Kí Nìdí Táwọn Ẹlẹ́rìí Jèhófà Kì Í Fi Ṣayẹyẹ Ọdún Àjíǹde?

Àwọn èrò tí kò tọ́ táwọn èèyàn ní

Irọ́: Ìdí táwọn Ẹlẹ́rìí Jèhófà kì í fi ṣe ayẹyẹ ọdún Àjíǹde ni pé wọn kì í ṣe Kristẹni.

Òótọ́: A nígbàgbọ́ pé Jésù Kristi ni Olùgbàlà wa, a sì ń ṣe gbogbo nǹkan tá a lè ṣe láti “tọ ipasẹ̀ rẹ̀ pẹ́kípẹ́kí.”—1 Pétérù 2:21; Lúùkù 2:11.

Irọ́: Ẹ ò gbà gbọ́ pé Jésù jíǹde.

Òótọ́: A gbà pé Jésù jíǹde, àti pé àjíǹde ẹ̀ wà lára ohun pàtàkì táwa Kristẹni gbà gbọ́, a sì ń wàásù ẹ̀ fáwọn èèyàn.—1 Kọ́ríńtì 15:3, 4, 12-15.

Irọ́: Ẹ̀ ń jẹ́ káwọn ọmọ yín pàdánù ayọ̀ táwọn míì máa ń ní lákòókò tí wọ́n ń ṣe ọdún Àjíǹde.

Òótọ́: A nífẹ̀ẹ́ àwọn ọmọ wa gan-an, a sì ń ṣe gbogbo nǹkan tá a lè ṣe láti kọ́ wọn lóhun tó máa jẹ́ kí wọ́n ní ayọ̀ tòótọ́.—Títù 2:4.

Kí nìdí táwọn Ẹlẹ́rìí Jèhófà kì í fi ṣayẹyẹ ọdún Àjíǹde?

• Kò sí ibi tí Bíbélì ti sọ pé káwa Kristẹni máa ṣe ayẹyẹ ọdún Àjíǹde.

• Jésù pàṣẹ pé ìrántí ikú òun ni ká máa ṣe dípò àjíǹde òun. Ọdọọdún la máa ń ṣe Ìrántí Ikú Jésù lọ́jọ́ tó bá bọ́ sí nínú kàlẹ̀ńdà àwọn Júù.—Lúùkù 22:19, 20.

• Àtinú àṣà àwọn tó ń jọ́sìn òrìṣà ìbímọlémọ ni wọ́n ti yọ àwọn nǹkan tí wọ́n ń ṣe nínú ọdún Àjíǹde, ìdí nìyẹn tá a fi gbà pé inú Ọlọ́run ò dùn sí ayẹyẹ náà. Ọlọ́run fẹ́ ká “máa sin òun nìkan ṣoṣo,” inú ẹ̀ kì í sì dùn táwọn èèyàn bá ń ṣe ohun tí kò bá ìfẹ́ rẹ̀ mu nínú ìjọsìn wọn.—Ẹ́kísódù 20:5; 1 Àwọn Ọba 18:21.

Ohun tí Bíbélì sọ ló jẹ́ ká pinnu pé a ò ní ṣe ọdún Àjíǹde. Bíbélì sì rọ̀ wá pé ká máa lo “ọgbọ́n tó gbéṣẹ́ àti làákàyè” tá a bá fẹ́ ṣe ìpinnu dípò ká kàn máa tẹ̀ lé àṣà àwọn èèyàn. (Òwe 3:21; Mátíù 15:3) Táwọn èèyàn bá fẹ́ mọ èrò wa nípa ọdún Àjíǹde, a máa sọ fún wọn. Àmọ́ a kì í fipá mú wọn láti gba ohun tá a sọ torí a mọ̀ pé ẹnì kọ̀ọ̀kan ló máa pinnu ohun táá ṣe.—1 Pétérù 3:15.