Ìdí Tí Àwọn Ilé Ìjọsìn Fi Ń kógbá Sílé

ÀWỌN ṣọ́ọ̀ṣì, ilé ìjọsìn, ẹgbẹ́ akọrin, àti èédú—ní ìwọ̀nba 50 ọdún péré sẹ́yìn, wọ́n jẹ́ àmì gidi tí ń fi hàn pé o wà ní àwọn àfonífojì ìwakùsà ní Gúúsù Wales. Ó jọ pé ní gbogbo ọgọ́rọ̀ọ̀rún mítà, ìwọ yóò rí yálà ilé ìjọsìn Baptist tí wọ́n ti ń sọ ède Welsh tàbí Gẹ̀ẹ́sì tàbí èyí tí ó bá a dọ́gba, tí ó jẹ́ fún àwọn Mẹ́tọ́díìsì, Mẹ́tọ́díìsì ti Calvin, Congregational, Presbyterian, àti bẹ́ẹ̀ bẹ́ẹ̀ lọ. Níwọ̀n bí ó ti jẹ́ pé èdè orílẹ̀-èdè wọn ni ọ̀pọ̀ lára àwọn ènìyàn Wales ń sọ, ó fẹ́rẹ̀ẹ́ jẹ́ ìsìn kọ̀ọ̀kan ló ní ilé ìjọsìn ọ̀tọ̀ọ̀tọ̀ fún èdè kọ̀ọ̀kan. Tẹlifíṣọ̀n àti ìlànà tí ń yí padà ti yí gbogbo iyẹn padà láàárín ẹ̀wádún márùn-ún tí ó ti wà.

Islwyn Jones, ọmọ ilẹ̀ Wales, tí ń gbé Blaenclydach ní Àfonífojì Rhondda, ti lo ọ̀pọ̀ ọdún ní ṣíṣàkọsílẹ̀ kúlẹ̀kúlẹ̀ ohun tí ń ṣẹlẹ̀ sí ọ̀gọ̀ọ̀rọ̀ ilé ìjọsìn ní Rhondda. Ìwé ìròyìn àdúgbò náà, Rhondda Leader, tẹ àwọn ilé ìjọsìn tí ó fẹ́rẹ̀ẹ́ tó ọgọ́rùn-ún, tí ọ̀pọ̀ jù lọ lára wọ́n ti wà láti ọ̀rúndún kọkàndínlógún, jáde, ó sì tọ́ka sí ipò tí wọ́n wà ní lọ́ọ́lọ́ọ́. Ìròyìn náà sọ pé: “Àwọn ilé ńláńlá yìí jẹ́ apá pàtàkì ní Rhondda bí ó ti ń la àwọn ọdún ìbúrẹ́kẹ́ èédú já títí dé ìgbà tí àwọn ìpìlẹ̀ méjèèjì wọ̀nyí [ìsìn àti èédú] tí ń gbé ẹ̀mí ró ní àfonífojì náà fi jó rẹ̀yìn pátápátá.”

Àkọsílẹ̀ náà ṣiṣẹ́ gẹ́gẹ́ bí ẹ̀dàyà ìwólulẹ̀ ipa tí ìsìn ń ní, kì í ṣe ní Wales nìkan ṣùgbọ́n ní apá ibi púpọ̀ ní ilẹ̀ Europe. A ṣàkọsílẹ̀ pé àwọn ilé ìjọsìn 68 ni a ti “wó palẹ̀ nísinsìnyí.” A ti yí ìlo 19 padà sí ṣíṣe àwọn ohun mìíràn. Àwọn àpẹẹrẹ nìyí: “a yí i padà sí ilé ẹ̀kọ́ ọ̀nà ìgbèjà ara ẹni ti Aikido,” “a yí i padà sí ilé àdágbé [ilé gbéetán],” “a yí i padà sí ilé ẹrù,” “a sọ ọ́ di ibi ìtajà,” “a sọ ọ́ di ilé ìtajà egbòogi.” Ọ̀kan tí a kò kọ sílẹ̀, tí ó wà ní Penygraig, ni a yí padà sí Gbọ̀ngàn Ìjọba Àwọn Ẹlẹ́rìí Jèhófà ní ọ̀pọ̀ ọdún sẹ́yìn, fún ìlò Ìjọ Rhondda tí ń gbèrú sí i.

Gẹ́gẹ́ bí Bíbélì ṣe sọ tẹ́lẹ̀ nípa “Bábílónì Ńlá,” ilẹ̀ ọba ìsìn èké àgbáyé, àwọn omi ìṣàpẹẹrẹ rẹ̀, ìtìlẹ́yìn àwọn ènìyàn, ti ń gbẹ ní àwọn apá ibi púpọ̀ lágbàáyé. Láìpẹ́, àwọn ìsọ̀rí àwùjọ olóṣèlú àgbáyé yóò dojú ìjà kọ ìsìn bí wọ́n ti ń “mú ìrònú [Ọlọ́run] ṣẹ” láti pa ìsìn èké, tí ó ti sọ̀rọ̀ òdì sí orúkọ Jèhófà Ọlọ́run àti ète rẹ̀, run.—Ìṣípayá 17:5, 15-17.a

[Àlàyé ìsàlẹ̀ ìwé]