Mang e Ra Ayuwegdad ni Nge Fel’ e Par Rodad Boch Nga M’on?

Kad filed ko fapi article ni ke yan ni bay e girdi’ ni yad ma guy rogon ni nge fel’ e par rorad boch nga m’on ni aram e ma pagan’rad nga boch ban’en ndabin guy ni be gagiyegnag e n’en nra buch rorad boch nga m’on, nge skul, nge flaab, maku yad ma guy rogon ni nge fel’ e ngongol rorad. Machane faanra ga be fanay e pi n’ey ni ngam guy rogon ni nge fel’ e par rom boch nga m’on, ma bod ni ga be fanay bangi map nib kireb ni nge pow’iyem nga bang ndawor mu un ngay bayay. Ere gur, re n’ey e be yip’ fan ndariy ban’en nrayog ni nge ayuwegdad ni nge fel’ e par rodad boch nga m’on? Danga’!

BAY BAN’EN NI KAB GEL BOCH E FEL’ RIY NRAYOG NI NGE POW’IYDAD

Ra nap’an ni ngad dugliyed boch ban’en, mab ga’ ni gad ma fith laniyan’ be’ nib ilal ngodad ma kab ga’ e gonop rok. Ere ku arrogon ni bay Be’ ni kab gel e ilal rok ngodad ma kab ga’ e gonop rok nrayog ni nge pi’ e fonow ngodad nrayog ni nge pagan’dad ngay u rogon ni nge fel’ e par rodad boch nga m’on. Rayog ni ngad pirieged e fonow rok u lan ba ke babyor nni tabab i yoloy ni ke pag sogonap’an 3,500 e duw ni ke yan. Re ke babyor nem e aram e Bible.

Mang fan nrayog ni nge pagan’um ko Bible? Bochan ni ke yib rok e En th’abi gonop u ga’ngin e palpalth’ib. Be yog e Bible ni ir “faanem ni kab kakrom i yib ni immoy” nde ‘sum ma dariy e rofen nra mus.’ (Daniel 7:9; Psalm 90:2) Ir e “sunumiy lan e lang, i ir e en ni ir e Got! I ir e sunumeg e fayleng.” (Isaiah 45:18) Ke yog ngodad ni fithingan e Jehovah.—Psalm 83:18.

Der yog e Bible ni bay reb e yalen ara ba ulung e girdi’ ni kab fel’ nga yugu reb ni bochan ni Bible e ke yib rok e en ni sunmiy urngin e girdi’. Fonow riy e gubin ngiyal’ ni ma yib angin ngak e girdi’ u gubin e nam. Dariy ba ken e babyor ni bod e re ke babyor ney ni bochan e boor e thin ni kan pilyeg ngay maku boor e girdi’ ni bay rorad.a Ere urngin e girdi’ nrayog ni ngar beeged miki pow’iyrad. Ba puluw e re n’ey ko n’en be yog e Bible ni be gaar:

“Gubin e girdi’ ma taareb rogorad u wan’ Got. En ni ba’ madgun Got u wan’ ma be rin’ e tin nib mat’aw e ra i par nib fel’ u wan’ Got ndemturug ko be’ u kun nam.”—ACTS 10:34, 35.

Jehovah Got ni Chitamangidad ni gad ba t’uf rok e baadag ni nge ayuwegdad u daken e Thin rok ni aram e Bible ni bod e piin gallabthir nib t’uf pi fakrad rorad ma yad baadag ni ngar ayuweged yad. (2 Timothy 3:16) Rayog ni nge pagan’um ko Thin rok ni bochan e ir e ke sunmiydad ma manang e n’en nra yibnag e felfelan’ ngodad.

RAYOG NI NGE PAGAN’DAD KO BIBLE

Rayog ni nge pagan’dad ko n’en be yog e Bible nra buch boch nga m’on ni bochan e gad be guy boch ban’en ni be buch e ngiyal’ ney ni kan yiiynag u Bible nsogonap’an 2,000 e duw ni ke yan.

BOCH BAN’EN NRA BUCH

“Bay reb e nam me cham ngak reb e nam, ma gin nsuwon reb e pilung e bayi mahl ko gin nsuwon reb e pilung; ma gubin yang ni bay i yib e durru’ nib gel riy, nge uyongol, nge liliy nib machreg ni ma af ko girdi’ i yan.”—LUKE 21:10, 11.

RAROGON E GIRDI’

“Tin tomren e rran e ri bay mo’maw’ ni ngan par nrogon e tin riyul’ ni girdien Kristus. Ya bayi par e girdi’ ni ke mus ni yad e yad be lemnagrad, ma kari gel e chogow rorad, ma kar ufanthingad, ma ke tolangan’rad ni yad be lemnag nri ba ga’ farad; ma bay urogned e thin nib kireb ngak e girdi’, ma bay dab kur folgad rok e gallibthir rorad, ma bay dab kur pininged e magar ngak be’ u lanin’rad, ma bay dab kur liyorgad ngak Got; ma bay dab kur golgad, ma bay dab kur runguyed e girdi’, ma bay ur t’ared e thin nga daken e girdi’, ma dariy fan ban’en u wun’rad, ma yad ba damumuw; ma bay ra dabuyed e tin nib fel’; ma dabiyog ni nge pagan’uy ngorad, ma dariy fan e girdi’ u wun’rad, ma yad ba uf; ma bayi t’uf e fafel rorad me tomur Got u wun’rad.”—2 TIMOTHY 3:1-4.

Uw rogon ni ke yag ko Bible ni nge yiiynag e pi n’ey u reb e kanawo’ ni ke yan i aw nib puluw? Dariy e maruwar riy nib puluw u wan’um e n’en ni yog Leung ni be’ nu Hong Kong ni gaar: “Ke kakrom ni kan yoloy e pi yiiy u Bible. Dabiyog ko girdi’ ni ngar yiiynaged e pi n’ey me yan i aw nib puluw. Ere dabisiy ni bay be’ ni kab ga’ e gonop rok ni ir e ke yib e Bible rok.”

Bokum miriay e yiiy u Bible ni ke lebug.b Pi n’ey e be micheg nriyul’ ni Bible e Thin rok Got. I gaar Jehovah: “Ke mus ni gag e Got, ma dariy be’ ni bod gag. Gog ko tabolngin e tin ni bay ko tungun.” (Isaiah 46:9, 10) Ere bay rogon ni nge pagan’um ko n’en be yog e Bible nra buch boch nga m’on.

FONOW NRA YIB ANGIN NGOM E CHINEY I YAN NGA M’ON

Nap’an ni ga ra fol ko fonow u Bible ma ra yib angin ngom. Am lemnag boch e pi n’ey.

ROGON NI NGAN LEMNAG E SALPIY NGE MARUWEL

“Kab fel’ ni nge yag ngom ni buchuuw, nib gapas lanin’um, ko bin nge thay parowom ni gubin ngiyal’ ni ga be maruwel nga l’agruw raba’ i paam, ni ga be guy rogon ni ngam focholiy e nifeng.”—EKLESIASTES 4:6, BT.

TABINAW

“Urngin e pumoon e thingari t’uf rok leengin ni gowa ir, ma urngin e ppin ni thingari ta’ fan figirngin.”—EFESUS 5:33.

THA’ U THILDAD YUGU BOCH E GIRDI’

“Dab mu pagem nge magafan’um ara mu damumuw; ya kemus ni oloboch e ra yib riy.”—PSALM 37:8, BT.

Ga ra fol ko n’en be yog e Bible ma ra yib angin ngom e chiney miki fal’eg e par rom boch nga m’on. Bay boch ban’en ni ke micheg Got u Bible nra buch boch nga m’on nib muun ngay e

GAPAS NGE PAGAN’

“[Bay ra] pired u fithik’ e gapas ni yad ba felfelan’.”—PSALM 37:11.

NAUN NGE GGAN

“Bay ra toyed e naun mi yad par u lan, ma gathi yugu be’ e bay yib i par ngay. Bay ra yunged e woldug ni grapes me fel’ rogorad u logowen.”—ISAIAH 65:21.

DAKURIY E M’AR NGE YAM’

“Dab ku unim’, ma dab ki i kireban’uy, ma dab ku un yor, ma dab ku un amith.”—REVELATION 21:4.

Mang e ba t’uf ni ngam rin’ ya nge yag ni fel’ e par rom boch nga m’on? Mu guy e bin migid e article.

a Ra ga baadag ni ngkum nang boch ban’en u rogon ni yibe pilyeg e Bible nge rogon ni yibe wereg, mag yan ko www.jw.org mag yaliy e BIBLE TEACHINGS > HISTORY & THE BIBLE.

b Ra ga baadag ni ngkum nang boch ban’en u murung’agen e re n’ey, mag guy e guruy ni 2 ko fare ke babyor ni Mang e Ri Be Fil e Bible? ko par. 13-17 ni ke ngongliy e Pi Mich Rok Jehovah. Ku bay u online ko www.jw.org/yap. Mman ko GIN BAY BOCH BAN’EN RIY > YU KEN E BABYOR NGE BROCHURE.