Rogon e Gol ni Dag Reb e Kristiano

NNI taufenag e chitamangin John ni ke mang reb e Pi Mich Rok Jehovah u tungun e pi duw ni tabab ko 1950 nge yan i mada’ ko 1959 u bochi binaw nib achig ni bay u Gujarat u India. Machane, John nge lal i pumoon nge ppin ni walagen nge chitiningirad e yad gubin ni yad ba m’ing ko Katolik, ma dubrad e teliw ko chitamangirad.

Ere yan i reb e rran, ma aram me yog e chitamangin John ngak ni nge fek ba envelope nge yan i pi’ ngak reb e fager rok u lan e ulung. Rofen nem ni kadbul e math’ buguli pa’ John u nap’an ni be bing upongen ba dromkang. Machane bochan ni baadag ni nge fol ko n’en ni ke yog e chitamangin ngak, ma aram me fek bangi mad nge m’ag nga buguli pa’ ma aram me yan nga tafen facha’ ni nge yan i pi’ fare envelope.

Nap’an ni taw John e ngaram, ma aram me pi’ fare envelope ngak e ppin rok facha’ ni fager ko chitamangin. Re ppin nem e ku ir reb e Pi Mich Rok Jehovah. I guy fare pin buguli pa’ John ni ke maad’ad, ma aram me yog nrayog ni nge ayuweg. Ere, yan i fek ban’en ni fen ni bay boch ban’en riy ni yima tafalaynag e maad’ad ngay, ma aram me yib i klinnag fagi maad’ad u buguli pa’ John me m’ag m’ag. Tomuren e re n’ey, ma aram me ngongliy ba kap i tea nge pi’ ngak John ni nge unum, ma aram mi i weliy boch ban’en ngak u Bible u fithik’ e sumunguy.

Bochan e gol ni dag e re ppin nem, ma aram e n’en ni k’aring John ni nge thil e lem rok u murung’agen e Pi Mich. I fith l’agruw e deer ngak u murung’agen e pi n’en ni ke mich u wan’ e chitamangin nib thil ko n’en ni yima fil ko ba’ rok e teliw. Som’on e fith ko Jesus e ir Got fa danga’, ngemu’ miki fith ko ba puluw ni nga i meybil e piin Kristiano ngak Maria, fa danga’. Re ppin nem e ke fil e thin ni Gujarati ni aram e re thin ni ma yog John. Ere yag rok ni nge pi’ e fulweg ko gal deer nem ni fith John ni be fanay e thin nu Bible, ma aram miki pi’ boch ke babyor ngak ni kenggin e “This Good News of the Kingdom (Re Thin rok Got Ney nib Fel’ ni Murung’agen e Gagiyeg Rok).”

Boch nga tomuren u nap’an ni beeg John fachi ke babyor, ma aram me nang nib riyul’ e pi thin nem ni be beeg. Ere yan i guy e padrey ko teliw rok miki fith fa gal deer ngak ni faani fith ko fare pin. De n’uw nap’an nra nonow, ma aram me damumuw fare padrey me pag e Bible rok ngak John, me tolul ni gaar: “Chiney e kam bod Satan! Aygum dag ngog ko uw u lan e Bible e be yog ni Jesus e gathi ir Got. Mu kum dag ngog ko uw e gin ni be yog nde puluw ni ngan meybil ngak Maria. Am dag ngguy!” Ri gin John ko n’en ni rin’ e re padrey nem. Ere gaar ngak, “Dakuriy biid ni gu ra yot’ lan e galesiya ko Katolik.” Ma aram e n’en ni rin’!

Tomuren e re n’ey, ma aram mar tababgad e Pi Mich ko fol Bible u taabang, ma aram me mich e tin riyul’ u wan’, me tabab ni nge pigpig ngak Jehovah. Boch nga tomuren ma aram miki un in e girdi’ u lan e tabinaw rok ko tin riyul’. Ke mada’ ko chiney ni ke pag 60 e duw, ma ka bay fathan e gi maad’ad nem u buguli pa’ John. Aram e n’en ni ma puguran ngak rogon e gol ni dag reb e Kristiano ngak, me k’aring ni nge un ko bin riyul’ e liyor.​—2 Kor. 6:4, 6.