ÀWỌN Ọ̀DỌ́ BÈÈRÈ PÉ
Ṣó Di Dandan Kéèyàn Púpọ̀ Mọ̀ Mí Lórí Ìkànnì Àjọlò?
Ọ̀dọ́bìnrin kan tó ń jẹ́ Elaine sọ pé: “Tí mo bá rí iye àwọn ọ̀rẹ́ táwọn ọmọ ilé ìwé mi ní lórí ìkànnì àjọlò, mo máa ń ronú pé, ‘Èé, àwọn eléyìí mà mọ̀ọ̀yàn o!’ Kí n má párọ́, mo máa ń jowú wọn.”
Ṣé ó ti ṣèwọ náà báyìí rí? Tó bá jẹ́ bẹ́ẹ̀, àpilẹ̀kọ yìí máa ràn ẹ́ lọ́wọ́ láti mọ ewu tó wà níbẹ̀ tó o bá fẹ́ káwọn èèyàn púpọ̀ mọ̀ ẹ́ lórí ìkànnì àjọlò.
Àwọn ewu wo ló wà níbẹ̀?
Ní Òwe 22:1, Bíbélì sọ pé “orúkọ rere ló yẹ kéèyàn yàn dípò ọ̀pọ̀ ọrọ̀.” Torí náà, kò sí ohun tó burú nínú kéèyàn fẹ́ lórúkọ rere tàbí kó fẹ́ káwọn èèyàn gba tiẹ̀ pàápàá.
Àmọ́ nígbà míì, torí pé ó wù ẹ́ gan-an káwọn èèyàn gba tìẹ, o lè má láyọ̀ àyàfi tó o bá dẹni táyé ń fẹ́ lórí ìkànnì àjọlò. Ǹjẹ́ ewu kankan tiẹ̀ wà níbẹ̀? Onya tó jẹ́ ọmọ ọdún mẹ́rìndínlógún (16) sọ pé, bẹ́ẹ̀ ni:
“Mo ti rí i táwọn èèyàn kan ń ṣe àwọn nǹkan tí kò bọ́gbọ́n mu, irú bíi kẹ́nì kan bẹ́ láti àjà kejì ilé ìwé mi sílẹ̀ torí káwọn èèyàn lè gba tiẹ̀.”
Àwọn kan tún máa ń gbé fídíò àwọn erékéré tí wọ́n ń ṣe sórí ìkànnì àjọlò torí káwọn ojúgbà wọn lè gba tiwọn. Bí àpẹẹrẹ, àwọn ọ̀dọ́ kan máa ń gbé fídíò ara wọn níbi tí wọ́n ti ń jẹ ọṣẹ ìfọṣọ tàbí àwọn oògùn tó lè pa wọ́n lára sórí ìkànnì àjọlò. Àwọn nǹkan tí kò yẹ kí ẹnikẹ́ni dán wò rárá!
Bíbélì sọ pé: “Ẹ máṣe fi . . . ogo asan ṣe ohunkóhun.”—Fílípì 2:3, Bibeli Mimọ.
Rò ó wò ná:
Ṣé ó máa ń wu ìwọ náà gan-an káwọn èèyàn púpọ̀ mọ̀ ẹ́ lórí ìkànnì àjọlò?
Ṣé o lè fi ẹ̀mí tàbí ìlera ẹ wewu torí káwọn èèyàn lè gba tìẹ?
“Òkìkí orí ahọ́n”
Lóòótọ́, kì í ṣe gbogbo ìgbà làwọn èèyàn máa ń fẹ̀mí ara wọn wewu torí káwọn èèyàn púpọ̀ lè gba tiwọn. Erica tó jẹ́ ọmọ ọdún méjìlélógún (22) sọ ọgbọ́n míì táwọn èèyàn máa ń dá:
“Ìṣẹ́jú ìṣẹ́jú làwọn èèyàn kan máa ń gbé gbogbo ohun tó ń ṣẹlẹ̀ láyé wọn sórí ìkànnì àjọlò, ìyẹn á wá jẹ́ kó dà bíi pé wọ́n ní àwọn ọ̀rẹ́ tó pọ̀ gan-an tí wọ́n jọ máa ń wà pa pọ̀ ní gbogbo ìgbà. Àwọn èèyàn á wá rò pé àwọn èèyàn púpọ̀ gba tiwọn.”
Cara tó jẹ́ ọmọ ọdún mẹ́ẹ̀ẹ́dógún (15) sọ pé irọ́ làwọn míì máa ń pa ní tiwọn:
“Mo ti rí ibi táwọn kan ti gbé fọ́tò pé wọ́n wà ní patí sórí ìkànnì àjọlò àmọ́ tó jẹ́ ilé ni wọ́n wà.”
Matthew tó jẹ́ ọmọ ọdún méjìlélógún (22) sọ pé òun ti ṣe bẹ́ẹ̀ rí:
“Mo gbé fọ́tò pé mo wà lórí òkè kan tí wọ́n ń pè ní Mount Everest sórí ìkànnì àjọlò, kẹ́ ẹ sì máa wò ó mi ò dé ilẹ̀ Éṣíà rí!”
Bíbélì sọ pé: “Ó ń wù wá láti jẹ́ olóòótọ́ nínú ohun gbogbo.”—Hébérù 13:18.
Rò ó wò ná:
Ṣé ìwọ náà máa ń tan àwọn èèyàn jẹ lórí ìkànnì àjọlò torí kí ọ̀pọ̀ èèyàn lè gba tìẹ?
Ṣé àwọn fọ́tò tàbí ọ̀rọ̀ tó o máa ń gbé sórí ìkànnì àjọlò máa ń sọ irú ẹni tó o jẹ́ gan-an?
Ṣé ó di dandan káwọn èèyàn púpọ̀ mọ̀ ẹ́, kí wọ́n sì gba tìẹ lórí ìkànnì àjọlò?
Ọ̀pọ̀ èèyàn ló gbà pé táwọn bá fẹ́ lókìkí lórí ìkànnì àjọlò, àfi káwọn láwọn ọ̀rẹ́ tó pọ̀, tó máa tẹ àwọn àmì tó fi hàn pé wọ́n fẹ́ràn fọ́tò tàbí fídíò táwọn gbé sórí ìkànnì. Matthew tá a sọ̀rọ̀ ẹ̀ lẹ́ẹ̀kan sọ pé ó máa ń ṣe òun bẹ́ẹ̀:
“Mo máa ń bi àwọn èèyàn pé, ‘Ọ̀rẹ́ mélòó lo ní lórí ìkànnì àjọlò?’ tàbí ‘Tó o bá gbé nǹkan sórí ìkànnì àjọlò, ẹni mélòó ló máa ń sọ pé àwọn fẹ́ràn ẹ̀?’ Mo tún máa ń dọ̀rẹ́ àwọn tí mi ò mọ̀ rí lórí ìkànnì àjọlò lérò pé wọ́n á dọ̀rẹ́ mi, màá sì lọ́rẹ̀ẹ́ púpọ̀. Ó wá bẹ̀rẹ̀ sí í ṣe mí bíi kí n di olókìkí dandan, ńṣe ni ìkànnì àjọlò ń koná mọ́ ìfẹ́kúfẹ̀ẹ́ yìí.”
Ṣe ni òkìkí orí ìkànnì dà bí ìpápánu—ó lè kọ́kọ́ dùn àmọ́ kì í yó èèyàn
Maria tó jẹ́ ọmọ ọdún mẹ́ẹ̀ẹ́dọ́gbọ̀n (25) sọ pé òun ti rí i pé àwọn kan máa ń fi iye àwọn tó fẹ́ràn ohun táwọn gbé sórí ìkànnì pinnu bí wọ́n ṣe gbayì tó, títí kan iye ọ̀rẹ́ tí wọ́n ní:
“Táwọn èèyàn ò bá fi bẹ́ẹ̀ tẹ àmì tó fi hàn pé àwọn fẹ́ràn fọ́tò tí ọ̀dọ́bìnrin kan gbé sórí ìkànnì, ńṣe lá máa rò pé òun ò rẹwà. Èrò yẹn ò tọ̀nà rárá, ṣe nirú àwọn èèyàn bẹ́ẹ̀ kàn ń fìyà jẹra wọn lásán.”
Bíbélì sọ pé: “Ẹ má ṣe jẹ́ kí a di agbéraga, kí a má ṣe máa bá ara wa díje, kí a má sì máa jowú ara wa.”—Gálátíà 5:26.
Rò ó wò ná:
Ṣé o máa ń fi ara ẹ wé àwọn ẹlòmíì tó o bá ń lo ìkànnì àjọlò?
Ṣé bó o ṣe máa láwọn ọ̀rẹ́ púpọ̀ lórí ìkànnì ló ṣe pàtàkì jù sí ẹ àbí bó o ṣe máa láwọn ọ̀rẹ́ tòótọ́ tó nífẹ̀ẹ́ ẹ dénú?