Nge Puluw e Ngongol Rom ko Thin rok Jesus

“En ni Got e ke l’og ke yib e be weliy e thin rok Got.”​—JOHN 3:34.

1, 2. Mang fan ni rayog ni nga dogned ni “thin rok Got” fapi thin ni kan weliy ko fare Welthin u daken e Burey?

BOOR ban’en nrib fel’ ni fil Jesus ngak e girdi’ ko fare Welthin ni tay u Daken e Burey, ni bochan e gubin ma thin rok Jehovah. I yog Jesus ni gaar: “En ni Got e ke l’og ke yib e be weliy e thin rok Got.”​—John 3:34-36.

² Fare Welthin u Daken e Burey e bay boch e thin riy nni fek u meruk ken e babyor nni yoloy som’on ni thin ni Hebrew, ni yugu aram rogon ni sana de gaman baley e awa nni pi’. Ere rib mudugil ni thin riy e “thin rok Got.” Ngad guyed rogon ni rayog ni ngad folgad ko thin ni rib manigil ni weliy Jesus ko re welthin nem.

“Ngam Fal’eg Thilmew Walagem”

3. Tomren ni ginang Jesus pi gachalpen u murung’agen e damumuw ma mang e fonow ni pi’ ngorad?

³ Gad e Kristiano e gadad ba felfelan’ ma ba gapas thildad ni bochan e bay fel’ngin gelngin Got nib thothup rodad ni bod e felfelan’ nge gapas laniyan’. (Gal. 5:22, 23) Dabun Jesus ni nge par pi gachalpen ni dakuriy e gapas nge felfelan’ u thilrad, aram fan ni ginangrad u murung’agen e damumuw nib pag rogon. (Mu beeg e Matthew 5:21, 22.) Migid ngay me gaar: “Faanra mman ni ngam pi’ e n’en ni ngam pi’ ngak Got u mit e altar me yib ngan’um ni bay ban’en nib togopuluw u wan’ walagem ngom, ma ga pag e n’en ni ngam pi’ ngak Got u mit e altar ma ga yan ni ka chingiyal’ nem ngam fal’eg thilmew walagem; ma aram e fin mu sul ngam pi’ e n’en ni ngam pi’ ngak Got.”​—Matt. 5:23, 24.

4, 5. (a) Mang fare “n’en” ni yog Jesus u Matthew 5:23, 24 ni yima pi’ ngak Got? (b) Uw feni ga’ fan ni nge fel’ thilmew walagem?

⁴ Fare “n’en” ni yog Jesus ni yima pi’ ngak Got e aram e maligach ni yima pi’ u tempel u Jerusalem. Ba ga’ fan e gamanman ni yima ognag ngak Jehovah kakrom ni bochan e aram bang ko liyor ni ma tay e girdi’ rok ngak. Machane, bay ban’en ni kab ga’ fan ni yog Jesus ni thingari rin’ be’ u m’on ni nge pi’ e maligach rok ngak Got, ni aram e nge fal’eg thilrow walagen.

⁵ Ere mang e gad ra fil ko thin rok Jesus? Tha’ u thildad pi walagdad u lan e ulung e bay rogon ko tha’ u thildad Jehovah. (1 John 4:20) Bod kakrom ni faanra ba kireb thilin be’ nge walagen ma ba m’ay fan e maligach nra pi’ ngak Got.​—Mu beeg e Mikah 6:6-8.

Thingari Sobut’an’uy

6, 7. Mang fan nib t’uf e sobut’an’ u nap’an ni ga be fal’eg thilmew walagem?

⁶ Nap’an nra t’uf ni ngam fal’eg thilmew walagem ma aram e ngiyal’ nra m’ug ko rriyul’ ni gab sobut’an’ fa danga’. Piin nib sobut’an’ e darur tugthingad ngak pi walagrad nge ni aw ni yad e ba fel’ e rorad. Ya faanra aram rogon ma ra yan i bod e n’en ni buch u thilin e pi Kristiano nu Korinth kakrom. I yog Paul ni apostal boch e thin u murung’agrad nra ayuwegdad ni gaar: “Re n’en ni beer ni gimed be maluagthin u fithik’med ma gimed be yan nga tafen e pufthin e be dag ni kam mulgad u rarogon girdien Kristus. Gathi kab fel’ ni yira ngongliy e kireb ngomed? Gathi kab fel’ ni yira fek e tiromed ban’en?”​—1 Kor. 6:7.

⁷ De yog Jesus ni ngad nonad ngak walagdad ni bochan e nge m’ug ni gadad e ba fel’ e rodad me ir e ba kireb e rok. Ya n’en ni ngad rin’ed e ngad gayed rogon ni nge fel’ thildad walagdad, ni aram e ngad weliyed lanin’dad ngak. Kub t’uf ni ngad nanged ni ku arrogon ir ni ki kireban’. Ma faanra gur e ba kireb e rom mab t’uf ni ngam sobut’an’ ngam wenig.

‘Faanra Waliyem e Ba’ ni Mat’aw i Owchem ngam Denen’

8. Mang e yog Jesus u Matthew 5:29, 30?

⁸ Nap’an fare Welthin rok Jesus u Daken e Burey, me pi’ e fonow u murung’agen e ngongol ya manang ni daworda flontgad nrayog ni nge waliydad yu yang u dowdad ngad denengad. Ere yog ni gaar: “Faanra waliyem e ba’ ni mat’aw i owchem ngam denen, ma ga luf ngam n’ag! Ya kab fel’ ni nge mul bangi dowam ko bin ni nga nin’ dowam ni polo’ nga [“Gehenna,” NW]. Faanra waliyem e ba’ ni mat’aw i paam ngam denen, ma ga th’ab ngam n’ag! Ya kab fel’ nra mul baraba’ i paam ko bin ni nge yan dowam ni polo’ nga [“Gehenna,” NW].”​—Matt. 5:29, 30.

9. Uw rogon nrayog ni nge waliyey lan ‘owchey’ nge ‘paay’ ngan “denen”?

⁹ Lan ‘owchey’ ni yog Jesus e be yip’ fan rogon ni ma l’agan’uy nga ban’en, ma ‘paay’ e ba’ rogon ko n’en ni yima maruweliy nga paay. Faanra dab da kol ayuwgad ma rayog ni nge waliydad e yungi n’ey u dowdad ngada ‘denengad’ ma dab ku da ‘liyorgad ngak Got.’ (Gen. 5:22; 6:9) Ere nap’an ni be waliydad ban’en ni nge dab ku da yul’yul’gad ngak Jehovah ma ngad rin’ed ban’en ni ngad pired ni gad ba gel ni bod rogon ni kad l’ufed barba’ i lan owchedad fa kad th’abed barba’ i pa’dad.

10, 11. Mang e ra ayuwegdad ni ngad siyeged e ngongol ni darngal?

¹⁰ Uw rogon ni ngad feked owchedad ko ngongol ni puwlag? I yog Job ni gaar: “Ku gu t’ar u wun’ug ndariy ba ngiyal’ ni nggu changar i darngal ngak be’ nib pin.” (Job 31:1, BT) Job e be’ nib mabgol ma ke dugliy u wan’ ni dabi th’ab e motochiyel rok Got u murung’agen e par ko pumoon nge ppin. Ku arrogodad ni demtrug ko gadad ba mabgol fa danga’ ma ngad folgad ko re thin ney. Ere ba t’uf ni ngad paged gelngin Got nib thothup ni ir e ma ayuweg e piin nib t’uf Got rorad nguur t’ared lanin’rad nge pow’iydad nge yog ni dab da uned ko ngongol ni darngal.​—Gal. 5:22-25.

¹¹ Ra ngad siyeged e ngongol ni darngal ma ba t’uf ni ngada fithed gadad ni nge lungudad, ‘Gu ma pag lan owcheg ni nge yaliy yaan e puwlag u babyor ara T.V. fa internet nra pug e ar’ar ni kireb u lanin’ug, fa?’ Ku ba fel’ ni dab da paged talin e thin rok James ni gaar: “Pi n’en ni ma waliy e girdi’ nge denen e ma yib ngak e en ni pag ir ko n’en nib kireb ni be ar’arnag nge waliy faanem nge aw ko wup; ma aram me diyen e tin nib kireb ni be ar’arnag nge gargeleg e denen; ma faani ilal e denen nge mus nga rogon me gargeleg e yam’.” (Jas. 1:14, 15) Faanra ke par be’ ni yugu be “sap” i darngal ngak be’ ni gathi yow taa barba’ i yuw, mab t’uf ni nge thilyeg e lem rok nib papey ni bod rogon ni ke luf barba’ i lan owchen ke n’ag.​—Mu beeg e Matthew 5:27, 28.

12. Mang fonow e pi’ Paul nrayog ni nge ayuwegdad nge dab ku da ar’arnaged e ngongol ni puwlag?

¹² Bochan nra dab da maruwelgad nga pa’dad nib fel’ rogon ma ra k’aringdad ngad th’abed e motochiyel rok Jehovah ma aram fan nib t’uf ni nguud pired nib fel’ e ngongol rodad. Susun ni ngad folgad ko fonow rok Paul ni gaar: “Mu lied ngem’ e ar’ar . . . ni be maruwel u fithik’ i dowmed, ni aram e darngal, nge puwlag, nge ar’ar nib kireb ni ma waliy e girdi’ ko denen, nge chogow ya chogow e mmit e ta’ fan nge meybil ni yibe tay ngak e liyos.” (Kol. 3:5) Fare thin ni gaar “mu lied ngem’” e be dag feni ga’ fan ni ngad rin’ed ban’en nge yog ni dab ku da ar’arniged e ngongol ni puwlag.

13, 14. Mang nib ga’ fan ni ngad siyeged e lem nge ngongol ni kireb?

¹³ Faanra dabun be’ ni nge yim’ ma ra m’agan’ ngay ni ngan th’ab barba’ i pa’ fa barba’ i ay ngan n’ag. Ere fare thin ni ngan ‘luf ’ barba’ i owchey nge barba’ i paay ngan n’ag e ba ga’ fan nga rogon ni ngan siyeg e lem nge ngongol nrayog ni nge magawonnag e tha’ u thildad Jehovah. Faanra par lanin’dad nge ngongol rodad nib beech ma kemus rogon ni rayog ni ngada thaygad ko yam’ ni dariy n’umngin nap’an ni aram e n’en ni kan fanathinnag ko Gehenna.

¹⁴ Bochan e denen ni ke af ngodad da kud flontgad ma ba t’uf e athamgil u rogon ni ngad pired nib fel’ e ngongol rodad. I yog Paul ni gaar: “Kug gelnag dowag ko tug ni be aw ngay ke yan i par ni be fol rog, ni fan e nge dab nn’igeg u tomren ni kug pining boch e girdi’ ni ngar uned ko re gosgos nem.” (1 Kor. 9:27) Ngad folgad ko fonow rok Jesus u rogon e ngongol ma dabda paged gadad ni ngad ngongolgad u boch e kanawo’ ni be dag ni dariy fan fare biyul ni pi’ u wan’dad.​—Matt. 20:28; Heb. 6:4-6.

“Mu Golgad Ngak e Girdi’”

15, 16. (a) Uw rogon ni dag Jesus e kanawo’ nib fel’ ni ngan folwok riy u rogon ni ngan gol ko girdi’? (b) Mang e be yip’ fan fapi thin ni yog Jesus ni bay ko Luke 6:38?

¹⁵ Fapi thin ni yog Jesus nge ngongol ni ba fel’ ni dag e ra k’aringdad ni ngad golgad ngak e girdi’. Rib gol ko n’en ni rin’ ni yib nga fayleng ni fan ngak e girdi’ ni tadenen. (Mu beeg e 2 Korinth 8:9.) I m’agan’ Jesus ngay ni nge pag e flaab rok u tharmiy nge yib nga fayleng nib girdi’ nge pi’ e yafas rok ni fan ko girdi’ ni tadenen ni ba’ boch i yad nra un ngak ko gagiyeg u tan Gil’ilungun Got. (Rom. 8:16, 17) Ke pi’ Jesus e athamgil nga lanin’uy ni ngaun gol ngak e girdi’ ni gaar:

¹⁶ “Mu golgad ngak e girdi’ me gol Got ngomed: nra pi’ ngomed nge yan i mus nga rogon e fol riy u wan’, nra map’ nga pa’med ni pire’ nge sugsug pa’med riy. Ya re fol ni ga ra pi’ ngak be’ e ereram e re fol nra pi’ Got ngom.” (Luke 6:38) Bay ba mit e mad ni ma yin’ e girdi’ u boch e nam nga daken e mad rorad ni bay bang riy ni yima chugum ngay, ere nap’an ni yad ra yan nga kantin ma bay boch e ta fol chuway’ ni ba gol ni ma suguy e chugum nga lan fagi mad nge chugur i map’ nga but’. Ere faanra uda golgad maku rayog ni ngan gol ngodad nge pag e fol riy nib ga’ ni ngiyal’ ni baaray ni kari t’uf ban’en rodad.​—Ekl. 11:2.

17. (a) Uw rogon ni ke dag Jehovah e bin th’abi fel’ e kanawo’ u rogon ni ngan gol? (b) Mang e gad ra maruwel ngay ma gad felfelan’?

¹⁷ Ma tow’athnag Jehovah maku ba t’uf rok e piin ni ma pi’ ban’en u fithik’ e felfelan’. Ir e ke dag e bin th’abi fel’ e kanawo’ u rogon ni ngan gol ya ke pi’ fak ni kari maagirag rok “ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” (John 3:16) I yog Paul ni: “Cha’ nra yung e awoch nib lich e buchuuw e n’en nrayog riy ngak; ma en nra yung e awoch ni pire’, e pire’ e n’en nrayog riy ngak. Ere ra be’ ma nge pi’ ban’en nrogon ni ir e ke dugliy u laniyan’, ndabi kireban’ ngay ni ke pi’ fa reb e finey ni ban’en nthingari rin’; yi Got e ba t’uf rok e en ni ma pi’ ban’en u fithik’ e felfelan’.” (2 Kor. 9:6, 7) Faanra u da maruwelgad ko tayim rodad nib fel’ rogon nge gelngidad nge tin ni bay rodad ni fan ko bin riyul’ e liyor ma gad ra felfelan’ ma yira tow’athnagdad.​—Mu beeg e Proverbs 19:17; Luke 16:9.

“Dab Mu Guy Rogon ni Ngar ni Guy”

18. Uw rogon ni gad ra rin’ ban’en ma “dariy puluwon nra yib” rok e Chitamangidad nu tharmiy ngodad?

¹⁸ “Mu guyed rogomed ni nge dab mu ngongliyed e ngongol nib fel’ u fithik’ e girdi’ ni fan e nge guy e girdi’ e n’en ni gimed be rin’. Faanra um rin’ed e pi n’ey u fithik’ e girdi’ ni yoor ma dariy puluwon nra yib riy ngomed rok e Chitamangimed nu tharmiy.” (Matt. 6:1) “Ngongol nib fel’,” ni yog Jesus u roy e be yip’ fan e ngongol nib m’agan’ Got ngay. Gathi be yip’ fan ni dab ni dag e ngongol nib fel’ u fithik’ e girdi’ ya yog ngak pi gachalpen ni “nge gal [ramaerad] u p’eowchen e girdi’.” (Matt. 5:14-16) Machane “dariy puluwon nra yib” rok e Chitamangidad nu tharmiy ngodad ni faanra u da rin’ed boch ban’en “ni fan e nge guy e girdi’” ma ur ted fadad. Faanra aray fan ni gad ma rin’ ban’en ma dabiyog ni nge fel’ e tha’ u thildad Got fa yog e flaab u Gil’ilungun ngodad.

19, 20. Mang fonow e ke pi’ Jesus ngodad u murung’agen e ayuw ni gad ma pi’ ngak be’?

¹⁹ Faanra ba fel’ rogon ni ga ma lem ma ga ra fol ko n’en ni yog Jesus ni gaar: “Faan ga ra pi’ ban’en ngak be’ ni ke gafgow ndabi siy ni nge yog ngak, ma dab mu guy rogon ni ngar ni guy, ni bod ni ma rin’ e piin ni ma madag girdi’ u lan e pi tafen e muulung ngu daken e kanawo’. Yad ma rin’ ni bochan e nge yog e girdi’ e sorok ngorad. Dab mpaged talin, ni aram e ke m’ay i pi’ puluwon ngorad ni polo’.” (Matt. 6:2) Jesus nge pi apostal rok e immoy e salpiy ni ur chaariyed nga bang ni fan ko piin ke gafgow. (John 12:5-8; 13:29) Faanra da pied ban’en ngak be’ ni ke gafgow ma dab da boded e pi Farise kakrom ni yad ma guy rogon ni ngar ni guy. I yog Jesus ni yad e piin ni ma madag girdi’ ni bochan e yad ma rin’ e pi n’ey u “lan e pi tafen e muulung ngu daken e kanawo’.” Miki yog ni “ke m’ay i pi’ puluwon ngorad ni polo’,” ni re puluwon nem e aram e bin m’on e chiya u lan tafen e muulung u tooben e pi tayugang’ ko teliw nu Jew. Ma kemus chi puluwon ni rayog ngorad aram ya Jehovah e dariy puluwon nra pi’ ngorad. (Matt. 23:6) Ere, uw rogon e ngongol ni nga i tay e pi gachalpen Kristus? Ke yog ngorad maku arrogodad ni gaar:

²⁰ “Ere faanra mu ayuweg be’ u ban’en ndabi siy ni nge yog ngak, ma ngam rin’ ni ngam guy rogon ni mus ngak e en nth’abi fel’ e thin romew ma dabi nang murung’agen, machane ban’en ni goo gimew e gimew manang. Ma Chitamam ni be guy e n’en ni kam rin’ nde nang e girdi’, e bay pi’ puluwon ngom!” (Matt. 6:3, 4) Ere rogon ni yog Jesus u roy e gad ra pi’ e ayuw ngak be’ ma de t’uf ni nge nang be’ ni mus ngak e piin ba chugur ngodad.

21. Mang puluwdad ni ra pi’ e en ni ma ‘guy e n’en ni kad rin’ed ni de nang e girdi’’?

²¹ Faanra dab da ufgad ko ayuw ni kad pied ngak be’ ni ke gafgow ma aram e ra par ni dariy be’ ni manang. Ma Chitamangidad ‘ni ke guy e n’en ni ka da rin’ed nde nang e girdi’’ e ra pi’ puluwon ngodad. Puluwon ni ra pi’ ngodad e aram e ra chugurnagdad ngak me n’ag fan e denen rodad me pi’ e yafos ndariy n’umngin nap’an ngodad. (Prov. 3:32; John 17:3; Efe. 1:7) Kab fel’ e binem ko bin ni nga i pining e girdi’ e sorok ngodad!

Boch e Thin ni Rib Manigil ni Nge Ga’ Fan u Wan’dad

22, 23. Mang ni ngari ga’ fan e thin rok Jesus u wan’dad?

²² Fare Welthin u Daken e Burey e ri boor ban’en riy ni rib manigil. Dariy e maruwar riy ni boor e thin riy ni rib ga’ fan ni rayog ni nge yibnag e felfelan’ ngodad ni yugu aram rogon ni gad be par u ba fayleng ni ke sug ko kireb. Rriyul’ ni gad ra felfelan’ ni faanra ga’ fan e thin rok Jesus u wan’dad me yib angin ko yafas rodad.

²³ Yira tow’athnag gubin e piin ni yad ra “rung’ag” mi yad “fol” ko thin rok Jesus. (Mu beeg e Matthew 7:24, 25.) Ere ngarda folgad ko pi fonow ni pi’ Jesus. Bin migid e thin e ka gadra weliy boch ko fapi thin ni yog Jesus ko fare Welthin u Daken e Burey.

Uw Rogon ni Ga Ra Fulweg?

• Mang nrib ga’ fan ni ngam fal’eg thilmew walagem?

• Uw rogon ni nge dabi waliydad e ‘ba’ ni mat’aw i owchedad’ ngad denengad?

• Uw rogon ni ngaud pied ban’en?

[Picture on page 15]

Faanra ke kireb thilmew walagem ma rib fel’ ni “ngam fal’eg”!

[Pictures on page 17]

Ma tow’athnag Jehovah e piin ma pi’ ban’en u fithik’ e felfelan’