Ngan Rin’
3. Uw rogon nra rin’ e tin ke sunmiy Jehovah ban’en ngodad?
3 Mang fan ni ngam pigpig ngak fare Got nib riyul’ mab fas? Revelation 4:11 e be weliy fan ni gaar: “Somol romad ma Got romad! Ba’ rogom ni nga nog e sorok ngom, min ta’ fam, ma ba’ rogom ni nge mil suwon urngin ban’en ngom. Yi gur e mu sunmiy urngin ban’en, yi gur e mu lemnag mi yad sum ni yad ba fos.” Jehovah ir e En ni Sunmiy urngin ban’en ni ba’. Rib fel’ yaan e fayleng! Gek’iy, nge floras, nge gamanman, nge day, nge burey, nge ran ni boor ni be map’ u tabon bangi war e gubin ni Jehovah e ke ngongliy. Psalm 104:24 e be gaar: “Ke sug e fayleng nga urngin e tin ni kam sunumeg!” Ri gad be pining e magar ni bochan e ke pi’ Jehovah e dowef nge man’ey rodad ni ir e ke ayuwegdad ni ngad felfelan’gad ko fayleng nge tin nib fel’ ni bay riy! Felfelan’ rodad ko pi n’en nrib fel’ ni ke sunmiy e ir e susun nra k’aringdad ni ngad adaged ni ngad pigpiggad ngak.
4, 5. Mang e ngongol rok Jehovah ni chugurnag Joshua ngak?
4 Reb i fan ni ngad pigpiggad ngak Jehovah e kan pirieg ko thin rok e en nib ga’ rok yu Israel ni aram Joshua. Nap’an ni chugur nga tomren e yafas rok, me gaar ngak e girdi’ rok Got: “Ri gimed manang u polo’ i gum’irchamed ngu polo’ i yafas romed ni dariy bbugithin nib fel’ ni ke yog Jehovah ni Got romed ni ke aw nib m’ay fan. Ya urngin ni ke riyul’ ni fan ngomed.” Mang nrayog ni nge yog Joshua ere bugithin ney?—Josh. 23:14, NW.
5 Ba mudugil ni ke nang Joshua e n’en ni ke micheg Jehovah nra pi’ reb e binaw ni nge tafanay piyu Israel, ni bochan e ilal u Egypt. (Gen. 12:7; 50:24, 25; Ex. 3:8) Ma aram me guy Joshua e tin ke micheg Jehovah ni aram e pi’ fa Ragag i Gafgow nge yib nga Egypt me towasariy Farao ni gelan’ nge pag piyu Israel nga ranod. I moy Joshua ko piin ni ayuwegrad nga barba’ fare Day ni Row miki guy Farao nge pi salthaw rok nra m’ad u lan fagi day. Nap’an ni yad be milekag u “daken e ted” nu Sinai, me guy Joshua rogon ni pi’ Jehovah e tin nib t’uf rok piyu Israel. Dariy bagayad nim’ ko belel ara bilig. (Deut. 8:3-5, 14-16; Josh. 24:5-7) Nap’an ni taw ko ngiyal’ ni nge gel piyu Israel ko fare nam nu Kanaan mar tafanayed fare Nam ni Kan Micheg, miki guy Joshua rogon ni ayuwegrad fare Got ni ur pigpiggad piyu Israel ngak.—Josh. 10:14, 42.
6. Mang e ra ayuwegem ni ngam maruweliy ngam adag ni ngam pigpig ku Got?
6 Manang Joshua nde thilyeg Jehovah e tin Ke micheg. Ere, gaar Joshua: “Gag nge girdi’ ko birog e tabinaw e nguug pigpiggad ngak Somol.” (Josh. 24:15) Ma gur e uw rogom? Ga ra lemnag e tin ke micheg e bin nriyul’ e Got ni ke m’ay i lebguy rok nge tin ni bay fini lebguy, mag baadag ni ngam pigpig ngak ni bod rogon Joshua?
7. Mang fan nrib ga’ fan e taufe?
7 Gad ra fal’eg i yaliy e maruwel rok Jehovah nib fel’ mu kud fal’eged i lemnag e tin ke micheg, ni tin ni ke lebug nge tin ni bay fini lebug, ma ra mithimthegdad ni ngad ognaged gadad ngak Jehovah ma gad dag e n’en ni kad micheged u daken e taufe. Taufe reb e ban’en nrib ga’ fan ni nge rin’ e piin ni yad baadag ni ngar pigpiggad ngak Got. Kari m’ug ere n’ey rok e en nsusuna ngad folwokgad rok, ni Jesus. De n’uw nap’an u m’on ni ke tababnag e maruwel rok ni ir fare Messiah, me yib ngak John ni Tataufe ni ngan taufenag. Mang fan ni rin’ Jesus ere n’ey? Tomur riy me gaar: “Ku gub u tharmiy nga but’ ni nggu rin’ e tin ni be finey e en ni ke l’ugeg ku gub, machane gathi nggu rin’ e tin ni gu be finey.” (John 6:38) Kan taufenag Jesus ni nge mang pow riy ni ke ognag ir ni nge rin’ e n’en nib m’agan’ e Chitamangin ngay.—Matt. 3:13-17.
8. Mang fan ni dugliy Timothy ni nge pigpig ngak Got, ma mang e rayog nim rin’?
8 Kum lemnag Timothy, nreb e Kristiano nib fel’ yangaren nnap’an ni taw nga nap’an me pi’ Jehovah ngak e maruwel ni boor nge tow’ath. Mang fan ni dugliy Timothy ni nge pigpig ngak e bin nriyul’ e Got? Be yog e Bible ngodad ni ‘ke fil boch ban’en ma kari mich u wan.’ (2 Tim. 3:14) Faanra kam un i fil e Thin rok Got ma kan pi’ e athamgil nga lanin’um ni nge mich u wan’um e machib riy, ma taareb rogom ku Timothy. Chiney e ba t’uf ni ngam dugliy ban’en. Mang ndab mu non ngak e gallabthir rom u murung’agen e n’en ni ga be finey ni ngam rin’? Yad e piin piilal ko ulung e rayog ni ngar ayuweged gur ngam nang fan e tin ni bay u Bible nib t’uf ni ngam rin’ mfini yog ni ngam un ko taufe.—Mu beeg e Acts 8:12.
9. Mang e ra rin’ boch e girdi’ u nap’an ni ga ra un ko taufe?
9 Faanra mu un ko taufe, ma ireray e gin nrib fel’ ni ngan tababnag e pigpig ngak e bin nriyul’ e Got riy. Ga ra rin’ e re n’ey, ma aram e kam un nga ba sagreng ni labgen e yafas ni manemus nge felfelan’ ni ma yib nfaanra ni rin’ e tin nib m’agan’ Got ngay. (Heb. 12:2, 3) Maku rayog ni ngam felfelan’nag e tabinaw rom ni ka yad be un ko re sagreng nem nge pi tafager rom u lan e ulung ko Kristiano. Bin nth’abi ga’ fan riy, e ga ra felfelan’nag gum’irchaen Jehovah. (Mu beeg e Proverbs 23:15.) Riyul’, boch e girdi’ e sana dab ra nanged fan ni kam mel’eg ni ngam pigpig ku Jehovah, ma sana yad ra lemnag nde fel’ e n’en ni kam dugliy. Sana yad ra togopuluw ngom. Machane rayog ni ngam gel ko pi magawon ney.
Nap’an nra Deeriyem ara Togopuluw Boch e Girdi’ Ngom
10, 11. (a) Mang boch e deer nrayog ni fith e girdi’ ngom u murung’agen fan ni kam dugliy ni ngam pigpig ku Got? (b) Mang e rayog nim fil u rogon ni ma fulweg Jesus e deer u murung’agen e bin nriyul’ e liyor?
10 Sana ra balyangan’ e piin gimed nga skul, piin buguli yoror rom, ara girdi’ rom ko n’en ni kam mel’eg ni ngam pigpig ku Jehovah. Sana yad ra fith ngom fan ni kam mel’eg ni ngam rin’ e re n’em mar deeriyed murung’agen e michan’ rom. Susun uw rogon ni ngam fulweg? Riyul’, nib t’uf ni ngam fal’eg i lemnag rogon lanin’um nge yog ni mu weliy fan ni kam dugliy ni ngam rin’ e re n’em. Ma nap’an ni ngam fulweg boch e deer u murung’agen e michan’ rom, ma n’en nth’abi fel’ ni ngam rin’ e ngam folwok ko n’en ni rin’ Jesus.
11 Nap’an ni togopuluw e pi tayugang’ ko teliw ngak Jesus u murung’agen e fas ko yam’, me fal owcherad nga reb e thin ko Bible ndaur lemnaged ko som’on. (Ex. 3:6; Matt. 22:23, 31-33) Nap’an ni fith reb e tamachib ko motochiyel ngak Jesus e bin nth’abi ga’ e motochiyel, me yog Jesus e thin ni bay ko Bible ngak. Kari felfelan’ e re moon nem ni ke pi’ Jesus e fulweg ko deer rok. (Lev. 19:18; Deut. 6:5; Mark 12:28-34) Rogon ni i fanay Jesus e thin ko Bible nge rogon ni i weliy fan e k’aring nge “ruw raba’ e girdi’ u fithik’ fapi girdi’,” ma pi toogor rok e de yog nra gafgowniged. (John 7:32-46) Nap’an ni ga be fulweg boch e deer u murung’agen e michan’ rom, mag fanay e Bible ni ngam fulweg u rogon ni ‘kam fal’eg rogom ni ngam rin’.’ (1 Pet. 3:15) Faanra dam nang e fulweg u reb e deer, ma gog ndam nang, ma gog ni bay mu gay murung’agen. Boch nga tomren, ma rayog ni ngam gay murung’agen fare n’em ni aram e ngam fanay fare Watch Tower Publications Index ara fare Watchtower Library ko CD-ROM ni faanra bay nthin ko nam rom. Faanra ba fel’ rogon ni kam fal’eg rogom, ma rayog ni ngam ‘pi’ e fulweg nib mat’aw.’—Kol. 4:6.
12. Mang fan ndab mu pag e togopuluw nge k’aringem nge mulan’um?
12 Ku rayog ni yira fith boch e deer ngom ni gathi deer u murung’agen fan ni kam dugliy ni ngam pigpig ku Got nge michan’ rom. Ma rogon riy, e en ni toogor rok Got, ni aram Satan ni fare Moonyan’, e ir e be gagiyegnag e fayleng. (Mu beeg e 1 John 5:19.) De puluw ni ngam lemnag ni yira yog e thin nib fel’ ngom ara ra m’agan’ urngin e girdi’ ko n’en ni gara yog, maku rayog ni gara mada’nag e togopuluw. Boch e girdi’ e rayog ni yad ra ‘yog e thin nib kireb ngom,’ ma sana ka yad ra ulul ngaur rin’ed i yan. (1 Pet. 4:4) Machane, dab mu pagtalin ni gathi kemus ni goo gur e ga be mada’nag boch ban’en ni aray rogon. Mus ngak Jesus miki yib e gafgow ngak. Maku arrogon apostal Paul, me yoloy ni gaar: “Pi tafager rog ni gimed ba t’uf rog, dab mu gingad ko gafgow nib gel ni yibe tay ngomed ni ba skeng ngomed, ni gowa ban’en ni kam gingad ngay. Machane ngam felfelan’gad ni gimed be un ko gafgow ni i tay Kristus.”—1 Pet. 4:12, 13.
13. Mang fan nrayog ni nge felfelan’ e Kristiano u nap’an ni yibe gafgownagrad?
13 Bochan ni gad e Kristiano e gad be k’adan’ ko gafgow nge togopuluw, ma arfan ni bay fan ni ngad felfelan’gad. Mang fan? Ya faan gad ra fel’ u wan’ e re fayleng ney ma aram e be dag ni gad be par nrogon ni baadag Satan ni ngad pired—gathi rogon ni baadag Got. I ginangey Jesus ni gaar: “Kam gafgowgad ni faanra gubin e girdi’ ma gimed ba fel’ u l’ugunrad; ya pi chitamangirad e ereram e pi thin ni urogned u murung’agen e pi profet ni yigoo bogi ban’en.” (Luke 6:26) Ra yibe gafgownigem ma be dag nib damumuw Satan nge re fayleng ney ngom ni bochan e ga be pigpig ngak Jehovah. (Mu beeg e Matthew 5:11, 12.) Ma ‘faanra nog e thin nib kireb ngodad ni fan e gadad girdien Kristus’ ma aram ban’en ni ngad felfelan’gad ngay.—1 Pet. 4:14.
14. Mang angin nra yib ni faanra par be’ nib yul’yul’ ngak Jehovah ni yugu aram rogon ni be yib e togopuluw riy ngak?
14 Ga ra par nib yul’yul’ ngak Jehovah ni yugu aram rogon ni ga be mada’nag e togopuluw, ma aningeg angin ni bay. Kam mang mich rok Got nge Fak. K’adan’ ni kam tay u fithik’ e yul’yul’ e ke pi’ e athamgil nga laniyan’ e pi walag ni pumoon nge ppin. Boch e piin ndar nanged Jehovah ni yad ra guy e n’en ni kam rin’ e rayog ni nge k’aringrad ni ngar gayed. (Mu beeg e Filippi 1:12-14.) Ma nap’an ni gara guy rogon ni ke pi’ Jehovah gelngim ni ngam gel ko pi skeng ney, ma ra gel e t’ufeg rom ngak.
Ke “Mab e Kanawo’” Ngom
15. Mang “kanawo’” e ke mab ku apostal Paul?
15 I yoloy apostal Paul murung’agen e machib ni i tay u Efesus ni gaar: “Ba mab e kanawo’ ngog u roy nrayog ni gu ngongliy e maruwel riy ni ba ga’.” (1 Kor. 16:8, 9) Aram e kanawo’ ni ke mab ni fan nga boch e maruwel nib fel’ ni aram e nge machibnag fare thin nib fel’ me pingeg boch e girdi’ u lan ere binaw nem ngar manged pi gachalpen Jesus. Bochan ni yan Paul ko re kanawo’ nem, ma aram rogon ni ke ayuweg boch e girdi’ ni ngar filed murung’agen Jehovah mar pigpiggad Ngak.
16. Uw rogon ni yan e tin ni ke magey ko girdien fachi ulung “u ba pa’ i kanawo’” ko duw ni 1919?
16 Nap’an e duw ni 1919 me Jesus ni kan tolangnag e ke ‘bing e kanawo’’ ngak e piin ni ke magey ko fachi ulung. (Rev. 3:8) Ranod u daken ere pa’ i kanawo’ nem ngar tababgad i machibnag fare thin nib fel’ mi yad be fil e thin riyul’ ko Bible ni ke gel boch e pasig rorad ko kafram. Mang angin e machib ni kar ted? Fare thin nib fel’ e ke taw ko gin ni mus e fayleng riy, ma sogonap’an medlip milyon e girdi’ e ke yog e athap ngorad ko yafas ni manemus u lan e bin nib beech e fayleng rok Got.
17. Uw rogon ni nge ‘mab e kanawo’ ngom ni ngam ngongliy e maruwel riy’?
17 Kab mab e ‘kanawo’ nrayog ni ngan ngongliy e maruwel riy’ ngak e pi tapigpig rok Jehovah. Piin ni yad be yan ko re pa’ i kanawo’ nem e yad ma pirieg e felfelan’ u nap’an ni yad be un i machibnag fare thin nib fel’. Gimed e pi tapigpig rok Jehovah nib fel’ yangarmed, uw feni ga’ fan u wun’med fare maruwel ni ngam ayuweged boch e girdi’ ‘nge mich u wan’rad e Thin Nib Fel’ ni yib rok Got!’ (Mark 1:14, 15) Gabe lemnag ni ngam pigpig ni gur reb e regular ara auxiliary pioneer, fa? Boch e maruwel ni bod ni ngan toy e Kingdom Hall, maruwel u Bethel, nge maruwel ko missionary e aram boch e maruwel nrayog ni nge mab kanawoen ngomed. Mit ney e maruwel e be ga’ fan i yan ni gubin e rran ni bochan e ke buchuuw e tayim ni ka bay ko re fayleng rok Satan ni kireb ney. Ga ra yan u daken fare pa’ i “kanawo’” e chiney ni ka bay e tayim riy, fa?
“Mpagan’um Ngak Somol, ma Ga Pirieg Feni Manigil!”
18, 19. (a) Mang e ayuweg David ni nge adag ni nge pigpig ngak Jehovah? (b) Mang e be dag nde kalngan’ David ko pigpig ni ke tay ku Jehovah?
18 Fare psalmist e pining e girdi’ ni nge ‘pagan’rad ngak Somol, mi yad pirieg feni manigil.’ (Ps. 34:8) Nap’an ni kab pagel David ni Pilung nu Israel, me ayuweg Jehovah rok e pi gamanman nib malboch. I ayuweg Got ko cham ni i tay ngak Goliath miki ayuweg u yugu boch e gafgow ni i yib ngak. (1 Sam. 17:32-51; Ps. 18, superscription) Bochan e runguy rok Got u fithik’ e t’ufeg, ma ir e ke k’aring David ni nge yoloy ni gaar: “Somol ni Got rog, pire’ ban’en ni yira ngat ngay ni kam ngongliy ni fan ngomad; dariy be’ ni bod gur! Boor ban’en nib fel’ ni ke m’ay i lemnag rom ni fan ngomad. Ra nggu weliy murung’agen ni gubin, ma ra yan i aw ndabiyog rog ya kaygi pire’.”—Ps. 40:5.
19 Ba gel e t’ufeg rok David ngak Jehovah ma baadag ni nge pining e Sorok ngak u polo’ i gum’irchaen. (Mu beeg e Psalm 40:8-10.) Ke yan boor e duw nga tomren, ma de kal David ngan’ ko pigpig ni ke tay ngak e bin nriyul’ e Got. Rib ga’ fan u wan’ ni nge par ni be fol rok Got—ma ke yib e felfelan’ riy ngak ndariy ban’en nrayog i taarebnag ngay. Ma nap’an ni ke pilibthir David me gaar: “I gur e athap rog, O Jehovah ni Somol rog, ma gur e en ni be pagan’ug ngom ko ngiyal’ nib fel’ yangareg. O Got dab mu pageg ni ki mada’ ko ngiyal’ ni kug pilibthir ma ke manna’ chugeg.” (Ps. 71:5, 18, NW) Ma yugu aram rogon ni ke war David, ma pagan’ rok nge tha’ u thilrow Jehovah e ri kab gel.
20. Mang fan ni pigpig ku Got e aram e bin nth’abi fel’ rogon nrayog ni ngam fanay e yafas rom?
20 Rogon e yafas ku Joshua, David, nge Timothy e be micheg ngodad ni faan gad ra pigpig ngak Jehovah ma aram e bin nth’abi fel’ kanawoen e yafas nrayog ni ngad leked. Angin e maruwel nib fel’ ko re fayleng ney ndabi n’uw nap’an nra par e dabiyog ni ngan taarebnag nga angin nra yib ngom ni faanra ‘mu pigpig ngak Jehovah u polo’ i gum’irchaem ngu polo’ i gelngim.’ (Josh. 22:5) Faanra dawor mu ognagnagem ngak Jehovah, ma rayog nim fithem ni nge lungum, ‘Mang e be talegneg ndagur mang reb e Pi Mich Rok Jehovah?’ Faanra gur reb e tapigpig rok Jehovah ni kam un ko taufe, ga baadag ni ngam gelnag e felfelan’ rom ko yafas, fa? Ma aram e ngam yoornag e machib ni ngam tay, mag mon’og iyan ko tirok Got ban’en. Bin migid e article e ra dag ngom rogon nrayog ni ngam ilal ko tirok Got ban’en ni aram e ngam folwok ko n’en ni rin’ apostal Paul.
Uw Rogon ni Ga Ra Fulweg?
• Mpi’ l’agruw fan nsusuna ngad pigpiggad ku Got.
• Mang e ayuweg Timothy ni nge dugliy ni nge pigpig ngak Got?
• Mang fan ni ngam par nib mudugil u nap’an nra yib e togopuluw ngom?
• Mang boch kanawoen e pigpig nrayog ni mab ngom?
[Picture on page 22]
Pigpig ku Jehovah e aram e bin nth’abi fel’ i kanawoen e yafas
[Picture on page 23]
Rayog ni ngam fulweg boch e deer u murung’agen e michan’ rom?