Mange Ra Buch u Nap’an ni Yira Yim’?

“Gubin e yaal e dabi yim’, ngki mada’ ko yaal rok e piin nib kireb . . . Yira gechignagrad ni manemus u fithik’ e nifiy, ma dabra m’ad, ma dabiyog ni ngan taleg e gafgow rorad.”​—Clement nu Alexandria, reb e tayol u nap’an e bin l’agruw nge bin dalip e chibog.

PIIN ni taareb rogon ngak Clement e yad ma machibnag ni nifiy e bangi ban’en tafen e gafgow ma yad ma lemnag ni yaal ko girdi’ e dabi yim’. Aray rogon ni bay u Bible fa danga’? Mu lemnag e Thin rok Got ni fulweg ko tin ni baaray e deer ni migid.

Adam, ni bin som’on e girdi’ e dabi yim’? Nap’an ni sunumiy Adam, me pi’ Got e re motochiyel ni baaray ngak ni gaar: “Ra um koy wom’engin urngin e gek’iy ni ba’ ko re gi woldug ney, ma ke mus ni fare gek’iy ni ma tamilangnag an’uy ko tin nib fel’ nge tin nib kireb e dab mu koy. Thingar dab mu koy wom’engin. Ya rofen ni ga ra kay e ga ra yim’.” (Genesis 2:16, 17) Rayog ni nge yim’ Adam.

Mange buch rok Adam u tomren ni ke denen? Fare Gechig ni pi’ Got e gathi gafgow ni manemus u fithik’ e nifiy. Be yog e Bible ni gaar: “Thingari yib e athuw u dakenam ma ga maruwel nib gel nge yog ni pi’ e but’ e ggan ngom, nge yan i mada’ ko ngiyal’ ni ngam sul riy ko but’ ni ir e ngongliyem ngay. Ni ngongliyem ko but’, ere bay kum ngal’ ni but’ bayay.” (Genesis 3:19) N’en ni yog Got e der yip’ fan nra yim’ Adam ma bay ban’en rok ni ku ra par nib fos.

Bay e girdi’ ndabiyog ni yim’? Danga’ dariy be’ ndabi yim’. Ke yog e Bible ko Eklesiastes 3:20: “Taab yang i ban’en e bay yan e girdi’ nge gamanman ngay, bay ra sulod ngar ngal’gad ni fiyath ya ra sumgad ko fiyath.” Ke yoloy apostal Paul ni gaar: “Denen e yib nga fayleng u daken taabe’, ma denen ni ngongliy e fek e yam’ i yib. Wenegan ni yib e af e yam’ ngak urngin e girdi’ nu fayleng, ni bochan e urngin e girdi’ ni ngongliy e denen. (Roma 5:12) Urngin e girdi’ ni ke denen, ere urngin e girdi’ ma ra yim’.

Rayog ko piin kar m’ad ni ngar nanged ara ur thamiyed ban’en? Thin rok Got e be gaar: “Piin bfos e yad manang ni bay ra m’ad, machane piin nib yam’ e dariy ban’en ni yad manang.” (Eklesiastes 9:5) Be yog e Bible e n’en nra buch ko girdi’ ni ke yim’ ni gaar: “Nap’an ni yad ra yim’, mi yad ra sul ko ab; rofen nem e gubin e tin ur tanomniged e ra mus. (Psalm 146:4) Faanra piin ni kar m’ad “ndariy ban’en ni yad manang ma gubin e tin ur tanomniged e ra mus,” me ere uw rogon ni yad ra thamiy e amith u fithik’ e nifiy?

I taareb rogonnag Jesus e yam’ ko mol ma gathi ba mit i rarogon e yafas.a (John 11:11-14) Boch e girdi’ e yad ra gaar e gathi aray rogon, ya i yog Jesus nifiy e ba gowel ma piin tadenen e yira yin’rad nga mit e nifiy. Ngada guyed e n’en ni yog Jesus u murung’agen e nifiy.

[Footnote]