Um Rin’ e Tin nib Fel’

‘Nguum rin’ . . . e tin nib fel’.’​—LUKE 6:35.

1, 2. Mang nib mo’maw’ ni ngan rin’ e tin nib fel’ ngak boch e girdi’?

BA MO’MAW’ ni ngan rin’ e tin nib fel’ ko girdi’. Piin ni gad ma dag e t’ufeg ngorad e sana darur daged e t’ufeg ngodad. Yugu aram rogon ni gad ma athamgil ni ngad ayuweged e girdi’ u daken fare ‘machib ni kan pirieg u fithik’ e thin nib fel’ ni yib rok Got’ nge Fak, maku dubrad. (1 Tim. 1:11) Boch e girdi’ e kar micheged ni yad “e toogor ko fare ley i gek’iy rok Kristus ni yima gafgownagey riy.” (Fil. 3:18, NW) Ma gad e Kristiano, e susun nge uw rogon e ngongol rodad ngorad?

² I yog Jesus Kristus ngak pi gachalpen ni gaar: “Nge t’uf romed e pi toogor romed mi gimed rin’ e tin nib fel’ ngorad.” (Luke 6:35) Ngad fal’eged i yaliy e re fonow ney. Ku ra yib angin ngodad boch ban’en ni yog Jesus u murung’agen rogon ni ngan rin’ e tin nib fel’ ngak boch e girdi’.

“Nge T’uf Romed e Pi Toogor Romed”

3. (a) Mu weliy fapi thin rok Jesus ni bay ko Matthew 5:43-45. (b) Mang lem u murung’agen piyu Jew nge piin gathi Jew e ke sum rok e pi tayugang’ ko teliw nu Jew ko bin m’on e chibog?

³ Nap’an fare Welthin rok Jesus u Daken e Burey, me yog ngak e piin ni be motoyil ni ngar t’ufeged e pi toogor rorad mar yibilayed e piin be gafgownagrad. (Mu beeg e Matthew 5:43-45.) Piin ur moyed ko re ngiyal’ i n’em e piyu Jew, ni yad manang e motochiyel rok Got ni gaar: “Dab mu fulweged taban e kireb ngak be’, ara kireb u wun’med pi fak e girdi’ romed; ma nge t’uf e piin gimed romed ni bod gimed.” (Lev. 19:18, NW) Pi tayugang’ ko teliw nu Jew ko bin m’on e chibog e ba mich u wan’rad ni “pi fak e girdi’ romed” nge “piin ni gimed” e kemus ni fan ngak piyu Jew. Fare Motochiyel rok Moses e be yog nthingari par piyu Israel ni yad ba dar rok boch e nam, machane rogon ni kan lemnag e gubin e piin ni gathi yad piyu Jew e yad e toogor, ma bay rogon ni ngan fanenikayrad ni yad gubin.

4. Susun uw rogon e ngongol rok pi gachalpen Jesus ngak e pi toogor rorad?

⁴ Ba thil ya gaar Jesus: “Nge t’uf romed e pi toogor romed, mpied e meybil rok e piin ni yad be ngongliy e kireb ngomed.” (Matt. 5:44) Pi gachalpen e thingar daged e ngongol u fithik’ e t’ufeg ngak e piin ni yad be togopuluw ngorad. Rogon ni yog Luke nreb e tayol Gospel, e gaar: “Nggog ngomed e piin ni gimed be motoyil ngog, ni nge t’uf romed e pi toogor romed, mu ngongliyed e tin nib fel’ ngak e piin ndaburad dakenmed, mu yibiliyed ngak Got ni nge ayuweg e piin ni kar yibiliyed gimed ni nge buch ban’en romed, mi gimed yibiliy ngak Got ni nge ayuweg e piin ni yad be ngongliy e kireb ngomed.” (Luke 6:27, 28) Ngad ‘ngongliyed e tin nib fel’ ngak e piin ndubrad dakendad’ ni aram e ngad fulweged taban e togopuluw ni yad be tay u daken e ngongol u fithik’ e sumunguy ni bod e piin ni ur moyed ko bin m’on e chibog ni ur folgad ko n’en ni i fil Jesus ngorad. Gad be ‘yibilay ngak Got ni nge ayuweg e piin ni be yibilay ni nge buch ban’en rodad’ u daken e thin nib sumunguy ni gad ra yog ngorad. Ma gad be ‘pi’ e meybil rok e piin ni yad be ngongliy e kireb’ ngodad u daken e cham ni yad be tay ngodad ara yugu “boch e kireb” ni yad be rin’ ngodad. Mit ney e meybil e be dag nib t’uf rodad e pi toogor rodad ni bochan e gad be wenignag ngak Jehovah ni nge ayuwegrad nge yog ni thil gum’ircharad mar rin’ed ban’en nge yog nra fel’gad u wan’ Jehovah.

5, 6. Mang fan nsusuna ngad t’ufeged e pi toogor rodad?

⁵ Mang fan ni ngad daged e t’ufeg ngak e pi toogor rodad? Ya gaar Jesus: “Ya nge yog ni mmanged pi fak e Chitamangimed ni bay u tharmiy.” (Matt. 5:45) Faan gad ra fol ko re fonow nem, ma gad ra mang “pi fak” Got ni aram e gad be folwok rok Jehovah, ni ir e ma “mateg ramaen e yal’ rok nga daken e girdi’ nib tagan nge girdi’ nib fel’ ntaareb rogon, ma be pi’ e n’uw ngak e piin ni yad be rin’ e tin nib mat’aw nge piin ni yad be rin’ e tin nib kireb.” Rogon ni yog Luke e Got e ba “gol ngak e piin ndarir pininged e magar ngak nge piin nib kireb.”​—Luke 6:35.

⁶ I weliy Jesus murung’agen feni ga’ fan ni nge t’uf rok pi gachalpen ‘e pi toogor rorad,’ ni gaar: “Gimed be finey nra fulweg Got labgen ngomed ni faanra ke mus ni piin ni gimed ba t’uf rorad e ya ba t’uf romed? Ya mus ngak e piin ni yad ma kunuy e tax ma ereyer e n’en ni yad ma rin’! Faanra ke mus ni pi tafager romed e nguum nonod ngorad, ma gur kam rin’ed ban’en ni yugu ba thil ko tin ni kayi ma rin’? Mus ngak e piin ni yad ma meybil ngak yugu boch e kan ma ku ereyer e pi n’en ni yad ma rin’!” (Matt. 5:46, 47) Ere, faanra achig e t’ufeg rodad nge ni par ni kemus ni fan ko piin ni gad ba t’uf rorad, ma dabi yib “labgen” ngodad nib ga’. Mus ko pi tamukun tax ni ur daged e t’ufeg ngak e girdi’ ni yad ba t’uf rorad, ni yugu aram rogon ni boor e girdi’ ndubun dakenrad.​—Luke 5:30; 7:34.

7. Mang fan nra yan i aw ni ban’en nib thil ni faanra kemus ni piin “walagdad” e ir e nguud fingichiyed?

⁷ Thin nib ga’ ni ma fanay piyu Jew ko fangich e ba muun ngay fare thin ni “gapas.” (Judg. 19:20; John 20:19) Re n’ey e be dag ni yibe lemnag e tin nib fel’ ngak be’ ni nge fel’ fithik’ i dow, nge tin nib fel’ ngak, nge rarogon e par rok. “Ban’en nib thil” ni faanra kemus ni ngad fingichiyed e piin ni gad be yog ni “walagdad.” Rogon ni yog Jesus e bay ban’en ni aram rogon ni be rin’ e ‘girdi’ ko pi nam.’

8. Mang e be pi’ Jesus e athamgil riy nga laniyan’ e piin ni yad be motoyil ngak u nap’an ni gaar: ‘Thingar mpired ni gimed ba yal’uw’?

⁸ Denen ni ke af ngodad e ir e ke k’aring pi gachalpen Kristus ni nge dab kur pired nib flont. (Rom. 5:12) Machane, i museg Jesus e giney ko welthin rok ni gaar: “Ere thingar mpired ni gimed ba yal’uw ni bod e Chitamangimed ni bay u tharmiy nib yal’uw!” (Matt. 5:48) I pi’ e athamgil ngak e piin ni yad be motoyil ngak ni ngar folwokgad ko ‘Chitamangirad ni bay u tharmiy,’ ni aram Jehovah, ni ngar fal’eged rogon e t’ufeg rorad​—nge polo’ ni aram e nge t’uf e pi toogor rorad rorad. Ku aray e n’en nthingar kud rin’ed.

Mang Fan ni Ngaun N’ag Fan e Kireb?

9. Mang e be yip’ fan fapi thin ni gaar: “Ma ga n’ag fan u wan’um e kireb romad”?

⁹ Gad be rin’ e tin nib fel’ ni faanra gad be n’ag fan u fithik’ e runguy e denen ni ke rin’ be’ nib togopuluw ngodad. Riyul’ riy e bang ko fare meybil ni fil Jesus e bay fapi thin riy ni gaar: “Ma ga n’ag fan u wan’um e kireb romad, ni bod ni kug n’iged fan u wan’mad e kireb ni ke rin’ boch e girdi’ ngomad.” (Matt. 6:12) Gospel rok Luke e be dag ni fare “kireb” ni bay u wan’ Jesus e aram e denen, ya gaar: “Ma ga n’ag fan u wun’um e denen romad, ya kug n’iged fan u wun’mad e kireb ni ke ngongliy urngin e piin ni kar ngongliyed e kireb ngomad.”​—Luke 11:4.

10. Uw rogon ni ngad folwokgad rok Got u rogon i n’ag fan e kireb?

¹⁰ Ba t’uf ni ngad folwokgad rok Got, nri ma n’ag fan e kireb ko pi tadenen ni kar kalgadngan’rad. I yoloy apostal Paul ni gaar: “Machane um golgad ngomed, me bigimed me munguy ngak bigimed, mu um n’iged fan u wan’med e tin nib kireb ni ke rin’ bigimed ngak bigimed, ni bod rogon Got ni bochan Kristus ma aram fan ni ke n’ag fan u wan’ e kireb ni kam rin’ed.” (Efe. 4:32) I tangnag fare psalmist ni gaar: “I Somol e ri ma runguy e girdi’ ma ma par nib t’uf e girdi’ rok, ba sowath ni ma yib e damumuw ngak, ma yugu ma par nib t’uf e girdi’ rok. . . . Der ma gechignagdad nrogon ni ba’ rogon ni nge gechignagdad, ara pi’ ngodad wenegan e denen rodad nge kireb rodad nrogon. . . . Rogon feni mal’af thilin e ngek nge ngal, e aram rogon nra chuweg e denen rodad nge mal’afnag rodad. Rogon feni gol ba matam ngak pi fak, e aram rogon feni gol Somol ngak e piin ni yad be par ni bay madgun u wun’rad. Manang e n’en nni ngongliydad ngay; ma manang ni gadad e fiyath.”​—Ps. 103:8-14.

11. Mini’ e piin ma n’ag Got fan e kireb rorad?

¹¹ Rayog ni nge n’ag Got fan e kireb ko girdi’ ni faanra kar n’aged fan e kireb rok e piin ni kar denengad nib togopuluw ngorad. (Mark 11:25) Ki uneg Jesus boch e thin ni nge tamilangnag ere n’ey ni gaar: “Ya faanra mu n’iged fan u wun’med e kireb ni ke rin’ boch e girdi’ ngomed, ma ku er rogon e Chitamangimed nu tharmiy nra n’ag fan u wan’ e kireb ni kam rin’ed. Machane faanra dab mu n’iged fan u wun’med e kireb ni ke rin’ boch e girdi’ ngomed, ma ku er rogon e Chitamangimed nu tharmiy ndabiyog ni nge n’ag fan u wan’ e kireb ni kam rin’ed.” (Matt. 6:14, 15) Arrogon, ma n’ag Got fan e kireb rok e piin ni kar n’aged fan e kireb rok boch e girdi’. Ma reb e kanawo’ ni ngan rin’ e tin nib fel’ ni gubin ngiyal’ e faan yira fol ko fonow rok Paul ni gaar: “Thingar um n’iged fan u wan’med e n’en ni ke rin’ bigimed ngak bigimed ni bod rogon ni ke n’ag Somol fan u wan’ e tin ni kam rin’ed nib togopluw ngak.”​—Kol. 3:13.

“Mu Talgad i Turguy e Kireb nga Daken e Girdi’”

12. Mang fonow e pi’ Jesus u murung’agen e ngan turguy e kireb nga daken e girdi’?

¹² Ku reb e kanawo’ ni ngad rin’ed e tin nib fel’ riy e bay ko fare Welthin u Daken e Burey ni faani yog Jesus ngak e piin ni yad be motoyil ndab kur turguyed e kireb nga daken e girdi’ ma aram me fanay reb e fanathin nib manging’ ni nge tamilangnag e re n’ey. (Mu Beeg e Matthew 7:1-5.) Ngad guyed e n’en ni be yip’ Jesus fan u nap’an ni gaar: “Mu talgad i turguy e kireb nga daken e girdi’.”

13. Uw rogon ma piin ni ur motoyilgad ngak Jesus e ngaur ‘n’iged fan e kireb’ rok boch e girdi’?

¹³ Gospel rok Matthew e bay e thin rok Jesus riy ni gaar: “Mu talgad i turguy e kireb nga daken e girdi’, nge dabi turguy Got e kireb nga dakenmed.” (Matt. 7:1, NW) Ma rogon ni bay ko Luke, e gaar Jesus: “Mu talgad i turguy e kireb nga daken be’, ma aram e dabki turguy Got e kireb nga dakenmed; mu talgad i turguy e gechig rok be’, ma aram e dabi turguy Got e gechig romed. Mu n’iged fan u wun’med e kireb ni ke ngongliy be’ ngomed, me n’ag Got fan u wan’ e kireb ni kam ngongliyed.” (Luke 6:37, NW) Pi Farise ko bin nsom’on e chibog e ur turguyed e kireb rok boch e girdi’ nib kireb rogon, ya yad be fol ko pi yalen nde puluw ko Bible. Piin ni ur motoyilgad ngak Jesus ni yad be rin’ ere n’em e ngar “talgad i turguy e kireb nga daken e girdi’.” Mu ur ‘n’iged fan u wun’rad,’ ni aram e kar n’iged fan e kireb rok boch e girdi’ u wun’rad. Ku taareb rogon ko fonow ni pi’ apostal Paul u rogon i n’ag fan e kireb nrogon ni bay i er nga lang.

14. Faanra n’ag pi gachalpen Jesus fan e kireb, ma mang e yad ra k’aring e girdi’ ni ngar rin’ed?

¹⁴ Ra n’ag pi gachalpen Jesus fan e kireb rok boch e girdi’, ma ku rayog ni ngar k’aringed e girdi’ ni ngkur n’aged fan u wan’rad e kireb rok boch e girdi’. I gaar Jesus: “Got e ra turguy e kireb nga dakenmed nrogon ni kam turguyed e kireb nga daken e girdi’, nrogon nga gelngin ni mrin’ed ngorad.” (Matt. 7:2) Gad ma t’ar wom’engin e n’en kad yunged u rogon e ngongol rodad ngak boch e girdi’.​—Gal. 6:7.

15. Uw rogon ni dag Jesus nib kireb ni ngan gay thibngin be’?

¹⁵ Dab mu pagtalin ni fith Jesus ban’en ni nge dag rogon feni kireb ni ngaun gay thibngin be’ ni gaar: “Ere mang fan ni ga be sap nga ba tabyu’ ni bay u lan mit walagem, ma damur tiyan’um nga baley i gek’iy ni bay u lan owchem? Ere ra diin me lungum ngak walagem, Mu son, nggu chuweg e re tabyu’ ni beer u lan owchem, ma ba’ ba ley i gek’iy u lan owchem?” (Matt. 7:3, 4) Be’ nib ta gay thibngin be’ e ma sap nga ban’en nib kireb u “lan mit” walagen. Cha’nem nib ta gay thibngin be’ e ri be yog ni be lemnag nder ma turguy walagen ban’en nib fel’ rogon. Yugu aram rogon nib achig fare kireb​—ntaareb rogon ngab tabyu’—​ma faen nib ta gay thibngin be’ e be yog ni nge ‘chuweg fare tabyu’’ u lan mit faanem. Be dake nge ayuweg fare walag nge guy ban’en nib fel’ rogon.

16. Mang fan nrayog ni nga nog ni fapi Farise e bay “ba ley i gek’iy” u lan owcherad?

¹⁶ Pi tayugang’ ko teliw ni Jew e ri yad ma gay thibngin e girdi’. Baaray rogon: Nap’an ni weliy be’ nib moon nib malmit ni golnag Kristus e malmit rok ndabisiy ni Jesus e ke yib rok Got, me fulweg fapi Farise u fithik’ e damumuw ni lungurad: “I gur e ni gargelnigem ngan chuguluyem u fithik’ e denen ma ga be guy rogon ni ngam machib ngomad?” (John 9:30-34) Ra ngan sap nrogon nib puluw min turguy ban’en u rogon nib puluw ko lem rok Jehovah, ma pi Farise e bay “ba ley i gek’iy” u lan owcherad ni ke malmitnagrad. Arfan ni gaar Jesus: “Gur e cha’ ni ga be dake modingnigem! Som’on e ngam chuweg fare ley i gek’iy u lan owchem, nge mu’ ma aram me yog ni mu guy ban’en ngam chuweg fare tabyu u lan mit walagem.” (Matt. 7:5; Luke 6:42) Faanra ke mudugil lanin’dad ni ngad rin’ed e tin nib fel’ ma gad dag e ngongol nib fel’ ngak boch e girdi’, ma dab da gayed thibngin e girdi’, ni gubin ngiyal’ ma gad be gay ba tabyu’ u lan mit walagdad nib fanathin. Ya, ngad daged ndaworda flontgad ma susuna ngad paged ndab kud turguyed e kireb ma gad be gay thibngin e piin ni gad nga mich.

Rogon ni Ngad Ngongolgad Ngak Boch e Girdi’

17. Rogon ni bay ko Matthew 7:12, susun uw rogon e ngongol rodad ngak boch e girdi’?

¹⁷ U lan fare Welthin u Daken e Burey, me dag Jesus ni Got e ma ngongol ngak e pi tapigpig Rok ni bod rogon be’ nib Matam u rogon ni ma fulweg taban e meybil rorad. (Mu beeg e Matthew 7:7-12.) Bay rogon ni ke sunmiy Jesus e re motochiyel ni baaray ni gaar: “Ere mu rin’ed ngak e girdi’ e tin ni gimed ba adag ni ngar rin’ed ngomed.” (Matt. 7:12) Kemus ni faanra ngad daged e ngongol nib fel’ ngak e girdi’ ma rayog ni ngad micheged ni gad e tin riyul’ pi gachalpen Jesus Kristus.

18. Uw rogon ni ke dag “fapi Motochiyel” rogon nsusuna ngad ngongolgad ngak boch e girdi’?

¹⁸ Tomren ni ke yog ni ngad rin’ed ngak e girdi’ e tin ni gad baadag ni ngar rin’ed ngodad, miki gaar Jesus: “Ereray fan fapi Motochiyel rok Moses nge tin i fil e pi profet ngak e girdi’.” Nap’an ni gad ra dag e ngongol ngak boch e girdi’ u rogon ni yog Jesus ngodad, ma aram e gad be ngongol u rogon nib puluw ko n’en ni kan lemnag ko “fapi Motochiyel”​—ni fapi thin ni bay ko fapi babyor ko Bible ni Genesis nge ni mada’ ko Deuteronomy. Pi babyor ney e gathi kemus ni be yog e n’en nib m’agan’ Jehovah ngay ni nge sunmiy fare awoch nra chuweg e tin nib kireb, ya ku bay riy e pi Motochiyel ni pi’ Got ngak fare nam nu Israel u daken Moses ko duw ni 1513 B.C.E. (Gen. 3:15) U fithik’ boch ban’en, e ke tamilangnag fare Motochiyel ni piyu Israel e ngar pired ni yad ba mat’aw, ma dab ra daged ni yad be fol ngak boch e girdi’, ma ngar rin’ed e tin nib fel’ ngak e piin ni ke gafgow lanin’rad nge piin nu bang ni be par ko fare binaw.​—Lev. 19:9, 10, 15, 34.

19. Uw rogon ni ke dag e “pi profet” nsusuna ngad rin’ed e tin nib fel’?

¹⁹ Bay u wan’ Jesus fapi Hebrew Scriptures ni babyor ko profet u nap’an ni yog e “pi profet.” Bay e pi yiiy ko fare Messiah riy nra lebguy Kristus. Pi yol ney e be dag ni ma tow’athnag Got e girdi’ rok u nap’an ni yad ra rin’ e tin nib fel’ u p’eowchen mar daged e ngongol nib fel’ ngak boch e girdi’. Bod ni, pi’ fare yiiy rok Isaiah e pi fonow ni baaray ngak piyu Israel ni gaar: “Baaray e n’en ni ke yog Jehovah: ‘Mu rin’ed e tin nib mat’aw ban’en. . . . Ba felfelan’ e cha’ nra rin’ e re n’ey, ma en fak e girdi’ nra fol riy e ra chichiiy pa’ ko tin nib fel’ ya nge dabi rin’ e tin nib kireb.’” (Isa. 56:1, 2, NW) Arrogon, baadag Got ni nge rin’ e girdi’ rok e tin nib fel’.

Mu Rin’ e Tin nib Fel’ ko Girdi’

20, 21. Uw rogon u wan’ fapi girdi’ fare Welthin rok Jesus u daken e Burey, ma mang fan ni ngam fal’eg i lemnag?

²⁰ Kad weliyed buchuuw e tin nib ga’ fan ni ke weliy Jesus ko fare Welthin rok u daken e Burey. Yugu aram rogon, ma rayog ni ngad nanged fan e n’en ni rin’ e piin kar rung’aged fare welthin ni pi’. Be gaar e Bible: “Faani yog Jesus e pi n’ey nge mu’, me gin fapi girdi’ ni aram urngirad nga rogon e machib ni ke tay. Ya gathi bod e tamachib rorad ko Motochiyel; ya i machib ni bay gelngin e thin rok.”​—Matt. 7:28, 29.

²¹ Dariy e maruwar riy ni ke micheg Jesus ni ir fare “Tafonow nrib Manigil ma ba Gonop” ni kan weliy u m’on riy. (Isa. 9:6) Fare Welthin u Daken e Burey e be dag rogon e tamilangan’ rok Jesus u rogon kanawoen ni ma sap e Chitamangin nga ban’en. Tin kub muun ko n’en kad weliyed, e re welthin nem e boor ban’en ni bay ni nge weliy u murung’agen e bin riyul’ e felfelan’, nge rogon ni ngan siyeg e ngongol ndarngal, nge rogon ni ngan rin’ e tin nib mat’aw, nge n’en nthingar da rin’ed ma gad felfelan’ ko tin bay yib ni fan ngodad boch nga m’on, nge ku boch ban’en. Mang ndab mu beeg e Matthew guruy ni 5 nge ni mada’ ko 7 bayay nib fel’ rogon u daken e meybil? Mu fal’eg i lemnag e fonow rok Jesus nrib manigil ni bay u rom. Mu fanay u lan e yafas rom e n’en ni ke yog Kristus ko fare Welthin rok u Daken e Burey. Ma aram e rayog nim fel’ u wan’ Jehovah, mag dag e ngongol nib fel’ ngak boch e girdi’, mag rin’ e tin nib fel’ ni gubin ngiyal’.

Uw Rogon ni Ga Ra Fulweg?

• Uw rogon ni ngad ngongolgad ngak e pi toogor rodad?

• Mang fan nsusun e ngaud n’aged fan e kireb?

• Mang e yog Jesus u murung’agen i turguy e kireb nga daken boch e girdi’?

• Rogon ni bay ko Matthew 7:12, susun uw rogon e ngongol rodad ngak boch e girdi’?

[Blurb on page 14]

Ga manang ko mang fan ni gaar Jesus: “Mu talgad i turguy e kireb nga daken e girdi’”?

[Picture on page 12]

Mang fan ni ngad yibilayed e piin ni yad be gafgownagdad?

[Picture on page 14]

Ga ma rin’ ngak boch e girdi’ e tin ni ga baadag ni ngar rin’ed ngom, fa?