Machib U Polo’ E Tayim Rodad E Rayog Ni Nge Gelnag E Tha’ U Thildad Got

1, 2. (a) Mang e rayog ni nge buch nfaan gad ra lemnag ara ngad weliyed murung’agen be’ nib t’uf rodad? (Mu guy e sasing ni bay u tabolngin e re article ney.) (b) Mang deer e gad ra weliy?

GAD ra lemnag, ma gad weliy murung’agen be’ nib t’uf rodad, ma rayog ni nge gel e tha’ u thildad e cha’nem. Ku aram rogon e tha’ u thildad Jehovah. David ni ir be’ nib ta chugol saf e boor e nep’ ni par ni be fal’eg i yaliy lan e lang nib sug e pi t’uf riy, ma be fal’eg i lemnag e En Ta Sunmiy ndariy be’ ni taareb rogon ngak. Ma aram me yoloy ni gaar: “Faan gu ra yaliy lan e lang ni gur e kam sunumiy, nge pul nge pi t’uf nu lan e lang, ni gur e mu ta’rad nga tagil’rad, me lungug u wun’ug, Girdi’ e mang ni ngam lemnag; mang ni ngam lemnag ni yugu aram rogon ni ir e ke mus ni girdi’?” (Ps. 8:3, 4) U tomuren ni fal’eg i lemnag Paul rogon ni be lebguy Jehovah e n’en nib m’agan’ ngay ni fan ngak e pi Kristiano ni kan dugliyrad, me yog ni gaar: “Ri ba ga’ e flaab rok Got! Ma rib toar e gonop rok nge llowan’ rok.”​—Rom. 11:17-26, 33.

² Nap’an ni gad ra un ko machib, ma gad ma lemnag ma gad weliy murung’agen Jehovah. Ma re n’ey ni gad ma rin’ e ra yibnag e felfelan’ ngodad. Boor e piin ni kar uned ko machib u polo’ e tayim rorad ara pioneer ni kar pirieged u lanin’rad ni kar chugurgad ngak Got. Demtrug ko ga be un ko pioneer e chiney ara ga be nameg e re n’em, mab fel’ ni ngam lemnag e re n’ey: Uw rogon ma machib ni ga ra tay u polo’ e tayim rom e rayog ni nge gelnag e tha’ u thilmew Jehovah? Faanra gur reb e pioneer, ma ngam fithem ni nge lungum, ‘Mang e rayog ni ayuwegeg ni nggu ulul ko re maruwel ney?’ Faanra dawor mu un ko pioneer, maku rayog ni ngam fithem nge lungum, ‘Mang e ba t’uf ni nggu thilyeg nge yag ni nggu un ngay?’ Ngad weliyed boch e kanawo’ nrayog ni nge gel e tha’ u thildad Got riy nbochan ni gad be pigpig ngak u polo’ e tayim rodad.

MACHIB U POLO’ E TAYIM RODAD NGE THA’ U THILDAD GOT

3. Nap’an ni gad ra weliy murung’agen e pi tow’ath nra fek Gil’ilungun Got i yib ngak e girdi’ u nap’an e machib, ma uw rogon nrayog ni nge ayuwegdad e re n’ey?

³ Faan gad ra weliy murung’agen e pi tow’ath nra yibnag Gil’ilungun Got ma gad ra chugur ngak Jehovah. Mang thin nu Bible e ga baadag ni ngam beeg u nap’an ni ga be un ko machib u mit e tabinaw i yan? Gur, ga baadag ni ngam beeg e Psalm 37:10, 11; Daniel 2:44; John 5:28, 29; ara Revelation 21:3, 4? Gubin ngiyal’ ni gad ra weliy e pi n’ey, ma be puguran ngodad ni Got rodad nib gol e riyul’ ni ir e ma pi’ ‘urngin e tin nib fel’ ni be pi’ ngodad nge urngin e tow’ath nrib manigil.’ Re n’ey e ra chugurnagdad ngak.​—Jas. 1:17.

4. Mang fan nra gel boch e felfelan’ rodad nga feni rib fel’ Got u nap’an ni gad ra guy e girdi’ nder yag e tirok ban’en ngorad?

⁴ Gad ra machibnag e piin ni gad be guy nri be gafgow lanin’rad, ma rayog ni nge k’aringdad ngki gel e t’ufeg rodad ko tin riyul’. Girdi’ nu fayleng e dariy ban’en ni be pow’iyrad nrayog ni ngar pagan’rad ngay nge yag ni nge yib angin e yafas rorad ma rayog ni nge felfelan’rad. Yooren e girdi’ e be magafan’rad ko tin ni bay nga m’on ma dariy e athap rorad, ma yad be fal’eg i gay fan e yafas. Ma yooren e girdi’ ni yad ba m’ing ko teliw rorad e de yoor e tamilangan’ rorad ko thin nu Bible. Yad bod e girdi’ nu Nineveh kakrom. (Mu beeg e Jonah 4:11.) Nap’an ni gad ra tay e tayim ni boor ni fan ko machib, ma gad ra guy ni piin ni gad be machibnagrad e darur gamangad ko tirok Got ban’en ni bod rogon e tirok Jehovah e girdi’. (Isa. 65:13) Kan puguran ngodad feni rib fel’ Jehovah ya gathi kemus ni be pi’ e tin nib t’uf rodad ko tirok ban’en; ya be pining urngin e girdi’ ni nge yag e ayuw ngorad ni fan ko tirok ban’en maku rayog ni nge yag e bin riyul’ e athap ngorad.​—Rev. 22:17.

5. Faan gad ra ayuweg yugu boch e girdi’ ko tirok Got ban’en, ma ra uw rogon e magawon rodad u wan’dad?

⁵ Gad ra ayuweg e girdi’ ko tirok Got ban’en, ma rayog ni ngad siyeged ni nge dabkud lemnaged e magawon rodad nib pag rogon. Trisha, ni ir reb e regular pioneer e ke guy nriyul’ e re n’ey u nap’an ni ke dar e gallabthir rok. Ke weliy ni gaar: “Ireray reb e ban’en ni kari k’aring e kireban’ ngog.” Immoy reb e rran ni kari kireban’ ma ke lemnag ni nge par u tabinaw, machane me dugliy ni nge yan i guy dalip e bitir ni yad ma fil e Bible u taabang, ma pi bitir nem e rib gel e magawon ko tabinaw rorad. Ya ke n’agrad e chitamangirad, ma bin ba ilal i walagrad nib pumoon e ke gafgownagrad. Me yog Trisha ni gaar: “Dabiyog ni ngan taarebrogonnag e magawon rog ko magawon rorad, ya kab gel boch e birorad e magawon. Nap’an ni gamad be fil e Bible, ma be m’ug u owcherad ni yad ba felfelan’ ma yad be minmin. Rofen nem e ri tamilang u wan’ug ni pi bitir nem e yad boch e tow’ath ni ke pi’ Jehovah.”

6, 7. (a) Uw rogon nra gel e michan’ rodad u nap’an ni gad ra machibnag be’? (b) Nap’an ni gad ra guy e piin ni yad be fil e Bible ni be mon’og e yafas rorad, ma ra uw rogon e gonop rok Got u wan’dad?

⁶ Gad ra fil e thin nu Bible ngak yugu boch e girdi’ ma ra gel e michan’ rodad. U nap’an apostal Paul me yoloy murung’agen boch piyu Jew nda ur folgad ko n’en ni yad be machibnag ni gaar: “Ga be machibnag boch e girdi’ mang fan ndab mmachibnigem?” (Rom. 2:21) Ngiyal’ ney ma piin ni yad ma un ko pioneer e ba thil e n’en ni yad ma rin’. Ba ga’ ni boor e kanawo’ ni ke mab ngorad ni ngar machibnaged mar filed e Bible ngak e girdi’. Ra ngar rin’ed e re n’ey nib fel’ rogon, mab t’uf ni ngar fal’eged rogorad u m’on riy, ma ngkur fal’eged i gay boch ban’en ya nge yag ni ngar pied e fulweg ko pi deer nra fith faen ni yibe fil e Bible ngak. Reb e pioneer ni Janeen fithingan e weliy ni gaar: “Gubin ngiyal’ ni ke mab e kanawo’ ngog ni nggu machibnag yugu boch e girdi’, ma gowa be par e pi n’ey u gum’irchaeg. Ma angin ni ke yib riy e be gel e michan’ rog.”

⁷ Nap’an ni gad ra guy e piin ni yad be fil e Bible ni be mon’og e yafas rorad, ma re n’ey e ra ayuwegdad ni ngad guyed feni rib ga’ fan e gonop rok Got. (Isa. 48:17, 18) Ma re n’ey e ra ayuwegdad ni ngad dugliyed u lanin’dad ni ngad folgad ko pi kenggin e motochiyel. Adrianna ni ir reb e pioneer e yog ni gaar: “Ra pagan’ e girdi’ ko gonop rorad, ma rayog ni nge magawon e yafas rorad. Machane, nap’an ni yad ra pagan’ ko gonop rok Jehovah, mab papey nra yib angin ko yafas rorad.” Miki weliy Phil ni gaar: “Rayog ni ngam guy rogon ni be thilyeg Jehovah e yafas ko girdi’, nde yag rorad ni ngar thilyeged yad.”

8. Faan gad ra un ngak e pi walag ko machib u taabang, ma uw rogon nrayog ni nge ayuwegdad e re n’ey?

⁸ Gad ra chag ngak e pi walagdad u nap’an e machib, ma ra gel e michan’ rodad. (Prov. 13:20) Yooren e piin pioneer e yad ma thognag boor e tayim ko machib ni yad be chag ngak e pi walag. Ma re n’ey e ra bing e kanawo’ ni nge bagadad ma nge gelnag e “michan’” rok bagadad. (Rom. 1:12; mu beeg e Proverbs 27:17.) Reb e pioneer ni Lisa fithingan e yog ni gaar: “U taban e maruwel e ba ga’ nra be’ ma be guy rogon ni nga nog ni ir e ba cheg u boch ban’en, maku ba gel e awan’ ni ma tay e girdi’. Gubin ngiyal’ ni bay e dugdug thin, ma ba ga’ ni yima yog e thin nib kireb. Ma yad ma rin’ boch ban’en ni yigoo yad e nge fel’ ngorad. Yu ngiyal’ e yima moningnagem nbochan ni ga be rin’ e ngongol ko Kristiano. Machane, gamad ra machib e pi walag u taabang, ma ri ma yib e athamgil nga lanin’ug. Nap’an ni gu ra sul nga tabinaw u tomuren e machib, ma gub fel’felan’, ni yugu aram rogon ni kug magar.”

9. Gad ra machib e en mabgol rodad u taabang u polo’ e tayim rodad, ma uw rogon nra gel e tha’ u thildad Jehovah?

⁹ Ra machib e piin nib mabgol u taabang u polo’ e tayim rorad ma ra gel e tha’ u thilrad Jehovah. (Ekl. 4:12) Madeline ni ir be’ ni yow ma machib e pumoon rok u taabang u polo’ e tayim rorow e weliy ni gaar: “Gamow e pumoon rog e gamow ma weliy murung’agen e pi n’en ni kug rin’ew u nap’an ni kug warow ko machib ara gamow ma weliy murung’agen reb e thin ni kug beegew u Bible nrayog ni nggu fanayew u nap’an e machib. Urngin e duw ni kug machibgow u taabang u polo’ e tayim romow ma ke yag ni nge chugur e tha’ u thilmow.” Miki yog Trisha ni gaar: “Kug dugliyew e pumoon rog ni dab ug chuw’iyew boch ban’en ndabiyog puluwon romow, ere dab gu maluagthingow u murung’agen e salpiy. Gamow ma sul ni ngguyew boch e girdi’ ni kug machibnagew nge piin ni gamad ma fil e Bible u taabang, re n’ey e ke ayuwegmow ni nge gel e tha’ u thilmow.”

10. Nap’an ni gad ra mon’eg Gil’ilungun Got, ma gad be guy ni be ayuwegdad, ma ra uw rogon e pagan’ rodad ngak?

¹⁰ Ra gel e pagan’ rodad ngak Jehovah u nap’an ni gad ra mon’eg Gil’ilungun, ma gad ra guy ni ke ayuwegdad ma be fulweg taban e meybil rodad. Riyul’ ni gubin e piin ni Kristiano ni yad ba yul’yul’ e be pagan’rad ngak Jehovah. Machane, piin pioneer e yad manang nfaanra pagan’rad ngak Jehovah ma rayog ni ngar ululgad ko re maruwel ney. (Mu beeg e Matthew 6:30-34.) Curt ni ir be’ nib pioneer maku ma lekag e ulung yu ngiyal’ e nog ngak ni bay reb e ulung ni nge lekag. L’agruw nge baley e awa n’umngin nap’an nfaanra nge yan u tabinaw rok nge taw ko re ulung nem. Ir nge ppin rok ni ku reb e pioneer e kemus nib gaman e pensin ko karrow rorow ni nga ranow ko re ulung nem, machane de gaman ni ngar sulow, ma ka bay taareb e wik mfin ni pi’ puluwon ko maruwel rok. Ke yog Curt ni gaar: “Be maruwar u wun’ug ko bfel’ e n’en ni kug dugliy fa danga’.” Tomuren ni kar meybilgow mar dugliyew ni ngar lekagew fare ulung, mab pagan’row nra pi’ Got e tin nib t’uf rorow. Ma nap’an ni yow be deg ni nga ranow, me callnagrow reb e walag nib ppin nge yog ni bay e tow’ath ni aram e salpiy ni nge pi’ ngorow. Ba gaman e re salpiy n’em ni nga ranow ngar sulow. I yog Curt ni gaar: “Ra i buch boch ban’en rom ni aram rogon, mab mom ni ngan guy e ayuw ni ma pi’ Jehovah.”

11. Mang boch e tow’ath ni ma yag ngak e piin pioneer?

¹¹ Arrogon, ba ga’ ni ke pirieg e piin pioneer ni faan yad ra fanay e tayim rorad ni fan ngak Jehovah, ma yad be guy rogon ni nge chugur e tha’ u thilrad ma aram e yad ra guy e pi tow’ath ni ma yib ‘ngorad.’ (Deut. 28:2) Machane ku bay e magawon rok e piin ni yad ma un ko pioneer. Dariy reb e tapigpig rok Jehovah ndariy e magawon rok ni bochan e togopuluw ni tay Adam. Yugu aram rogon ni yu ngiyal’ ma bay boch e pioneer ni kar pirieged nib t’uf ni ngar talgad ko re maruwel ney, machane ba ga’ nrayog ni ngan pithig e magawon ara ngan siyeg. Mang e rayog ni nge ayuweg e piin pioneer nge yag ni ngar ululgad ko re maruwel ney?

ROGON NI NGE PAR BE’ NI BE UN KO MACHIB U POLO’ E TAYIM ROK

12, 13. (a) Mang e ba t’uf ni nge rin’ reb e pioneer ni faanra ba mo’maw’ ni nge thognag e awa rok? (b) Mang nib ga’ fan ni nge yarmiy e tayim ni nge beeg me fil e Bible ni yigoo ir, me fal’eg i lemnag?

¹² Yooren e pioneer e boor e maruwel ni yad ma rin’. Rayog ni nge mo’maw’ ni ngan mu’nag gubin ban’en, ere rib t’uf ni ngan yarmiy urngin ban’en. (1 Kor. 14:33, 40) Faanra bay reb e pioneer nib mo’maw’ rok ni nge thognag fare awa rok, ma sana ba t’uf ni nge fal’eg i lemnag rogon ni be maruwel ko tayim rok. (Efe. 5:15, 16) Rayog ni nge fith ir ni gaar: ‘Uw urngin e tayim ni gu be n’ag ko pi n’en ni yima chuweg e chalban ngay? Ba t’uf ni nggu gay rogon ni nggu ayuwegneg ko tin ndariy fan? Rayog ni nggu thilyeg e tayim rog ko maruwel ni gu ma un ngay?’ Demtrug be’ nib Kristiano ma rayog ni nge yog nib mom ni ngan uneg boch ban’en ko tin ni ka bay ni gad ma rin’; ere, piin ni yad ma un ko pioneer e ba t’uf ni ngar fal’eged i lemnag ban’en ni gubin ngiyal’ ma ngar thilyeged boch ban’en nfaanra ba t’uf.

¹³ Pi n’en ni ma rin’ e piin pioneer e aram e ngar beeged e thin ko Bible ni gubin e rran, ma ngar filed e Bible ni yigoo yad mar fal’eged i lemnag. Ere, reb e pioneer e ba t’uf ni nge ayuweg ir ni nge dabi un nga boch ban’en ndariy fan ni nge dabi magawonnag e tayim rok ko tin nib ga’ fan ban’en. (Fil. 1:10) Mu susunnag reb e pioneer ni ke yib nga tabinaw rok u tomuren ni ke un ko machib. Ke lemnag ni nge par e re blayal’ nem ni nge fal’eg rogon ir ko bin migid e muulung. Machane, som’on e ma beeg e mail rok. Ma aram me onnag e computer rok nge beeg me pi’ e fulweg ko e-mail ni kan pi’ ngak. Me yan ko Web site nge guy ko ke sobut’ puluwon fare n’en ni baadag ni nge chuw’iy. Ma aram me ke naab ni ke pag l’agruw e awa ni ke yan ma dawori tabab ni nge fil e n’en ni be lemnag ni fan ko muulung. Mang fan nreb e magawon e re n’ey? Girdi’ ni yad ma un ko gosgos e thingar ra ayuweged dowrad nfaanra yad baadag ni ngar ululgad ko fare gosgos. Ku arrogon e piin pioneer nib t’uf rorad ni ngar filed e Bible ni gubin ngiyal’ ya nge gel e michan’ rorad, ma aram e rayog ni ngar ululgad ko machib u polo’ e tayim rorad.​—1 Tim. 4:16.

14, 15. (a) Mang fan nib t’uf rok e piin pioneer ni ngar lichnaged pa’ u puluwrad? (b) Faanra ke mada’nag reb e pioneer reb e magawon nib ga’, ma mang e thingari rin’?

¹⁴ Piin pioneer ni kar athamgilgad ni ngar lichnaged pa’ u puluwrad e ke yib angin ngorad. Ke pi’ Jesus e athamgil ngak pi gachalpen ni ngar rin’ed ni aram rogon. (Matt. 6:22) Ireray e n’en ni ke rin’ Jesus ya nge yag ni nge machib ndariy ban’en ni nge taleg. Ke yog ni gaar: “Gamanman ni fox e bay e low ni taferad, ma arche’ e bay taferad ni kar toyed, machane en ni Fak e girdi’ e dariy bang ni nge pag ir riy nga but’ nge toffan.” (Matt. 8:20) Reb e pioneer ni baadag ni nge fil ban’en ko n’en ni rin’ Jesus e thingari lemnag nfaanra ke yoor e chugum rok, ma aram e ke yoor e n’en nib t’uf ni nge ayuweg, me fal’eg, me thilyeg.

¹⁵ Piin pioneer e yad manang nrib fel’ e re tow’ath ney ni ke yag ngorad, ma darur lemnaged ni ka yad ba fel’ boch ngak e tin ni ka bay e walag. Ya urngin e tow’ath ni bay rodad e Got e ke pi’ ya ir be’ nib gol. Ere thingar da pagan’dad ngak Jehovah ya nge yag ni ngad ululgad i rin’ e re maruwel ney. (Fil. 4:13) Rayog ni nge sum boch e magawon. (Ps. 34:19) Ma nap’an nra buch e re n’ey, ma thingari ning e piin pioneer e ayuw ngak Jehovah ni nge pow’iyrad, mar paged ni nge ayuwegrad, ko bin ni ngan gur ngan tal ko pigpig ngak. (Mu beeg e Psalm 37:5.) Nap’an ni yad ra guy ni be ayuwegrad Got, ma ra k’aringrad ni ngar chugurgad ngak ni ir e Chitamangirad nu tharmiy ni ma lemnag rarogorad.​—Isa. 41:10.

RAYOG NI NGAM UN KO PIONEER?

16. Faanra ga baadag ni ngam un ko pioneer ma mang e thingar mu rin’?

¹⁶ Faanra ga baadag ni nge yag e pi tow’ath ney ngom ni ku ma yag ngak e piin pioneer, mab fel’ ni ngam meybil ngak Jehovah ngam weliy rogon e tafinay rom ngak. (1 John 5:14, 15) Mu non ngak e piin ni yad be un ko pioneer. Mu nameg ni ngam rin’ boch ban’en ya nge yag nim un ko machib u polo’ e tayim rom. Ireray e n’en ni rin’ Keith nge Erika. Ur unew ko maruwel u polo’ e tayim rorow, ma tomuren ni kar mabgolgow ma ke yag ni ngar chuw’iyew reb e naun ni ngar tafanayew nge reb e karrow nib beech. Kar gaargow: “Kug lemnagew ni bochan ni ke yag e pi chugum nem ngomow ma gamow ra pirieg e felfelan’, machane de buch ni aram rogon.” Nap’an ni kan taleg Keith ko maruwel, ma aram me un ko pioneer ni ayuw. Me yog ni gaar: “Nap’an ni kug un ko pioneer ni ayuw ma be puguran ngog gelngin e felfelan’ ni ma yib u nap’an e machib.” Ke fel’ e thin rorad ba wu’ i mabgol ni yow ma un ko pioneer, ma ke yag ni ngar ayuwegew yow ni ngar guyew e felfelan’ ni ma yib nbochan ni yibe lichnag pa’ u puluwoy nge felfelan’ ni ma yib nbochan ni yibe un ko pioneer. Ere, mang e rin’ Keith nge Erika? Kar gaargow: “Gu yoloyew boch ban’en nga but’ ni bay rogon ko tirok Got ban’en ni nggu namegew mug tew e gi babyor nem ko icebox romow, ma aram mug checknigew e tin ni ke yag ni nggu rin’ew.” Me munmun ma ke yag rorow ni ngar unew ko pioneer.