“Mu Rin’ e N’en ni Kam Micheg”

1. (a) Mang e ba taareb rogon rok Jefthah nge Hannah? (Mu guy fa gal sasing ni bay u tabolngin e re article ney.) (b) Mang deer e gad ra weliy e fulweg riy ko re article ney?

JEFTHAH e ir be’ ni i yog e thin kakrom nder ma rus maku ir reb e salthaw nib falu’, ma Hannah e ir reb i leengiy ni ma fol rok figirngin ma ma ayuweg e tabinaw rok. Gali cha’ney e yow l’agruw ni yow ma pigpig nga taab Got. Machane, ku mang reb e ban’en nib taareb rogon rorow? Yow l’agruw ni bay ban’en ni kar michegew ngak Got, ma kar parew ni yow ba yul’yul’ ngay. Gali cha’ney e kar dagew e kanawo’ nib fel’ nrayog ni nge folwok boch e pumoon nge ppin riy e ngiyal’ ney ni kar micheged boch ban’en ngak Jehovah. Machane, bay e deer nib ga’ fan nib t’uf ni ngad weliyed e fulweg riy ni be gaar: Uw feni ga’ fan e n’en ni kam micheg ngak Got? Ma mang boch ban’en nrayog ni ngad filed rok Jefthah nge Hannah?

2, 3. Mang e be yog e Bible u murung’agen e pi n’en ni ma micheg be’ ngak Got?

² Be yog e Bible nrayog ni nge micheg be’ ngak Got ni nge rin’ ban’en, ara nge ognag reb e maligach ngak nib tow’ath, ara nge un nga reb e maruwel ni fan ngak, ara nge par ni bay boch ban’en ndab ki rin’ ara dab ki un ngay. Ma micheg be’ ban’en ni ir rok, nrogon ni ke dugliy u laniyan’. Machane, nap’an nra micheg be’ ban’en ma rogon fare n’em ni ke micheg u wan’ Got e ban’en nrib ga’ fan ma thingari tay u gil’. Rogon ni bay u Bible e ban’en ni kam micheg e bod rogon ban’en ni kam mownag. Gali n’ey e l’agruw i ban’en nrib ga’ fan. Faanra ke mow be’ ma aram e ke yog bbugithin ni be micheg ni nge rin’ ban’en ara nge taleg ir u ban’en. (Gen. 14:22, 23; Heb. 6:16, 17) Ere, uw rogon ni be tamilangnag e Bible feni ga’ fan e pi n’en ni gad ma micheg ngak Got?

³ Be gaar fare Motochiyel rok Moses: “Nap’an nra mow be’ ni ognag ban’en ni nge pi’ ngak Somol . . . , ma thingari dabi pag e n’en ni ke micheg, ma thingari rin’ urngin e tin ni yog ni nge rin’.” (Num. 30:2, BT) Boch nga tomuren me thagthagnag Got nga laniyan’ Solomon ni nge yoloy ni gaar: “Nap’an ni ga ra micheg ban’en ngak Got, mag gurnag u payngin nrayog ngam tay u gil’. Ya ir e de m’ag u wan’ be’ nib balyang. Ere mu rin’ e n’en ni kam micheg.” (Ekl. 5:4, BT) Ki tamilangnag Jesus feni ga’ fan ni ngad ted u gil’ e n’en ni kad micheged u nap’an ni yog ni gaar: “Kam rung’aged ni ka nog ngak e girdi’ kakrom ni lunguy, Dab mu thiliyeg e tin ni ka mog ni bay mu rin’, ya ngam rin’ e tin ni ka mog ngak be’ u p’eowchen Somol ni bay mu rin’.”​—Matt. 5:33.

4. (a) Uw feni ga’ fan e pi n’en ni gad ma micheg ngak Got? (b) Mang e ba t’uf ni ngad nanged u murung’agen Jefthah nge Hannah?

⁴ Ere, ba tamilang nrib ga’ fan e pi n’en ni gad ma micheg ngak Got. Ma n’en ni gad ra rin’ nga tomuren e bay rogon ko tha’ u thildad Jehovah. I tamilangnag David e re n’ey u nap’an ni fith ni gaar: “Mini’ e ba’ mat’awun ni nge yan nga daken e burey rok Somol? I mini’ e yira pag nge yan nga lan e tempel rok nib thothup?” Ngemu’ me tamilangnag ni en nra “micheg bbugithin ni nge rin’ ma dabi thiliyeg” e aram e en nra fel’ u wan’ Jehovah. (Ps. 24:3, 4) Ere, mang e micheg Jefthah nge Hannah? Ma gur, ba mom ngorow ni ngar tew u gil’ e n’en ni kar michegew, fa?

KAR TEW U GIL’ E N’EN NI KAR MICHEGEW NGAK GOT

5. Mang e micheg Jefthah, ma mang e buch nga tomuren?

⁵ I yul’yul’ Jefthah ko n’en ni micheg ngak Jehovah u nap’an ni yan i cham ngak piyu Ammon nreb e nam ni be gafgownag e girdi’ rok Got. (Judg. 10:7-9) Bochan nri baadag Jefthah ni nge gel ko re mahl nem, ma aram me micheg ngak Jehovah ni gaar: “Faan ga ra gelnageg ko mahl ngak piyu Ammon, ma . . . cha’ nth’abi som’on nra yib u lan e naun rog nga wen ni nge mada’nigeg, u nap’an ni gu ra sul ko mahl ni kug gel [e] gu ra pi’ . . . ngom nib maligach.” Ere, mang e buch? I gel Jefthah ngak piyu Ammon, ma nap’an ni sul nga tafen u tomuren ni ke gel ko mahl, ma fare rugod ni fak nrib t’uf rok e aram e en nth’abi som’on ni yib ni ngar mada’gow. Ere, aram e en nthingari “pi’” ngak Jehovah. (Judg. 11:30-34, BT) Ere, mang e ra buch ko re rugod nem?

6. (a) Ba mom ngak Jefthah nge fare rugod ni fak ni ngar tew u gil’ e n’en ni kar michegew, fa? (b) Mang e kam fil ko Deuteronomy 23:21, 23 nge Psalm 15:4 u murung’agen e n’en ni gad ma micheg ngak Got?

⁶ Rogon ni nge tay fare rugod ni fak Jefthah u gil’ e n’en ni ke micheg e chitamangin e aram e nge yan i par ko tabernacle rok Jehovah nge pigpig ngak u n’umngin nap’an e yafos rok. Gur, re n’em ni micheg Jefthah e ban’en ni yigi micheg nde lemnag u m’on riy? Danga’, ya dabisiy nsana manang nrayog nre rugod ni fak nem e aram e en nra yib u lan e naun rok nga wen ni ngar mada’gow u nap’an nra sul nga tafen. Bin riyul’ riy e, re n’em ni ke micheg Jefthah e ban’en nrib mo’maw’ ngorow e re rugod ni fak nem ni ngar rin’ew, ya bay boch ban’en nthingar ra pagew fan ya nge yag nra tew u gil’ e n’en ni kar michegew. Ere, aram fan nnap’an ni guy Jefthah e re rugod ni fak nem, ma aram me “guchthuy e mad rok” me yog ni kari kireban’ nib gel. Ma fare rugod ni fak e ‘yornag ir ni thingar yim’ ni dawori nang e pumoon.’ Mang fan? Ya dariy e pumoon ni fak Jefthah, maku re rugod ni fak nem e dabkiyog ni nge un ko mabgol me fakay e bitir. Ere, dakuriy be’ nra yib nga tomuren ni nge fek fithingan e tabinaw rok Jefthah. Yugu aram rogon, ma gathi aram e n’en nth’abi ga’ fan u wan’row. Ya yog Jefthah ni gaar: “Kug ngongliy ba m’ag ni kug micheg ngak Somol, ni dabkiyog ni nggu sulweg!” Me fulweg fare rugod ni fak ni gaar: “[Mu] rin’ e tin ka mog ni ngam rin’ ngog.” (Judg. 11:35-39, BT) Ireray l’agruw ni’ ni yow ba yul’yul’ ma dariy e ngiyal’ ni yow ra lemnag ni ngar thilyegew e n’en ni kar michegew ngak fare Got ni Ir e Th’abi Tolang ni yugu demtrug feni mo’maw’ ngorow ni ngar rin’ew.​—Mu beeg e Deuteronomy 23:21, 23; Psalm 15:4.

7. (a) Mang e micheg Hannah, ma mang fan? Mang e buch nga tomuren? (b) Mang e thingari rin’ Samuel ni bochan e n’en ni ke micheg Hannah? (Mu guy e footnote.)

⁷ Hannah e ku ir be’ nib yul’yul’ ni tay u gil’ e n’en ni micheg ngak Jehovah. I micheg ban’en ngak Jehovah u ba ngiyal’ ni kari amith laniyan’ ma kari kireban’ ni bochan e dabiyog ni nge diyen ma yugu yibe par ni yibe moningnag. (1 Sam. 1:4-7, 10, 16) I weliy Hannah laniyan’ ngak Got me micheg ngak ni gaar: “Somol ni Gubin ma Rayog Rom, mu sap ngog i gag e tapigpig rom! Mu guy e gafgow ni kug tay ngam lemnigeg! Dab mu pag talig! Faan ga ra gagiyegnag nggu diyennag ba pagel, ma gu be micheg ngom ni bay gu pi’ ngom nge mil fan ngom u n’umngin nap’an e yafos rok, ma dariy e rofen ni yira th’ab piyan lolugen.”a (1 Sam. 1:11) I fulweg Got taban e meybil rok Hannah, ma aram me diyen ni bochi pagel. Rib gel e felfelan’ ni tay! Machane yugu aram rogon, ma de pagtalin e n’en ni micheg ngak Got. Nap’an ni gargeleg e chi pagel ni fak nem, ma aram me yog ni gaar: “Gu wenig ngak Somol ni nge pi’ ngog.”​—1 Sam. 1:20.

8. (a) Ba mom ngak Hannah ni nge tay u gil’ e n’en ni ke micheg, fa? (b) Uw rogon ni be puguran ngom fapi thin ni yog David ko Psalm 61 rogon e n’en ni rin’ Hannah nrayog ni ngan folwok riy?

⁸ Nap’an ni yigi pag Samuel e thuth u nap’an ni ke gaman sogonap’an dalip e duw yangaren, ma aram me rin’ Hannah e n’en ni micheg ngak Got. Dariy ba ngiyal’ ni lemnag ni nge thilyeg e n’en ni ke micheg. Ya fek Samuel i yan ngak Eli ni ir e Prist Nth’abi Tolang ko tabernacle u Shiloh me gaar ngak: “Gu wenig ngak ni nge pi’ e re tir ney ngog, me pi’ ngog e n’en ni gu wenignag ngak. Ere nggu pi’ nga pa’ Somol. Nge par nib mil suwon ngak Somol u n’umngin nap’an e yafos rok.” (1 Sam. 1:24-28) Ere, aram e gin ni ilal Samuel riy “ni be pigpig ngak Somol.” (1 Sam. 2:21) Ere gur, ba mom ngak Hannah ni nge rin’ e re n’ey? Ya rib t’uf e chi pagel ni fak nem rok, machane dabkiyog ni ngaur mada’gow ni gubin e rran. Am lemnag rogon laniyan’ Hannah, ya dabisiy ni i yim’ ni bochan ni nge dibey fak, mar fafelgow u taabang, ma be ayuweg, ma be guy rogon ni be ilal i yan. Yugu aram rogon, ma de kal Hannah ngan’ ko n’en ni micheg ngak Got. I felfelan’ ko n’en ni ke rin’ ni fan ngak Jehovah.​—1 Sam. 2:1, 2; mu beeg e Psalm 61:1, 5, 8. 

9. Mang l’agruw e deer ni ngad weliyed e fulweg riy?

⁹ Chiney ni ke tamilang u wan’dad feni ga’ fan e pi n’en ni gad ma micheg ngak Got e aram e ngad weliyed e fulweg ko gal deer ni baaray ni be gaar: Mang boch ban’en nrayog ni ngad micheged ni gad e piin Kristiano? Ma uw rogon ni ngad dugliyed u wan’dad ni ngad ted u gil’ e pi n’en ni kad micheged?

N’EN NI KAM MICHEG U NAP’AN NI KAM OGNAGEM NGAK GOT

10. Mang e n’en nth’abi ga’ fan ni ma micheg reb e Kristiano? Mang e ba muun ko re n’ey?

¹⁰ N’en nth’abi ga’ fan ni ma micheg reb e Kristiano e aram e n’en ni ma micheg ngak Jehovah u nap’an ni ke ognag ir ngak. Mang fan? Ya faanra nge ognag be’ ir ngak Jehovah ma aram e ke meybil ngak ni yigoo ir ke micheg ni nge fanay e yafos rok ni nge pigpig ngak ndariy n’umngin nap’an ndemtrug ko mang e ra buch. I yog Jesus nnap’an nra rin’ be’ ban’en ni aray rogon, ma aram e thingari “pag talin ir,” ni aram e be yip’ fan ni nge micheg ngak Got ni ir e nge m’on u lan e yafos rok me tomur e tin ni ka bay ban’en. (Matt. 16:24) Tomuren e re ngiyal’ i n’em, ma aram e ke par facha’ ni ke ‘mil fan ngak’ Jehovah. (Rom. 14:8) Nap’an nra ognag be’ ir ngak Jehovah ma thingar dabi pagtalin nrib ga’ fan e n’en ni ke micheg, ma thingari lem ni bod rogon fare psalmist ni faani weliy murung’agen e pi n’en ni ke micheg ngak Got ni gaar: “Be mang e rayog ni gu pi’ ngak Somol nge yan nga puluwon gubin e pi n’en nib fel’ ni ke rin’ ngog? U lan e muulung rok urngin e tirok e girdi’ e bay gu pi’ ngak riy e tin gu micheg.”​—Ps. 116:12, 14, BT.

11. Mang e mu rin’ ko rofen nim un ko taufe?

¹¹ Kam ognagem ngak Jehovah kam un ko taufe, fa? Faanra kam rin’, ma rib manigil! Dab mu pagtalin ni rofen ni baaram nim un ko taufe e ni fithem u p’eowchen e girdi’ ni yoor ko kam ognagem ngak Jehovah ma ke tamilang u wan’um ni “yafos rom ni kam ognag ngak nge taufe ni ngam un ngay e ra dag ni kam mang reb e Pi Mich Rok Jehovah ma kam mang bang ko ulung rok ni gelngin Got nib thothup e ir e be pow’iy, fa.” Nap’an ni mog e arrogon ko gal deer ney, ma aram e ka mog ngak urngin e girdi’ ni immoy u rom ni kam ognag e yafos rom ngak Got ma ke bung rogom nrayog ni ngan taufenagem ni ngam mang reb e tamachib rok Jehovah. Dariy e maruwar riy ni ka rim felfelan’nag Jehovah e rofen nem!

12. (a) Mang boch e deer nib fel’ ni ngad fithed gadad riy? (b) Mang boch e fel’ngin ni yog Peter nib fel’ ni ngad yaliyed rodad?

¹² Machane nap’an ni gad ra un ko taufe, ma aram tabolngin e pigpig rodad ngak Got. Tomuren e re ngiyal’ i n’em, ma aram e thingar da guyed rogon ni ngad ted u gil’ e n’en ni kad micheged ma gad pigpig ngak Got u fithik’ e yul’yul’. Ere, rayog ni ngad fithed gadad ni nge lungudad: ‘Uw rogon e mon’og ni kug tay ko tirok Got ban’en ni ka nap’an e ngiyal’ ni baaram nug un riy ko taufe? Kug be ulul ni ngaug pigpig ngak Jehovah u polo’ i gum’irchaeg, fa? (Kol. 3:23) Gu ma meybil, ma gu ma beeg e Thin rok Got, ma gu ma un ko muulung, ma gu ma un ko machib u rogon nrayog rog? Fa gathi ri ka be yag ni nggu rin’ e pi n’ey ni gubin ngiyal’?’ I tamilangnag apostal Peter nrogon ni nge dab da malmalgad ko pigpig ni gad be tay e aram e ngad puthuyed e tamilangan’, nge k’adan’, nge yul’yul’ ko michan’ rodad ngak Got.​—Mu beeg e 2 Peter 1:5-8.

13. Mang e thingari nang reb e Kristiano ni ke ognag ir ngak Got ke un ko taufe?

¹³ Nap’an ni yug gad ra micheg ngak Jehovah ni ngad pigpiggad ngak, ma aram e dabkiyog ni ngad thilyeged e n’en ni kad micheged. Faanra ke dabuy be’ ni be pigpig ngak Jehovah ara ke dabuy ni be rin’ e pi n’en ni ma rin’ e piin Kristiano, ma dabiyog ni nge yog nde ognag ir ngak Got maku dabiyog ni nge n’igin ni nge yan i aw ni taufe ni ke un ngay e ban’en nde buch.b Ya bin riyul’ riy e, facha’ e ke pi’ ir nib polo’ ngak Got. Ere, faanra rin’ reb e denen nib ubchiya’ ma thingari weliy ngak Jehovah nge ulung rok e n’en ni ke rin’. (Rom. 14:12) Dubdad ni ngad boded e piin ni gaar Jesus ngorad: ‘Da kug t’uf romed e chiney ni bod fanag t’uf romed ko som’on.’ Ya gad baadag ni nge gaar Jesus ngodad: ‘Gu manang e n’en ni gimed be rin’. Gu manang rogon nib t’uf Got romed nge girdi’, nge fanam yul’yul’gad, nge pigpig ni gimed be tay, nge fanmed gum’an’. Gu manang ni ke gel e maruwel ni gimed be tay e chiney ko som’on.’ (Rev. 2:4, 19) Ere, manga yugu da ululgad ngad ted u gil’ e n’en ni kad micheged ngak Jehovah u nap’an nda ognaged gadad ngak ma gad felfelan’nag.

N’EN NI KE MICHEG BE’ NGAK E EN MABGOL ROK

14. Mang e n’en ni migid nrayog ni nge micheg be’ nri kub ga’ fan, ma mang fan?

¹⁴ Bin migid e n’en nra micheg be’ nri kub ga’ fan e aram e n’en ni ke micheg ngak e en mabgol rok. Mang fan? Ya mabgol e ban’en nib thothup. Nap’an nra un l’agruw ni’ ko mabgol, ma aram e kar michegew ban’en u p’eowchen Got nge piin ni kar uned ko fare madnom ko m’agpa’ rorow. Bod nnap’an nra mabgol l’agruw ni’, mab ga’ ni yow ma micheg ngorow ni yow ra t’ufegew yow, mar ayuwegew yow, me bagayow me tayfan bagayow u “n’umngin nap’an e yafos rorow u roy u fayleng nrogon nib puluw ko yaram rok Got ni fan ngak e piin mabgol.” Sana bay boch e walag ni kar uned ko mabgol ni gathi ri ireray e pi thin nrogned u nap’an e m’agpa’ rorad, machane bay ban’en ni kar micheged u p’eowchen Got. Tomuren ni yow ra micheg e pi thin ney u p’eowchen Got, ma aram e ngiyal’ nrayog ni nga nog ni kar mabgolgow ni aram e ngar parew u taabang u n’umngin nap’an e yafos rorow. (Gen. 2:24; 1 Kor. 7:39) I gaar Jesus: “Thingari dabi dareg e girdi’ e gali cha’ ni Got e ke chagiyrow.” Ere, faanra ke dugliy l’agruw ni’ ni ngar mabgolgow ma susun e dab ra lemnagew ni faanra yan i taw nga ba ngiyal’ ni ke kireb e mabgol rorow, ma aram e rayog ni ngar dargow.​—Mark 10:9.

15. Mang fan nthingar dab i lemnag e piin Kristiano e mabgol ni bod rogon ni ma lemnag e girdi’ nu fayleng?

¹⁵ Riyul’ ndariy reb e mabgol nib flont. Ya fagali cha’ ni kar mabgolgow e yow l’agruw ndawor ra flontgow. Aram fan ni be yog e Bible ni piin ni kar mabgolgad e bay yu ngiyal’ nra ur ‘pirieged e gafgow.’ (1 Kor. 7:28) Rib gel e kireban’ riy ni bochan e boor e piin ni yad ba mabgol u fayleng e ngiyal’ ney e dariy fan e mabgol u wan’rad. Nap’an nra yib e magawon nga lan e mabgol rorad, ma aram mar dargad e en mabgol rorad. Machane, gathi aram rogon e mabgol ko piin Kristiano. Faanra dabi tay be’ u gil’ e n’en ni ke micheg ngak e en mabgol rok ma taareb rogon ni ke bannag Got, ma Got e ri ma fanenikan e piin ni yad ma ban! (Lev. 19:12; Prov. 6:16-19) I yoloy apostal Paul ni gaar: “Ba’ leengim fa? Ere dab mu guy rogon ni ngam n’ag.” (1 Kor. 7:27) Rayog ni nge yog Paul e re thin ney ni bochan e manang ni ma fanenikay Jehovah e mabgol ni ma dar.​—Mal. 2:13-16.

16. Mang e be yog e Bible u murung’agen e mabgol ni be dar nge ra be’ ma be par u bang?

¹⁶ I yog Jesus ni kemus nrogon nrayog ni nge dar e mabgol nib puluw ko Bible e faanra ke par bagayow fa wu’ i mabgol nge be’ ni gathi mabgol rok, ma ke dugliy faen nde kireb e rok u wan’ ndabi n’ag fan e kireb ni ke rin’ e en mabgol rok. (Matt. 19:9; Heb. 13:4) Me ere uw rogon e bin baaray ni nge bagayow fa wu’ i mabgol me par rok? Kub tamilang e n’en ni be yog e Bible u murung’agen e re n’ey. (Mu beeg e 1 Korinth 7:10, 11.) Der yog e Bible ni bay tapgin nrayog ni nge dugliy l’agruw ni’ ni nge bagayow me par rok. Machane, bay boch e magawon ni ma sum u lan e mabgol nib pag rogon nrayog ni nge k’aring reb e Kristiano ni nge turguy ni nge bagayow e en mabgol rok me par rok. Re n’ey e bod rogon be’ ni be taleg e en mabgol rok ndabi pigpig ngak Jehovah ara be’ ni be li’ e en mabgol rok.c

17. Uw rogon nrayog ni nge ayuweg l’agruw e Kristiano e mabgol rorow ni nge par ndabi wer?

¹⁷ Nap’an nra yan ba wu’ e mabgol i guy e piin piilal ni ngar ningew e ayuw u rogon ni ngar pithigew e magawon u lan e mabgol rorow, mab fel’ ni nge fith e piin piilal ngorow ko kar yaliyew fare video ni kenggin e What Is True Love? ni thin ni Meriken, ma kar filew fare brochure ni kenggin e Rayog ni Nge Felfelan’ e Tabinaw Rom u taabang fa dawor. Mang fan? Ya re video ney nge re ke brochure ney e be tamilangnag boch e pi kenggin e motochiyel rok Got ni ke yag ni nge ayuweg yu wu’ e mabgol ni ngar gelnaged e tha’ u thilrad. I yog ba wu’ e mabgol ni lungurow: “Ka nap’an nug tababgow i fil e re ke brochure ney u taabang, ma ke yag ni nggu piriegew e felfelan’ u lan e mabgol romow.” Ku bay reb e walag nib pin ni ke gaman 22 e duw ni ke un ko mabgol ni ke lemnag ni bayi wer e mabgol rok. Machane, tomuren ni yaliy e re video ney me yog ni gaar: “Gamow l’agruw ni gamow ba taufe, machane der yag ni nggu parew nib taareban’mow. Rib puluw e tayim nni pi’ e re video ney riy! Chiney e ke yag ni nge fel’ boch e mabgol romow.” Me gur, gab mabgol, fa? Faanra gab mabgol, mag athamgil ni ngam fol ko pi kenggin e motochiyel rok Jehovah. Faan ga ra rin’ ni aray rogon ma ra ayuwegem ni ngam tay u gil’ e n’en ni kam micheg ko en mabgol rom, me par e mabgol romew ni bay e felfelan’ riy!

N’EN NI KE MICHEG E PIIN NI YAD MA PIGPIG U POLO’ E TAYIM RORAD NI YAD MA RIN’ BOCH E MARUWEL NI YUGU BA THIL

18, 19. (a) Mang e ke rin’ boor e gallabthir ni Kristiano? (b) Mang e rayog ni nga nog u murung’agen e piin ni yad ma pigpig u polo’ e tayim rorad ni yad ma rin’ boch e maruwel ni yugu ba thil?

¹⁸ Ka ga manang reb e ban’en ni taareb rogon rok Jefthah nge Hannah? Bochan e n’en ni micheg Jefthah nge Hannah ma aram e thingari yan i par gal fakrow nga tabernacle ni ngar pigpiggow ngak Jehovah u rom. Rib gel e felfelan’ ni yow ra tay ko n’en ni kar rin’ew ko yafos rorow. Ngiyal’ ney e boor e gallabthir ni Kristiano ni kar pied e athamgil nga laniyan’ pi fakrad ni ngar uned ko pigpig u polo’ e tayim rorad, mar fanayed e yafos rorad ni fan ko tirok Got ban’en. Ere, bay rogon ni ngan pining e magar ko pi walag ney.​—Judg. 11:40; Ps. 110:3.

¹⁹ Chiney e bay sogonap’an 67,000 e Pi Mich Rok Jehovah u ga’ngin yang e fayleng ni yad ma pigpig ni ka nog e Special Full-Time Servants ngorad ara piin ni yad ma pigpig u polo’ e tayim rorad ni yad ma rin’ boch e maruwel ni yugu ba thil. Boch i yad e ma pigpig u Bethel, ma boch e ma dimow naun ara ma lekag e pi ulung i yan, ma boch i yad e ma pi’ boch e skul ni yima tay, ara yad e special pioneer, ara missionary, ara yad ma pigpig ni yad ma ayuweg e pi Assembly Hall, ara pi naun ni yima tay boch e skul rodad riy. Gubin e pi walag ney ni ke m’agan’rad ngay ni ngar folgad ko n’en ni bay u daken bangi babyor ni ka nog e “Vow of Obedience and Poverty” ngay. Nap’an nra sayinnag be’ e gi babyor nem ma aram e ke micheg ndemtrug e re miti maruwel ni kan pi’ ngak ni nge rin’ ni fan ko pigpig ni be tay ngak Jehovah ma ra rin’, ma nge momnag e par rok, ma dabi un ko maruwel ni ma yag e salpiy riy ndawor ni pi’ mat’awun. Ere, gathi girdi’ ni ma rin’ e pi maruwel ney e ba ga’ farad, ya maruwel rorad e aram e n’en nib ga’ fan ma yima tay ni aram boch e maruwel ni yugu ba thil. Pi walag ney e yad manang nrib ga’ fan ni ngar ted u gil’ e n’en ni kar micheged u n’umngin nap’an ni yad be pigpig u polo’ e tayim rorad ni yad be rin’ e pi maruwel ney ni yugu ba thil.

20. Mang e susun ni ngad rin’ed ni gubin e “rran,” ma mang fan?

²⁰ Re article ney e kad weliyed dalip ban’en riy nrayog ni ngad micheged ngak Got. Ere, in ko pi n’ey e kam micheg? Taareb, l’agruw, ara gubin. Dariy e maruwar riy ni ga manang nib ga’ fan e pi n’en ni kam micheg, ma dabiyog ni ngam darifannag. (Prov. 20:25) Gad manang ni faanra dabi tay be’ u gil’ e n’en ni ke micheg ngak Jehovah, ma rayog ni nge yib wenegan nib kireb ngak. (Ekl. 5:6) Ere, ngad athamgilgad ni gad gubin nga ‘don’ed e tang ni gad be pining e sorok ngak [Jehovah], ko ngiyal’ ni gad be pi’ ngak ni yu rran e n’en ni kad micheged.’​—Ps. 61:8.