Ohun tó jẹ́ ìṣòro: Èrò Òdì

ṢÉ INÚ rẹ máa ń bà jẹ́ lọ́pọ̀ ìgbà tàbí inú máa ń bí ẹ tàbí o máa ń di ẹni tó bá ṣẹ̀ ẹ́ sínú? Tó bá rí bẹ́ẹ̀, ìrẹ̀wẹ̀sì lè bá ẹ débi tó ò fi ní lókun tó pọ̀ tó láti ṣe àwọn nǹkan tó ṣe pàtàkì. Kí lo lè ṣe sí i?a

ÀPẸẸRẸ INÚ BÍBÉLÌ: DÁFÍDÌ

Dáfídì Ọba ní ọ̀pọ̀ nǹkan tó máa ń kó o lọ́kàn sókè, lára ẹ̀ ni àníyàn àti ìbànújẹ́. Àmọ́, kí ló ràn án lọ́wọ́? Ńṣe ni Dáfídì kó gbogbo àníyàn rẹ̀ lé Ọlọ́run lọ́wọ́. (1 Sámúẹ́lì 24:​12, 15) Ó tún kọ ẹ̀dùn ọkàn rẹ̀ sílẹ̀. Ó sì máa ń gbàdúrà láìdabọ̀ torí pé ó nígbàgbọ́ nínú Ọlọ́run.b

OHUN TÍ GREGORY ṢE

Bá a ṣe sọ nínú àpilẹ̀kọ àkọ́kọ́, Gregory ní ẹ̀dùn ọkàn àti ìsoríkọ́ tó lékenkà. Ó sọ pé: “Gbogbo ìgbà ni àníyàn máa ń gbà mí lọ́kàn ju bó ṣe yẹ lọ.” Kí ni Gregory ṣe sí ìṣòro yìí? Ó sọ pé: “Kí n lè dín àníyàn mi kù, mo jẹ́ kí ìyàwó mi àtàwọn ọ̀rẹ́ mi ràn mí lọ́wọ́. Mo tún lọ sọ́dọ̀ dókítà kí n lè mọ̀ sí i nípa ìṣòro mi. Nígbà tí mo ṣe àwọn àyípadà kan nígbèésí ayé mi, mo bẹ̀rẹ̀ sí rí i pé àníyàn kò fi bẹ́ẹ̀ gbà mí lọ́kàn bíi ti tẹ́lẹ̀ mọ́. Bó tilẹ̀ jẹ́ pé mo ṣì máa ń ṣàníyàn lẹ́ẹ̀kọ̀ọ̀kan, mo ti mọ ohun tó ń fà á, mo sì mọ ohun tí mo lè ṣe láti gbé e kúrò lọ́kàn.”

OHUN TÓ O LÈ ṢE

Tí ẹ̀dùn ọkàn bá pọ̀ lápọ̀jù fún ẹ, o lè ṣe àwọn nǹkan wọ̀nyí:

• Kọ ẹ̀dùn ọkàn rẹ sínú ìwé kan.

• Sọ ohun tó ń dùn ẹ́ lọ́kàn fún mọ̀lẹ́bí tó sún mọ́ ẹ tàbí ọ̀rẹ́ rẹ.

• Má ṣe gba èrò òdì láyè. Bí àpẹẹrẹ, tí èrò òdì bá ń wá sí ẹ lọ́kàn, o lè bi ara rẹ pé, ‘Ṣé ohun tí mò ń rò nípa ara mi yìí rí bẹ́ẹ̀ lóòótọ́?’

• Má ṣe jẹ́ kí àníyàn àti ìbínú gbà ẹ́ lọ́kàn. Má sì máa di àwọn èèyàn sínú. Kàkà bẹ́ẹ̀, ohun tó máa ṣe ẹ́ láǹfààní ni kó o máa fọkàn rò.c

Ohun Tó Yẹ Kó O Mọ̀: Lọ́pọ̀ ìgbà, kì í ṣe ipò tá a wà ló ń fa ẹ̀dùn ọkàn. Ohun tó sábà máa ń fà á ni èrò òdì tá a ní nípa ara wa.