Guzúʼbanu stiidxaʼ Jiobá de guidubi ladxidoʼno
«Zabaneʼ modo [rusiidiluʼ]. Gucané naa guidxibeʼ lalu de guidubi ladxeduáʼ.» (SAL. 86:11.)
1, 2. 1) Casi bidúʼyanu lu Salmo 86:2, 11, xi zacané laanu cadi gusaananu Jiobá neca tiidinu lu guendanagana ne lu xcaadxi cosa malu ni ruquiinde laanu gúninu yaʼ. 2) Pora nga naquiiñeʼ gúninu stipa para cadi gucaa ladxidoʼno laanu gusaananu Jiobá.
XIÑEE nuu bíʼchinu ne bizánanu despué de maʼ biʼniʼ huantarcaʼ xadxí ora guzanándacabe laacaʼ o biteguyoocabe laacaʼ rudiicaʼ lugar cubayú bidxichi laacaʼ yaʼ. Rúnicabe zacá purtiʼ maʼ gadxé ni nuu ndaaniʼ ladxidóʼcabe. Salmo 86 na qué zusaananu Jiobá pa tobi si ladxidoʼno o pa rúninu ni nabe de guidubi ladxidoʼno. David, ni bicaa salmo ca biʼniʼ orarbe sicaríʼ: «Gupa xhialmaʼ [Jiobá], ya, purtiʼ qué huasaanaʼ lii. Bilá esclavu stiluʼ ni runi cré lii, lii nga Dios stinneʼ». De racá guniʼbe: «Bisiene naa, Jiobá, cani rusiidiluʼ. Zabaneʼ modo na cani. Biʼniʼ ladxiduáʼ riʼ tobi si ti guidxibeʼ lalu» (Sal. 86:2, 11).
2 Pa qué guni crenu Jiobá de guidubi ladxidoʼno la? chaahuidugá xcaadxi cosa ni riuuláʼdxinu ca zucaacani laanu gusaananu laabe. Cani riuuláʼdxinu ca zeeda gácacaʼ casi ca bomba ni nuu ndaaniʼ yú neza ra rizá binni ne ora guzuhuaañeecabe cani la? ráchecani ne runinácani. Neca qué nusaananu Jiobá dxi gudídinu lu guendanagana la? zanda guiábanu lu ca trampa stiʼ Binidxabaʼ. Nga runi, naquiiñeʼ gúninu stipa para cadi gucaa ladxidoʼno laanu gusaananu Jiobá, ante gueeda ca guendanagana ca luguianu ne xcaadxi cosa malu ni uquiinde laanu gúninu. Biblia na: «De guiráʼ xixé cosa ni naquiiñeʼ gápaluʼ la? jma gupa chaahuiʼ ladxidoʼloʼ» (Pro. 4:23). Zazíʼdinu de ni caninu riʼ lu ni bizaaca ni riguixhená de Judá, ni biseendaʼ Jiobá laa para guiniʼné rey Jeroboán de guidxi Israel que.
«Bidii lugar gusigaʼdeʼ lii xiixa»
3. Xi biʼniʼ Jeroboán ora gudxi ni riguixhená stiʼ Dios que laa zati.
3 Bixuiʼlú ni chiguininu riʼ: Casi biluxe guníʼ ni riguixhená stiʼ Dios que zati rey Jeroboán, rey ni bicaa chii tribu stiʼ Israel que guni adorar ca yuze huiiniʼ que. Pur ngue bidxiichi rey que ne biʼniʼ mandar ca xpinni guinaazeʼ laabe. Peru Jiobá nuuné laabe, purtiʼ oraqueca bicuiidxiʼ naʼ rey que ne gundaa altar ni biquiiñecabe para biʼniʼ adorárcabe ca dios ni cadi dxandíʼ que. Guca si ngue bichaa rey que modo laa ne gúdxibe hombre ni biseendaʼ Dios que sicaríʼ: «¡Bicuudxi lú Jiobá Dios stiluʼ ne biʼniʼ orar pur naa ti guianda nayaʼ!». Óraque biʼniʼ orar ni riguixhená que ne bianda naʼ rey que (1 Rey. 13:1-6).
4. 1) Xiñee zanda guininu pur ni cudii rey que ni riguixhená que bisihuinni pa dxandíʼ qué zusaanabe Jiobá. 2) Ximodo bicabi ni riguixhená que rey que.
4 De racá gudxi rey Jeroboán hombre ni biseendaʼ Dios ni dxandíʼ que ca diidxaʼ riʼ: «Chuu ralidxeʼ, ya, ne guicaaluʼ ni goloʼ, ne bidii lugar gusigaʼdeʼ lii xiixa» (1 Rey. 13:7). Xi naquiiñeʼ guni ni riguixhená ca yaʼ. Ñee qué zúnibe ni cayabi rey ca laabe purtiʼ casi gúdxibe laa zati la? (Sal. 119:113.) O zúnibe ni na purtiʼ ruluíʼ maʼ guca arrepentir. Cumu napa Jeroboán bueltu la? zanda gusigaʼdeʼ ca xhamigu xiixa ni risaca. Pa ni riguixhená que rinabaʼ ladxidóʼ gapa cosa ni risaca la? ziuulaʼdxiʼ guicaa ni cudii rey que laa. Peru Jiobá maca gudxi laabe ca diidxaʼ riʼ: «Cadi goloʼ pan ne cadi gueluʼ nisa, ne cadi guibiguétaluʼ nézaca beeduʼ». Ngue runi, ni riguixhená que gudxi rey que: «Neca nusigáʼdeluʼ naa galaa de ni nápaluʼ ndaaniʼ lídxiluʼ, qué ziniadiaʼ lii ne qué zahuadiaʼ pan ne nin qué zeediaʼ nisa raríʼ». Despué de nga biree ni riguixhená que de Betel ne zeʼ gadxé neza (1 Rey. 13:8-10). Xi rusiidiʼ ni biʼniʼ ni riguixhená ca laanu gúninu para cadi gusaananu Jiobá yaʼ (Rom. 15:4).
Naquiiñeʼ chuʼnu nayecheʼ ne cani caquiiñesinu
5. Xiñee zanda guininu zucaa guendarapa bidxichi ca laanu gusihuínninu pa qué zusaananu Jiobá.
5 Ruluíʼ nga qué zucaa guendarapa bidxichi ca laanu gusihuínninu pa dxandíʼ que zusaananu Jiobá, peru nga nga ni rucaani laanu gúninu. Ñee runi crenu zudii Jiobá laanu ni caquiiñenu casi guniʼbe zúnibe ni la? (Mat. 6:33; Heb. 13:5.) Ñee zanda guibáninu ne caadxi si cosa ne sin luju la? O rúninu intiica cosa para gápanu cani neca qué gápanu ni sínenu cani la? (biindaʼ Filipenses 4:11-13.) Ñee ruquiinde laanu guninu huaxiéʼ lu dxiiñaʼ stiʼ Jiobá ti ganda gápanu ni racaláʼdxinu la? Ñee jma risaca para laanu cadi gusaanananu xhiiñaʼ Jiobá la? Modo guicábinu ca zusihuinni pa de guidubi ladxidoʼno rúninu ni na Jiobá o coʼ. Sicaríʼ bicaa apóstol Pablu: «Dxandí ricu ca xpinni Cristu, pa guieche né ca biaʼ napa si caʼ. Gasti qué ñedané nu ndaani guidxilayú ne gasti qué ziné nu ra chuu nu. Nga runi, zaa naca gapa nu bidxichi, inque si napa nu ni idóʼ no ne ni gacu nu, nga si guieche né nu» (1 Tim. 6:6-8).
6. Xi dxiiñaʼ zándaca gudiicabe laanu ni zeeda gaca casi nusigáʼdecabe laanu xiixa, ne xi zacané laanu gánnanu xi gúninu.
6 Guidúʼyanu chupa ejemplu. Zándaca jefe stiluʼ gudii lii sti dxiiñaʼ jma risaca ra jma guni ganarluʼ bueltu ne xcaadxi cosa. O zándaca gábicabe laanu chigúninu dxiiñaʼ sti guidxi ra riguíxecabe galán. Casi gábicabe ni laanu zándaca guiníʼ íquenu ti ndaayaʼ stiʼ Jiobá ni. Peru ante quixhe íquenu gúninu ni la? naquiiñeʼ guiníʼ íquenu xipeʼ nga nuu ndaaniʼ ladxidoʼno. Ni jma naquiiñeʼ gusisácanu nga guidúʼyanu pa qué zuxhéleni laanu de Jiobá.
7. Pa rinabaʼ ladxidoʼno laanu gápanu bidxichi, xiñee naquiiñeʼ cueenu ni de ladxidoʼno.
7 Ca xpinni Binidxabaʼ nabé rucaacaʼ binni guyubi gapa bidxichi (biindaʼ 1 Juan 2:15, 16). Cumu ni racalaʼdxiʼ Binidxabaʼ nga guchee laanu la? naquiiñeʼ gatananu para guidúʼyanu pa ruquiinde ladxidoʼno laanu gápanu cosa ni risaca ne cueenu ni de ndaaniʼ ladxidoʼno (Apo. 3:15-17). Casi Jesús la? nagueendaca bicaanabe Binidxabaʼ ora guníʼ zudii laabe guiráʼ ca reinu ni nuu lu guidubi naca Guidxilayú riʼ (Mat. 4:8-10). Ne Jesús caguixhená laanu sicaríʼ: «Laguuya gá laatu ne enda ruyubi gapa bidxichi, purti cadi nga si nga enda nabani sti binni» (Luc. 12:15). Pa guzúʼbanu stiidxaʼ Jiobá la? zuni crenu zacanebe laanu ne qué zaníʼ íquenu laasinu zanda gúninu xiixa.
Ti binnigola ni riguixhená bisiguii laabe
8. Xi bizaaca para bisihuinni ni riguixhená stiʼ Dios que pa qué zuzuubaʼ stiidxaʼ Jiobá.
8 Ni riguixhená stiʼ Dios ca galán ñeni laa pa qué nuzuhuaadxí neza zibíʼ. Purtiʼ casi bireebe de ra nuu rey que bizaacabe xiixa ra bihuinni pa dxandíʼ zuzuubabe stiidxaʼ Jiobá. Biblia na guyuu ti ni riguixhená ndaaniʼ guidxi Betel ni maʼ nagola, ne gudxi ca xiiñibe laabe xi guiráʼ bizaaca dxi que. Ora gunna binnigola que xi guiráʼ guca la? gúdxibe ca xiiñibe cuʼ xiá burru stibe purtiʼ chiguyúbibe ni riguixhená stiʼ Dios que. Qué nindaa bidxélabe ni riguixhená que caziilaʼdxiʼ xaʼnaʼ ti yaga roʼ ne gúdxibe laa: «Chuu ralidxeʼ ne goloʼ pan». Ora biʼyaʼ binnigola que qué náʼ ni riguixhená que cheʼ la? gúdxibe laa: «Naa laaca nacaʼ ni riguixhená casi lii. Ne ti ángel gudxi naa xiná Jiobá, sicaríʼ guniʼbe: “Gudxi laabe guibiguetanebe lii ralídxiluʼ ti gobe pan ne guebe nisa”». Peru Stiidxaʼ Dios na bisiguii binnigola que laabe (1 Rey. 13:11-18).
9. Xiná Biblia de cani rusiguii, ne xi rizaaca ora rusiguiicabe.
9 Qué gánnanu xipeʼ gucalaʼdxiʼ binnigola que, peru ni nánnanu nga bisiguiibe. Zándaca gúcabe ti ni riguixhená ni biʼniʼ ni na Jiobá dxiqué, peru despué maʼ bisiguiibe, ne Stiidxaʼ Dios na cadi jneza diʼ guni binni zacá (biindaʼ Proverbios 3:32). Cani rusiguii qué ziuudicaʼ galán ne Dios ne stale biaje laaca rucaacaʼ xcaadxi binni maʼ cadi chuʼ galán ne Dios.
Zinebe binnigola ni riguixhená que
10. Xi biʼniʼ ni riguixhená stiʼ Dios que ora gudxi binnigola que laabe chinebe laa ralidxi, ne xi guleendube pur ngue.
10 Ni riguixhená de Judá que naquiiñeʼ ñanna cusiguii binnigola que laa. Naquiiñeʼ niníʼ íquebe: «Xiñee guseendaʼ Jiobá ti ángel ra nuu sti binni para gabi naa xi guneʼ yaʼ». Laaca ñanda ninabadiidxabe Jiobá pa dxandíʼ ni, peru qué ruzeeteʼ diʼ Biblia pa bíʼnibe nga. Ni ruzeeteʼ Biblia nga bibiguetanebe binnigola que ralidxi para gobe pan ne guebe nisa. Ni bíʼnibe ca bichiichi Jiobá. Ngue runi biree ti lión lube neza zebe Judá ne biiti laabe. ¡Guizáʼ triste modo bilúxebe dxiiñaʼ ni gúpabe casi ni riguixhená que! (1 Rey. 13:19-25.)a
11. Xiñee zanda guininu galán ejemplu ni bidii Ahíya.
11 Yanna, Ahíya ni riguixhená ni biseendaʼ Jiobá chindí Jeroboán para gaca rey que la? qué nucheené Jiobá dede bioʼxhoʼ. Dxi maʼ bioʼxhoʼ Ahíya ne maʼ nacheepaʼ lú la? biseendaʼ Jeroboán xheelaʼ ra nuube para guinabadiidxaʼ laabe xi zazaaca xiiñiʼ purtiʼ huará. Qué nidxibi Ahíya gudxi gunaa que zati xiiñibe (1 Rey. 14:1-18). Tobi de ca ndaayaʼ ni gucuaa Ahíya nga laaca gucané para gucuá Stiidxaʼ Dios. Paraa gucané ni bíʼnibe ca yaʼ. Gucaneni Esdras ni ruzaaquiʼ guʼxhuʼ que para gunna xi bizaaca dxiqué (2 Cró. 9:29).
12-14. 1) Xi rizíʼdinu de ni bizaaca ni riguixhená de Judá que. 2) Guníʼ xiixa ejemplu ni guluíʼ pabiáʼ risaca nga guiníʼ íquenu ca conseju stiʼ Biblia ni gudii ca binnigola ca laanu ne pabiáʼ risaca nga guni orarnu ante gúninu xiixa.
12 Biblia qué ruzeeteʼ diʼ xiñee qué ninabadiidxaʼ ni riguixhená de guidxi Judá que Jiobá pa zaa chinebe binnigola que ralidxi para gobe ne guebe raqué. Zándaca purtiʼ binnigola que gudxi laabe ni racaláʼdxisibe gunadiágabe. Yanna, xi rusiidiʼ nga laanu yaʼ. Ni rusiidini laanu nga naquiiñeʼ guzúʼbanu stiidxaʼ Jiobá purtiʼ nánnanu jneza nga guiráʼ ni rinábabe laanu.
13 Nuu tu laa rucaadiaga ni racalaʼdxi si ora guicaa conseju. Guxuíʼlunu cudiicabe dxiiñaʼ ti ni rucheeche diidxaʼ, peru dxiiñaʼ ca zabee tiempu stibe para chúʼnebe binnilídxibe ne para gúnibe xhiiñaʼ Jiobá. Ne ora gunábabe conseju ti binnigola la? primeca ni gudxi laabe nga qué zanda diʼ guiníʼ xi naquiiñeʼ gúnibe para gudiibe ni iquiiñeʼ binnilídxibe, despué binnigola ca gudxi laabe ximodo zanda guxheleʼ dxiiñaʼ ca laabe de Jiobá. Ñee zucaadiágabe ni guníʼ binnigola ca primé la? o zaníʼ íquebe ni gudxi laabe despué ca. Nanna dxíchinu ni jma naquiiñeʼ gúʼyabe nga pa qué zuxheleʼ dxiiñaʼ ca laabe de Jiobá.
14 Guidúʼyanu sti ejemplu. Ti bizánanu gunabadiidxaʼ ti binnigola pa zaa gusaanabe xheelabe cadi Testigu. Primeca ni guníʼ binnigola que nga laabe nga naquiiñeʼ gúʼyabe xi gúnibe ne despué biluíʼ laabe caadxi conseju ni cá lu Biblia ra caníʼ xi naquiiñeʼ gúnibe (1 Cor. 7:10-16). Ñee zaníʼ ique bizánanu ca ni gudxi binnigola ca laa la? O maʼ cá íquebe gusaanabe xheelabe. Ni jma jneza gúnibe nga guinábabe Jiobá guluíʼ laabe xi naquiiñeʼ gúnibe ne guiníʼ íquebe ca conseju ni cá lu Biblia.
Cadi guiníʼ íquenu jma nánnanu
15. Xi rizíʼdinu de ni riguixhená stiʼ Dios que pur qué ñuni ni jneza.
15 Xiruʼ rizíʼdinu de hombre ni riguixhená que pur qué ñuni ni jneza yaʼ. Proverbios 3:5 na: «Gulaʼquiʼ guidubi ladxidoʼloʼ lu naʼ Jiobá, ne cadi gúniluʼ ni na si xpiaaniluʼ». Lugar de ñúnibe ni na Jiobá casi bíʼnibe ni ante que la? bíʼnibe ni nabe. Nga runi, pur bicheebe que gútibe ne maʼ qué ñuuyaʼ Dios laabe casi ti hombre ni ruzuubaʼ diidxaʼ. Historia ca rusiidiʼ laanu pabiáʼ risaca nga gúninu xhiiñaʼ Jiobá sin gudxíʼbanu laanu ne sin gusaananu laabe.
16, 17. Xi zacané laanu para cadi gusaananu Jiobá.
16 Ladxidoʼno ruyubi puru para laasi, nga runi cadi jneza ni rucaani laanu gúninu. Biblia na: «Ladxidóʼ binni nga ni jma riguite laa que intiica si cosa, ne qué ridxélani xi gúnini» (Jer. 17:9). Para cadi gusaananu Jiobá la? naquiiñeʼ gúninu stipa guiráʼ dxi pur guchaʼnu modo laanu. Purtiʼ pa qué gúninu nga zuni crenu laanu ne zaníʼ íquenu jneza guiráʼ ni rábinu. Ne naquiiñeʼ guibáninu modo na Dios ne gusihuínninu dxandíʼ maʼ gadxé laanu yanna, purtiʼ maʼ nayá xquendanabáninu ne rúninu ni jneza (biindaʼ Efesios 4:22-24).
17 «Binni [ni] qué runi cré laa naróʼ la? nuu xpiaaniʼ» na Proverbios 11:2. Pa qué runi crenu laanu ne guni crenu Jiobá la? zacané nga laanu cadi gúninu ni cadi jneza. Cásixa ora maʼ nuunu triste la? zándaca maʼ gadxé guidúʼyanu xcaadxi cosa (Pro. 24:10). Zándaca nuu ni maʼ qué racaláʼdxinu gúninu lu xhiiñaʼ Jiobá, ne guiníʼ íquenu maʼ stale nga ni maʼ bíninu ne yanna maʼ xcaadxi nga tu naquiiñeʼ gúnini ni. Laaca zándaca guiale de ladxidoʼno guibáninu casi nabani xcaadxi binni. Peru pa gúninu stipa para cadi chuʼ dxi gusaananu de gúninu xhiiñaʼ Jiobá la? zápanu ladxidoʼno (Luc. 13:24; 1 Cor. 15:58).
18. Xi zanda gúninu pa cayaca nagana para laanu gánnanu xi naquiiñeʼ gúninu.
18 Nuu biaje zándaca qué zánnanu xipeʼ naquiiñeʼ quixhe íquenu gúninu ora guidxaagalunu xiixa guendanagana. Ñee zuquiinde laanu gúninu ni jma chuuláʼdxisinu la? Ora chuʼnu zacá la? naquiiñeʼ guinábanu Jiobá gacané laanu. Santiago 1:5 na: «Pa nuu tuuxa de laatu caʼru guiene chaahui xi naquiiñe guni la? inaba lu Dios usiene laa ne zusiene Dios laa. Purti tutiica inabaʼ, rudii Dios ni laa de idubi ladxidóʼ». Bixhózenu ni nuu guibáʼ zudii laanu espíritu santu ni caquiiñenu para gánnanu xi naquiiñeʼ gúninu (biindaʼ Lucas 11:9, 13).
Quixhe íquenu cadi gusaananu Jiobá
19, 20. Xi naquiiñeʼ quixhe íquenu gúninu.
19 Dxi maʼ qué ñuni adorar Salomón Jiobá la? nabé gudiʼdiʼ xquidxi Dios lu guendanagana ne raqué bisihuínnicabe pa dxandíʼ qué zusaanacabe laabe. Dxandíʼ nga stale tu bichee, peru laaca guyuu xcaadxi ni qué nusaana Jiobá.
20 Guiráʼ dxi cadxaagalunu cani rucaa laanu gusihuínninu pa dxandíʼ qué zusaananu Jiobá, ne casi biʼniʼ ca israelita ni qué nusaana Jiobá que, laanu laaca naquiiñeʼ gúninu ni racalaʼdxiʼ Dios guni ca xpinni. Cadi liica gusaananu Jiobá ne para nga naquiiñeʼ gaca ladxidoʼno tobi si, ne naquiiñeʼ ganna dxíchinu qué zusaana Jiobá de uguu ndaayaʼ laanu (2 Sam. 22:26).
[Cani cá ñee yaza]
a Qué ruzeeteʼ diʼ Biblia pa biiti Jiobá binnigola que pur ni biʼniʼ.
Xi nicábiluʼ
• Pa guidúʼyanu ruquiinde ladxidoʼno laanu gápanu cosa ni risaca, xiñee naquiiñeʼ cueenu ni de ladxidoʼno.
• Xi zacané laanu cadi gusaananu Jiobá
• Ora cadi guni crenu laanu, ximodo racané nga laanu cadi gusaananu Jiobá.
[Ca dibuju/foto ni zeeda lu yaza 9]
Ñee raca nagana gucueezaluʼ lii ora cuquiinde lii gúniluʼ xiixa ni cadi jneza la?
[Ca dibuju/foto ni zeeda lu yaza 10]
Ñee riníʼ ique chaahuiluʼ ca conseju stiʼ Biblia ni rudiicabe lii la?