MÁA HÙWÀ TÓ YẸ KRISTẸNI

Fọgbọ́n Yan Eré Ìnàjú Tí Wàá Máa Ṣe

Kí nìdí tó fi yẹ ká fọgbọ́n yan eré ìnàjú tá a máa ṣe? Ìdí ni pé tá a bá yan fíìmù kan tá a fẹ́ wò, orin tá a fẹ́ gbọ́, ìkànnì kan tá a fẹ́ lọ, ìwé kan tá a fẹ́ kà tàbí géèmù tá a fẹ́ gbá, ṣe là ń yan ohun tá a fẹ́ fi kúnnú ọkàn wa. Ohun tá a bá yàn máa nípa lórí ìwà wa. Ó ṣeni láàánú pé púpọ̀ lára àwọn eré ìnàjú tó wà lónìí ló ní àwọn nǹkan tí Jèhófà kórìíra nínú. (Sm 11:5; Ga 5:19-21) Ìdí nìyẹn tí Bíbélì fi rọ̀ wá pé ká máa ronú lórí àwọn nǹkan tó máa mú ògo wá fún Jèhófà.—Flp 4:8.

WO FÍDÍÒ NÁÀ ERÉ ÌNÀJÚ WO LÓ YẸ KÍ N YÀN LÁÀYÒ? KÓ O SÌ DÁHÙN ÀWỌN ÌBÉÈRÈ YÌÍ:

Báwo ni ìjà àjàkú akátá tí wọ́n ń jà ní Róòmù láyé àtijọ́ ṣe jọra pẹ̀lú àwọn eré ìnàjú kan lóde òní?
Báwo ni àwọn ará ìjọ ṣe lè ran àwọn ọ̀dọ́ lọ́wọ́ láti yan eré ìnàjú tó gbámúṣé?
Báwo ló ṣe yẹ kí Róòmù 12:9 ràn wá lọ́wọ́ tá a bá fẹ́ yan eré ìnàjú?
Irú àwọn eré ìnàjú tó gbámúṣé wo ló wà ní àdúgbò rẹ?

ṢÉ O FẸ́ MÁA ṢE ERÉ ÌNÀJÚ NI ÀBÍ Ó KÀN FẸ́ RÍ OHUN TÍ ẸLÒMÍÌ ṢE?

Àwọn tó ti di gbajúgbajà ní ìdí eré ìnàjú lóde òní ò fẹ́ káwọn èèyàn máa ṣe eré ìnàjú, wọ́n kàn fẹ́ kí wọ́n máa wo ohun tí àwọn ẹlòmíì ṣe. Má gbàgbé pé iṣẹ́ ọpọlọ àwọn ẹlòmíì ni wọ́n máa ń fi hàn nínú fíìmù, ìwé àti ètò orí tẹlifíṣọ̀n, kì í ṣe ìwọ lo ṣe é. Lóòótọ́ kò burú pátápátá tá a bá ń fi ohun táwọn míì ṣe dára yá, àmọ́ ọ̀pọ̀ ló ti rí i pé àǹfààní pọ̀ níbẹ̀ téèyàn bá ń fúnra rẹ̀ ṣe eré ìnàjú. Bí àpẹẹrẹ, àwọn kan máa ń fẹ́ lo ohun èlò ìkọrin láti kọrin tàbí kí wọ́n yàwòrán. Àwọn míì fẹ́ràn kí wọ́n máa ṣe àwọn eré ìdárayá míì níta táá jẹ́ kí wọ́n máa sá síbí sá sọ́hùn, àwọn míì sì máa ń lọ wẹ̀ lódò tàbí kí wọ́n jó ijó ìbílẹ̀. Eré ìnàjú èyíkéyìí tá a bá yàn, ẹ jẹ́ ká rí i dájú pé a “ṣe ohun gbogbo fún ògo Ọlọ́run.”—1Kọ 10:31.