DILONGI 42
NKUNGA 44 Nsambu wu Kisadi Kidi Kiunda Kingolo
Mbi Tufueti Vanga Muingi Tusambila Kuidi Yave mu Ntim’itu Woso?
‘ Yi kutela mu ntim’ami woso, thambudila ah Yave ‘—MINKU. 119:145 .
MAMBU TUANLONGUKA
Tuemmona buidi minsambu bantubila mu Kibibila milenda ku tusadisila kunsambila kuidi Yave mu ntim’itu woso.
1-2. (a)Mbi bilenda tutula nkaku kuzibudila ntim’itu kuidi Yave? (b) Buidi tuzabi ti Yave wunkuwanga minsambu mitu?
Khumbu zinkaka wumuenanga ti wumvutukilanga mo mawu mambu mu minsambu miaku? Boti buawu wisi ko ngie veka. Mu kibila ki mambu ma lumbu ka lumbu, tulenda bua mu ntambu wu kuvanga nsambu mu thinu. Mvandi tulenda mona phasi kuzibudila ntim’itu kuidi Yave voti, ḿba tummuenanga ti tuisi ko bafuana muingi kufikama Yave mu nzila nsambu.
2 Kibibila kimmonisa ti Yave wunluta vuanga nkinza mambu madi mu ntim’itu kena bikuma biwombo tulenda tuba mu nsambu. Nandi wunkuwanga minsambu mi batu ba kikululanga. (Minku. 10:17) Mu luzolo, nandi wunkuwanga kadika kikuma tuntuba ayi wu tuvuanga nkinza.—Minku. 139:1-3.
3. Biuvu mbi tunkuiza baka mimvutu mu dilongi adidi?
3 Tulenda kuyikuvusa: Buidi tulenda sambidila mu phila yifuana? Buidi tulenda sambidila mu phila yilenda tufikika kuidi Yave? Buidi kuyindula mu minsambu bantubila mu Kibibila malenda tu sadisa kuzibudila ntim’itu kuidi Yave mu nzila nsambu? Ayi mbi tulenda vanga boti tusa zaba ko ma kuvanga mu kibila ki mambu tumviokila? Tuembakula mimvutu mi biuvu abiobio.
KAWU BIKA NI KIUMA KI KUTULA NKAKU KUSAMBILA KUIDI YAVE
4. Mbi binkuinza tusadisa kuzibudila ntim’itu kuidi Yave mu nzila nsambu? (Minkunga 119:145)
4 Bo tumvisa ti Yave widi nkundi wukiedika wuntomba muingi tubaka ndandu mu luzingu, tumvisanga ti tulenda sambila kuidi nandi mu lufiatu. Nsoniki wu Minkunga 119 wumona mambu amomo mu luzingu luandi. Nandi wuviokila mu mambu mawombo, ayi bankua luvunu banvunina mambu mawombo. (Minku. 119:23, 69, 78) Mvandi nandi waba nuananga na zinzimbala ziandi. (Minku. 119:5) Kheti bobo, nandi kasa ba ko boma bu kuzibudila ntim’andi kuidi Yave mu nzila nsambu.—Tanga Minkunga 119:145.
5. Kibila mbi tulendi bika ko mayindu makhambu fuana ma tutula nkaku kusambila?
5 Yave wuntumisa batu, kheti bo bavanga disumu dingolo muingi kusambila kuidi nandi. (Yesa. 55:6, 7) Diawu, tulendi bika ko muingi mayindu makhambu fuana ma tutula nkaku kusambila kuidi Yave. Mvandi kheti tummoma zitsoni mambu tube vanga, tufueti tatamana kusambila. Diawu, bo tummona ti tuisinzaba ko ma kuvanga voti tube vanga disumu dingolo, tufueti vanga mangolo muingi kusambila kuidi Yave.—Minku. 119:25, 176.
BUIDI TULENDA SAMBIDILA MU PHILA YIFUANA
6-7. Buidi kuyindula mu zikhadulu zi Yave zilenda tusadisila kunzibudila ntim’itu? Vana kifuani. (Tala mvandi nota.)
6 Bo tunzibudila ntim’itu kuidi Yave mu nzila nsambu, tufueti kunzabikisa mabanza mitu ma tsi ntima. Mbi binkuiza tusadisa kuvanga mawu?
7 Yindula mu zikhadulu zi Yave.a Bo tunluta yindula mu zikhadulu zi Yave, tumbuelanga phuila yi kunzibudila ntim’itu. (Minku. 145:8, 9, 18) Tala kifuani ki yaya Cristine, wuba tata wuba buphuya. Nandi wutuba: Dimbanga diambu diphasi ku koluka na Yave mu nzila nsambu. Yimmuenanga ti zinzimbala ziama zilenda vanga Yave ku khuekula. Khadulu mbi yi Yave yi sadisa khomba ayoyo? Nandi wubue tuba: Luzolo lukuikama lu Yave lu kutsadisanga kuba wuvumbama. Minu yizebi ti nandi kalasa ku khuekula ko. Kheti minu kubua nandi wukuiza thelimisa mu luzolo. Mawu ma kutsadisanga kunzabikisa mayangi ma tsi ntim’ami ayi mvandi mambu moso ma ku thuadisanga kiunda.”
8-9. Ndandu mbi tulenda baka befu kuyindula mu mambu tunkuiza yoluka ava kusambila? Vana kifuani.
8 Yindula mu mambu wunkuiza tuba. Ava kusambila, buboti beni kuyivana biuvu abibi: ‘Mu mambu mbi yidi mu kuviokila? Vadi mutu yifueti lemvukila? Mambu mbi ma baluka mu luzingu luama mantombulu Yave katsadisa?’ (2 Minti. 19:15-19) Mvandi tulenda sambila muingi dizina di Yave di vedusu, Kintinu kiandi kiza ayi luzolo luandi luvangama.—Mat. 6:9, 10.
9 Bo khomba mueka bantedilanga Aliska kabakula ti nnuni’andi wuba Câncer, nandi wumona phasi kusambila ayi wutuba: “Yiba beni mu kiunda ayi yabasa zabanga ko mambu yifueti tuba mu nsambu.” Mbi binsadisa? Nandi wubue tuba: “Minu yimbotulanga mua thangu ava kusambila, muigi kuludika mayindu mami, ayi mawu ma kutsadisanga kubika tsikika thalu mu minu veka bo yimvanga nsambu. Mvandi ma kutsadisanga kuba wuvumbama ayi kuba mayindu mafuana.”
10. Kibila mbi tufueti vanganga minsambu mikula? (Tala mvandi zifoto.)
10 Vanga minsambu mikula. Kheti Yave kalenda kuwa minsambu mikhufi, vayi kuvanga minsambu mikula, kunkuiza tusadisa kuzibudila ntim’itu kuidi Yave.b Yaya Elijah Nnuni wu yaya Aliska wutuba: Yimvanganga mangolo ma kusambila kadika kilumbu, ayi mawu ma ku fikikanga kuidi Yave. Yave katsikikanga ko thangu kua tufueti viokisa bo tunsambila kuidi nandi. Nandi widi nkua mvibudulu, diawu vanga mambu amama: Botula thangu ayi bakula kibuangu kinkuiza kusadisa kusambila mu mbembu yinnangama mu khambu vuvuka ayi vanga mangolo muingi wuvanga nsambu wukula.
Sola thangu ayi kibuangu kifuana kilenda kusadisa kuvanga nsambu wukula. (Tala lutangu 10)
YINDULA MU MINSAMBU BANTUBILA MU KIBIBILA
11. Ndandu mbi tulenda baka befu kusadila minsambu midi mu Kibibila? (Tala mvandi quadro yintuba: “Ngie Widi mu Kuviokila mu Mambu Bawu Baviokila?”)
11 Ḿba wulenda baka ndandu mu kuyindula minsambu ayi minkunga bantubila mu Kibibila. Bo wunyindula phila bisadi bi Nzambi mu thangu yikhulu bazabikisa mayindu ayi mabanza mawu kuidi Yave mu nzila nsambu, ngie wunkuiza ba phuila yi kuzibudila ntim’aku kuidi Yave. Mvandi ngie wulenda bakula ziphila zimona zi kuvana nkembu kuidi Yave mu nzila nsambu. Ayi mvandi ngie wulenda bakula minsambu mintubila mambu ngie widi mu kuviokila.
12. Biuvu mbi tulenda kuyivana bo tunyindula mu bifuani bantubila mu Kibibila?
12 Bo tunyindula mu minsambu bantubila mu Kibibila, tulenda kuyikuvusa: Nani wutuba mambu amomo ayi mambu mbi kaba viokila? Mambu katuba madi madedakana na mambu minu yidi mu kuviokila? Mambu mbi yilenda longuka mu mawu? Befu tufueti fionguninanga mambu mankaka muingi kubakula mimvutu mi biuvu abiobio. Tala mua kifuani.
13. Mbi tulenda longuka mu nsambu Ana kavanga? (1 Samueli 1:10, 11) (Tala mvandi fikula va thonono levista.)
13 Tanga 1 Samueli 1:10, 11. Bo Ana kavanga nsambu, nandi waba viokila mu mambu muadi maphasi. Ditheti, nandi wuba kisita. Dimuadi, mband’andi waba kunkuamisanga. (1 Samu. 1:4-7) Boti ngie widi mu kuviokila mu mambu maphasi, mbi wulenda longuka mu nsambu Ana kavanga? Nandi wubaka mbombolo bo kavanga nsambu wukula, ayi wuzibudila ntim’andi kuidi Yave. (1 Samu. 1:12, 18) Befu mvitu tulenda baka mbombolo, bo tunyekula bizitu bitu kuidi Yave mu kunzabikisa mayindu ayi mabanza mitu ma tsi ntima.—Minku. 55:22.
Bo mband’andi kaba kunsakininanga, Ana wuzibula ntim’andi kuidi Yave mu nzila nsambu. (Tala lutangu 13)
14. (a) Mbi binkaka tulenda longuka mu kifuani ki Ana? (b) Buidi kufiongunina mu mambu madi mu Kibibila malenda tusadisa kunyevisa nsambu’itu? (Tala mvandi nota.)
14 Bo vavioka mua mimvu tona Samueli kabutuka, Ana wunnata kuidi mfumu zinganga Nzambi Eli. (1 Samu. 1:24-28) Mu nsambu Ana kavanga, nandi wumonisa lufiatu luandi ti Yave wunkebanga bisadi biandi bikuikama.c (1 Samu. 2:1, 8, 9) Mambu maphasi kaba viokila ku nzo masa mana ko. Vayi Ana wutsikika thalu mu phila Yave kansakumunina. Mbi tulenda longuka? Befu tunkuiza nunga mambu maphasi, befu kutsikika thalu mu phila Yave ka tusadisilanga bubu.
15. Mbi tulenda longuka mu kifuani ki ḿbikudi Yelemia bo tumviokila mu mambu makhambulu masonga? (Yelemia 12:1)
15 Tanga Yelemia 12:1. Kilumbu kimueka ḿbikudi Yelemia wuba mu kiunda ayi wuba divuda bo kamona bankua mambi kubaka ndandu. Mvandi wuba mu kiunda mu phila basi Isaeli baba kuntadilanga. (Yele. 20:7, 8) Befu mvitu tulenda bela dedi ḿbikudi Yelemia bo tummona bankua mambi kubaka ndandu ayi bo bankaka ba tusakinina. Kheti Yelemia wudasuka mu kumona mawu, nandi wutatamana wukuikama mu busonga bu Nzambi. Bo kamona Yave kufundisa dikabu diandi diba ntu ngolo, lufiatu luandi mu busonga bu Yave lubuelama. (Yele. 32:19) Befu mvitu tulenda zabikisa kuidi Yave mu nzila nsambu mambu ma tutatisa, ayi kuba lufiatu ti mu thangu yifuana nandi wala dedikisa mambu moso makhambulu masonga tumviokila.
16. Mbi tulenda longuka mu kifuani ki musi Levi, boti vadi mambu ma tutula nkaku kusadila Yave va kimueka na zikhomba zitu? (Minkunga 42:1-4) (Tala mvandi zifoto.)
16 Tanga Minkunga 42:1-4. Nkunga awowo wusonimina kuidi muisi Levi wukhambu baka luaku lu kusadila Yave ku tempelo va kimueka na dikabu di Nzambi. Nkunga kasonika, mammonisa mabanza mandi ma tsi ntima. Befu mvitu tulenda kuyimuena buka nandi boti tuisi ko luaku lu kusadila Yave va kimueka na zikhomba, voti tuidi mu buloku mu kibila ki kiminu kitu. Ma kumonika, tufueti zabikisa mabanza mitu kuidi Yave mu nzila nsambu. Mawu mankuiza tusadisa kuba mayindu mafuana ayi kutadila mambu tumviokila mu phila yinkaka. Dedi, muisi Levi wuvisa ti mambu kaba viokila maba kumvana luaku lu kuzitisa Yave mu ziphila zinkaka. (Minku. 42:5) Nandi mvandi wuyindula mu phila Yave kaba kunkebilanga. (Minku. 42:8) Kutatamana kusambila kuidi Yave, kulenda tusadisa kuvisa buboti mabanza mitu, kuba mayindu mafuana ayi kubaka mangolo muingi kukindama.
Nsoniki wu Minkunga 42 wunzibula ntim’andi kuidi Yave. Bo tunzabikisa mambu ma tukuazula mu nzila nsambu, tulenda balula mayindu mitu ayi kutadila mambu beni mu phila yifuana. (Tala lutangu 16)
17. (a) Mbi tulenda longuka mu nsambu wu ḿbikudi Yona? (Yona 2:1, 2) (b) Buidi mambu madi mu Minkunga malenda ku tubomba bo tumviokila mu mambu maphasi? (Tala mvandi nota.)
17 Tanga Yona 2:1, 2. Ḿbikudi Yona wuvanga nsambu awowo, bo kaba mu kivumu ki fu. Kheti nandi kasa tumukina ko Yave, nandi wuba lufiatu ti Nzambi wunkuiza nyuwila. Mu nsambu’andi, Yona wusadila bikuma tulenda bakula mu zibuku zi Minkunga. Ḿba nandi waba sadilanga beni matangu amomo.d Mu kuyindula mu mawu, nandi wuyiza ba lufiatu ti Yave wunkuiza nsadisa. Bobuawu mvandi, befu kufiongunina matangu ma Kibibila, mawu mankuiza tusadisa kuma tebukila moyo mu thangu tumviokila mu mambu maphasi.
TATAMANA KUFIKAMA YAVE MU NZILA NSAMBU
18-19. Boti tuisinzaba ko mambu tufueti tuba mu nsambu, mbombolo mbi tulenda baka mu mambu madi mu Loma 8:26, 27? Vana kifuani.
18 Tanga Loma 8:26, 27. Khumbu zinkaka, tulenda ba beni mu kiunda ayi ku khambu zaba mambu tufueti tuba mu nsambu. Vayi, befu tuidi lusalusu. Bo mawu mammonika, phevi yinlongo yi Nzambi yilenda ku tusadisa, bo tunkuana. Buidi mawu malenda bela? Mu nzila phevi yinlongo, Yave wubika muingi minsambu mi bisadi biandi bikuikama bisonama mu Kibibila. Diawu boti tuisinzaba ko ma kutuba mu kibila ki mambu ma tukuazula, Yave kalenda sadila bikuma bi bisadi biandi bisonama mu Kibibila, muingi ku tusadisa ayi kukuwa minsambu mitu.
19 Mambu amomo masadisa khomba mueka bantedilanga Yelena ku Rússia. Bantula mu buloku mu kibila ki kutanga Kibibila ayi kusambila. YayaYelena waba kuazuka beni ayi kabasa zabanga ko mambu kafueti tuba mu nsambu. Nandi wutuba: “Yitebuka moyo ti, bo yinkuazuka mu khambu zaba mbi yifueti tuba mu nsambu, Yave kalenda sadila nsambu wu bisadi biandi basonika mu Kibibila, banga minsambu miama ayi kundiuwila. Kuzaba mambu amomo, ma kumbombanga bulutidi bo yimviokila mu mambu maphasi.”
20. Buidi tulenda kubikila mayindu mitu ava kusambila boti tuidi mu kuviokila mu mambu maphasi?
20 Bo tunkuazuka voti tumviokila mu mambu maphasi, tulenda mona phasi kuzaba mambu ma kukoluka mu nsambu. Diawu, muingi tukubika mayindu mitu ava kusambila, tulenda tanga matangu madi mu buku yi Minkunga mu mbembu yinangama. Mvandi tulenda sonika mambu tuntomba kutuba mu nsambu, dedi bo ntinu Davidi kavangila. (Minku. 18; 34; 142) Vayi, vasi ko zithuadusulu zisonama matedi mambu mbi tufueti vanga muingi kukubika ntim’itu ava kusambila. (Minku. 141:2) Diawu, tulenda vanga mambu mo tuzebi ti mankuiza tusadisa.
21. Kibila mbi tufueti sambila mu ntima woso?
21 Khindusulu yinneni kuzaba ti Yave wumvisanga mambu tuntomba kutuba mu nsambu ava tuma tubila. (Minku. 139:4) Vayi nandi wunkuangalalanga beni kukuwa minsambu mitu, mimmonisa lufiatu tuidi mu nandi. Diawu, bika kuba boma mu kusambila kuidi tat’itu yi diyilu. Baka ndandu mu minsambu bantubila mu Kibibila. Sambila kuidi Yave mu ntima woso, ayi nzabikisa mayangi maku, mabanza maku ayi mambu ma kutula kiunda. Dedi nkundi wu kiedika, Yave wala tatamana kuba ku khonzo’aku.
NKUNGA 45 Mayindu ma Tsi Ntim’ami
a Tala ‘zikhadulu zi Yave’ bantubila mu buku Princípios Bíblicos para a Vida Cristã mu kikhuku Jeová.
b Minsambu bamvanganga mu kimvuka, mifueti ba mikhufi.
c Mu nsambu kavanga, Ana wusadila bikuma bidedakana mu mambu Mose kasonika. Ḿba nandi wubotula thangu muingi kuyindula mu masonoko. (Deute. 4:35; 8:18; 32:4, 39; 1 Samu. 2:2, 6, 7) Mimvu miwombo kuntuala Maria mama wu Yesu, wusadila bikuma bi kuzitisila Yave na mambu Ana katuba mu Nsambu.—Luka 1:46-55.
d Dedikisa na Yona 2:3-9; Minkunga 69:1; 16:10; 30:3; 142:2, 3; 143:4, 5; 18:6; 3:8, mu nsambu Yona kavanga.