Efesios

5 Le oʼolaleʼ beeteʼex jeʼex u beetik Dioseʼ, tumen teʼexeʼ u paalaleʼex, yéetel u yaabiltmeʼex. 2 Maʼ u xuʼulul xan a weʼeskeʼex yaabilaj jeʼex úuchik u yaabiltikeʼex Cristoeʼ. Letiʼeʼ tu kʼububa ta woʼolaleʼex bey junpʼéel siibal yéetel bey juntúul kíimsbil baʼalcheʼeʼ; lelaʼ junpʼéel baʼal jach kiʼibok tu táan Dios.

3 Le núupkʼebanoʼ,* tuláakal le u jejeláasil baʼaloʼob éekʼtakoʼ bey xan le u píitmáan u tsʼíiboltaʼal wa baʼaxoʼ, maʼ unaj mix u yaʼalaʼal ichileʼexiʼ, tumen ichil le máaxoʼob kiliʼichoʼoboʼ maʼ unaj u yantal le baʼaloʼobaʼ. 4 Maʼ unaj xan u beetaʼal baʼaloʼob suʼtsiltakiʼ, mix u yaʼalaʼal tʼaanoʼob minaʼan u biilaloʼob, mix u yaʼalaʼal kʼaakʼas báaxal tʼaanoʼob; baʼax unajeʼ u tsʼaʼabal gracias. 5 Tumen a wojleʼex yéetel ta juunaleʼex ka tsʼáaikeʼex cuentaeʼ, le máax ku núupkʼeban, le máax ku beetik baʼaloʼob éekʼtak, le máax chéen ku chʼíikil u tsʼoʼokbes u tsʼíibolaloʼoboʼ —lelaʼ láayliʼ bey ka adorartaʼak beetbil diosoʼobeʼ—, mix juntúul tiʼ letiʼob kun páajtal u tiaʼalintik u Reino Cristo yéetel Dios.

6 Mix máak ka u tuseʼex yéetel tʼaanoʼob minaʼan u biilaloʼob, tumen tu yoʼolal le baʼaloʼobaʼ yaan u taal u pʼujaʼanil Dios tu yóokʼol le máaxoʼob maʼ u kʼáat u yuʼuboʼob tʼaanoʼ. 7 Le oʼolaleʼ maʼ a táakpajleʼex tu yéeteloʼob; 8 tumen kaʼacheʼ ka máaneʼex ich éeʼjochʼeʼenil, baʼaleʼ beoraaʼ táan a máaneʼex ich sáasilil tumen u tiaʼaleʼex Yuumtsil. Seguernak a máaneʼex bey u paalaleʼex le sáasiloʼ, 9 tumen le sáasiloʼ ku beetik u yantal* jejeláas utsiloʼob, justicia bey xan jaajil. 10 Seguernak a jach ilkeʼex baʼax kʼambeʼen tu táan Yuumtsil; 11 xuʼuluk xan a táakpajleʼex tiʼ baʼaloʼob minaʼan u biilaloʼob ku taal tiʼ le éeʼjochʼeʼeniloʼ, baʼaxeʼ eʼeseʼex jach maʼ maʼalobtakoʼobiʼ. 12 Tumen tak chéen u yúuchul tʼaan tiʼ le baʼaxoʼob ku beetkoʼob taʼakumbailoʼ, jach suʼtsil. 13 Baʼaleʼ tuláakal le baʼaloʼoboʼ ku chíikpajal jach bixoʼob tu yoʼolal le sáasiloʼ, tumen tuláakal le baʼaxoʼob ku chíikpajloʼoboʼ ku pʼáatloʼob yáanal le sáasiloʼ. 14 Le oʼolal ku yaʼalaʼal: «Teech máax táan a weenleʼ, aajkech yéetel líiʼkech ichil le kimenoʼoboʼ, Cristo túuneʼ yaan u juul ta wóokʼol».

15 Le oʼolaleʼ jach kanáanteʼex maʼ a máaneʼex bey máaxoʼob minaʼan u naʼatoʼobeʼ, baʼaxeʼ bey máaxoʼob yaan u naʼatoʼobeʼ. 16 Ilawil u meyajteʼex tubeel le tiempo* yaanteʼexoʼ tumen jach kʼasaʼan le kʼiinoʼobaʼ. 17 Tu yoʼolal lelaʼ xuʼuluk a beetkabaʼex j-maʼ naʼatil, baʼaxeʼ seguernak a jach ilkeʼex baʼax u kʼáat Jéeoba. 18 Maʼ a káaltaleʼex xan yéetel vino, tumen ku kʼaskúuntik u kuxtal máak, baʼaxeʼ seguernak a chupkabaʼex yéetel kiliʼich muukʼ. 19 Tʼanabaʼex yéetel salmoʼob, yéetel kiʼikiʼtʼaanoʼob utiaʼal Dios bey xan yéetel kʼaayoʼob utiaʼal adoración; kʼaayneneʼex yéetel paax ichil a puksiʼikʼaleʼex utiaʼal Jéeoba, 20 yéetel mantatsʼ tsʼáaʼex gracias tiʼ k-Dios yéetel k-Taata tu yoʼolal tuláakal baʼal tu kʼaabaʼ k-Yuumtsil Jesucristo.

21 Yoʼolal le nojoch tsiikil ka weʼeskeʼex tiʼ Cristooʼ, tsʼáabaʼex yáanal a páajtalileʼex ta baatsileʼex. 22 Le atantsiloʼoboʼ ka u tsʼáaubaʼob yáanal u páajtalil u yíichamoʼob jeʼex u tsʼáaikubaʼob yáanal u páajtalil Yuumtsileʼ, 23 tumen le íichamtsiloʼ letiʼ u poolil u yatan, jeʼex Cristo u poolil le múuchʼuliloʼ; lelaʼ u wíinklil yéetel letiʼ salvartik. 24 Jeʼex le múuchʼulil u tsʼaamuba yáanal u páajtalil Cristooʼ, bey xan unaj u tsʼáaikuba le atantsiloʼob yáanal u páajtalil u yíichamoʼob tiʼ tuláakal baʼaloʼ. 25 Íichamtsileʼex, maʼ u xuʼulul a yaabiltikeʼex a wataneʼex jeʼex tu yaabiltaj Cristo le múuchʼuliloʼ yéetel tu kʼububa tu yoʼolal, 26 utiaʼal ka u kiliʼichkúunt ikil u yisíinsik yéetel u jaʼil u tʼaan Dios, 27 utiaʼal beyoʼ ka u taas le múuchʼulil tu yiknal letiʼ yéetel tuláakal u kiʼichpanil, minaʼan u jóojom éekʼil, minaʼan u yuʼuyuchʼil, minaʼan mix junpʼíit tiʼ le baʼaloʼobaʼ, baʼaxeʼ kiliʼich yéetel minaʼan mix junpʼéel baʼal kʼaas tiʼ.

28 Bey túun xanoʼ, le íichamtsiloʼoboʼ unaj u yaabiltikoʼob u yatanoʼob jeʼex u yaabiltikoʼob u wíinkliloʼobeʼ. Máax u yaabiltmaj u yataneʼ u yaabiltmuba xan. 29 Tumen mix máak ku pʼektik u wíinklil, baʼaxeʼ ku tséentik yéetel ku kanáantik jeʼex u beetik Cristo yéetel le múuchʼuliloʼ, 30 tumen táakaʼanoʼon tiʼ u wíinklil. 31 «Tu yoʼolal lelaʼ, le xiiboʼ yaan u pʼatik u taata bey xan u maama utiaʼal ka pʼáatak* yéetel u yatan; tu kaʼatúulaloʼob túuneʼ yaan u kʼuchul u beetubaʼob junpʼéeliliʼ wíinklil.» 32 Le kiliʼich taʼakbil baʼalaʼ nojoch; táan in tʼaan tiʼ Cristo yéetel tiʼ le múuchʼuliloʼ. 33 Baʼaleʼ cada juntúul tiʼ teʼexeʼ u yaabilt u yatan jeʼex u yaabiltmilubaeʼ; le atantsil xanoʼ unaj u yeʼesik nojoch tsiikil tiʼ u yíicham.