Kí Ni Wọ́n Gbà Gbọ́?

ÀWỌN Ẹlẹ́rìí Jèhófà ní ìgbàgbọ́ nínú Jèhófà, Ọlọ́run Olódùmarè, Ẹlẹ́dàá ọ̀run òun ayé. Wíwà tí àwọn ohun àgbàyanu wà lọ́nà àrà nínú àgbáálá ayé tó yí wa ká, fi hàn gbangba pé Ẹlẹ́dàá olóye àti alágbára jù lọ ló ṣẹ̀dá gbogbo rẹ̀. Gẹ́lẹ́ bí iṣẹ́ ọwọ́ àwọn èèyàn lọ́kùnrin lóbìnrin ṣe máa ń fi irú ẹni tí wọ́n jẹ́ hàn, bẹ́ẹ̀ náà ni iṣẹ́ tí Jèhófà Ọlọ́run ṣe ń fi irú ẹni tó jẹ́ hàn. Bíbélì sọ fún wa pé “àwọn ànímọ́ rẹ̀ tí a kò lè rí ni a rí ní kedere láti ìgbà ìṣẹ̀dá ayé síwájú, nítorí a ń fi òye mọ̀ wọ́n nípasẹ̀ àwọn ohun tí ó dá.” Pẹ̀lúpẹ̀lù, láìsí ohùn tàbí ọ̀rọ̀, “àwọn ọ̀run ń polongo ògo Ọlọ́run.”—Róòmù 1:20; Sáàmù 19:1-4.

Èèyàn kì í mọ ìkòkò tàbí kó ṣe tẹlifíṣọ̀n àti ẹ̀rọ̀ kọ̀ǹpútà láìní ète kan lọ́kàn. Ayé àti àwọn ewéko àti ẹranko tó jẹ́ ẹ̀dá alààyè inú rẹ̀ tiẹ̀ tún jẹ́ ohun ìyanu jù bẹ́ẹ̀ lọ fíìfíì. Ìgbékalẹ̀ ara ẹ̀dá ènìyàn tòun ti ẹgbẹẹgbẹ̀rún lọ́nà ẹgbẹẹgbẹ̀rún ọ̀kẹ́ sẹ́ẹ̀lì tó wà nínú rẹ̀ ré kọjá òye wa, kódà ohun àgbàyanu tó ju òye ẹni lọ ni ọpọlọ tí a fi ń ronú pàápàá jẹ́! Bí àwọn èèyàn bá ni ète tí wọ́n fi ń ṣe àwọn ohun tí wọ́n hùmọ̀, èyí tí kò tó nǹkan lẹ́gbẹ̀ẹ́ ti Ẹlẹ́dàá, dájúdájú Jèhófà Ọlọ́run ni ète tó fi dá àwọn ìṣẹ̀dá àgbàyanu tó dá! Òwe 16:4 sọ pé ó ní ète tó fi dá wọn, ó ní: “Ohun gbogbo ni Jèhófà ti ṣe fún ète rẹ̀.”

Ó ní ète tí Jèhófà fi dá ilẹ̀ ayé, nítorí ó sọ fún tọkọtaya àkọ́kọ́ pé: “Ẹ máa so èso, kí ẹ sì di púpọ̀, kí ẹ sì kún ilẹ̀ ayé . . . , kí ẹ sì máa jọba lórí ẹja òkun àti àwọn ẹ̀dá tí ń fò ní ojú ọ̀run àti olúkúlùkù ẹ̀dá alààyè tí ń rìn lórí ilẹ̀ ayé.” (Jẹ́nẹ́sísì 1:28) Nítorí pé tọkọtaya yìí di aláìgbọràn, wọn kò lè fi àwọn ìdílé olódodo, tó máa fi tìfẹ́tìfẹ́ bójú tó ilẹ̀ ayé àti àwọn ewéko àti ẹranko inú rẹ̀, kún inú ayé. Àmọ́ ìkùnà wọn kò gbé ète Jèhófà wọmi. Ẹgbẹẹgbẹ̀rún ọdún lẹ́yìn náà, a kọ ọ́ pé: “Ọlọ́run . . . Aṣẹ̀dá ilẹ̀ ayé . . . kò wulẹ̀ dá a lásán.” Ńṣe ni “ó ṣẹ̀dá rẹ̀ àní kí a lè máa gbé inú rẹ̀.” Kò wà fún píparun bí kò ṣe pé kí “aiye duro titi lai.” (Aísáyà 45:18; Oníwàásù 1:4, Bíbélì Mímọ́) Ohun tí Jèhófà pète fún ilẹ̀ ayé yóò ṣẹ, ó ní: “Ìpinnu tèmi ni yóò dúró, gbogbo nǹkan tí mo bá sì ní inú dídùn sí ni èmi yóò ṣe.”—Aísáyà 46:10.

Nípa bẹ́ẹ̀, àwọn Ẹlẹ́rìí Jèhófà gbà gbọ́ pé ayé yóò wà títí láé ni, àti pé gbogbo ẹni tó bá ti lè hùwà níbàámu pẹ̀lú ohun tí Jèhófà pète fún ilẹ́ ayé ẹlẹ́wà yìí, yálà ẹni yẹn ń bẹ láàyè tàbí ó ti kú, ni ó lè gbé ayé títí láé. Gbogbo aráyé jogún àìpé látọ̀dọ̀ Ádámù àti Éfà, wọ́n sì tipa bẹ́ẹ̀ jẹ́ ẹlẹ́ṣẹ̀. (Róòmù 5:12) Bíbélì sọ fún wa pé: “Owó ọ̀yà tí ẹ̀ṣẹ̀ máa ń san ni ikú.” “Àwọn alààyè mọ̀ pé àwọn yóò kú; ṣùgbọ́n ní ti àwọn òkú, wọn kò mọ nǹkan kan rárá.” “Ọkàn tí ń dẹ́ṣẹ̀—òun gan-an ni yóò kú.” (Róòmù 6:23; Oníwàásù 9:5; Ìsíkíẹ́lì 18:4, 20) Báwo ni wọn yóò ṣe wá padà tún wà láàyè láti lè pín nínú àwọn ìbùkún inú ayé? Ipasẹ̀ ẹbọ ìràpadà Kristi Jésù nìkan nìyẹn fi lè ṣeé ṣe, nítorí ó sọ pé: “Èmi ni àjíǹde àti ìyè. Ẹni tí ó bá ń lo ìgbàgbọ́ nínú mi, bí ó tilẹ̀ kú, yóò yè.” “Gbogbo àwọn tí wọ́n wà nínú ibojì ìrántí yóò gbọ́ ohùn rẹ̀, wọn yóò sì jáde wá.”—Jòhánù 5:28, 29; 11:25; Mátíù 20:28.

Báwo ni èyí yóò ṣe ṣẹlẹ̀? Àlàyé bí yóò ṣe ṣẹlẹ̀ wà nínú “ìhìn rere ìjọba náà” tí Jésù bẹ̀rẹ̀ sí polongo nígbà tó wà láyé. (Mátíù 4:17-23) Àmọ́ lóde òní, ọ̀nà àkànṣe pàtàkì kan ni àwọn Ẹlẹ́rìí Jèhófà gbà ń wàásù ìhìn rere yìí.

[Àtẹ Ìsọfúnnni tó wà ní ojú ìwé 13]

OHUN TÍ ÀWỌN ẸLẸ́RÌÍ JÈHÓFÀ GBÀ GBỌ́

Ohun Tí Wọ́n Gbà Gbọ́ Ìdí Látinú Ìwé Mímọ́

Jèhófà ni orúkọ Ọlọ́run Sm. 83:18; Aísá. 26:4; 42:8, AS; Ẹ́kís. 6:3

[Àwòrán tó wà ní ojú ìwé 12]

AYÉ . . . Jèhófà ló dá a . . . kéèyàn máa bójú tó o . . . ká sì máa gbé inú rẹ̀ títí láé