Ni rinabadiidxaʼ cani ruundaʼ

Ndaaniʼ Biblia rieeteʼ de «libru stiʼ Jasar» ne de «libru ra cayeeteʼ de ca guendaridinde stiʼ Jiobá» (Jos. 10:13; Núm. 21:14). Peru nin tobi de laacani cadi zeeda cani lade ca libru stiʼ Biblia. Ñee gucuá cani pur espíritu santu ne biníticani despué la?

Gastiʼ razón para guni crenu gucuá guiropaʼ libru ca pur espíritu stiʼ Dios ne despué biníticani. Ca hombre ni bicaacaʼ Biblia ne espíritu santu la? bizeetecaʼ de stale libru. Zándaca caadxi de ca libru ni bizeetecabe ca zeedacani lu Biblia, peru maʼ gadxé modo biree lácani, nga runi yanna maʼ qué runibiaʼnu cani. Casi lu 1 Crónicas 29:29 rieeteʼ «ca diidxaʼ stiʼ Samuel ni ruuyaʼ xi zazaaca», «ca diidxaʼ stiʼ Natán ni riguixhená» ne «ca diidxaʼ stiʼ Gad hombre ni ruuyaʼ visión que». Zándaca guionnaʼ ni bizéʼtenu ca zeeda gácacani libru ni runibiaʼnu yanna casi Primero ne Segundo de Samuel, o zándaca libru ni láʼ Jueces.

Ne nuu biaje rieeteʼ caadxi libru ni láʼ casigá caadxi libru stiʼ Biblia, peru cadi zeeda cani lu Biblia. Casi tapa de ca libru de dxiqué ni láʼ «libru ra cá cani guca dxi bibani ca rey stiʼ Judá», «Libru stiʼ ca Rey stiʼ Judá ne Israel», «Libru stiʼ ca Rey stiʼ Israel» ne «Libru stiʼ ca Rey de Israel ne de Judá». Neca ruluíʼ tobi si lácani ne ca libru ni runibiaʼnu casi Primero ne Segundo de los Reyes ca la? guidapaʼ libru ca qué nicá cani ne espíritu stiʼ Dios ne cadi zeeda cani lade ca libru stiʼ Biblia (1 Rey. 14:29; 2 Cró. 16:11; 20:34; 27:7). Zándaca nácacani tobi de ca libru ni caníʼ de historia ni guca dxi bicaa Jeremías ne Esdras ca historia ni cá lu Biblia.

Zacá ni, caadxi hombre ni bicaa Biblia biyúbicaʼ caadxi cosa lu ca guiʼchiʼ ni guyuu dxi bibánicaʼ neca cadi Dios guníʼ xi guicá lúcani. Casi lu Ester 10:2 cayeeteʼ de «Libru ra cá cani guca dxi bibani ca rey stiʼ Media ne Persia». Ne Lucas guníʼ: «Huanaba diidxa chaahue dede ra bizulú ni», zándaca nga riníʼ biiyabe ca guiʼchiʼ ra cá tudé zá Jesús ora bicaabe Evangeliu stibe (Luc. 1:3; 3:23-38). Dios dxandíʼ biquiiñeʼ espíritu santu stiʼ para biluíʼ Lucas xi gucaa lu Evangeliu stiʼ, ne risaca ni para laanu neca biiyabe xcaadxi guiʼchiʼ ni cadi zeeda de Dios.

«Libru stiʼ Jasar» ne «libru ra cayeeteʼ de ca guendaridinde stiʼ Jiobá», ni bizéʼtenu ra gunabadiidxanu luguiáʼ que cadi Dios guníʼ xi guicá lúcani. Nga runi, qué ñapa Jiobá cani para ñuucani dede yanna. Cumu ruzeeteʼ Biblia de guiropaʼ libru ca la? nga rucaa ca hombre ni ruundaʼ de historia guiníʼ íquecaʼ nácacani chupa de ca libru risaca ni caníʼ de historia stiʼ Israel dxi gudindené ca xhenemigu (2 Sam. 1:17-27). Ti enciclopedia ni caníʼ de Biblia na zándaca nácacani ca poesía ne canción stiʼ cani nanna guʼndaʼ ndaaniʼ guidxi Israel de dxiqué, purtiʼ laacabe qué ñuuláʼdxicabe niníticani. Dede ca hombre ni biquiiñeʼ Jiobá para guiníʼ ca diidxaʼ riguixhená stiʼ o ca visión stiʼ laaca bicaacaʼ caadxi guiʼchiʼ ni qué niníʼ Jiobá xi guicá lú. Peru qué ñuucani lade ca libru zeeda lú Biblia, purtiʼ laani gucuá ni «para usiidi ni laanu ne para ulidxe ni laanu ne para gabi ni laanu paraa cuchéʼ nu ne para acané ni laanu ibani nu casi na Dios» (2 Tim. 3:16; 2 Cró. 9:29; 12:15; 13:22).

Cadi purtiʼ ruzeeteʼ ca hombre ni bicaa Biblia de xcaadxi libru ni biiyacabe para bicaacabe ca libru stiʼ Biblia ca zanda guininu Dios nga guníʼ xi guicá lúcani. Peru naquiiñeʼ ganna dxíchinu nápanu guiráʼ ca libru ni zeeda lu «stiidxaʼ Dios stinu», ni «qué ziuu dxi guiniti» (Isa. 40:8). Zacá ni, cani gulí Jiobá guicá lu 66 libru zeeda lu Biblia ni nápanu dede yanna la? ngapeʼ nga ni caquiiñeʼ cada tobi de laanu para «ganda guni[nu] irá ni riree ndu» (2 Tim. 3:16, 17).