Ke Gagiyel e En Be Gagiyegnag e Fayleng

IMMOY bayay ni gaar Jesus ngak e girdi’: “Bay nluf pa’ e en ni ir e be gagiyegnag e girdi’ nu fayleng.” Ma boch nga tomuren miki yog ni ‘en ni be gagiyegnag e girdi’ nu roy u fayleng e dariy gelngin ni nge gagiyegnag’ ma “en ni be gagiyegnag e girdi’ u roy u fayleng e ke mu’ Got i dugliy e gechig rok.” (John 12:31; 14:30; 16:11) Ere mini’ e be weliy Jesus murung’agen?

Gad ra lemnag e n’en ni be yog Jesus u murung’agen e “en ni be gagiyegnag e girdi’ u roy u fayleng,” ma ba tamilang nder weliy murung’agen e Chitamangin ni Jehovah Got. Ere, mini’ e “en ni be gagiyegnag e girdi’ u roy u fayleng”? Ma uw rogon ni “bay nluf pa’” ko gagiyeg ni be tay, ma uw rogon ni kan “dugliy e gechig rok”?

“En ni Be Gagiyegnag e Girdi’ nu Roy u Fayleng” e Ke Tamilangnag ko Ir Mini’

Nap’an ni be guy Moonyan’ rogon ni nge waliy Jesus ni Fak Got, ma i uf nga gelngin ni bod ni ma rin’ be’ nib ga’ ko kireb. Tomuren ni dag ngak Jesus “urngin e pi nam nu fayleng,” me gaar ngak: “Gu ra pi’ mat’awum ni nguum gagiyegnag e pi nam ney nge urngin e pi flaab ney. Ya ni pi’ ngog ni gubin nrayog ni gu pi’ ngak e en ni gub adag ni nggu pi’ ngak. Urngin e pi n’ey ma ra mil suwon ngom ni faanra mu ragbug nga but’ u p’eowcheg.”​—Luke 4:5-7.

Faanra Moonyan’ e kemus ni be yip’ fan e kireb, ni bod rogon ni ma yog boch e girdi’, me ere uw rogon min weliy fan e n’en ni buch? Gur, lem nib kireb ni yib ngak Jesus u tomuren ni kan taufenag e ir e i waliy ko kireb? Faanra aram rogon, me ere mang fan ni ka nog ni “dariy e denen rok”? (1 John 3:5) De yog Jesus ndariy gelngin Moonyan’ ni nge gagiyegnag e girdi’, ya yog ni ir e “en ni be gagiyegnag e girdi’ nu roy u fayleng” miki yog ni “ma thang e fan rok e girdi’” maku ma “lifith l’ugun.”​—John 14:30; 8:44.

Sogonap’an 60 e duw nga tomuren ni waliy Moonyan’ Kristus me puguran apostal John ngak e pi Kristiano feni gel gelngin Moonyan’ nrayog ni nge suruyey ko kireb. I yog ni “tin ni ka ba’ e girdi’ nu fayleng e ke suweyrad faanem nib kireb.” Ki yog John ni ku aram e en ni be “bannag e girdi’ nu fayleng ni polo’.” (1 John 5:19; Revelation 12:9) Ere ba tamilang ni be yog e Bible ni bay reb e kan ni ir e “be gagiyegnag e girdi’ nu roy u fayleng.” Machane, uw urngin e girdi’ ni be gagiyegnagrad u fayleng?

En Be Gagiyegnag e Fayleng e Ke Pi’ Gelngin e Piin ni Yad Ba Muun Ngak

Nap’an ni be yoloy apostal Paul murung’agen e cham ni ma tay e Kristiano ni fan ko michan’ rorad, me tamilangnag e bin th’abi ga’ e toogor rorad. I yog ni gaar: “Gadad e gathi gadad be cham ngak e girdi’, ya gadad be cham ngak gelngin e kan nib kireb, ni pi kan ni yad e yad be gagiyeg, nge gelngin e kan u lan e lang ko ngiyal’ ney nib talumor.” (Efesus 6:12) Ere, re cham ney e gathi cham ni yibe “tay ngak e girdi’,” ya cham ni yibe tay nga “gelngin e kan nib kireb.”

Rogon ni kan pilyeg u yu ken e Bible ni chiney e “gelngin e kan nib kireb” ni faan kan weliy murung’agen u roy e gathi be yip’ fan e kireb, ya be yip’ fan e kan nib kireb. Ere be maruwel Moonyan’ nga gelngin u daken boch e engel ni kar togopuluwgad ni bod ir, ma kar paged e “gin ni yad ma par riy” u tharmiy.​—Jude 6.

Ke weliy Daniel rogon ni i gagiyegnag e pi “kan nib kireb” ney e fayleng kakrom u lan e babyor ni Daniel. Bochan ni ke magafan’ ngak piyu Jew ni kar sulod u Babylon nga Jerusalem ko duw ni 537 B.C.E. me yibilayrad u lan dalip e wik. Ma fare engel ni l’og Got ni nge pi’ e athamgil nga laniyan’ Daniel e weliy ngak fan ni sagaal. I gaar: “Fare engel nib kireb ni ke mil fan e nam nu Persia ngak e reliw’ nge taareb e rran ni togopluw ngog. Ma reb fapi pilungen e engel, ni Mikael fithingan e yib i ayuwegeg, ya ka ni pageg u rom ni goo gag u lan e nam nu Persia.”​—Daniel 10:2, 13.

Ere mini’ fare “engel nib kireb ni ke mil fan e nam nu Persia ngak”? Re engel nib kireb ney ni ke milfan e nam nu Persia ngak e ba mudugil ni ir reb e engel rok Moonyan’ ni ir e be gagiyegnag e am nu Persia. Boch nga tomuren, me yog fare engel rok Got ni nge sul nga Persia ni nge cham ngak fare “engel nib kireb ni ke mil fan e nam nu Persia ngak” nge ku reb e engel nib kireb ni “ke mil fan e nam nu Greece ngak.”​—Daniel 10:20.

Ere mang e rayog ni nga dogned ko re n’ey? Rayog ni nga dogned ni bay boch e “kan nib kireb” ni yad be gagiyegnag e fayleng ni yad be maruwel u tan pa’ e ga’ rorad ni aram Satan ni Moonyan’. Machane, mang e yad be nameg ke mada’ ko chiney?

Ke M’ug e En ni Be Gagiyegnag e Fayleng

U lan e bin tomur e babyor ko Bible ni Revelation, e yog apostal John riy ni Jesus ni ir Mikael ni pilungen e engel e ke gel ngak Moonyan’ nge pi engel rok. Miki weliy e n’en ni buch u tomuren ni kan tharbograd u tharmiy. Be gaar: “Ri bayi gafgow e fayleng . . . ya ke yib fare Moonyan’ ngomed ni kari damumuw, ya manang ndaki n’uw nap’an ni nge par.”​—Revelation 12:9, 12.

Uw rogon ni ke dag Moonyan’ ni kari damumuw? Boor e girdi’ nib kireb ndemtrug e n’en ni yad ra rin’ ni fan e nge lebug e n’en ni yad baadag. Ere ku er rogon Moonyan’ nge pi engel rok ni yad be rin’ boch ban’en ya kar turguyed u wan’rad ni nge un e re fayleng ney nge girdi’ riy ngorad ko magothgoth. Bochan ni manang Moonyan’ ndaki n’uw nap’an ni nge par, ma kab kafram i yib ni be fanay e siyobay ni gagang’ ni nge gelnag fare lem ni ngan adag ni ngan chuw’iy boor ban’en ni ngaun fol chuway’ ngay. Ma re lem ney e ke buchuuwnag boch ban’en u fayleng ni yima fanay, ma be kirebnag e yafang, maku be kirebnag e par ko girdi’.​—Revelation 11:18; 18:11-17.

Ka aram u tabolngin chepin e girdi’ keb i mada’ ko chiney ni be m’ug u daken e pi am nge teliw ni baadag Moonyan’ ni nge gagiyeg. Fare babyor ni Revelation e kan taareb rogonnag e pi am nu fayleng nga ba gamanman ni ke pi’ Moonyan’ “mat’awun.” Ki tamilangnag nib gel e tamra’ ko m’ag ni ke ngongliy e pi am u thilrad e pi yurba’ i teliw, ya taareb rogon ko ngongol ndarngal. (Revelation 13:2; 17:1, 2) Am lemnag e gafgow ni yibe tay ko girdi’, nge mahl, nge magawon ni be sum u thilin e girdi’ ko pi nam ko fapi chibog ni ke yan ni bokum milyon e girdi’ ni kar m’ad riy. Ere, gur, rayog ni nga nog ni pi kireb ney ni ke gafgownag e girdi’ e bogi ban’en ni girdi’ e be sum rorad? Fa bay boch e kan nib kireb ni yad be k’aring e pi n’ey?

Kari tamilangnag e Bible ko mini’ e be gagiyegnag e pi pilung nge am nu fayleng. Demtrug ko yad manang fa danga’, machane be m’ug rarogon e en ni be gagiyegnagrad rorad, maku be m’ug ni be guy rogon ni nge fekrad i yan ko magothgoth. Machane, uw n’umngin nap’an ni bayi gafgow e girdi’ u tan e gagiyeg rok Moonyan’?

Dabki N’uw Nap’an Min Chuweg Gelngin Moonyan’!

Pi n’en ni i rin’ Kristus u fayleng ko bin som’on e chibog e be dag ndaki n’uw nap’an ma bay ni thang Moonyan’ nge pi engel rok. Nap’an ni weliy pi gachalpen Jesus rogon ni kar tulufed boch e moonyan’, me gaar ngorad: “Kug guy Satan ni ke mul u lan e lang ni bod e uluch.” (Luke 10:18) Pi thin nem ni yog Jesus e be dag ni be felfelan’ ko gel nra tay ngak e en ni be gagiyegnag e fayleng boch nga m’on u nap’an nra sul bayay nga tharmiy ni ir Mikael ni Pilungen e Engel. (Revelation 12:7-9) Yira fal’eg i fil e pi yiiy nu Bible, ma yira nang ni ke gel Jesus ngak Moonyan’ u tharmiy u nap’an e duw ni 1914 ara de n’uw nap’an nga tomuren e re duw nem.a

Ka nap’an e re duw nem, me nang Moonyan’ ndaki n’uw nap’an ma bay ni thang. Yugu aram rogon ni ke suwey e ‘tin ka bay e girdi’’ ma bokum milyon e girdi’ e ngiyal’ ney nder yog ni nge bannagrad Moonyan’. Bible e ir e ke ayuwegrad ke yog ni ngar nanged ko mini’ Moonyan’ nge tin ni be lemnag ngorad. (2 Korinth 2:11) Ke l’agan’rad ko n’en ni yog Paul ngak e pi Kristiano kakrom ni gaar: “Mi Got ni ir e ma pi’ e gapas ngodad e dab ki n’uw nap’an me pirdiiy Satan u tan e rifrif u aymed.”b​—Roma 16:20.

Dabki n’uw nap’an min chuweg gelngin Moonyan’! Piin ni yad ba mat’aw e yad ra pingeg e re fayleng ney nge mang paradis u tan e gagiyeg rok Kristus. Cham, nge fanenikan, nge chogow e ra chuw ni manemus. Be gaar e Bible: “Tin kakrom e ri bay ni pag talin.” (Isaiah 65:17) Ra taw ko ngiyal’ nem, ma rra felfelan’ e piin ni kar chuwgad u tan gelngin e en ni be gagiyegnag e re fayleng ney!

[Footnotes]

[Blurb on page 9]

Piin ni yad ba mat’aw e yad ra pingeg e re fayleng ney nge mang paradis u tan e gagiyeg rok Kristus