Tó Bá Ń Ṣe Ẹ́ Bíi Pé Kó O Pa Ara Rẹ

ṢÉ ÌṢÒRO ti mu ẹ́ lómi rí débi tó o fi ronú pé ó sàn kó o kú? Tó bá rí bẹ́ẹ̀, ó ṣeé ṣe kí ọ̀rọ̀ Adriana yé ẹ. Dókítà sọ fún Adriana pé ó ní àìsàn tó ń fa ìdààmú ọkàn tí kì í lọ bọ̀rọ̀. Èyí ló mú kí ayé sú u, ó sì dà bíi pé kò sí ọ̀nà àbáyọ kankan fún un.

Àpẹẹrẹ míì tún ni ti ọkùnrin ọmọ ilẹ̀ Japan kan tó ń jẹ́ Kaoru, tó ń tọ́jú àwọn òbí rẹ̀ tí wọ́n ń ṣàìsàn tí wọ́n sì ti darúgbó. Kaoru sọ pé: “Nígbà yẹn, wàhálà tí mò ń kojú níbi iṣẹ́ mú kí ayé sú mi. Oúnjẹ kì í wù mí jẹ, mi ò sì ń rí oorun sùn dáadáa. Mo wá bẹ̀rẹ̀ sí í ronú pé, ó sàn kí n kú.”

Ọmọ Nàìjíríà kan tó ń jẹ́ Ojebode sọ ní tiẹ̀ pé: “Inú mi máa ń bà jẹ́ débi pé màá bẹ̀rẹ̀ sí í sunkún, torí náà, mo bẹ̀rẹ̀ sí í wá ọ̀nà láti pa ara mi.” Àmọ́ a dúpẹ́ pé Ojebode, Kaoru, àti Adriana kò pa ara wọn. Síbẹ̀, ẹgbẹẹgbẹ̀rún èèyàn ló ń gbẹ̀mí ara wọn lọ́dọọdún.

IBO LO TI LÈ RÍ ÌRÀNLỌ́WỌ́?

Ọkùnrin ló pọ̀ jù nínú àwọn tó máa ń pa ara wọn, ọ̀pọ̀ nínú wọn ló sì jẹ́ pé ìtìjú ni kò jẹ́ kí wọ́n wá ìrànlọ́wọ́. Jésù sọ pé àwọn tó ń ṣàìsàn nílò oníṣègùn. (Lúùkù 5:31) Torí náà, tí ìdààmú ọkàn tàbí ìrẹ̀wẹ̀sì bá mú kó o máa ronú láti pa ara rẹ, má ṣe jẹ́ kí ojú tì ẹ́ láti wá ìrànlọ́wọ́. Ọ̀pọ̀ àwọn tó ní ìṣòrò ìdààmú ọkàn ti wá rí i pé àwọn lè rí ìtọ́jú nílé ìwòsàn tó máa jẹ́ kí ìlera àwọn sunwọ̀n sí i. Ohun tí Ojebode, Kaoru, àti Adriana ṣe nìyẹn, ìtọ́jú tí wọ́n gbà nílé ìwòsàn ló jẹ́ kí ìlera wọn sunwọ̀n sí i.

Àwọn dókítà lè fún ẹ ní oògùn, tàbí kí wọ́n sọ ohun tó máa ràn ẹ lọ́wọ́, wọ́n sì lè lo ọ̀nà méjéèjì. Àwọn tó ní irú ìsòro yìí nílò ọ̀rẹ́ tàbí mọ̀lẹ́bí tó máa jẹ́ alábàárò wọn, táá sì fìfẹ́ bójú tó wọn lọ́nà jẹ̀lẹ́ńkẹ́. Àmọ́, Jèhófà Ọlọ́run ni ọ̀rẹ́ tó dáa jù lọ téèyàn lè ní, torí pé òun ló ń pèsè ìrànwọ́ tó dáa jù lọ nípasẹ̀ Bíbélì Ọ̀rọ̀ rẹ̀.

ṢÉ ÌṢÒRO YÌÍ LÈ DÓPIN?

Àwọn tó ní ìṣòro ìdààmú ọkàn sábà máa ń gba ìtọ́jú fún àkókò tó gùn, wọ́n sì ní láti ṣe àwọn àtúnṣe kan nínú bí wọ́n ṣe ń gbé ìgbé ayé wọn. Tí ìdààmú ọkàn bá ń bá ẹ fínra, fọkàn balẹ̀ ọ̀la ń bọ̀ wá dára. Ó dá Ojebode lójú pé ìgbà kan ń bọ̀ tí ẹ̀dùn ọkàn òun máa lọ pátápátá. Ó sọ pé: “Mò ń retí ìgbà tí àsọtẹ́lẹ̀ tó wà ní Àìsáyà 33:24 máa ṣẹ, èyí tó sọ pé ìgbà kan ń bọ̀ tí kò ní sí ẹnì kankan lórí ilẹ̀ ayé tó máa sọ pé ‘ara mi ò yá.’” Bíi ti Ojebode, jẹ́ kí àwọn ìlérí Ọlọ́run tù ẹ́ nínú pé nínú “ayé tuntun,” kò ní sí “ìrora” mọ́. (Ìfihàn 21:1, 4) Ìlérí yẹn túmọ̀ sí pé kò ní sí ìrora, ìdààmú ọkàn àti ìrẹ̀wẹ̀sì mọ́. Gbogbo ẹ̀dùn ọkàn rẹ ló máa di ohun ìgbàgbé títí láé. Gbogbo ohun tó ń fa àròkàn fún ẹ báyìí máa di ohun àtijọ́, wọn ò ní wá sí ìrántí mọ́, wọn ò sì ní wá sí ọkàn rẹ.​—Àìsáyà 65:17.