N’en ni Gad Be Fil ko Fare Madnom nib Mom Rogon ni Kan Tay u Murung’agen Reb e Pilung ni Bay u Tharmiy

1-2. (a) Mang fan nrayog ni ngad lemnaged nra dag Jesus ngodad reb e kanawo’ nib mom u rogon ni ngan madnomnag e yam’ ni tay? (b) Mang boch i fel’ngin Jesus ni gad ra weliy?

RAYOG ni ngam weliy e n’en ni ma buch u nap’an e Puguran ko yam’ ni tay Kristus ni yima tay ni gubin e duw, fa? Dabisiy ni yooren i gadad e ka manang e tin ni yima rin’ u nap’an ni yira tay e re Abich ni Blayal’ rok Somol ney. Mang fan? Bochan nre madnom ney e rib mom rogon ni yima tay. Ma ireray ba madnom nrib ga’ fan. Ere rayog ni ngad fithed gadad ni nge lungudad, ‘Mang fan nrib mom rogon ni yima tay e re madnom ney?’

² Nap’an e machib ni tay Jesus u fayleng ma yigoo yimanang ni tin riyul’ ni ma fil ko girdi’ e ba mom ni ngan nang fan, mab tamilang. (Matt. 7:28, 29) Ere ku arrogon ni ke dag ngodad rogon ni ngan madnomnagb e yam’ ni tay, yab mom ni ngan rin’ maku ra yib angin ngodad. Ngad fal’eged i weliy murung’agen e re Puguran ney nge ku boch ban’en ni yog Jesus nge tin ni rin’. Ya faan gad ra rin’, ma rra tamilang u wan’dad rogon nrib sobut’an’ Jesus ma der rus nge rogon ni ma dag e t’ufeg. Maku gad ra fil rogon nrayog ni ngad folwokgad rok nib fel’ rogon.

BA SOBUT’AN’ JESUS

3. Uw feni mom rogon ni tababnag Jesus fare madnom ko Puguran nrogon ni bay ko Matthew 26:26-28? Mang e be yip’ fan fa gali n’en ni fanay nib ga’ fan?

³ Immoy Jesus rok fa 11 i apostal ni yad ba yul’yul’ u nap’an ni tababnag fare Puguran ko yam’ ni tay. Ke fek e n’en ni ke magey ko fare abich ko Paluk’af ma aram me tababnag e re madnom ney nib mom rogon ni ngan tay. (Mu beeg e Matthew 26:26-28.) Kemus ni fanay e n’en ni bay u rom ni aram e flowa ndariy e is riy nge wain. Ke yog Jesus ngak e pi apostal rok ni gali n’ey nib ga’ fan e be yip’ fan downgin nib flont nge rachaen ndab ki n’uw nap’an ma nge pi’ ni maligach ni fan ngorad. Rayog nde gin e pi apostal nga rogon feni mom ni ngan tay e re madnom ney nib ga’ fan. Mang fan?

4. Uw rogon ni be ayuwegdad fare fonow ni pi’ Jesus ngak Martha ni ngad nanged fan ni ngongliy Jesus fare Puguran nib mom rogon?

⁴ Am lemnag e n’en ni buch in e pul u m’on ko bin dalip e duw ni be machib Jesus u nap’an ni yan nga tafen Lazarus nge Martha nge Maria ni yad boch e fager rok nrib chugur e tha’ rorad. Nap’an ni yad be sabethin ma yad be toffan me tabab Jesus ni nge machibnagrad. Bay Martha u rom machane der yag ni nge motoyil nib fel’ rogon ni bochan e be ngongliy e ggan ni boor ni nge kay Jesus ni ir be’ nib ga’ fan u wan’rad ni ke yib nga tabinaw. Nap’an ni guy Jesus e re n’ey me yal’uweg Martha u fithik’ e gol me ayuweg ni nge guy nde t’uf ni gubin ngiyal’ ni ngan ngongliy e ggan nib boor. (Luke 10:40-42) Ere boch nga tomuren u m’on ni ka bay in e awa, me pi’ e yafos rok ni maligach miki fol Jesus ko fonow rok ni pi’ ngak Martha. Ke ngongliy fare madnom nib mom ni ngan tay. Mang e be fil e re n’ey ngodad u murung’agen Jesus?

5. Mang e gad be fil u murung’agen Jesus u rogon nib mom nni tay e re madnom ney? Uw rogon nib puluw ko n’en ni be yog e Filippi 2:5-8?

⁵ Gubin ban’en ni i yog Jesus ma be rin’ e be m’ug riy ni ir be’ nib sobut’an’. Ere dabin gin ngay ni ki dag e sobut’an’ u nap’an e bin tomur e nep’ ko yafos rok u fayleng. (Matt. 11:29) Manang ni fare maligach ni be yan ni nge pi’ e aram e bin th’abi ga’ fan e maligach ni ngan pi’ ni fan ko girdi’. Maku manang nra faseg Jehovah ko yam’ ni nge mang pilung u tharmiy. Yugu aram rogon ma de lemnag ni ngan pining e sorok ngak ni aram e ngan rin’ boor ban’en ni fan ko puguran ko yam’ ni tay. Ya yog ngak pi gachalpen ni taab yay u reb e duw e ngar ted e re puguran ney nib mom ni ngan tay. (John 13:15; 1 Kor. 11:23-25) Bochan nib mom mab puluw rogon ni kan tay e re madnom ney, ma be m’ug riy ni Jesus e gathi ir be’ nib tolangan’. Rayog ni ngad felfelan’gad ni sobut’an’ e aram reb i fel’ngin e Pilung rodad u tharmiy.​—Mu beeg e Filippi 2:5-8.

6. Uw rogon ni ngad folwokgad ko sobut’an’ ni dag Jesus u nap’an ni gad ra mada’nag e skeng?

⁶ Uw rogon nrayog ni ngad folwokgad ko sobut’an’ ni dag Jesus? Aram e ngad m’oneged e tin ni baadag e girdi’ ko tin ni gad baadag. (Fil. 2:3, 4) Am lemnag e bin tomur e nep’ rok Jesus u fayleng. Manang ndab ki n’uw nap’an mab gel e amith ni nge yan u fithik’ me yim’, machane ri be lemnag rarogon fapi apostal rok ni yad ba yul’yul’ ndab ki n’uw nap’an ma ra kireban’rad ko n’en nra buch rok. Ere re nep’ nem e par ni be fonownagrad ma be pi’ e athamgil nge pagan’ ngorad. (John 14:25-31) Ke dag Jesus nib sobut’an’ ya ri ma lemnag e tin nib t’uf rok yugu boch e girdi’ ko tin nib t’uf rok. Rib manigil e kanawo’ ni ke dag nrayog ni ngad folwokgad riy!

KE DAG JESUS NDER RUS

7. Uw rogon ni dag Jesus nder ma rus u tomuren ni tababnag fare Abich ni Blayal’ rok Somol?

⁷ Tomuren ni tababnag Jesus fare Abich ni Blayal’ rok Somol ma ri dag nder ma rus. Uw rogon? Ke m’agan’ Jesus ngay ni nge rin’ e n’en nib m’agan’ e Chitamangin ngay ni yugu aram rogon ni manang nre n’ey e be yip’ fan ni yira li’ nge yim’ ni bochan e gowa be t’ar e thin nga daken Got ma be darifannag. (Matt. 26:65, 66; Luke 22:41, 42) Ke par Jesus nib yul’yul’ ni bochan e nge pining e sorok nga fithingan Jehovah me tayfan mat’awun e gagiyeg rok, me bing e kanawo’ ko yafos ni manemus ngak e girdi’ ni kar kalgadngan’rad. Maku ireray e ngiyal’ ni fal’eg Jesus rogon pi gachalpen ko n’en ndab ki n’uw nap’an ma yad ra mada’nag.

8. (a) Mang e yog Jesus ngak e pi apostal rok ni yad ba yul’yul’? (b) Uw rogon ni dag pi gachalpen Jesus ni yad be folwok rok ndar rusgad u tomuren e pi duw ni ke yim’ Jesus?

⁸ Ki dag Jesus nder rus ya de lemnag e magafan’ ni be tay ya par ni be tiyan’ ko tin nib t’uf ko pi apostal rok ni yad ba yul’yul’. Fare madnom ni tababnag nib mom rogon u tomuren ni chuw Judas e ra puguran ngak pi gachalpen angin rachaen nra map’ nga but’ nge fare m’ag nib beech ni yad ra mang bang riy. (1 Kor. 10:16, 17) I yog Jesus ngak pi gachalpen e n’en nib m’agan’row e Chitamangin ngay ni ngar rin’ed ya nge yag ni ngar micheged ni bay rogon ni ngan pi’ ngorad fare athap ni nga ranod nga tharmiy. (John 15:12-15) Miki yog ngorad ni yad ra mada’nag e skeng boch nga m’on. Ma aram me pi’ e athamgil nga lanin’rad ni ngar folwokgad rok me gaar ngorad, “dab mu rusgad!” (John 16:1-4a, 33) Ere boor e duw nga tomuren, ma ka be ulul pi gachalpen ni yad be folwok rok Jesus u rogon ni pag fan u boch ban’en ni nge dag nder rus. Yugu aram rogon nre n’ey e be yip’ fan ni yad ra yan u fithik’ e gafgow, machane kar ayuweged yad u fithik’ e skeng ni ka ranod u fithik’.​—Heb. 10:33, 34.

9. Uw rogon ni ngad folwokgad rok Jesus u rogon ni ngad daged ndab da rusgad?

⁹ Ere ku taareb rogon ko ngiyal’ ney ni gad ma folwok rok Jesus u rogon ni dag nder ma rus. Bod nib t’uf ni ngad daged ndab da rusgad ni ngad ayuweged pi walagdad ni yibe gafgownagrad ni bochan e michan’ rorad. Yu ngiyal’ e rayog ni ngan kalbusnag pi walagdad ni yugu aram rogon ndariy ban’en nib kireb ni kar rin’ed. Nap’an nra buch e re n’ey, ma thingar da rin’ed e tin rayog rodad ni ngad ayuweged yad, nre n’ey ba muun ngay ni ngad nonad ni pa’rad. (Fil. 1:14; Heb. 13:19) Reb e kanawo’ ni ngad daged ndarud rusgad riy e aram e ngad ululgad ni ngad machibgad ndab da ‘rusgad.’ (Acts 14:3) Kad dugliyed u wan’dad ni ngad machibnaged fare thin nib fel’ ni murung’agen Gil’ilungun Got ni yugu aram rogon nrayog ni nge togopuluw ara gafgownagdad e girdi’ ni bod ni kan rin’ ngak Jesus. Machane yu ngiyal’ e rayog ni ngad rusgad. Ere mang e ngad rin’ed?

10. Mang e susun ni ngad rin’ed u lan e pi wik u m’on ko Puguran, ma mang fan?

¹⁰ Rayog ni ngad gelnaged rogon ndab da rusgad ni aram ngad lemnaged fare athap ni ke yag ngodad ni bochan fare biyul ni ke pi’ Kristus. (John 3:16; Efe. 1:7) U lan e pi wik u m’on ko Puguran, ma aram e ngiyal’ ni ke mab e kanawo’ ngodad ni ngad gelnaged feni ga’ fan fare biyul u wan’dad. Ngiyal’ nem e rayog ni ngad beeged e thin nu Bible ni fan ko Puguran, ma gad meybil, ma gad fal’eg i lemnag e tin ni buch rok Jesus u m’on ni nge yim’. Ma aram e nap’an ni gad ra yib nga taabang ni fan ko fare Abich ni Blayal’ rok Somol, ma ra tamilang u wan’dad feni ga’ fan fare flowa nge wain ni fan ko Puguran, nge n’en ni be yip’ fan fare maligach ni kan pi’ ni yugu ba thil. Nap’an nra ga’ fan u wan’dad e n’en ni ke rin’ Jesus nge Jehovah ni fan ngodad, miki tamilang u wan’dad rogon nra yib angin ngodad nge piin nib t’uf rodad, ma aram e ra riyul’ u wan’dad e athap rodad ko tin ni bay nga m’on. Ma re n’ey e ra k’aringdad ni ngad athamgilgad ndab da rusgad nge mada’ ko tomur.​—Heb. 12:3.

11-12. Mang e kad filed ko tin ni kad weliyed?

¹¹ Ere kad filed ko tin ni kad weliyed ni fare Abich ni Blayal’ rok Somol e gathi kemus ni be puguran ngodad feni ga’ fan fare biyul, ya ku be puguran ngodad pi fel’ngin Jesus, ni aram e rogon nib sobut’an’ nge rogon der ma rus. Ri gad ba felfelan’ ni ku be ulul Jesus ni nge dag e pi fel’ngin ney ni ir e Prist Nth’abi Tolang rodad ni bay u tharmiy ni be wenignagdad ngak Got! (Heb. 7:24, 25) Faanra ngad daged nriyul’ nib ga’ fan u wan’dad e re n’ey, ma thingar da yul’yul’gad ko n’en ni ke tay Jesus chilen ni aram e ngan madnomnag e yam’ ni tay. (Luke 22:19, 20) Gad ra rin’ e re n’ey ko rofen ni Nisan 14 ni ireray e bin th’abi ga’ fan e rran ni bay u lan reb e duw.

¹² Rogon feni mom ni kan tay fare Abich ni Blayal’ rok Somol e rayog ni ngkud filed reb i fel’ngin Jesus riy ni aram e n’en ni k’aring ni nge yim’ ni fan ngodad. Nap’an ni immoy u fayleng ma yigoo yimanang ni bochan e re fel’ngin ney. Ere mang e re fel’ngin ney?

MA T’UFEGEY JESUS

13. Uw rogon ni be tamilangnag e John 15:9 nge 1 John 4:8-10 e t’ufeg ni ke dag Jehovah nge Jesus? Chon mini’ e ra yib angin e re t’ufeg ney ngorad?

¹³ Kari dag Jesus rogon e t’ufeg rok Jehovah nib fel’ rogon u gubin ban’en ni rin’. (Mu beeg e John 15:9; 1 John 4:8-10.) Bin th’abi ga’ fan riy e, t’ufeg rok Jesus ni ke yib u gum’irchaen e aram e n’en ni k’aring ni nge pi’ e yafos rok ni fan ngodad. Ere demtrug ko gadad e piin ni kan dugliydad ara gadad “yugu boch e saf,” ma rayog ni nge yib angin e t’ufeg ni ke dag Jehovah nge Fak ngodad u daken fare biyul. (John 10:16; 1 John 2:2) Kum lemnag fare flowa nge wain nni fanay u nap’an fare madnom ko Puguran. Gali n’ey e be dag e t’ufeg rok Jesus nge rogon ni ma lemnag rarogon pi gachalpen. Ni uw rogon?

14. Mang reb e kanawo’ ni ke dag Jesus nib t’uf pi gachalpen rok?

¹⁴ Ke dag Jesus nib t’uf pi gachalpen rok ni kan dugliyrad ya aram fan ni ke tababnag reb e madnom nib mom ni ngar madnomnaged, ma gathi ba madnom ni boor ban’en ni ngan rin’ riy. Munmun ma pi gachalpen Jesus ni kan dugliyrad e ba t’uf ni ngar madnomnaged fare Puguran ni gubin e duw. Yad be rin’ e re n’ey ni yug demtrug ko mang e be buch rorad ni mus ni ngan kalbusnagrad. (Rev. 2:10) Gur, ke yag ni ngar folgad rok Jesus? Arrogon, ke yag ni ngar rin’ed e re n’ey!

15-16. Uw rogon ni ke yag ni nge madnomnag boch e walag fare Abich ni Blayal’ rok Somol ni yugu aram rogon nib mo’maw’ ngorad ni ngar rin’ed?

¹⁵ Nap’an e bin som’on e chibog ke mada’ ngodad e ngiyal’ ney ma tin riyul’ e Kristiano e yad ma athamgil ni ngar madnomnaged e yam’ ni tay Jesus. Yad ma folwok u rogon nni tay fare Abich ni Blayal’ rok Somol nrogon nrayog rorad, ni yugu aram rogon ni yu ngiyal’ e rib mo’maw’. Am lemnag e n’en ni buch rok boch e walag. Nap’an ni bay reb e walag ni pumoon ni ka nog Harold King ngak u reb e singgil nib kalbus u China, me gay kanawoen nrayog ni nge madnomnag e Puguran. Ke fal’eg rogon fare flowa nge wain ko n’en ni bay rok ni be gay rogon ndab ni guy. Miki theeg e rran nib fel’ rogon ya nge nang e rran nra yan i aw e puguran ngay. Ere nap’an ni taw ngal’an fare madnom, ma aram me tang ngemu’ me meybil ma aram me pi’ reb e welthin nib puluw ko Thin rok Got ni yugu aram rogon ni yigoo ir u lan e singgil.

¹⁶ Ku baaray reb e ban’en ni ki buch rok boch e walag. Bay bu ulung i walag nib pin ni ur moyed u concentration camp u nap’an e Bin L’agruw e Mahl ko Fayleng. Kar ted e yafos rorad u thatharen e riya’ ya nge yag nra madnomnaged fare Abich ni Blayal’ rok Somol. Bochan ni fare madnom e ba mom rogon e n’en ni ngan fanay ngay, ma ke yag ni ngar ted e re madnom ney ndabiyog ni ngan guyrad. Kar gaargad: “Kug sak’iygad kug liyeged ba tebel ni bay e mad nib wechwech u daken ni aram e gin ni kug ted fare flowa nge wain nga daken. Ba kindal e ir e gamad be guy ramaen ya gamad ra k’eg e magal ma rayog ni ngan nang e n’en ni gamad be rin’. . . . Kug sulod u daken e n’en ni gu micheged ngak e Chitamangidad ni aram e nggu fanayed gelngimad ni nggu gagiyelnaged fithingan nib thothup.” Rib manigil rogon ni kar daged nib gel e michan’ rorad! Ere kari m’ug e t’ufeg rok Jesus u rogon ni ke n’igin nrayog ni ngad madnomnaged fare Puguran ni yugu aram rogon ni yu ngiyal’ e ra mo’maw’ ngodad ni ngad rin’ed!

17. Mang boch e deer nrayog ni ngad fithed gadad riy?

¹⁷ Nap’an nra chugur ko fare Puguran mab fel’ ni ngad fithed gadad ko pi deer ni baaray: ‘Uw rogon ni nggu mon’og ya nggu folwok rok Jesus ni nggu dag e t’ufeg? Gur, ba ga’ ni gu ma lemnag e tin nib t’uf ko pi walag ni gamad ma pigpig u taabang ko tin nib t’uf rog, fa? Gur, gu ma lemnag ni nge yoor e n’en ni nge rin’ e pi walag ngog, ara gu ma lemnag e tin ndabiyog rorad?’ Manga yugu da folwokgad rok Jesus ni gubin ngiyal’ ma gad dag e ‘runguy’ ngak e pi walag.​—1 Pet. 3:8.

MU TAY E TIN KAN FIL NIB TAMILANG U WAN’UM

18-19. (a) Mang e rayog ni nge pagan’dad ngay? (b) Mang e kam dugliy u wan’um ni ngam rin’?

¹⁸ Re n’ey ni kan tay chilen ngodad ni ngad madnomnaged e Puguran ko yam’ ni tay Kristus e dabki n’uw nap’an ma bayi tal. Ya nap’an nra “yib” Jesus u nap’an fare gafgow nib ga’, ma aram e ra kunuy e tin ni ke magey ko “girdi’ rok” ni yad e piin ni kan dugliyrad ni nga ranod nga tharmiy. Ma ireray e ngiyal’ nra tal e madnom ko Puguran.​—1 Kor. 11:26; Matt. 24:31.

¹⁹ Ere mus nga tomuren ndab kun madnomnag e Puguran, ma rayog ni nge pagan’dad ngay nra i yib ngan’ e girdi’ rok Jehovah e re madnom ney nib mom rogon nni tay u fithik’ e felfelan’. Ya ireray ba madnom ni kan dag e bin th’abi fel’ e kanawo’ u rogon e sobut’an’ nge rogon ndabin rus nge rogon ni kan dag e t’ufeg ngak e girdi’. Ngiyal’ nem e ra weliy e piin ni kar uned ko re madnom ney murung’agen ngak e piin ni yira fasegrad e ngiyal’ nem ya nge yib angin ngorad. Machane faanra nge yib angin e re madnom ney ngodad e ngiyal’ ney, ma thingar da dugliyed u wan’dad ni ngad folwokgad rok Jesus u rogon ni dag e sobut’an’ nge rogon nde rus nge rogon ni dag e t’ufeg. Ya faan gad ra rin’ e re n’ey, ma ra pagan’dad nra yag ngodad e tow’ath nra pi’ Jehovah.​—2 Pet. 1:10, 11.