Abril

Bidxaagalú ca xpinni Jehová ni bibani dxiqué guendanagana ni cadi cabézacaʼ. Guidúʼyanu ni bizaaca Jacob. Gudxi bixhózebe laabe guichaganabe ti familia stibe ni runi adorar Jehová, ti xiiñidxaapaʼ Labán. Zacá zaguu Jehová ndaayaʼ laabe (Gén. 28:​1-4). Bizuubaʼ Jacob diidxaʼ: bireebe de Canaán ne guyebe ra nabeza Labán, napa Labán chupa xiiñidxaapaʼ, Lea ne Raquel. Guyuulaʼdxiʼ Jacob ni jma nahuiiniʼ de ca xiiñidxaapaʼ Labán ni láʼ Raquel. Ne guná Jacob guni dxiiñaʼ gadxe iza para Labán ti ganda guichaganáʼ Raquel (Gén. 29:18). Peru gudxite Labán laabe ne bidii laabe Lea, xiiñidxaapaʼ ni jma huaniisi. Bidii Labán lugar guichaganáʼ Jacob Raquel ti semana despué, peru caquiiñeʼ gúnibe dxiiñaʼ xcadxe iza para laa (Gén. 29:​26, 27). Laaca cadi jneza modo biʼniʼ tratar Labán Jacob ora bíʼnicaʼ negocio. Biʼniʼ Jacob xhiiñabe 20 iza. ¡Biaa pabiáʼ malu guca Labán! (Gén. 31:​41, 42). w23.04 15 párr. 5

Ora caquíʼñenu tu quixhedxí ladxidoʼno ne gabi laanu xi gúninu, ¿tu ruyúbinu yaʼ? Zanda guni orarnu Jehová purtiʼ laa peʼ cayabi laanu: «Cadi gusaana de guni orartu» (1 Tes. 5:17). Zanda guni orarnu laabe ora tiica si ne guinábanu laabe gacanebe laanu gánnanu xi gúninu lu xquendanabáninu (Prov. 3:​5, 6). Ne cumu guizáʼ nachaʼhuiʼ Jehová la? qué riguixhe pabiáʼ zanda guni orarnu laa sínuque racaláʼdxibe guni orarnu laabe stale biaje. Nanna Jesús rusisaca Jehová ca oración ca purtiʼ ante gueedabe lu Guidxilayú riʼ, guyuube gaxha de laa. Biiyabe ximodo bicabi Bixhózebe ca oración ni biʼniʼ ca xpinni de guidubi ladxidoʼcaʼ casi: Ana, David, Elías ne xcaadxi (1 Sam. 1:​10, 11, 20; 1 Rey. 19:​4-6; Sal. 32:5). Nga runi, gudxi Jesús ca discípulo stiʼ cadi gusaana de guni orarcaʼ ne gápacaʼ confianza zacabi Jehová laacaʼ (Mat. 7:​7-11). w23.05 2 párr. 1, 3

Bidxibi sumo sacerdote Jehoiadá nucheené Jehová. Dxi biʼniʼ Atalía, xiiñiʼ Jezabel, ti dxiiñaʼ ni qué nudii Dios laa, gaca reina stiʼ guidxi Judá, bisihuinni Jehoiadá pabiáʼ ridxibi gucheené Dios. Nabé mala guca Atalía, ne cumu gucaláʼdxibe ñápabe poder ne guni mandarbe guidubi guidxi que la? biyúbibe ñuutibe guiráʼ xixé ca ni zanda gueeda gaca rey, dede né ca xhiágabe. Peru bilá Jehoás, tobi de ca ni zanda gaca rey (2 Crón. 22:​10, 11). ¿Ximodo yaʼ? Purtiʼ Jehosabeat, xheelaʼ Jehoiadá, bilá Jehoás dxi naca baʼduhuiiniʼ. Laabe ne xheelabe bicaachicabe baʼduhuiiniʼ riʼ ne gúpacabe laa. Zaqué qué nusaana de ñaca tobi de ca ni zá de David rey. Cumu qué nidxibi Jehoiadá Atalía la? qué nusaana de ñuni ni jneza neca maʼ huaniisi. Dxi napa Jehoás gadxe iza, bisihuinni Jehoiadá sti biaje qué nixheleʼ de Jehová. Gudixhe íquebe gúnibe xiixa, pa guiree ni jneza la? zaca Jehoás rey, tobi ni zá de David. Ne pa qué guiree ni jneza la? zati Jehoiadá. Peru cumu guluu Jehová ndaayaʼ laabe la? jneza biree guiráʼ ni bíʼnibe que. w23.06 17 párr. 12, 13

Ñándaca niníʼ ique rey Nabucodonosor cucaalú Daniel laa ne ñuni mandar ñuuti laabe, peru guizáʼ gupa Daniel valor ne qué ñaanadxí de niníʼ guiráʼ ni gudxi Dios laa. ¿Xi zándaca gucané Daniel gapa valor biaʼ dxi bibani yaʼ? Zándaca biziidibe stale de bixhózebe ne jñaabe dxi nahuiinibe (Deut. 6:​6-9). Cadi ca chii si mandamientu runibiáʼ Daniel sínuque laaca nánnabe xi zanda ne xi qué zanda gó ca israelita (Lev. 11:​4-8; Dan. 1:​8, 11-13). Ne laaca nánnabe xi guiráʼ bizaaca xquidxi Dios ne xi rizaaca tobi ora qué rinanda ca norma stiʼ Jehová (Dan. 9:​10, 11). Ne guiráʼ ni bizaacabe gunna dxiichibe nuuca Jehová ne ca ángel stiʼ para gacané laabe (Dan. 2:​19-24; 10:​12, 18, 19). w23.08 3 párr. 5, 6

Guca Rebeca ti gunaa nuu xpiaaniʼ ne ni nanna pora ne ximodo guni xiixa (Gén. 24:58; 27:​5-17). Peru laaca gúpabe respetu ne bizuubabe diidxaʼ (Gén. 24:​17, 18, 65). Pa gúniluʼ cásica biʼniʼ Rebeca, ra gácaluʼ humilde ne chinándaluʼ principiu de autoridad ni maʼ gudixhe Jehová la? zacaneluʼ familia stiluʼ ne congregación. Gunna nuu cosa ni qué zanda gúniluʼ nga nga ti cualidad ni naquiiñeʼ gapa ti gunaa ni maʼ biniisi ndaaniʼ xquidxi Dios. Tobi de ca gunaa ni bisihuinni cualidad riʼ nga Ester. ¿Ximodo bisihuínnibe ni yaʼ? Casi dxi bíʼnicabe laabe reina la? qué ñácabe orgullosa, bicaadiágabe ne yenándabe ca conseju ni bidii Mardoqueo, xprímube, laabe (Est. 2:​10, 20, 22). Laaca zanda chinándaluʼ ejemplu stibe ra guinábaluʼ gudiicabe conseju lii ne ra chinándaluʼ ca ni (Tito 2:​3-5). Guidúʼyanu sti modo bisihuinni Ester nanna nuu cosa ni qué zanda guni. Biblia ná: «Nabé sicarú guca badudxaapaʼ riʼ ne galán rihuinni xcuérpube», neca zacá qué nuyúbibe nusisácacabe laabe (Est. 2:​7, 15). w23.12 19, 20 párr. 6-8

Ora guiníʼ íquenu náparunu donda, zeeda gácani casi ti carga ni qué racalaʼdxiʼ Jehová guanu. Pa maʼ biʼniʼ confesarnu pecadu stinu, maʼ guca arrepentirnu ne cayúninu stipa pur maʼ cadi guibiguetaʼ gucheʼnu la? zanda ganna dxiichinu maʼ biʼniʼ perdonar Jehová laanu (Hech. 3:19). Ne despué de gúninu ca ni bizéʼtenu riʼ, maʼ cadi guiníʼ íquenu náparunu donda purtiʼ qué racalaʼdxiʼ Jehová gacananu ne guni sentirnu zacá (Sal. 31:10). Pa chuʼnu triste zándaca guireʼnu gana ne gusaana de guxóʼñenu lu carrera ni ziné laanu lu guendanabani (2 Cor. 2:7). Pa guni sentirluʼ náparouʼ donda, cadi guiaandaʼ lii dxandíʼ rutiidilaʼdxiʼ Dios donda (Sal. 130:4). Ora gaca arrepentir tuuxa de guidubi ladxidóʼ, runi Jehová ni maʼ guníʼ «maʼ qué zietenalaʼdxeʼ» ca donda stiluʼ (Jer. 31:34). Ndiʼ riníʼ, ora maʼ biʼniʼ perdonar Jehová lii rusiaandabe pecadu stiluʼ. Ne pa yanna maʼ qué gápaluʼ xiixa privilegiu ndaaniʼ congregación, cadi guidxiichineluʼ laca lii. Maʼ bisiaandaʼ Jehová ca pecadu stiluʼ, ne ngaca naquiiñeʼ gúniluʼ. w23.08 30, 31 párr. 14, 15

Lu pandemia stiʼ COVID-19 que stale información biree, cadi dxandíʼ ca ni. Ca testigu stiʼ Jehová ni yenanda ca instrucción ni bidii organización stibe, gucané ni laacaʼ cadi gaca preocupar xhaatacaʼ pur guiráʼ ca noticia ni cadi jneza ni caguite binni tiempu que (Mat. 24:45). Caquiiñeʼ guiduʼyaʼ chaahuinu «xii nga ni jma risaca» (Filip. 1:​9, 10). Nuu caadxi cosa ni zanda cuee tiempu stinu ne pur laacani zanda gusaananu de gúninu ca cosa jma risaca. Ca cosa ni rúninu guiráʼ dxi casi guidoʼno, guideʼnu, gúninu xiixa para chuʼnu nayecheʼ ne gúninu dxiiñaʼ zanda gueeda gácacani ca cosa ni cuee tiempu stinu pa qué gápanu cuidadu (Luc. 21:​34, 35). Ne guiráʼ dxi lu ca noticia ca rihuinni ximodo ridinde ca líder políticu ne zaqueca modo rucaalú binni gobiernu. Cadi gudiʼnu lugar gaxha ni ridúʼyanu ne ni runadiáganu tiempu stinu, purtiʼ zanda gucaa ca ni laanu guiníʼ íquenu jneza ni nácabe dede guni apoyarnu xiixa partidu. Gadxé gadxé nga ni runi Binidxabaʼ para gusaana de gúninu ni jneza. w23.07 16, 17 párr. 12, 13

Para laanu, ca xpinni Jehová, dxi rietenaláʼdxinu guendaguti stiʼ Cristu nga dxi ni jma risaca. Laasini nga ceremonia ni biʼniʼ mandar Jesús gaca (Luc. 22:​19, 20). Rusietenalaʼdxiʼ ni laanu caadxi modo zanda gusihuínninu cudiʼnu xquixe peʼ pur bidii Jesús xquendanabani pur laanu (2 Cor. 5:​14, 15). Laaca racané ni laanu chuʼnu juntu né ca hermanu stinu ne «ugúʼsaanu gana laanu» (Rom. 1:12). Ne laaca ridxagayaa stale binni ni rié pur ni ruuyacaʼ ne ni runadiágacaʼ. Laaca maʼ racaláʼdxinu guedandá dxi riʼ purtiʼ ridúʼyanu nuu xquidxi Jehová tobi si. Nga runi riguixhe íquecaʼ guzulucaʼ gúʼndacaʼ Biblia. Pur guiráʼ ni bizéʼtenu riʼ, naca dxi rietenaláʼdxinu guendaguti stiʼ Cristu ti dxi nabé risaca para laanu. w24.01 8 párr. 1-3

Ra jma guiníʼ íquenu pabiáʼ gudixe Jehová ne Jesús pur laanu, jma ziénenu pabiáʼ nadxiicabe cada tobi de laanu (Gál. 2:20). Biʼniʼ Jehová ni purtiʼ nadxii laanu. Bisihuínnibe guendarannaxhii ni nápabe laanu ra bidiibe Xiiñibe, ni jma nadxiibe, casi sacrificiu ne bidiibe lugar gacaná ne gati pur laanu. Cadi nadxii si Jehová laanu, sínuque rusihuínnibe ni (Jer. 31:3). Bichíñabe laanu ra nuube purtiʼ nadxiibe laanu (bichaaga ni né Deuteronomio 7:​7, 8). Gastiʼ ne guirutiʼ zanda guxheleʼ laanu de guendarannaxhii ni napa Dios laanu (Rom. 8:​38, 39). ¿Xi runi sentirluʼ ra guiníʼ íqueluʼ pabiáʼ nadxii Dios lii? w24.01 28 párr. 10, 11

De guidubi ladxidóʼ ca xpinni Cristu ungidu rusisácacaʼ esperanza ni nápacaʼ de checaʼ guibáʼ. Lu iza 1991 hermanu Frederick Franz guníʼ sicaríʼ: «Seguru esperanza ni nápadu, dxandíʼ peʼ zaca cumplir ni luguiáʼ guiráʼ ne cada tobi de ca 144.000 ni nuu lu grupuhuiiniʼ de dendxuʼ, ne zácani jma de biáʼ ruxuíʼludu». Hermanu Franz guníʼ: «Qué huasaanadu de gusisácadu esperanza ni nápadu. Ni rúnidu nga [ . . . ] jma rusisácadu ni ra tidiʼ tiempu. Nácani ti cosa ni risaca cuézadu, neca tidiʼ ti millón de iza. Ne yanna jmaruʼ si rusisacaʼ esperanza ni nápadu». Guiranu nápanu ti esperanza ni nabé rusiecheʼ laanu: guibáninu guibáʼ o lu Guidxilayú sin qué chuʼ dxi gátinu. Ne ra zidiʼdiʼ dxi jma nadipaʼ zaca esperanza ni nápanu. w23.12 9 párr. 6; 10 párr. 8

Fuera de tabernáculo ni guyuu dxiqué, guyuu ti altar de cobre ra biiticabe maniʼ para gudiicabe Jehová sacrificiu (Éx. 27:​1, 2; 40:29). Peru qué nuxhá ca sacrificiu que ca pecadu stiʼ guidxi que tobi si tiru (Heb. 10:​1-3). Ca sacrificiu ni bidiicabe gatigá ndaaniʼ tabernáculo que runi representar ni sacrificiu ni zuxhá donda stiʼ binni guidxilayú tobi si tiru. Nanna Jesús biseendaʼ Jehová laa ndaaniʼ Guidxilayú para gudii xquendanabani ti gulá binni (Mat. 20:28). Nga runi, dxi guyuu nisa Jesús bisihuínnibe maʼ nuube listu para gúnibe ni riuulaʼdxiʼ Jehová (Juan 6:38; Gál. 1:4). Bidii Jesús xquendanabani «ti biaje si ne maʼ qué ziuuruʼ dxi gúnibe ni», ne bíʼnibe ni para gúxhabe donda stiʼ guiráʼ ca ni gapa fe laabe tobi si tiru (Heb. 10:​5-7, 10) w23.10 26, 27 párr. 10, 11

Stúbisinu que ñanda diʼ nilanu de lu náʼ pecadu ne guendaguti (Sal. 49:​7, 8). Ngue runi bidii Jehová Xiiñiʼ ni nadxii para gati pur laanu, nabé naroʼbaʼ ni gudixe guirópacabe pur laanu. Ra jma guiníʼ íquenu sacrificiu ni biʼniʼ Jehová ne Jesús pur laanu la? jma zusisácanu rescate ni bidiicabe riʼ. Peru dxi bicheené Adán Dios maʼ qué ñanda diʼ nibánibe para siempre ne ninca guiráʼ ca xiiñibe. Para ganda guibiguetaʼ ni biniti Adán que la? gupa xidé bidii Jesús guendanabani perfectu stiʼ casi sacrificiu. Biaʼ tiempu guyuu Jesús lu Guidxilayú riʼ «qué nucheebe ne qué nusiguiibe» (1 Ped. 2:22). Cumu perfectu laabe dxi gútibe la? nga runi biaʼca risaca guendanabani stibe ne guendanabani stiʼ Adán (1 Cor. 15:45; 1 Tim. 2:6). w24.01 10 párr. 5, 6

Biasa si Jesús de lade guetu guyuube ndaaniʼ Santísimo stiʼ templu espiritual. Jma risaca modo maʼ gudixhe Jehová para guni adorarnu laa ni beeda chuʼ ra bidii Jesús xquendanabani pur laanu ne ra beeda gaca Sumo Sacerdote. Santísimo ra guyuu ca sumo sacerdote stiʼ guidxi Israel nácani ti lugar ni bicuí binni ne riuucaʼ raqué né rini stiʼ maniʼ. Peru Jesús la? lugar jma santo peʼ nga biuu: «guibáʼ peʼ nga biuube», nezalú Jehová. Ne raqué nga bidiibe Jehová guendanabani sin donda stibe pur guiranu «ne maʼ guleebe pecadu stiʼ binni né sacrificiu stibe» (Heb. 9:​24-26). Gastiʼ naca pa chiguibáninu guibáʼ o ndaaniʼ Guidxilayú, zanda guni adorarnu Jehová ndaaniʼ templu espiritual stiʼ. w23.10 28 párr. 13, 14

Guiníʼ íquenu dxiiñaʼ ni napa Jesús guibáʼ casi Rey ni maʼ cayuni mandar ne casi Sumo Sacerdote ni riá binni, pur laabe zanda guidxíñanu lu trono stiʼ Dios «purtiʼ laa nachaʼhuiʼ né laanu» ne ziá laanu ora peʼ caquíʼñenu tu gacané laanu (Heb. 4:​14, 15). Guiráʼ dxi naquiiñeʼ guiníʼ íquenu ni maʼ biʼniʼ Jehová ne Jesús pur laanu ne ni cayunirúcabe pur laanu. Cumu guizáʼ nadxiicabe laanu la? rucaa ni laanu gúninu ni ná Jehová né stale gana (2 Cor. 5:​14, 15). Tobi de ca modo jma galán zanda gusihuínninu rudiʼnu xquixe peʼ nga ra gacanenu xcaadxi gácacaʼ testigu stiʼ Jehová ne discípulo stiʼ Jesús (Mat. 28:​19, 20). Ne nga peʼ nga ni biʼniʼ apóstol Pablo. Laabe nánnabe ni racalaʼdxiʼ Jehová nga «gulá guiráʼ xixé binni ne guiziidiʼ chaahuicaʼ ni dxandíʼ» (1 Tim. 2:​3, 4). w23.10 22, 23 párr. 13, 14

Nabé riquíʼñenu textu riʼ lu predicación para quixhedxinu ladxidóʼ binni ne gábinu laacaʼ ximodo zabani binni ndaaniʼ ti paraísu. ¿Ximodo zanda gacanenu xcaadxi binni ganna dxíchicaʼ zaca cumplir promesa ni riete lu Apocalipsis 21:​3, 4? ¿Ne xi zanda gacané laanu para iguidxi confianza ni nápanu Jehová ne lu ca promesa stiʼ? Cadi bizeeteʼ si Jehová de promesa sicarú riʼ, sínuque laaca bidiibe razón para gápanu confianza zácani. Lu ca versículo ni zeeda riʼ zadxélanu razón para guni crenu promesa ni maʼ biʼniʼ Jehová ra caníʼ de Paraísu. Nani sicaríʼ: «Óraque ná ni zuba lu trono que: “¡Biiyaʼ! Cayuneʼ guiráʼ cosa nacubi”. Ne laaca guniʼbe: “Bicaa ca diidxaʼ riʼ purtiʼ zanda gápanu confianza ni ne dxandíʼ ni”. Ne gúdxibe naa: “¡Maʼ guca guiráʼ ni! Naa nga Alfa ne Omega, ra bizulú ne ra biluxe”» (Apoc. 21:​5, 6a). w23.11 3 párr. 3-5

Rusihuinni ti joven maʼ biziidiʼ guiníʼ ique casi riníʼ ique Jehová pur modo racu lari ne modo rigá guicha ique. Cani riguixhe modo gacu binni lari ne cani ruyubi modo guidoo ni, qué runi respetarcaʼ Jehová ne stale biaje zinecaʼ ti vida inmoral. Nga runi, ca lari ni rúnicabe ca nabé riguiichi binni ndaaniʼ ca ni o runi ni guihuinni ca hombre ca casi gunaa. Zuni ti joven stipa pur guihuinni casi ti xpinni Cristu ni maʼ biniisi ndaaniʼ xquidxi Dios ora chinanda ca principiu ni zeeda lu Biblia ne ca ejemplu sti ca hermanu de congregación ora quixhe ique modo gacuʼ lari ne modo guzuchaahuiʼ. Nga runi, zanda guiníʼ íquebe: «¿Ñee rusihuinni ca decisión ni ricaaʼ nacaʼ ti binni nuu xpiaaniʼ ne runeʼ respetar ni runi sentir xcaadxi la? ¿Ñee rusihuinneʼ nacaʼ ti xpinni Dios pur modo racuaʼ lari la?» (1 Cor. 10:​31-33). Ca joven ni riziidiʼ gaca ti binni nuu xpiaaniʼ runi respetar ca hermanu laa, ne laaca runi respetar Bixhózebe ni nuu guibáʼ laabe. w23.12 26 párr. 7

Lu ca iza ni maʼ gudiʼdiʼ ca «rey del sur» guzananda xquidxi Jehová (Dan. 11:40). Casi lu Primera ne Segunda Guerra mundial stale de ca xpinni Cristu biseguyoocabe laacaʼ purtiʼ qué ninacaʼ ñecaʼ lu guerra ne biʼniʼ expulsárcabe ra scuela caadxi xcuidihuiiniʼ ni naca Testigu purtiʼ qué runi saludarcaʼ bandera. Lu ca últimu iza riʼ ca xpinni Cristu cadíʼdicaʼ guendanagana de xcaadxi modo ra caquiiñeʼ gusihuínnicaʼ pa qué zucheenecaʼ Jehová. Guzéʼtenu ti ejemplu, tiempu ruzulú votación zándaca ti xpinni Cristu gacalaʼdxiʼ guni apoyar ti partidu políticu o ti candidatu, dxandíʼ qué ziebe chiguni votarbe peru zándaca guiníʼ íquebe o ndaaniʼ ladxidoʼbe gacaláʼdxibe guni ganar tuuxa, peru para ganda gácanu neutral naquiiñeʼ gápanu cuidadu né ni riníʼ íquenu ne ni runi sentirnu (Juan 15:​18, 19). w23.08 12 párr. 17

Para guicaanu premiu de guendanabani ca naquiiñeʼ chinándanu conseju riʼ: «Laguxooñeʼ ti ganda guni ganartu ni» (1 Cor. 9:24). Guníʼ Jesús zándaca «guidxá tipa ladxidoʼto tantu gó xhaatatu ne gueʼ xhaatatu ne pur nuutu xizaa pur ca cosa ni caquiiñetu» (Luc. 21:34). Zacané textu riʼ ne xcaadxi textu ni zeeda lu Biblia laanu para gánnanu paraa caquiiñeʼ guchaʼnu ti ganda guxóʼñenu ne ganda chindanu ra riluxe carrera para guicaanu guendanabani. Nanna dxiichinu zuni ganarnu carrera ni cuxóʼñenu para guicaanu guendanabani, purtiʼ zudii Jehová laanu stipa ni caquíʼñenu para chindanu ra riluxe ni (Is. 40:​29-31). Nga runi, cadi guireeluʼ gana, biʼniʼ casi biʼniʼ apóstol Pablo, laa bixooñeʼ né stale stipa ne biʼniʼ guiráʼ ni nuu lu náʼ para guni ganar (Filip. 3:​13, 14). Dxandíʼ, guirutiʼ zanda guxooñeʼ pur lii, peru zacané Jehová lii gúniluʼ ni. Zacanebe lii gualuʼ ca cosa ni caquiiñeluʼ ne gusaanaluʼ ca ni cadi caquiiñeluʼ. Cumu cuxooñené Jehová lii lu carrera riʼ la? gunna dxiichiʼ zanda guni ganarluʼ. w23.08 31 párr. 16, 17

Dxi napa Jesús 12 iza, yené familia stiʼ Jerusalén para chécabe tobi de ca saa ni raca cada iza (Luc. 2:​46-52). Peru ora maʼ zedabíʼ José ne María bidiicabe cuenta qué guinni Jesús né laacabe. Bixhózebe ne jñaabe nga naquiiñeʼ ñuuyacaʼ pa nuu guiráʼ ca xiiñicaʼ ora nibiguétacaʼ ra lídxicaʼ despué de saa que. Ora bidxela José ne María laabe, ¡bigaaniʼ María donda íquebe purtiʼ bidxíbicaʼ! Ñándaca ñabi Jesús laacabe cadi jneza ni cayúnicabe que, peru qué ñúnibe zaqué. Ni bíʼnibe nga bicábibe bixhózebe ne jñaabe né stale respetu. Peru qué ñene José ne María «ni gúdxibe laacaʼ». Neca zacá, «bizuubarube stiidxacaʼ». Joven, ¿ñee raca nagana para lii guzuubaluʼ stiidxa bixhózeluʼ o jñaaluʼ ora gucheecaʼ o qué guiénecaʼ lii la? Pa zacá ni, ¿xi zanda gacané lii yaʼ? Guníʼ ique ximodo runi sentir Jehová. Biblia ruzeeteʼ: «Nabé riuulaʼdxiʼ Señor» ora ruzuubaʼ ca báʼducaʼ stiidxaʼ bixhózecaʼ ne jñaacaʼ (Col. 3:20). Nanna Jehová nuu biaje qué riene bixhózeluʼ o jñaaluʼ lii ora riguíxhecabe xiixa regla ni raca nagana para lii chinándaluʼ. Peru, ora quixhe íqueluʼ guzuubaluʼ stiidxaʼ bixhózeluʼ ne jñaaluʼ rusiécheluʼ Jehová. w23.10 7 párr. 5, 6

Zándaca guzeeteʼ ti compañeru ni rinenu scuela caquiiñeʼ guchaa ca testigu stiʼ Jehová modo riníʼ íquecaʼ o modo ruuyacaʼ gaca tuuxa muxeʼ o gunaa nguiuʼ. Galán gábinu laabe runi respetarnu ca decisión sticaʼ (1 Ped. 2:17). Zándaca zacá zudiibe lugar gusiénenu laabe xiñee galán nga chinándanu ca conseju zeeda lu Biblia. Ora maʼ gadxé ni runi cré tuuxa de ni runi crenu cadi nagueendacaʼ guiníʼ íquenu maʼ nánnanu xi runi crebe o xi riníʼ íquebe. Guzéʼtenu ti ejemplu, zándaca gabi ti compañeru ni rineluʼ scuela lii guendanahuati nga guni creluʼ nuu Dios. ¿Ñee zaníʼ íqueluʼ runi crebe evolución ne nánnabe stale de laani la? Ni dxandíʼ nga zándaca nin qué huaníʼ íquebe de laani. Zándaca galán guseendaluʼ ti enlace stiʼ ti artículo o ti videu ra nuube ni zeeda lu jw.org ni caníʼ ximodo bizáʼ Dios guiráʼ xixé ni nuu. Ne zándaca zanabe gúʼyabe xcaadxi de laacani. Ne pa guiníʼneluʼ laabe né respetu zándaca zucá nga laabe pa jneza ni runi crebe. w23.09 17 párr. 12, 13

Pa gúninu stipa guchaʼnu ne guyúbinu gacanebe laanu la? zaquiiñebe laanu ne qué zusaana de cuʼbe ndaayaʼ laanu (Prov. 28:13). Neca guyuu ra bichee Sansón ne jmaruʼ si ni bizaacanebe Dalila, peru qué nireebe gana, qué nusaana de ñúnibe ni ná Jehová. Qué niníʼ ique diʼ Jehová maʼ qué zanda guchaabe. Sínuque biquiiñeruʼ laabe para gusihuínnibe poder stiʼ. Biiyaʼ Jehová Sansón casi tobi de ca hombre ni guizáʼ gupa fe, ngue runi bidiibe lugar guicá lá lu lista ra zeeda lá ca binni ni gupa fe ni zeeda lu libru stiʼ Hebreos capítulo 11. Nabé riuunu gana ora gánnanu guizáʼ nadxii Jehová laanu ne racaláʼdxibe gudiibe stipa ni caquíʼñenu, jmaruʼ si ora cadídinu lu guendanagana ne caquíʼñenu gacanebe laanu. Nga runi, cásica Sansón, gábinu Jehová: «Bietenalaʼdxiʼ de naa Dios stinneʼ, rinabaʼ lii gudiiluʼ naa stipa» (Juec. 16:28). w23.09 7 párr. 18, 19

Nánnanu maʼ gaxhadóʼ nuu dxi stiʼ Jehová. Nga runi, racaláʼdxinu ganna binni de ca noticia galán stiʼ Reinu. Peru ziuu ora zadxíbinu guni predicarnu, ¿xiñee yaʼ? Purtiʼ zándaca ridxíbinu xi guni binni laanu o xi riníʼ íquecaʼ de laanu. Ne nga peʼ nga ni bizaaca Pedro gueelaʼ gunaazecabe Jesús. Bidxíbibe ñánnacabe nácabe discípulo stiʼ ne guyuu biaje biʼniʼ negarbe laa (Mat. 26:​69-75). Peru bisaana de guidxíbibe binni, ngue runi despué bidiibe conseju riʼ: «Cadi guidxíbitu ni ridxíbicabe ne cadi chuʼtu xizaa» (1 Ped. 3:14). Ca diidxaʼ riʼ rusihuinni ca ni zanda gusaana de guidxíbinu binni. ¿Xi zacané laanu gusaana de guidxíbinu binni yaʼ? Rudii Pedro conseju riʼ laanu: «Lagusisaca Cristu casi Señor ndaaniʼ ladxidoʼto» (1 Ped. 3:15). Rinándanu conseju riʼ ora riníʼ íquenu puestu ne poder ni napa Jesucristu, Señor ne Rey stinu. w23.09 27, 28 párr. 6-8

Naquiiñeʼ gápanu laanu para cadi chuʼnu «lu ca cosa qué iquiiñeʼ ni raca lu guelacahui» (Efes. 5:11). Ora qué rusaana ti binni de guʼyaʼ, gucaadiaga o guiníʼ de cosa yuudxuʼ o de inmoralidad sexual la? jma nagueenda riaba lu pecadu (Gén. 3:6; Sant. 1:​14, 15). Ti trampa ni riquiiñeʼ Binidxabaʼ nga riguite binni para cadi gudiicaʼ cuenta xii nga ni jneza ne ni cadi jneza (Is. 5:20; 2 Cor. 4:4). Nga runi, qué ridxagayaanu ora gacalaʼdxiʼ binni gucaa laanu guiníʼ íquenu cadi malu ca cosa ni ná Jehová nabiidiʼ ne inmoral (2 Ped. 2:19). Ne pur nga nuu stale película, programa de tele visión ne página de internet ra rusiidicabe cosa ni qué riuulaʼdxiʼ Jehová. Racalaʼdxiʼ Binidxabaʼ guiníʼ íquenu normal guiráʼ cosa yuudxuʼ ni runi binni yanna ne modo nabánicaʼ, nuube guiníʼ íquenu qué zuniná ca ni laanu (Efes. 5:6). w24.03 22 párr. 8-10

Tabernáculo que nga ti lugar ra guca reunir ca israelita para guni adorarcaʼ Dios ne gudiicaʼ sacrificiu (Éx. 29:​43-46). Rinécabe ni ora maʼ zécabe sti lugar lu desiertu que (Éx. 25:​8, 9; Núm. 9:22). Biquiiñecabe ni biaʼ 500 iza hasta dxi gurí templu stiʼ Jerusalén. Peru laaca biʼniʼ representar tabernáculo que xiixa jma galán. Guca tabernáculo que «ti bandáʼ stiʼ ca cosa ni raca guibáʼ» ne zeeda gácani templu espiritual naroʼbaʼ stiʼ Jehová. Apóstol Pablo guníʼ: «Ca cosa ni raca ndaaniʼ tabernáculo, nuucani de ejemplu para laanu» (Heb. 9:9). Nga runi, dxi bicaabe ra nuu ca hebreu que maʼ nuu templu espiritual. Beeda chuʼni lu iza 29 despué de ca dxi stiʼ Jesús. Iza que guyuu nisa Jesús ne bizulú bíʼnibe dxiiñaʼ casi sumo sacerdote nandxóʼ stiʼ Jehová ndaaniʼ templu espiritual stiʼ (Heb. 4:14; Hech. 10:​37, 38). w23.10 25, 26 párr. 6, 7

Para guzuhuaʼnu dxiichiʼ lu ni runi crenu, laaca caquiiñeʼ gácanu naguudxi ne gácanu binni ni riuu razón. ¿Ximodo yaʼ? Ra guiaʼnu ora guchaa xquendanabáninu ne ra guni respetarnu modo riníʼ ique xcaadxi ne ca decisión ni guicacaʼ. Guiráʼ ca ni runi ni ná Jehová, racaláʼdxinu gácanu binni riuu razón ne laaca racaláʼdxinu gácanu humilde ne guianu binni. Biblia ruzeeteʼ naca Jehová ti «Guié» purtiʼ naguidxi ne gastiʼ qué runiibi laa (Deut. 32:4). Peru laaca ruzeeteʼ ni nácabe ti Dios ni riuu razón. ¿Ximodo nánnanu ni yaʼ? Ora guchaa ca cosa ni nuu lu guidxilayú riʼ, ruyubi Jehová modo cadi guidxaa ni maʼ gudixhe ique. Cumu bizaʼbe laanu casi laabe la? laanu laaca zanda guiaʼnu ora guchaa ca cosa ca. Maʼ bidii Jehová laanu ca principiu ni zeeda lu Biblia, ni racané laanu guicaanu decisión jneza ora guidxaagalunu intiica guendanagana. Rusihuinni ca cosa ni runi Jehová ne ca principiu stiʼ nácabe ti Dios ni qué ruchaa peru ni riuu razón. w23.07 20 párr. 1-3

Biblia ná zeeda gaca Jehová casi ti gunaa ni rusihuinni nadxii xiiñiʼ (Is. 66:​12, 13). Guníʼ ique ti gunaa ni rapa xiiñiʼ né stale cariñu ne nagueendaca rudii ni caquiiñebe. Zaqueca nga Jehová, qué zusaana laanu ora nuunu triste. Qué rusaana de gannaxhiibe laanu neca gucheʼnu (Sal. 103:8). Stale biaje bininá ca israelita que ladxidóʼ Jehová, peru ora gaca arrepentircaʼ rusihuínnibe nadxiirube laacaʼ. Ti biaje gúdxibe xquídxibe: «Beeda gácaluʼ sicarú para naa, risácaluʼ para naa ne nadxieeʼ lii» (Is. 43:​4, 5). Qué huachaa diʼ Jehová. Ne neca guni cometernu ti pecadu grave, pa gaca arrepentirnu ne guyúbinu laabe, qué zusaana de gannaxhiibe laanu. Purtiʼ Jehová cayabi laanu «zutiidilaʼdxiʼ guiráʼ donda» stinu (Is. 55:7). Biblia ruzeeteʼ ora runi perdonar Jehová laanu, redané «tiempu para gatadxí» ladxidoʼno (Hech. 3:19). w24.01 27 párr. 4, 5

Zanda gacané Jehová laanu ora guidxaagalunu xiixa guendanagana ra guihuinni pa naguidxi fe stinu. Guzéʼtenu ti ejemplu, zándaca caquiiñeʼ guinábanu permisu ra dxiiñaʼ para ganda chuunu ti asamblea o gudiicabe lugar guchaʼnu ora de dxiiñaʼ stinu para cadi guiaadxanu nin ti reunión. Ora guizaacanu ca cosa riʼ nga ridúʼyanu ximodo racané Jehová laanu lu xquendanabáninu. Dede zadxagayaanu ni gueeda guizaaca ne zaca confianza nápanu Jehová jma nadipaʼ. Guca Esdras humilde ne gunabaʼ gacané Jehová laa. Ora runi sentirbe nadipaʼ dxiiñaʼ chigúnibe rácabe humilde ne runi orarbe Jehová (Esd. 8:​21-23; 9:​3-5). Ora biiyaʼ xcaadxi nápabe confianza Dios gucané ni laacaʼ gacanecaʼ laabe ne gápacaʼ fe cásica nápabe (Esd. 10:​1-4). Ora chuʼnu xizaa dede qué gásinu purtiʼ qué gápanu bueltu o purtiʼ qué gápanu ni caquiiñeʼ familia stinu la? galán guinínenu Jehová ne gápanu confianza zacanebe laanu. w23.11 18 párr. 15-17

Ora cayabi Jehová laanu naquiiñeʼ gápanu fe cásica gupa Abrahán para gúʼyabe laanu casi ti binni nachaʼhuiʼ, cadi caníʼ diʼ nga naquiiñeʼ gúninu cásipeʼ modo biʼniʼ Abrahán. Nuu stale modo gusihuínninu nápanu fe pur cani gúninu. Zanda guidxaagalunu né guendanayecheʼ ca ni nacubi cadxiña ndaaniʼ congregación, gacanenu ca hermanu stinu ora peʼ caquiiñecaʼ xiixa ne guidúʼyanu modo gacanenu familia stinu. Rusiéchenu Jehová ora rúninu ca cosa riʼ (Rom. 15:7; 1 Tim. 5:​4, 8; 1 Juan 3:18). Tobi de ca modo jma risaca gusihuínninu nápanu fe nga guni predicarnu né stale gana (1 Tim. 4:16). Guiranu zanda gusihuínninu pur ca ni gúninu nápanu fe zuni cumplir Jehová ca promesa stiʼ ne modo rúnibe ca cosa ca nga jma jneza. Pa gúninu ca ni la? zanda chuʼnu seguru zuuyaʼ Jehová laanu casi ti binni nachaʼhuiʼ ne zuuyabe laanu casi xhamígube. w23.12 2 párr. 3; 6 párr. 15

Dxi mayaca gati rey David gúdxibe Salomón ca diidxaʼ ni zeeda lu textu stiʼ yannadxí riʼ (1 Rey. 2:​1, 3). Naquiiñeʼ chinanda guiráʼ ca hombre ni naca xpinni Cristu conseju riʼ. Para ganda cueendúcabe ni galán caquiiñeʼ guiziidicabe ca norma stiʼ Jehová ne chinándacabe ca principiu ni zeeda lu Biblia lu guiráʼ ni gúnicabe (Luc. 2:52). ¿Xiñee risaca nga guiniisi ca joven ca lu neza stiʼ Jehová yaʼ? Ca hombre ni naca xpinni Cristu rúnicaʼ stale dxiiñaʼ risaca ndaaniʼ familia ne zaqueca ndaaniʼ congregación. Pa nácaluʼ joven, zándaca huaníʼ íqueluʼ ca privilegiu ni zanda gueeda gápaluʼ despué. Zándaca maʼ gudixhe íqueluʼ gácaluʼ precursor, siervu ministerial ne despué gueeda gácaluʼ ancianu. Zándaca laaca racaláʼdxiluʼ guichaganaluʼ ne gápaluʼ xiiñiluʼ (Efes. 6:4; 1 Tim. 3:1). Para ugaandaluʼ ca meta ca ne cueenduluʼ ni galán la? caquiiñeʼ gácaluʼ ti xpinni Cristu ni guiniisi ndaaniʼ xquidxi Dios. w23.12 24 párr. 1, 2

Bidii Jehová dxiiñaʼ ca ancianu para gápacaʼ ca dendxuhuiiniʼ stiʼ. Nabé rusisácacabe dxiiñaʼ riʼ ne rúnicabe stipa gácacabe pastor chaʼhuiʼ (Jer. 23:4; 1 Pedro 5:2). ¡Rudiʼnu xquixe peʼ pur dxiiñaʼ nadipaʼ runi ca hermanu riʼ ndaaniʼ congregación! Guidúʼyanu xi zanda guiziidiʼ ca ancianu de ejemplu stiʼ juez Gedeón (Heb. 6:12). Guca Gedeón pastor stiʼ xquidxi Dios ne gupa de guidxi ca (Juec. 2:16; 1 Crón. 17:6). Tiempu nagana riʼ cásica Gedeón maʼ bidii Jehová dxiiñaʼ ca ancianu para gápacaʼ xquidxi (Hech. 20:28; 2 Tim. 3:1). Zanda guiziidiʼ ca ancianu stale cosa de modo guca Gedeón, laa guca humilde, gunna nuu cosa ni qué zanda guni ne bizuubaʼ diidxaʼ, bisihuinni aguante lu guiráʼ ni biʼniʼ. Zacané ejemplu stiʼ Gedeón laanu gusisácanu dxiiñaʼ runi ca ancianu ne gacanenu laacaʼ de guidubi ladxidoʼno para gúnicaʼ xhiiñacaʼ (Heb. 13:17). w23.06 2 párr. 1; 3 párr. 3