Deer

◼ Mang ayuw e rayog ni ngad pied ko piin pioneer?

Nap’an e duw ni 2009 ma ke chugur ko 800,000 e pi walag ni pumoon nge ppin ni kar pigpiggad ni yad e regular ara special pioneer u ga’ngin yang e fayleng. Pi tapigpig ney e yad ma fanay e tayim rorad nge gelngirad nge pi n’en ni bay rorad ni ngar wereged fare thin nib fel’ u murung’agen Gil’ilungun Got. (Prov. 3:9) Kari felfelan’ Jehovah ko athamgil ni yad ma tay! Uw rogon nrayog ni ngad daged ni taareb e lem rodad Jehovah mad ayuweged yad ngar falfalan’gad mar athamgilgad ko pigpig ni yad be tay?

Ngad pied e athamgil nga lanin’rad ni ngar ululgad ko pioneer. (Prov. 25:11) Rayog ni ngad thiliyeged e schedule rodad ni ngad uned ngorad ko machib, fa? Faanra nga darod ko machib u taabang, ma rayog ni ngad fanayed e karrow rodad ma gad tay e birorad e karrow. Ma faan gad ra un ko karrow rorad ma rayog ni ngad pied reb e salpiy ngorad ni puluwon e pensin nge ku boch ban’en nib t’uf ko karrow. (1 Kor. 13:5; Fil. 2:4) Ku rayog ni ngad pininged yad ngar uned ngodad ko abich u tabinaw rodad.​—1 Pet. 4:8, 9.

Thin nu Bible e ma micheg ni Jehovah e ra pi’ e tin nib t’uf ko piin ni ma mon’eg Gil’ilungun. (Ps. 37:25; Matt. 6:33) Reb e kanawo’ ni ma rin’ e re n’ey riy e daken e pi walag ni Kristiano. (1 John 3:16-18) Machane der lemnag e piin pioneer ni nge pi’ e girdi’ urngin ban’en nib t’uf rorad. Ma sana dab rogned ko girdi’ ni ba t’uf e ayuw rorad. Machane rayog ni ngad ayuweged e pi pioneer nib yul’yul’ ni faanra da tedan’dad ngad guyed e n’en nib t’uf e ayuw riy rorad.​—2 Kor. 8:14, 15.

Febe e reb e ppin nib pasig ko machib u nap’an e bin som’on e chibog ma immoy ko ulung nu Kenkrea ma nap’an ni milekag nga Roma me yog Paul ko pi walag u rom ni gaar: “Mu t’ufeged u fithingan Somol, . . .mi gimed ayuweg ko tin nge yog ngak.” (Rom. 16:1, 2) Rayog ni ngad rin’ed e re n’ey, ngad ayuweged e girdi’ ko ulung rodad ni yad be wereg fare thin nib fel’ ni yad e regular nge special pioneer.​—Acts 5:42.