Rayog ni Ngam Felfelan’ ni Yugu Aram Rogon Nde Taareb e Michan’ Romed Chon e Tabinaw Rom
“Ke diin ma ka mu nang ndabiyog ni ngam thapeg [e en mabgol rom]?”—1 KOR. 7:16.
RAYOG NI NGAM PIRIEG E FULWEG RIY?
Uw rogon nrayog ni nge par e tabinaw rok reb e Kristiano ni bay e gapas riy ni yugu aram rogon nder un chon e tabinaw rok ko tin riyul’?
Uw rogon ni nge ayuweg reb e Kristiano chon e tabinaw rok ni ngar adaged e tin riyul’?
Uw rogon nrayog ni nge ayuweg boch e girdi’ e piin Kristiano nder un chon e tabinaw rorad ko tin riyul’?
1. Nap’an nra un be’ ko tin riyul’, ma mang e ra rin’ e tabinaw rok?
IMMOY bayay ni l’og Jesus e pi apostal rok, me gaar ngorad: “Marod ngam machibgad ni nge lungumed, ‘Gagiyeg rok Got e ke chugur!’” (Matt. 10:1, 7) Re thin nib fel’ ney e ra yibnag e gapas nge felfelan’ ngak e piin ni yad ra motoyil ngay mi yad fol riy. Machane, ke yog Jesus ngak e pi apostal rok ni boor e girdi’ ni yad ra togopuluw ko machib ni yad ra tay. (Matt. 10:16-23) Mab mit e togopuluw nib mo’maw’ ni yad ra mada’nag e aram e togopuluw ni ma yib u lan e tabinaw.—Mu beeg e Matthew 10:34-36.
2. Mang fan nrayog ni ngad felfelan’gad ni yugu aram rogon nder un chon e tabinaw rodad ko tin riyul’?
2 Faanra der un chon e tabinaw rom ko tin riyul’, ma gur, be yip’ fan ndabiyog ni ngam felfelan’? Danga’, ya gathi gubin e Kristiano ma taareb rogon e togopuluw ni yima tay ngorad. Maku reb e dabi par e togopuluw ndariy n’umngin nap’an, ya re n’ey e be yan u rogon e n’en ni ga ra rin’ u nap’an nra togopuluw chon e tabinaw rom ngom ara dubrad e tin riyul’. Maku reb e ma tow’athnag Jehovah e piin ni yad ba yul’yul’ ngak ma ma ayuwegrad ni ngar pared ni yad ba felfelan’ ni yugu aram rogon ni yad be mada’nag boch ban’en nib mo’maw’. Rayog ni nge gel boch e felfelan’ ko piin Kristiano ni faan yad ra (1) guy rogon ni nga i par e tabinaw rorad ni bay e gapas riy mar (2) guyed rogon ni ngar ayuweged chon e tabinaw rorad ni ngar adaged e tin riyul’.
NGA I PAR E TABINAW NI BAY E GAPAS RIY
3. Yugu aram rogon nder un chon e tabinaw rok reb e Kristiano ko tin riyul’, ma mang fan nsusun e nge guy rogon ni nga i par e tabinaw rok ni bay e gapas riy?
3 Ra mom ni nge adag chon e tabinaw e tin riyul’ ni faanra bay e gapas u lan e tabinaw. (Mu beeg e James 3:18.) Aram fan ni faanra bay reb e Kristiano nder un chon e tabinaw rok ko tin riyul’ ma susun ni nge guy rogon ni nga i par e tabinaw rok ni bay e gapas riy. Uw rogon nrayog ni nge rin’ e re n’ey?
4. Uw rogon nrayog ni nga i par e piin Kristiano nib gapas lanin’rad?
4 Thingari par e piin Kristiano nib gapas lanin’rad. Faanra ngar pared ni aram rogon, mab t’uf ni ngaur meybilgad ni ke yib u gum’ircha’rad, ya re n’ey e ra yibnag e “gapas rok Got” ngorad ndariy ban’en ni taareb rogon ngay. (Fil. 4:6, 7) Faan gad ra fil murung’agen Jehovah mu ud folgad ko pi kenggin e motochiyel nu Bible, ma aram e rayog ni nge yib e felfelan’ nge gapas ngodad. (Isa. 54:13) Kub ga’ fan ni ngaud uned ko muulung ma gad pasig ko machib. Piin Kristiano nder un chon e tabinaw rorad ko tin riyul’ e boor e kanawo’ nrayog ni ngar rin’ed e pi n’ey riy. Mu lemnag e n’en ni buch rok Enza.a Rogon e togopuluw ni ma tay e pumoon rok ngak e aram e ma li’. Ma un ko machib u tomuren ni ke mu’nag e maruwel rok u tabinaw. I yog ni gaar, “Kari tow’athnageg Jehovah ni bochan e gubin ngiyal’ ni gu ra athamgil ni nggu un ko machib ma ma yib angin.” Re tow’ath ney e ma yibnag e gapas nga lanin’uy nge felfelan’.
5. (a) Mang boch e magawon ni ma mada’nag boch e Kristiano nder un chon e tabinaw rorad ko tin riyul’? (b) Uw e rayog ni ngar pirieged e ayuw riy?
5 Ba t’uf ni ngad athamgilgad ni nga i par ni bay e gapas u thildad chon e tabinaw rodad ndarur uned ko tin riyul’. Machane, ba mo’maw’ e re n’ey ni bochan e bay boch ban’en ni yad baadag ni ngad rin’ed nib togopuluw ko pi kenggin e motochiyel nu Bible. Gad ra fol ko thin nu Bible ma sana ra k’aring e damumuw ngak boch i yad, machane re n’ey e ra ba ngiyal’ ma ra yibnag e gapas nga lan e tabinaw. Yugu aram rogon ma gad ma un i rin’ e pi n’en ni yad ba baadag ni faanra der togopuluw ko pi kenggin e motochiyel nu Bible ya nge dabi sum e maluagthin u thildad. (Mu beeg e Proverbs 16:7.) Nap’an nra yib e magawon ngodad, mab ga’ fan ni ngad gayed e fonow u lan e pi babyor ni ke ngongliy fare tapigpig nib yul’yul’ ma ba gonop, mu kud ninged e ayuw ngak e piin piilal.—Prov. 11:14.
6, 7. (a) Mang fan ni ma togopuluw chon e tabinaw ngak boch e girdi’ ni fin yad be tabab e Pi Mich Rok Jehovah i fil e Bible? (b) Mang e susun ni nge rin’ be’ ni be fil e Bible ara reb e Kristiano ni be togopuluw chon e tabinaw rok ngak?
6 Rayog ni nge yib e gapas nga lan e tabinaw ni faanra pagan’dad ngak Jehovah ma gad guy rogon ni ngad nanged rarogon laniyan’ chon e tabinaw rodad. (Prov. 16:20) Mus ngak e piin ni ka fin ra tababgad i fil e Bible nrayog ni ngar rin’ed e re n’ey. Bay boch i figirngiy ara leengiy ndariy ban’en nrogon u wan’rad ni be fil e en mabgol rorad e Bible. Ku bay boch i yad nsana ra yog nib fel’ e re n’ey ya ra yib angin ko tabinaw. Machane, bay boch i yad ni ma togopuluw nib gel. Esther ni ke mang reb e Mich Rok Jehovah e yog nnap’an ni tabab figirngin i fil e Bible mi “ri damumuw.” I yog ni gaar, “Ba ga’ ni gu ma n’ag e babyor rok ara gu urfeg.” Howard ni i togopuluw ngak leengin u nap’an ni tabab i fil e Bible e gaar, “Boor e pumoon ni yad be rus ni bochan e yad be lemnag ni ke un leengirad nga reb e ulung ko teliw ni yibe bannagrad riy. Ere rayog ni nge togopuluw faen figirngiy ni bochan e be rusnag leengin nri buch ban’en rok.”
7 Faanra be fil be’ e Bible ma be togopuluw figirngin ara leengin ngak, ma susun e ngad ayuweged nge nang nde t’uf ni nge tal ko fol Bible. Ba ga’ nrayog ni nge achig e magawon ni faanra i sumunguy ngak e en mabgol rok ma be tayfan. (1 Pet. 3:15) I yog Howard ni gaar, “Gub felfelan’ nde togopuluw leengig ngog ma de rin’ ban’en nib pag rogon!” Me yog leengin Howard ni gaar: “I yog Howard ngog ni nggu tal i fil e Bible ni bochan e yibe bannageg nda gur nang. Da gu togopuluw ngak, ya gog ngak nrayog nib puluw e n’en ni be yog, machane da gur guy e mich riy. Ere gog ngak ni nge beeg fare ke babyor ni gu be fil. Ma aram me fek nge beeg ma de yog ni nge togopuluw ko thin ni bay riy. Kari taw e thin ni beeg riy nga gum’irchaen.” Thingar dab da paged talin nrayog ni nge kireban’ be’ ara lemnag ni ke kireb e mabgol rok u nap’an nra un leengin ara figirngin ko muulung, me magey u tabinaw ni goo ir. Machane, rayog ni nge non faen ni be fil e Bible ara fare Kristiano ngak e en mabgol rok u fithik’ e sumunguy nge gol. Ma re n’ey e ra ayuweg facha’ ni nge dabi magafan’.
MU AYUWEGRAD NGAR ADAGED E TIN RIYUL’
8. Mang fonow e pi’ apostal Paul ngak e pi Kristiano nder un e en mabgol rorad ko tin riyul’?
8 I fonownag apostal Paul e piin Kristiano ndab ra chuwgad ko en mabgol rorad ni bochan e gathi yad e Kristiano.b (Mu beeg e 1 Korinth 7:12-16.) Faanra i par fare Kristiano ni be lemnag ni dabisiy ma ra ba ngiyal’ me adag e en mabgol rok e tin riyul’, ma ra ayuweg ni nge par nib felfelan’. Machane, ba fel’ ni nge kol ayuw u rogon ni ma guy rogon ni nge ayuweg e en mabgol rok ni nge nang e tin riyul’, ni bod e n’en ni buch ko pi girdi’ ni baaray.
9. Mang e thingari guy reb e Kristiano rogon ndabi rin’ u nap’an ni be weliy murung’agen e tin riyul’ ni ke fil ngak chon e tabinaw rok?
9 I weliy Jason e n’en ni rin’ u nap’an ni ka fini tabab i fil e tin riyul’ ni gaar, “Gu baadag ni nggu weliy ngak urngin e girdi’!” Nap’an nra nang be’ nib riyul’ e pi n’en ni be fil u Bible, ma rayog ni ngari felfelan’ ngay mi i par ni goo aram e n’en ni be weliy murung’agen. Rayog ni nge lemnag nib t’uf ni nge adag chon e tabinaw rok e tin riyul’ nib papey, machane rayog ndab ra motoyilgad ngak. Uw rogon u wan’ leengin Jason e pi n’en ni i rin’ u nap’an ni ka fini tabab i fil e Bible? I yog ni gaar, “Gowa dabkiyog ni nggu k’adan’ug.” Ma reb e ppin ni fini un ko tin riyul’ u tomuren 18 e duw ni ke un e pumoon rok ngay e gaar, “Kug guy nib t’uf ni nggu fil ni buchuuw ma buchuuw.” Faanra ga be fil e Bible ngak be’ nder lemnag e en mabgol rok ni nge un ko tin riyul’, mab fel’ ni ngam weliy ngak rogon nrayog ni nge weliy e tin ni be fil ngak e en mabgol rok u fithik’ e sumunguy ndabi k’aring e damumuw ngak. I yog Moses ni gaar: “Machib rog e bayi aw ni bod e n’uw, me ngal’ ni waangachal u but’ ni kadbul. Thin rog e bayi aw ni bod e n’uw ni aw ko woldug ni ka fini tugul, ma bod e n’uw ni be saaw’aw nga ran’ e pan ni kab mererey.” (Deut. 32:2) Ba ga’ ni faan yira weliy murung’agen e tin riyul’ ngak be’ ni buchuuw ma buchuuw ma ra yib angin ko bin ni ngan weliy ngak nge pag rogon.
10-12. (a) Mang fonow e pi’ apostal Peter ngak e pi Kristiano nder un e en mabgol rorad ko tin riyul’? (b) Uw rogon ni nang be’ ni un fil e Bible ngak rogon ni nge fol ko fare fonow ni bay ko 1 Peter 3:1, 2?
10 I fonownag apostal Peter e pi Kristiano nib pin nder un chon e tabinaw rorad ko tin riyul’ ni gaar: “Um folgad rok pi figirngimed, ni fan e faanra ba’ boch i yad ndawori mich e thin rok Got u wun’rad ma rayog ni nge mich u wun’rad ni bochan pangimed. Ma aram e dakuriy fan bbugithin ni nga mogned ngorad, ya bay ra guyed rogon feni machalbog pangimed nge rogon ni gimed be ta’ farad.” (1 Pet. 3:1, 2) Rayog ni nge ayuweg reb e ppin figirngin ni nge adag e tin riyul’ ni faanra i fol rok ma be tayfan ni mus ni faanra be gafgownag. Ku er rogon ni faanra faen figirngiy e ir e ba mich Got u wan’ ma susun ni ngki ngongol u rogon nib m’agan’ Got ngay me ayuweg e tabinaw rok u fithik’ e t’ufeg ni mus ni faanra be togopuluw leengin ngak.—1 Pet. 3:7-9.
11 Boor ban’en ni ma buch rok boch e Kristiano e ngiyal’ ney ni be dag feni ga’ fan ni ngan fol ko fare fonow rok Peter. Am lemnag e n’en ni buch rok Selma. Nap’an nra tababgad e Pi Mich Rok Jehovah i fil e Bible u taabang, ma dabun Steve ni pumoon rok. I yog Steve ni gaar, “Kar gu damumuw, ma ug taliyegnag e ppin rog, ma daki pagan’ug.” I yog Selma ni mus ko ngiyal’ ndawori fil e Bible ma de mom e par rorow. Gubin ngiyal’ nthingari kol ayuw ko n’en ni be yog nge n’en ni be rin’. Ki yog ni figirngin e ir be’ ni ma damumuw nib gel, ma nap’an ni fil e Bible mi ki gel boch e damumuw ni ma tay. Ere mang e ayuweg e re walag ney?
12 Ke yib ngan’ Selma ban’en ni fil rok e en ni ur filew e Bible. I gaar, “Immoy reb e rran ni dabug ni nggu filew e Bible ni bochan e re nep’ u m’on riy ma gamow tugthin Steve, ma aram me lieg. Kari kireban’ug. Tomuren ni gu weliy ngak fare walag nib pin ni gamow ma fil e Bible e n’en ni ke buch, ma aram me yog ngog ni nggu beeg e 1 Korinth 13:4-7. Nap’an ni gu beeg, me lungug ngak fare walag, ‘Dariy reb e pi n’ey ni ma rin’ Steve ngog.’ Machane me guy rogon ni nggu lem nga yugu reb e kanawo’, me fitheg ni gaar, ‘Bin ngan ko pi n’ey e ga ma dag ngak figirngim?’ Me lungug, ‘Dariy, ya rib mo’maw’ ni nggu parew u taabang.’ Ma aram me gaar fare walag ngog, ‘Selma, mini’ e be guy rogon ni nge mang reb e Kristiano? Gur fe Steve?’ Nap’an ni gu nang nib t’uf ni nggu thilyeg e lem rog, ma aram mu gu meybil ngak Jehovah ni nge ayuwegeg ni nge gel boch e t’ufeg ni nggu dag ngak Steve. Munmun, me tabab ni nge thil boch ban’en.” Tomuren 17 e duw ma aram me un Steve ko tin riyul’.
ROGON NRAYOG NI NGE PI’ BOCH E GIRDI’ E AYUW
13, 14. Uw rogon nrayog ni nge ayuweg boch e girdi’ u lan e ulung e piin nder un chon e tabinaw rorad ko tin riyul’?
13 Noch gaf i n’uw ni be mul u lan e lang nga but’ e rayog ni ngan taareb rogonnag ko ngongol u fithik’ e sumunguy. Noch gaf i n’uw ney e ba achig machane ra peth nga taabang ma rayog ni nge munurnag e but’. Ku er rogon e ngongol u fithik’ e sumunguy ni ma dag e girdi’ u lan e ulung nrayog ni nge yib angin ngak be’ nder un ko tin riyul’. Elvina ni ma par u Brazil e yog ni gaar, “T’ufeg ni i dag pi walageg u lan e ulung e aram e n’en ni ayuwegeg ni nggu par ni gub mudugil ko tin riyul’.”
14 Faanra i gol e girdi’ u lan e ulung ngak reb i chon e tabinaw nder un ko tin riyul’, ma yad be dag ngak ni yad be lemnag rarogon, ma rayog ni nge thil e lem rok. Reb e pumoon u Nigeria ni un ko tin riyul’ u tomuren 13 e duw ni ke un leengin ngay e yog ni gaar, “Nap’an ni gamow be milekag reb e Mich u taabang, me kireb e karrow rok. Ma aram me yan i gay boch e Pi Mich Rok Jehovah u reb e binaw nib chugur e ngaram. Ma nap’an ni piriegrad mi yad fekmow nggu parew u taferad ko re nep’ nem. Kar ayuweged gamow ni gowa yad boch e girdi’ ni gamad manangmad ni ka nap’an ni ka gamad bbitir. Ka ngiyal’ nem mu gu thamiy fare t’ufeg ni bay u thilin e piin Kristiano ni yugu ma weliy leengig murung’agen.” Reb e ppin ni ma par u England ni fini un ko tin riyul’ u tomuren 18 e duw ni ke un e pumoon rok ngay e yog ni gaar, “Ma piningmow e Pi Mich Rok Jehovah ni nggu abichgad u taabang. Gu ma guy ni yad baadag ni gu ma chag ngorad.”c Ku immoy reb i figirngiy ni ma par ko re nam nem ni munmun me mang bagayad e Pi Mich Rok Jehovah ni yog ni gaar, “Ba ga’ ni ma yib e pi walag i guymow, fa reb e ni piningmow nga taferad, ma kug guy nri yad ba gol. Aram ban’en ni gguy u nap’an ni ur bad ra guyed gag ko ngiyal’ ni gu bay u aspital ni gub m’ar.” Rayog ni ngam rin’ boch ban’en ni aray rogon ngak chon e tabinaw rok e piin ni goo yad e yad bay ko tin riyul’, fa?
15, 16. Mang e rayog ni nge ayuweg boch e Kristiano ni ngar pared ni yad ba felfelan’ ni yugu aram rogon ndabi adag chon e tabinaw rorad e tin riyul’?
15 Mus ni faan gad ra rin’ e tin nib fel’ u lan boor e duw ma gad be machibnag chon e tabinaw rodad u fithik’ e sumunguy, ma gathi yad gubin ni yad ra adag e tin riyul’. Boch i yad e dab ra adaged e machib ara ra talgad ko togopuluw. (Matt. 10:35-37) Machane, faanra ud daged fel’ngin e Kristiano ko ngongol rodad ma rayog ni nge yib angin. Reb i figirngiy ni fini un ko tin riyul’ u tomuren e ppin rok e gaar, “Ra dag faen nib mich e thin rok Got u wan’ e pi fel’ngin nem nib fel’, ma der nang e n’en ni be rin’ nga laniyan’ nge gum’irchaen e en mabgol rok nder un ko tin riyul’. Ere dabi mulan’um ngam lemnag ndariy e ngiyal’ nra adag e en mabgol rom e tin riyul’.”
16 Piin ndabi adag chon e tabinaw rok e tin riyul’ e ku rayog ni ngar pared ni yad ba felfelan’. Reb e walag e gay rogon ni nge adag figirngin e tin riyul’ u lan 21 e duw, machane de buch ni aram rogon. I yog ni gaar, “Ke yog ni nggu par ni gub felfelan’ ni bochan e gu ma rin’ e tin nib m’agan’ Jehovah ngay, ma gu ma par ni gub yul’yul’ ngak, ma gu ma guy rogon ni ngari fel’ e tha’ u thilmow. Fol Bible ni gu ma tay ni goo gag, nge muulung nge machib ni gu ma un ngay, nge ayuw ni gu ma pi’ ngak boch e girdi’ u lan e ulung e ke chugurnageg ngak Jehovah ma ke ayuwegeg ni nggu par ni gub yul’yul’ ngak.”—Prov. 4:23.
DABI MULAN’UM!
17, 18. Uw rogon ni nge dabi mulan’ reb e Kristiano nder un chon e tabinaw rok ko tin riyul’?
17 Dabi mulan’um ni faanra gathi gubin e girdi’ u lan e tabinaw rom ni yad baadag e tin riyul’. Dab mu pagtalin ni ke micheg Jehovah ‘ndabi n’agem, ya ke dugliy u wan’ ni nge tem ni gur girdien.’ (1 Sam. 12:22) Ra par rom u n’umngin nap’an ni ga be par ni gab chugur ngak. (Mu beeg e 2 Kronicles 15:2.) Ere, “mu adag Somol me fel’ u wun’um.” Arrogon, ‘mu piem ngak Somol; ma ga pagan’um ngak.’ (Ps. 37:4, 5) ‘Um meybil ni gubin ngiyal’,’ ma ga pagan’um ngak e Chitamangidad ni bay u tharmiy ya rayog ni nge ayuwegem u fithik’ urngin e magawon ni ma yib ngom.—Rom. 12:12.
18 Mmeybil ngak Jehovah ma ga ning gelngin nib thothup ni nge ayuwegem ni nge yib e gapas nga lan e tabinaw rom. (Heb. 12:14) Faan ga ra rin’ ni aray rogon, ma aram e rayog ni ngam ayuweg chon e tabinaw rom ndarur uned ko tin riyul’. Ga ra felfelan’ ma ra gapas lanin’um ni faan ga ra rin’ gubin ban’en ni “fan e nga nog e sorok riy ngak Got.” (1 Kor. 10:31) Ku rayog ni nge pagan’um ko pi walag u lan e ulung, ya rayog ni ngar ayuweged gur u fithik’ e t’ufeg!
[Footnotes]
a Kan thilyeg fithingan e girdi’ u roy.
b Fonow rok Paul e gathi be yog ndabiyog ni nge chuw be’ ko en mabgol rok ni faanra rib gel e magawon ko mabgol rorow. Re n’ey e fa gali cha’ e yow ra dugliy. Mu guy fare ke babyor ni “Mang e Ba T’uf ni Ngad Rin’ed ku Got?,” ko guruy ni 8 ko paragraph 6-7.
c Der yog e Bible ndabiyog ni ngad abichgad e piin ndawor ra uned ko tin riyul’ u taabang.—1 Kor. 10:27.
[Picture on page 30]
Mmel’eg e ngiyal’ nib fel’ ni ngam weliy e michan’ rom riy
[Picture on page 31]
Mu dag ngak e piin figirngiy ara piin leengiy nde mich Got u wan’rad ni ga be lemnagrad