Luzolo lu Nzambi Lunkadidilanga

1-2. Mambu mbi maphasi baklistu bawombo bamviokilanga?

YINDULA mu dikumbi didi ku ḿbu, bo vammonika kivuka kingolo. Diawu dimbanga nyikuka nyikuka ayi dinkuendanga voso vama ba kunnata mu mayo ma ḿbu. Muingi dikumbi beni ditatamana disikama, vantombuluanga kusadila kisengu kinsikimisanga dikumbi.

² Khumbu zinkaka, tumbanga buka dikumbi adiodio bo tumviokila mu mambu maphasi. Thangu zinkaka tulenda ba lufiatu ti Nzambi wu tuzolanga ayi wu tusadisanga, vayi bumviokila thangu, tulenda ba divuda boti nandi wumvuanga nkinza mambu tuidi mu kuviokila. (Minku. 10:1; 13:1) Bakundi bitu balenda ku tuvana mbombolo mu mua thangu. (Zinga. 17:17; 25:11) Vayi kiunda kitu kilenda bue vutuka ayi tulenda kuyikuvusa boti Yave wu tuyekula. Buidi tulenda bela lufiatu ti Yave wu tuzolanga ayi wunkuiza tusadisa?

3. Dedi bummonisina Minkunga 31:7 ayi 136:​1, mbi binsundula luzolo lukuikama? Ayi kibila mbi tulenda tubila ti Yave widi kifuani kilutidi? (Tala mvandi fikula.)

³ Phila yimueka tulenda kindimina bo tumviokila mu mambu maphasi yidi, kutebukila moyo luzolo lukuikama lu Yave. (Tanga Minkunga 31:7; 136:1.) Kikuma “luzolo lukuikama” kilenda sundula, kusimbidila mutu mu lukuikumunu mu khambu kunkuekula. Yave widi kifuani kilutidi mu kumonisa luzolo lukuikama. (Esodu 34:​6, 7) Kibibila mvandi kintubila matedi Yave: ‘Luzolo luaku lukuikama luidi luwombo kuidi batu boso ba kumbuongiminanga.’ (Minku. 86:5) Mawu mansundula ti Yave kayekulanga ko bisadi biandi bikuikama. Kutebukila moyo luzolo lukuikama lu Yave, kulenda tusadisa kukindama bo tumviokila mu mambu maphasi.—Minku. 23:4.

TEBUKA MOYO MBI BINSUNDULA LUZOLO LU YAVE

4. Vana kifuani ki malongi matheti ma Kibibila tulonguka ayi sudikisa buidi mawu ma tutuadisanga.

⁴ Phila yinkaka tulenda kindimina bo tumviokila mu mambu maphasi yidi, kuyindula mu luzolo lu Yave dedi bo tulonguka mu malongi matheti ma Kibibila. Mbi kikuma malongi matheti ma Kibibila kinsundula? Ḿba mawu ma tutebula moyo malongi matedi kiedika ki Kibibila tulonguka mu diambu di Nzambi. Dedi, tulonguka ti dizina di Nzambi Yave, Yesu widi muana Nzambi, bafua basa zaba ko ni kiuma, ayi kuala ba paladizu va ntoto, ko batu bala zingila mvu ka mvu. (Minku. 83:18; Mpovi 9:5; Yoa. 3:16; Nzai. 21:​3, 4) Bo tulonguka mawu, tukikinina ayi tubika muingi malongi beni ma tutuadisa. Kibila tubaka bivisa ti mawu madi makiedika. Tuemmona buidi mambu tulonguka matedi Yave malenda tusadisa bo tumbanga divuda boti Yave wu tuvuanga nkinza.

5. Sudikisa buidi tulenda nunga malongi ma luvunu.

⁵ Mambu mbi ma kusadisa kununga malongi ma luvunu, bo wulonguka kiedika mu khumbu yitheti? Ḿba ngie wudedikisa mambu wulonguka mu kinganga kiaku na mambu wulonguka mu Kibibila. Tala kifuani akiki: Yindula boti ngie waba kikininanga ti Yesu widi Nzambi yilutidi zangama. Bo wulonguka Kibibila ngie wukiyuvusa: Bukiedika ti malongi amomo madi makiedika? Bo wufiongunina bivisa bi Kibibila, wubakula ti malongi amomo madi ma luvunu, bosi wuvingisa malongi amomo ma luvunu, mu kiedika ki Kibibila ti Yesu widi kivangu kitheti mu bivangu bioso bi Nzambi. (Kolo. 1:15; Yoa. 3:18) Vantombuluanga mangolo mawombo muingi kununga malongi ma luvunu. (2 Ko. 10:​4, 5) Vayi, bo wulonguka kiedika, ngie wusiala bue kikininanga ko mu malongi ma luvuna waba kikininanga.—Fil. 3:13.

6. Kibila mbi tulenda ba lufiatu ti luzolo lukuikama lu Yave lunkadidilanga?

⁶ Bobuawu mvandi, ngie kutona kuba divuda boti Yave wu kuzolanga mu kibila ki mambu maphasi wumviokila, wukiyuvusa: ‘Bukiedika ti mayindu mami madi mafuana?’ Dedikisa divuda diaku na mambu Kibibila kintuba matedi luzolo lu Yave, mu Minkunga 136:1—lutangu lubongulu ntu diambu wu dilongi adidi. Kibila mbi buku yi Minkunga yintubila matedi luzolo lukuikama lu Yave lunkadidilanga mu 26 di zikhumbu? Kibila dedi bo tuma tubila, luzolo lukuikama luidi lumueka mu malongi matheti ma Kibibila tulonguka. Madi mambu mambi kuyindula ti tulendi tambula ko luzolo lu Yave. Diawu, vanga mangolo muingi wununga ntindu mayindu amomo ma luvunu.

7. Matangu mbi ma Kibibila ma tuvana lufiatu ti Nzambi wu tuzolanga?

⁷ Mu Kibibila muidi bivisa binkaka bimmonisa luzolo lu Yave. Dedi, Yesu wutuba kuidi minlandikini miandi: “Benu lulutidi luvalu kena makuanga mawombo.” (Mat. 10:31) Naveka Yave wutuba kuidi dikabu diandi: ‘Yela kukindisa, ngete, yela kusadisa, yela kusimba mu koko kuami ku lubakala ku lunungu.’ (Yesa. 41:10) Mona buidi bikuma abiobio bidi bi lufiatu. Yesu kasa tuba ko ‘benu mulenda luta ba luvalu,’ ayi Yave kasa tuba ko ‘minu yilenda kusadisa.’ Vayi bawu batuba: “Ngie wulutidi luvalu” ayi ‘Yinkuiza kusadisa.’ Ngie kuba divuda mu luzolo lu Yave bo wumviokila mu mambu maphasi, matangu amomo ma Kibibila malenda kusadisa muingi wununga, kibila mawu madi makiedika. Ngie kuyindula mu mawu bo wunsambila, wunkuiza tuba mambu madi mu 1 Yoane 4:16: “Befu tuzebi luzolo Nzambi kadi mu befu ayi tunkikininanga mu luzolo beni.”a

8. Mbi wulenda vanga boti wukhidi divuda boti Yave wu kuzolanga?

⁸ Buabu, mbi tufueti vanga boti tukhidi divuda boti Yave wu tuzolanga? Dedikisa mambu wunyindula na mambu wuzebi. Mambu wunyindula, malenda ku kuvukumuna, vayi luzolo lu Yave dedi buntubila Kibibila luidi lukiedika. Kuba divuda mu mambu amomo kulenda tuvanga kuzimbakana ti luzolo yawu khadulu yilutidi yi Yave.—1 Yoa. 4:8.

YINDULA MU PHILA YAVE KA KUKIEBILANGA

9-10. Mbi Yesu kaba tomba kutuba mu bikuma: “Naveka tata wu kuluzolanga,” dedi bummonisina Yoane 16:​26, 27? (Tala mvandi foto.)

⁹ Tulenda longuka matedi luzolo lu Yave, mu mambu Yesu katuba kuidi minlandikini miandi: “Naveka Tata wuku luzolanga.” (Tanga Yoane 16:​26, 27.) Yesu kasa tuba ko bikuma abiobio muingi minlandikini miandi bayimuena buboti. Bukiedika, mambu madi mu matangu amomo mammonisa mbi nandi kaba yindula mu thangu beni. Mu thangu beni Yesu kabasa tubila ko matedi mabanza ma minlandikini miandi, vayi nandi waba tubila matedi diambu dinkaka—nsambu.

¹⁰ Yesu wukamba minlandikini miandi ti bawu bafueti sambila mu dizina diandi, kubika kuandi kuidi nandi. (Yoa. 16:​23, 24) Ayi vaba tombulu minlandikini miandi kuzaba mambu amomo. Kibila bo Yesu kavulubuka, ḿba minlandikini miandi baba mayindu ma kusambidila kuidi nandi, mu kuyindula ti mu kibila ki luzolo kadi mu bawu, Yesu wunkuiza yuwa nsambu’awu ayi kuvanga Yave katambudila. Vayi Yesu wuba lubula babika kuba mayindu amomo. Kibila mbi? Kibila nandi wuba kamba: “Naveka tata wu kuluzolanga.” Mambu amomo madi mu khati malongi matheti ma Kibibila matedi nsambu. Yindula mbi mawu mansundula mu befu: Mu nzila ndongukulu yi Kibibila, ngie wuyiza zaba ayi kuzola Yave ayi Yesu. (Yoa. 14:21) Vayi, dedi minlandikini mu thangu bapostolo, befu mvitu tulenda sambila mu lufiatu ti Yave, wu tuzolanga. Tummonisanga kiminu mu mambu amomo, kadika khumbu tunsambilanga kuidi Yave.—1 Yoane 5:14.

BAKULA KUIDI KUMFUMINANGA DIVUDA DIAKU

11. Kibila mbi Satana kambelanga mu mayangi bo tumbanga divuda boti Yave wu tuzolanga?

¹¹ Kuidi kumfuminanga divuda boti Yave wu tuzolanga? Tulenda tuba ti Satana, nandi wuntuadisanga divuda dioso. Nandi widi buka khosi yintomba ki kudia, ayi wunkuangalalanga bo tumbanga divuda boti Yave wu tuzolanga. (1 Pet. 5:8) Mu luzolo, Yave wu tuvana khudulu, vayi Satana wuntomba tuyindula ti tuisi ko bafuana muingi kutambula nkhailu awowo. (Ebe. 2:9) Nani wumbakanga ndandu bo tumbanga divuda mu luzolo lu Yave? Satana. Nandi wuntomba muingi tuvonga bo tumviokila mu mambu maphasi. Satana wuntomba tuba divuda boti Yave wu tuzolanga ayi ti tunkuiza bungu, kibila nandi wuzimbisa luzolo lu Yave. (Efe. 6:11) Bo tumbakula ti mben’itu Satana wuntomba tuba divuda, befu tunkindisanga lufiatu luitu mu Yave ayi tumbayisanga Satana.—Tia. 4:7.

12-13. Buidi disumu tutambakana di tuvanga kuba divuda boti Yave wu tuzolanga?

¹² Mambu mankaka malenda tutula divuda boti Yave wu tuzolanga yidi, kuba batu ba masumu. (Minku. 51:5; Lom. 5:12) Disumu di tutatula kuidi mvang’itu, mvandi dibivisa mtim’itu, mayindu mitu ayi nyitu’itu.

¹³ Disumu di tuvanganga kukivana foto, kukuazuka, kumona boma ayi zitsoni. Tulenda ba mayindu amomo, bo tumvola disumu. Vayi mvandi mayindu amomo malenda ku tukuizila kibila tuidi batu ba masumu. Ayi masumu masi ko kithuadi na phila Yave ka tuvangila. (Lom. 8:​20, 21) Dedi bo dikalu dilendi sadila ko buboti boti peneu yibe tobuka, befu mvitu tuvanganga ko mambu mu phila Yave kantombila mu kibila ki disumu tutambakana. Diawu khumbu zinkaka tumbanga divuda boti Yave wu tuzolanga. Mambu amomo ma kumonika, tufueti tebukanga moyo ti Nzambi yilutidi zangama wummonisanga luzolo luandi lukuikama kuidi bo bantumukinanga minsiku miandi.—Nehe. 1:5.

14. Buidi kuyindula mu khudulu kulenda tusadisa kununga divuda boti Yave wu tuzolanga? (Loma 5:8) (Tala mvandi Quadro “Wuyikieba mu Luvunu lu Masumu.”)

¹⁴ Thangu zinkaka, tunyindulanga ti tusa fuana ko muingi kutambula luzolo lu Yave. Ayi mawu madi makiedika. Kibila mbi? Kibila Yave ka tumonisanga ko luzolo luandi lukuikama kibila tuidi bafuana, vayi nandi wunlemvukilanga masumu mitu mu nzila khudulu kibila wu tuzolanga. (1 Yoa. 4:10) Tebuka moyo ti Yesu wuyizila mu kibila ki minsumuki kubika kuandi kuidi batu bavedila. (Tanga Loma 5:8.) Vasi ko mutu kalenda vangila mambu mu phila yivedila, ayi Yave kasintomba ko mawu. Kutebukila moyo ti mu kuba batu ba masumu tulenda ba divuda boti Yave wu tuzolanga, kulenda tuvana mangolo muingi kununga mabanza amomo ayi ku tusadisa kubalula phil’itu yi kuyindudila.—Lom. 7:​24, 25.

TATAMANA WUKUIKAMA

15-16. Lufiatu mbi tulenda ba befu kutatamana bakuikama mu Yave, ayi kibila mbi? (2 Samueli 22:26)

¹⁵ Yave wuntomba muingi tusola kutatamana wukuikama mu nandi. (Deute. 30:​19, 20) Befu kuvanga mawu, tuala ba lufiatu ti nandi wala ba wukuikama mu befu. (Tanga 2 Samueli 22:26.) Befu kutatamana kuba wukuikama mu Yave, tulenda ba lufiatu ti nandi kalenda tusadisa mu moso kua mambu maphasi tulenda viokila.

¹⁶ Dedi bo tuma muena, tuidi bibila biwombo muingi kukindama bo tumviokila mu mambu maphasi. Tuzebi ti dedi bo Kibibila kinlonga, Yave wu tuzolanga. Befu kuba divuda boti Yave wu tuzolanga, tulenda yindula mu mambu tuzebi matedi nandi, kubika kuandi mu mayindu mitu. Tuntomba kutatamana kuba lufiatu ti luzolo lu Yave lunkadidilanga dedi bo Kibibila kinlonga.