Ẹ̀ṣọ́ Ọgbà Ẹ̀wọ̀n Kan Gbọ́ Ọ̀rọ̀ Ọlọ́run

Ọmọbìnrin kan wà nílùú Fílípì tí ẹ̀mí èṣù ń dà láàmú. Ńṣe ni ẹ̀mí èṣù náà máa ń jẹ́ kí ọmọbìnrin náà máa sọ àsọtẹ́lẹ̀, èyí sì máa ń pa owó wọlé fáwọn ọ̀gá ẹ̀. Nígbà tí Pọ́ọ̀lù àti Sílà dé Fílípì, ńṣe ni ọmọbìnrin yìí ń tẹ̀ lé wọn kiri fún ọ̀pọ̀ ọjọ́. Ẹ̀mí èṣù yẹn mú kí ọmọbìnrin náà máa pariwo pé: “Ẹrú Ọlọ́run Ẹni Gíga Jù Lọ ni àwọn ọkùnrin yìí.” Nígbà tó yá, ó sú Pọ́ọ̀lù, ó sì pàṣẹ fún ẹ̀mí èṣù náà pé: ‘Lórúkọ Jésù Kristi, jáde kúrò nínú ẹ̀!’ Ni ẹ̀mí èṣù yẹn bá jáde kúrò nínú ọmọbìnrin yẹn.

Nígbà táwọn ọ̀gá ọmọbìnrin náà rí i pé ohun tó ṣẹlẹ̀ yẹn ò ní jẹ́ kó máa pawó fáwọn mọ́, inú bí wọn gan-an. Wọ́n wá mú Pọ́ọ̀lù àti Sílà lọ sílé ẹjọ́, wọ́n sì sọ fún adájọ́ pé: ‘Àwọn ọkùnrin yìí ń rú òfin, wọ́n sì ń da ìlú wa rú!’ Ni adájọ́ bá pàṣẹ pé kí wọ́n na Pọ́ọ̀lù àti Sílà lẹ́gba, kí wọ́n sì jù wọ́n sẹ́wọ̀n. Wọ́n wá sọ Pọ́ọ̀lù àti Sílà sínú ẹ̀wọ̀n inú lọ́hùn-ún tó ṣókùnkùn gan-an, wọ́n tún fi pákó de ọwọ́ àtẹsẹ̀ wọn.

Ṣùgbọ́n Pọ́ọ̀lù àti Sílà bẹ̀rẹ̀ sí í kọrin sí Jèhófà, àwọn ẹlẹ́wọ̀n tó kù sì ń gbọ́. Nígbà tó di òru, gbogbo ọgbà ẹ̀wọ̀n yẹn bẹ̀rẹ̀ sí í mì tìtì. Ṣàdédé làwọn ilẹ̀kùn ṣí sílẹ̀, gbogbo ohun tí wọ́n fi de àwọn ẹlẹ́wọ̀n náà sì já. Nígbà tí ẹ̀ṣọ́ ọgbà ẹ̀wọ̀n yẹn rí i pé ilẹ̀kùn ti ṣí, ẹ̀rù bà á, ó rò pé àwọn ẹlẹ́wọ̀n náà ti sá lọ, ló bá fa idà yọ láti para ẹ̀.

Nígbà tí Pọ́ọ̀lù rí i pé ọkùnrin náà fẹ́ para ẹ̀, ó pariwo pé: ‘Má para ẹ o! Gbogbo wa wà níbí!’ Ọkùnrin náà sáré wá sọ́dọ̀ Pọ́ọ̀lù àti Sílà, ó dojú bolẹ̀, ó sì sọ pé: “Kí ni kí n ṣe kí n lè rí ìgbàlà?” Wọ́n sọ fún un pé: ‘Ìwọ àti ìdílé ẹ gbọ́dọ̀ gba Jésù gbọ́.’ Lẹ́yìn náà, Pọ́ọ̀lù àti Sílà kọ́ ọkùnrin náà àti ìdílé ẹ̀ ní ọ̀rọ̀ Jèhófà, gbogbo wọn sì ṣèrìbọmi.