Capítulo 8
Cadindenenu ca espíritu malu ca
1. Xiñee racaláʼdxipenu gánnanu xi cayuni ca espíritu malu ca.
NECA stale binni qué runi cré pa nuu ca espíritu malu ca la? cadi guendariguite diʼ ni. Neca nuu binni qué guni cré ni la? dxandíʼ nuucabe ne racaláʼdxicabe ñuni guiráʼ binni ni nácabe. Laaca zaqueca racaláʼdxicabe gúnicabe ca binni runi adorar Jiobá. Ne ca binni capeʼ nga nanda ca espíritu malu ca. Sicaríʼ bicaa apóstol Pablu para quixhená laanu: «Cadi binni guidxilayú cadinde né nu, sínuque cadinde né nu ca xaíque sti ca binidxabaʼ, ca espíritu ni runi mandar ndaani guidxilayú cahui riʼ, ne irá ca espíritu malu ni nuu neza ibáʼ» (Efesios 6:12). Ca dxi stinu riʼ, ca espíritu malu ca nabé cucaacaʼ binni guni ni nacaʼ purtiʼ guladxi Jesús Binidxabaʼ, xaíque sticaʼ, de guibáʼ ne nabé cadxiichi purtiʼ nanna maʼ xcaadxi si dxi cayaadxaʼ laa (Apocalipsis 12:12).
2. Ñee zanda guni ganarnu ca espíritu ni cadindenenu ca neca jma nadípacaʼ que laanu la?
2 Ñee zanda guni ganarnu ca espíritu ni cadindenenu ca neca jma nadípacaʼ que laanu la? Zanda pue, peru pa quíxhesinu guidubi ladxidoʼno lu náʼ Jiobá. Naquiiñeʼ gucaadiáganu laabe ne guzúʼbanu Stiidxabe, purtiʼ zacá qué zazaacanu ni rizaaca ca binni ni nuu lu náʼ Binidxabaʼ ca, racaná xcuérpucaʼ, ladxidoʼcaʼ ne rúnicaʼ guendaquéiquiiñeʼ (Santiago 4:7).
Ca espíritu ni nuu neza guibáʼ ni cayuni mandar lu Guidxilayú riʼ
3. Tuu nga cani cucaalú ne cayuniná Binidxabaʼ laacaʼ, ne ximodo rúnibe ni.
3 Jiobá cusiene chaahuiʼ laanu ximodo ruuyabe dede guibáʼ modo nuu lu guidubi naca Guidxilayú riʼ. Lu ti visión ni bidiibe apóstol Juan guniʼbe zeeda gaca Binidxabaʼ casi «ti dragón ngola xiñáʼ», ni guyuu listu para nunduuxeʼ Reinu stiʼ Dios casi ñuuni guibáʼ lu iza 1914. Cumu gastiʼ ñanda ñúnibe la? bizulú guzanándabe ne bininabe cani cayuni xhiiñaʼ Reinu lu Guidxilayú riʼ (Apocalipsis 12:3, 4, 13, 17). Ximodo cayúnibe nga yaʼ. Riquiiñebe binni ni cayuni ni nabe lu Guidxilayú riʼ.
4. Tuu ndiʼ cudii guendanandxóʼ ca gobiernu nuu lu Guidxilayú riʼ para guni mandarcaʼ, ne ximodo nánnanu ni.
4 Despué biiyaʼ Juan ti maniʼ guiʼxhiʼ napa gadxe ique ne chii cachu, laame runi «mandar me irá guidxi, irá ladu, irá binni riníʼ adxé adxé idioma». Maniʼ ca nga ni zeeda gaca ca gobiernu políticu ni nuu lu guidubi naca Guidxilayú. Gúdxicabe Juan «bicuí dragón [Binidxabaʼ] que laame guni mandar me jlugar, ne bidii laame enda nandxóʼ sti[me]» (Apocalipsis 13:1, 2, 7). Dxandíʼ, Binidxabaʼ nga cayuni mandar ca gobiernu nuu lu Guidxilayú riʼ ne pur laabe nandxoʼcaʼ. Nga runi casi bicaa apóstol Pablu que, cani dxandíʼ cayuni «mandar ndaani guidxilayú cahui riʼ» nga «ca espíritu malu ni nuu neza ibáʼ», laacabe nga naazecabe ca gobiernu nuu lu Guidxilayú riʼ. Cani racalaʼdxiʼ guni adorar Jiobá naquiiñeʼ guiénecaʼ xii nga cani cayeeteʼ riʼ (Lucas 4:5, 6).
5. Xi para cadagulisaa ca gobiernu políticu ni nuu yanna riʼ.
5 Neca stale gobiernu políticu na napa religión stiʼ la? nin ti guidxi qué náʼ guni mandar Jiobá laacaʼ nin Jesucristu, Rey ni gulibe. Guirácabe ruyúbicabe ximodo cadi gusaanacabe de guni mandárcabe. Casi na Apocalipsis, «espíritu sti[ʼ] binidxaba» nga ni cutagulisaa ca gobiernu ni nuu lu guidubi naca Guidxilayú para chúʼcabe «dxi uzulú [Dios ni jma nandxóʼ] cuidxi cuenta binni» lu Armagedón (Apocalipsis 16:13, 14, 16; 19:17-19).
6. Xiñee naquiiñeʼ gápanu laanu para cadi chuʼnu pur ca binni ni zinanda Binidxabaʼ.
6 Guiráʼ dxi cayacaná binni pur ridinde ca políticu, pur ridinde xiixa grupu de binni, pur bueltu ne pur religión. Lu ca guendaridinde ca, ridinde diidxaʼ binni o ruyubi intiica modo para chuʼ pur xquidxi, tribu stiʼ, pur cani riníʼ diidxaʼ stícabe o chúʼcabe pur ca binni ni napa bueltu biaʼca laacabe, ne dede cani cadi nuu lu ca guendaridinde ca ruyúbicaʼ tu pur chuʼcaʼ. Neca chúʼcabe pur tutiica binni o pur sti cosa la? tupeʼ nga nuucabe pur laa yaʼ. Biblia cusiene chaahuiʼ laanu: «Naaze dxiichi binidxaba idubi guidxilayú» (1 Juan 5:19). Yanna, xi zanda gúninu ti cadi chuunu nézaca zeʼ xcaadxi binni ca yaʼ. Ni naquiiñeʼ gúninu nga chuʼnu pur Reinu si stiʼ Dios ne cadi liica chuʼnu lu ca guendaridinde stiʼ ca binni guidxilayú riʼ (Juan 17:15, 16).
Cani riquiiñeʼ Binidxabaʼ para gusiguii binni
7. Ximodo rihuinni nanna dxichi Binidxabaʼ iquiiñeʼ religión ni cadi dxandíʼ ca para gusiguii binni.
7 Maʼ xadxí riquiiñeʼ Binidxabaʼ binni para guchelanidiʼ ne sananda ca xpinni Dios ti gusaanacaʼ de guni adorarcaʼ laabe jneza. Laaca huayúbibe modo gusiguiibe binni sin gudii cuenta pa laabe nga cucaabe laacaʼ gúnicaʼ ni cadi jneza. Nanna dxíchibe ximodo gúnibe para gápabe stale binni lu gueelacahui. Riquiiñebe religión ni cadi dxandíʼ ca ne zacá rucaabe binni guni crecaʼ cayúnicaʼ ni na Dios. Cumu qué runibiáʼ chaahuiʼ binni Dios ne qué riuuláʼdxicaʼ ni rusiidibe la? zándaca uquiinde laacaʼ checaʼ lade ca religión ra ruundaʼ si binni o ra rúnicabe stale ridxi para guiníʼnecabe Dios o guidxagayaacabe ca milagru ni nacaʼ rúnicaʼ (2 Tesalonicenses 2:9, 10). Peru Biblia cayábica laanu, dede cani cayuni adorar Dios jneza, nuu tu laa «[za]ree chu [...], zinanda enda rusiguii ne irá ni rusiidi binidxabaʼ» (1 Timoteo 4:1). Ximodo zaca nga yaʼ.
8. Ximodo zanda gucaa Binidxabaʼ laanu chuʼnu lade religión ni cadi dxandíʼ ca neca runi adorarnu Jiobá.
8 Binidxabaʼ nanna dxichi paraa nadá laanu. Ñee ridxíbirunu binni la? Pa ridxíbinu la? zándaca ucuudxi ca binnilídxinu laanu o ca xpesínunu para gúninu xiixa ni runi religión ni cadi dxandíʼ ca. Ñee rudxíʼbanu laca laanu la? Pa rúninu ni la? zándaca guidxiichinu ora tuuxa gudii conseju laanu o guiníʼ gadxé de ni rábinu (Proverbios 15:10; 29:25; 1 Timoteo 6:3, 4). Lugar de ñúninu casi biʼniʼ Cristu, zándaca jma gacaláʼdxinu gucaadiáganu binni ni gabi laanu ni chuláʼdxisinu, casi pa gábicabe laanu ni naquiiñeʼ si gúninu nga guidúʼndanu Biblia ne guibáninu jneza sin gúninu cosa malu (2 Timoteo 4:3). Binidxabaʼ qué rulabi diʼ xi religión chuʼnu lade o pa laasinu quíxhenu modo guni adorarnu Dios, ni racaláʼdxibe nga cadi guni adorarnu Jiobá modo cusiidiʼ laanu lu Stiidxaʼ ne modo cayábibe xquídxibe gusiidiʼ laanu.
9. Ximodo riquiiñeʼ Binidxabaʼ cani rinabaʼ beela ladi binni para gúnicaʼ ni nabe.
9 Binidxabaʼ laaca rucaa binni guni intiica ni rinabaʼ beela ládicaʼ laacaʼ, neca cadi malu cani la? peru rucaabe laacaʼ gúnicaʼ ni modo qué riulaʼdxiʼ Dios. Stale binni qué riná chinanda modo na Biblia guibáninu jneza ne riníʼ íquecabe gastiʼ naca gatané binni tuuxa neca caʼruʼ guichaganáʼ purtiʼ nácabe zacapeʼ gutastí ni o zacá nga rusihuínnicabe maʼ huaniisicabe. Yanna, cani maʼ bichaganáʼ ca yaʼ. Stale tu riuuné ni cadi xheelaʼ, o neca qué ñápacabe jnadxiicabe, ruyúbicabe gaca divorciárcabe o gusabixheelacabe para cuezanécabe stobi. Guiráʼ ni riquiiñeʼ Binidxabaʼ para uquiinde binni la? para ti ratu si cani ne qué liica ridiʼdiʼ ndaaniʼ íquecabe xi guendanagana gueedaneni para laacabe, ne para xcaadxi binni, ne qué liica riníʼ íquecabe ximodo ziuucabe nezalú Jiobá ne Xiiñiʼ (1 Corintios 6:9, 10; Gálatas 6:7, 8).
10. Xii ndiʼ caquiiñeʼ Binidxabaʼ para gucaa binni guiníʼ íquenu gastiʼ naca nga gapa binni jnadxii ne tinde.
10 Stobi ni riuuláʼdxinu nga chuʼnu nayecheʼ, ne pa galán modo guyúbinu chuʼnu nayecheʼ la? zacaneni xcuérpunu, nayá ziuu xquendabiaaninu ne sicarú ziuu ladxidoʼno. Yanna, xi rúninu ora gacalaʼdxiʼ Binidxabaʼ guchaa xquendabiaaninu sin gudiʼnu cuenta ora maʼ cayúninu xiixa para chuʼnu nayecheʼ ti cadi iníʼ íquenu modo na Dios yaʼ. Laanu nánnanu nanalaʼdxiʼ Jiobá gatané binni ni cadi xheelaʼ ne nanaláʼdxibe guendaridinde. Peru ora maʼ cadíʼdicani lu película, lu xcaadxi cosa ni ridiʼdiʼ lu tele o lu teatru, ñee riaananu guidúʼyanu cani la? Cadi guiaandaʼ laanu laga jma ziguidxiña dxi guinitilú Binidxabaʼ, laa zuyubi modo gácacani jma feu, purtiʼ lu Biblia na «cani canauchee ne canausiguii la? ze dxi jma rusi zinitilú caʼ. Caguite ca binni ne caguite binidxaba laacaʼ» (2 Timoteo 3:13). Nga runi, naquiiñeʼ gatananu ti gucáʼnanu cani riquiiñeʼ Binidxabaʼ para gusiguii laanu (Génesis 6:13; Salmo 11:5; Romanos 1:24-32).
11. Neca nánnanu xii nga espiritismo, ximodo zanda gueeda guiábanu luni pa qué gápanu laanu.
11 Laanu laaca nánnanu nanalaʼdxiʼ Jiobá cani runi dxiiñaʼ de espiritismo, casi guni adivinar binni, gúnicabe dxiiñaʼ de brujería o guiníʼnecabe gueʼtuʼ (Deuteronomio 18:10-12). Pa cadi gusiáʼndanu qué riuulaʼdxiʼ Jiobá ni rúnicabe ca la? qué ziuunu ra nuu ti espiritista ne qué liica zaguʼnu laacabe ra lídxinu para guninécabe ca demonio ca dxiiñaʼ. Peru, ñee zucaadiáganu de laacani pa cayeetecani lu tele o lu Internet la? Nécapeʼ laanu qué ziuunu ra nuu ti bruju para guiándanu, ñee zuguʼnu ti pulsera náʼ xiiñinu para gapa laabe la? O neca nánnanu na Biblia cadi jneza nga gúninu brujería binni, ñee zudiʼnu lugar tuuxa ni rusisiaasiʼ binni gucaa laanu gúninu xiixa sin gudiʼnu cuenta la? (Gálatas 5:19-21.)
12. 1) Ximodo zanda gucaa ca canción ca laanu guiníʼ íquenu ni cadi jneza. 2) Ximodo zanda guihuinni pa riuuláʼdxinu gácanu casi ca binni ni qué rúnicaʼ ni na Jiobá pur modo gácunu lari, gaca chaahuiʼ guicha íquenu o ni guininu. 3) Xi naquiiñeʼ gúninu ti cadi guiábanu lu cani riquiiñeʼ Binidxabaʼ para gusiguii laanu.
12 Biblia na cadi liica guieeteʼ guendarapa jnadxii ládenu ne nin ti cosa malu pa cá íquenu gúninu cani (Efesios 5:3-5). Peru, pa cayeeteʼ de laacani lu xiixa canción ne ruquiindecani laanu gúʼndanu cani yaʼ. Ñee zuzulunu guidúʼndanu ca canción ra nabé cayeeteʼ gatané binni ni cadi xheelaʼ, cubaʼ guixi o cayeeteʼ xcaadxi cosa ni qué iquiiñeʼ la? O neca nánnanu cadi naquiiñeʼ chinándanu modo nabani ca binni ni runi zacá, ñee rácunu lari casi laacabe, ne runi chaahuinu guicha íquenu casi laacabe o rininu casi riníʼcabe para guihuínninu casi laacabe la? Qué rihuinni diʼ pa malu nga cani riquiiñeʼ Binidxabaʼ para gucaa binni guni ni na (2 Corintios 4:3, 4). Pa qué racaláʼdxinu guiábanu lu cani riquiiñeʼ Binidxabaʼ para gusiguii binni la? cadi gudiʼnu lugar cubayú binni guidxilayú laanu. Cadi guiaandaʼ laanu tuu nga cani «runi mandar ndaani guidxilayú cahui riʼ» ne gucáʼnanu ne guiráʼ stipa stinu cani racaláʼdxicabe gúninu (Efesios 6:12; 1 Pedro 5:8).
Chuʼnu listu ti guni ganarnu
13. Ximodo zanda quixhedxinu ca cosa malu nuu lu guidxilayú ra cayuni mandar Binidxabaʼ riʼ neca gulenenu donda yaʼ.
13 Ante gati Jesús gúdxibe ca apóstol stibe: «Cadi idxibi tu purti ma udixhe dxie guidxilayú» (Juan 16:33). Laacabe laaca gunda gudixhe dxícabe guidxilayú. Biaʼ sesenta iza despué, bicaa apóstol Juan sicaríʼ: «Iruti qué zanda quixhe dxí enda nadxaba sti guidxilayú riʼ pa qué runi cre Jesús nga Xiiñi Dios» (1 Juan 5:5). Rusihuínninu nápanu fe ca ra guzúʼbanu stiidxaʼ Jesús ne ra guni crenu Stiidxaʼ Dios cásica bíʼnibe. Xiruʼ naquiiñeʼ gúninu yaʼ. Chuʼnu gaxha de xquidxi Jiobá ra naca Jesús Xaíque. Ora gucheʼnu la? naquiiñeʼ gaca arrepentirnu de guidubi ladxidoʼno ne guyúbinu gutiidilaʼdxiʼ Jiobá stóndanu pur rini ni bixhii Jesús. Zacá nga zanda guni ganarnu neca gulenenu donda (Salmo 130:3, 4).
14. Biindaʼ Efesios 6:13-17 ne biindaʼ ca guendarinabadiidxaʼ ni cá ra biluxe párrafo riʼ ne ca textu ca ti gúʼyaluʼ ximodo rapa cada tobi de cani zeeda gaca casi ni riquiiñeʼ ca soldadu ca laanu.
14 Zuni ganarnu pa «iquiiñe[nu] irá ni ma bidii Dios» laanu, ne cadi gusaananu de iquiiñenu nin tobi de laacani. Bixheleʼ Biblia stiluʼ lu Efesios 6:13-17 ne biindaʼ ximodo cusiéneni xii nga zeeda gaca casi cani riquiiñeʼ ti soldadu ora maʼ zitinde. De racá biindaʼ ca guendarinabadiidxaʼ ni cá xagueteʼ riʼ ti gánnaluʼ ximodo rapa cada tobi de laacani laanu.
Ǵuxhiʼnu ni dxandíʼ ca ndaaninu casi cinturón
Xiñee cadi naquiiñeʼ gusaananu de chuunu ca guendaridagulisaa ca, de guidúʼndanu Biblia, guiníʼ íquenu de ni cazíʼdinu luni neca maʼ nánnanu xii nga ca dxandíʼ ni cá luni (1 Corintios 10:12, 13; 2 Corintios 13:5; Filipenses 4:8, 9).
Ni jneza ca zeeda gaca guiibaʼ ni rapa ladxidóʼ ti soldadu
Tuu nga riguixhe xii nga ni jneza (Apocalipsis 15:3).
Guníʼ caadxi ejemplu ni culuíʼ xi rizaaca cani cadi zinanda ca neza chaahuiʼ stiʼ Dios (Deuteronomio 7:3, 4; 1 Samuel 15:22, 23).
Cuʼnu ñeenu listu para chinenu ca diidxaʼ nacubi ne galán ni riguixhedxí ladxidóʼ binni, ni zeeda gaca casi zapatu
Ra iquiiñenu ñeenu para chiguiníʼnenu binni de ni bidii Dios ti chuʼ guendariuudxi, ximodo rápani laanu (Salmo 73:2, 3; Romanos 10:15; 1 Timoteo 5:13).
Gápanu fe ca casi ti escudu
Pa naguidxi fe stinu, xi zúninu ora chuʼ xiixa ni gacalaʼdxiʼ gucaa laanu guiníʼ íquenu pa dxandíʼ ni runi crenu o xiixa ni guchibi laanu (2 Reyes 6:15-17; 2 Timoteo 1:12).
Ra maʼ nánnanu zalanu ca, guidúʼyanu ni casi ti cascu
Gánnanu zalanu, ximodo racané nga laanu para cadi nisi bidxichi guicá íquenu gápanu (1 Timoteo 6:7-10, 19).
Espada ni rudii espíritu santu
Xi naquiiñeʼ guni crenu zacané laanu ne ni zacané xcaadxi binni ora maʼ cucaalunu intiica ni gacalaʼdxiʼ guxheleʼ laanu de Jiobá yaʼ (Salmo 119:98; Proverbios 3:5, 6; Mateo 4:3, 4).
Xi sti cosa nga ni nabé zacané laanu para guni ganarnu lu guendaridinde ni nápanu ne ca espíritu malu ca yaʼ. Panda biaje naquiiñeʼ gúninu ni. Tu pur guinábanu (Efesios 6:18, 19).
15. Xi riquiiñeʼ gúninu para gudxíʼlunu ca espíritu malu ni cadindenenu ca.
15 Cumu nácanu soldadu stiʼ Cristu la? nuunu lade guiráʼ binni ni cadindené ca espíritu malu ca. Pa gápanu laanu ne iquiiñenu cani cudii Dios laanu la? cadi zuni ganársinu lu guendaridinde ca, sínuque laaca zacanenu xcaadxi de ca xpinni Jiobá. Ne jma ziuʼnu listu para gucáʼlunu lu guendaridinde ca ra gucheechenu ca diidxaʼ nacubi ne galán stiʼ Reinu stiʼ Dios, laani nga gobiernu ni nuu guibáʼ ni nabé cucaalú Binidxabaʼ.
Ni guietenaláʼdxinu
• Xiñee qué liica riuu cani runi adorar Jiobá lu ca guendaridinde stiʼ ca binni guidxilayú riʼ.
• Gunáʼ nga caadxi de cani riquiiñeʼ Binidxabaʼ para gusiguii ca xpinni Cristu ti guxhélebe laacaʼ de Jiobá.
• Ximodo rapa cani cudii Dios laanu ni zeeda gaca casi cani riquiiñeʼ soldadu para guni ganarnu ca espíritu malu ni cadindenenu ca yaʼ.
[Ca dibuju/foto ni zeeda lu yaza 76]
Guiráʼ ca guidxi ca cadagulisaa para guinitilucaʼ lu Armagedón