Gúcacabe monja ne yanna maʼ xpinni Cristu laacabe

Felisa: Nabé católicu familia stidu. Ne 13 de ca binnilídxidu maʼ huayuu lade ca xaíque stiʼ ca católicu. Dede bisisaca papa Juan Pablo II ti xprimu jñaaʼ casi tuuxa ni mayaca gaca bidóʼ. Xprímube ca guca ti sacerdote ne guca maestru ndaaniʼ ti scuela ra rusiidicabe de religión. Nabé pobre guca familia stidu. Bixhozeʼ guca herreru ne jñaaʼ biʼniʼ dxiiñaʼ lu layú ne naa nga huaniisi de lade xhono xiiñiʼ jñaaʼ.

Dxi napaʼ 12 iza bizulú guerra civil ndaaniʼ guidxi España, ne dxi biluxe ni maʼ gobiernu si riguixhe xi gaca. Cumu gadxé modo riníʼ ique bixhozeʼ ne gadxé ni naguixhe gobiernu que la? biseguyoocabe laabe. Ngue runi nabé nagana guca para jñaaʼ guyaanaʼ guiradu. Ti xhamígabe gudxi laabe guseendabe guionnaʼ bendaʼ ni jma nahuiiniʼ, Araceli, Lauri ne Ramoni, ndaaniʼ ti conventu ni nuu guidxi Bilbao (España). Raqué huaxa maʼ qué ziaadxaʼ ni gócabe.

Araceli: Nabé naná guca para laadu guixéledu de familia stidu purtiʼ deruʼ 14 iza napaʼ dxiqué, Lauri napa 12 ne Ramoni napa 10. Dxiiñaʼ bínidu ndaaniʼ conventu ni nuu Bilbao que nga gusiadu. Chupa iza despué biseendaʼ ca monja que laadu ndaaniʼ ti conventu jma naroʼbaʼ ni nuu Zaragoza, ra rápacabe ca binnigola. Ni guca xhiiñadu raqué nga gusiadu guzina, nabé rusidxaga dxiiñaʼ que laadu purtiʼ nahuíʼnirudu.

Felisa: Dxi maʼ zeʼ ca bendaʼ Zaragoza gudixhe ique jñaaʼ ne xtiuaʼ, ni naca párroco stiʼ guidxi que, chiguneʼ dxiiñaʼ ndaaniʼ conventu ra biree ca bendaʼ que. Jñaaʼ ne xtiuaʼ nuucaʼ guxhélecaʼ naa de ti hombrehuiiniʼ ni canananda naa. Cumu nabé católica naa la? guyuuladxeʼ chuaaʼ raqué ti tiempu. Dede guníʼ iqueʼ ñacaʼ misionera, casi ti xprimuaʼ ni naca monje ndaaniʼ guidxi África.

Ra nuaaʼ ndaaniʼ conventu que bineʼ sentir qué zanda diʼ guneʼ stale de ca cosa ni racalaʼdxeʼ, purtiʼ qué ñacané diʼ ca monja que naa nucaaʼ iqueʼ niguneʼ xhiiñaʼ Dios ndaaniʼ sti guidxi. Ngue runi gudiʼdiʼ si ti iza gudixhe iqueʼ guibiguetaʼ ra lidxeʼ para guuyaʼ xtiuaʼ, párroco que. Guiluxe siaʼ dxiiñaʼ runeʼ ndaaniʼ yoo, guirópadu runi rezardu rosariu guiráʼ huadxí. Laaca nabé guyuuladxeʼ guzuchaahueʼ yuʼduʼ que né guieʼ ne guzuchaahueʼ ca bidóʼ ne ca virgen ni nápacabe raqué.

Araceli: Laga nuaaʼ Zaragoza, bineʼ ca primé voto ni naquiiñeʼ guni binni para gaca monja. Ca dxi que gudixhe ique ca monja que guxhélecaʼ guiónnadu. Ramoni biaana Zaragoza, Lauri zeʼ Valencia ne biseendacabe naa Madrid, ne raqué nga bineʼ guiropa tanda voto ni runi ca monja. Cumu ndaaniʼ conventu ni nuu Madrid que nga rudiicabe ra guiaana ca baʼduscuela, binni huaniisi ne xcaadxi binni ni riganna lugar que la? ngue runi stale dxiiñaʼ raca ndaaniʼ ni. Ne naa bineʼ dxiiñaʼ ra enfermería nuu raqué.

Dxandipeʼ la? gadxé modo guníʼ iqueʼ ribani ti monja: ni jma racalaʼdxeʼ nga guundaʼ Stiidxaʼ Dios ne guieneʼ ni. Peru raqué guirutiʼ qué riníʼ de Dios o de Jesús ne qué riquiiñecabe Biblia. Biziideʼ caadxi latín, biziideʼ modo ribani ca católicu ne modo runi adorárcabe María. Peru jma nga riquiiñeʼ tiempu stinneʼ para guneʼ dxiiñaʼ.

Nabé gucaʼ estresar ne guyuaaʼ xizaa, ngue runi gudixheʼ iqueʼ guinieniáʼ madre superiora. Bisieneʼ laabe qué runeʼ sentir galán guneʼ dxiiñaʼ para guidxá xpolsa sti binni, ne familia stinneʼ cayatizíʼ. Xi biʼniʼ gunaa que yaʼ. Biseguyoobe naa ndaaniʼ ti lidxi guiibaʼ nápacabe raqué para guchaaʼ modo riníʼ iqueʼ ne guiaanaʼ ndaaniʼ conventu que.

Guleecabe naa ndaaniʼ lidxi guiibaʼ que chonna biaje para gúʼyacabe pa náparuaʼ gana chaaʼ. Cumu biiyacabe cadi cuchaaʼ modo riníʼ iqueʼ la? bicaacabe naa guneʼ ti guiʼchiʼ ra guiniéʼ cayuneʼ renunciar ne gucaaʼ: «Maʼ chaaʼ purtiʼ jma riuuladxeʼ guneʼ ni na Binidxabaʼ que ni na Dios». Guizáʼ bidxagayaaʼ ni canábacabe naa guneʼ, ne neca maʼ qué racalaʼdxeʼ chuaaʼ raqué peru qué ziuu dxi gucaaʼ ca diidxaʼ que. Últimu la? gunabaʼ guinieniáʼ ti confesor ne gudxeʼ laa guiráʼ ni bizaaca que. Laabe guníʼnebe diócesis que gudxiguetaʼ naa ndaaniʼ conventu nuu Zaragoza, ra maca guyuaaʼ. Chupa chonna beeu de nuaaʼ raqué maʼ bidiicabe lugar chaaʼ. Qué nindaa laaca bisaana Lauri ne Ramoni conventu ra nuucaʼ.

TI LIBRU NI GUNDASAA LAADU

Felisa: Bichaganaʼyaʼ ne yendezaʼ ti provincia ni láʼ Cantabria. Peru, qué nusaanaʼ de ñaaʼ mixaʼ guiráʼ semana ne ti domingu binadiaʼgaʼ guníʼcabe xiixa dede lu púlpito que ni nabé bidxagayaaʼ. Cadxiichi sacerdote que ne naduxhuʼ guníʼ: «¡Cayuuyatu libru riʼ la?!», culuíʼ náʼ libru La verdad que lleva a vida eterna. De raqué guníʼ: «Pa maʼ bidiicabe laatu tobi la? ¡latané ni naa o lagusaʼbiʼ ni!».

Neca qué gapaʼ libru que la? nagueendaca biyubeʼ tobi. Ca dxipeʼ que bedaguxhidxináʼ chupa gunaa Testigu ra lidxeʼ ne bidiicaʼ naa libru ni cadi naquiiñeʼ gapaʼ que. Gueelaʼ queca biindaʼ ni ne ora yeganna ca gunaa que naa sti biaje, gudxeʼ laacaʼ zaa gúʼndanecaʼ naa Biblia.

Nagueendaca yendá ni dxandíʼ que ndaaniʼ ladxiduáʼ. Bisaanaʼ de ñacaʼ binni yuʼduʼ ne guizáʼ gunnaxhieeʼ Jiobá ne bineʼ predicar né stale gana. Guyuaanisaʼ lu iza 1973. Ne bineʼ guiráʼ ni gúndatiʼ para güeniáʼ ca binnilidxeʼ ni caziideʼ, neca huaxiéʼ guyuu tiempu. Ne casi bisieneʼ ra bizulunu que, nabé bicaalúcabe naa pur cani caziideʼ, ne jmaruʼ si bendaʼ Araceli.

Araceli: Nabé feu modo biʼniʼ tratárcabe naa ndaaniʼ conventu que, ngue runi bidxiicheʼ ne maʼ qué ñuaaʼ nayecheʼ né religión stinneʼ. Peru guyaaruaʼ mixaʼ ca domingu ne bineʼ rezar rosario guiráʼ dxi. Racaladxeruáʼ guieneʼ Biblia ne gunabaʼ Dios gacané naa. Neca zaqué cayuneʼ sentir, peru ora gunadiagaʼ nabé nayecheʼ riniʼné Felisa bendaʼ naa de cani nacubi caziidiʼ la? riníʼ iqueʼ fanática laa. Nisi ridindediidxadu.

Gudiʼdiʼ si ti tiempu, bibiguetaʼ Madrid yeguneʼ dxiiñaʼ ne raqué bichaganaʼyaʼ. Bidieeʼ cuenta qué runi diʼ ca binni ni rié mixaʼ que ni rusiidiʼ ca Evangeliu. Ngue runi maʼ qué ñuuruʼ dxi ñaaʼ yuʼduʼ. Laaca bisaanaʼ de ñuneʼ cré bidóʼ, infiernu ne bisaanaʼ de ñuneʼ cré zanda guni perdonar ti sacerdote xpecadu binni. Dede bisaabeʼ guiráʼ bidóʼ ni napaʼ. Peru qué gannaʼ pa jneza ngue ni cayuneʼ. Cadi ngue diʼ gulezaʼ de religión stinneʼ, bineʼ orar Dios ne gudxeʼ laa: «Rapaʼ gana gunebiaʼyaʼ lii, ¡gucané naa!». Rietenalaʼdxeʼ stale biaje yeguxhidxináʼ ca testigu stiʼ Jiobá ra puertaʼ lidxeʼ, peru qué ñuu dxi nucaadiaʼgaʼ laacaʼ. Biniteʼ confianza guiráʼ religión.

Lauri bendaʼ ni nabeza Francia ne Ramoni ni nabeza España bizulú biindané ca Testigu laacaʼ Biblia casi bizulú década stiʼ iza 1980. Naa rabeʼ maʼ gudxítecabe laacaʼ casi gudxítecabe Felisa. Despué binebiaʼyaʼ Angelines, ti xpecinaʼ ni nabé guca xhamigaʼ. Laaca testigu stiʼ Jiobá laabe. Guizáʼ stale biaje gudxi Angelines ne xheelaʼ naa pa zuundanecaʼ naa Biblia. Laacabe bidiicabe cuenta riuuladxeʼ guiziideʼ de Biblia neca riniéʼ maʼ qué racalaʼdxeʼ gannaʼ de religión. Ti dxi gudxeʼ laacabe: «Zaa guni estudiárnetu naa, peru pa gudiitu lugar iquiiñeʼ Biblia stinneʼ», ne laani nga traducción Nácar-Colunga.

GUCANÉ BIBLIA LAADU GUYUʼDU TOBI SI

Felisa: Dxi guyuaanisaʼ lu iza 1973, nuu biaʼ setenta si testigu stiʼ Jiobá ndaaniʼ guidxi Santander, capital stiʼ Cantabria. Nabé naroʼbaʼ territorio stidu, napa ni gayuaa guidxihuiiniʼ, ngue runi riuudu lu autobús ne despué maʼ rinedu carru para ganda chigüínedu ca binni ni nabeza lu guidubi naca provincia que cani rusiidiʼ Biblia. Guyuudu guiráʼ guidxihuiiniʼ dede ra yegánnadu guidubi región que.

Lu ca iza ni maʼ gudiʼdiʼ ca maʼ stale binni biindaniáʼ de Biblia ne 11 de laacabe maʼ guyuunisa. Stale de laacabe gúcacabe católicu. Cumu naapiaʼ nabé católica gucaʼ la? nannaʼ caquiiñeʼ guieneʼ laacabe ne gapaʼ paciencia laacabe. Ne nannaʼ maʼ gucuaa xcu guiráʼ ni runi crécabe ndaaniʼ ladxidóʼcabe, ngue runi bidieeʼ cuenta caquiiñeʼ tiidiʼ tiempu para gusaanacabe cani. Ne napa xidé guniibi Biblia ne espíritu santu stiʼ Jiobá ladxidóʼcabe para ganda gudiicabe cuenta gunáʼ nga ni dxandíʼ (Hebreos 4:12). Xheelaʼ, Bienvenido, guca puliciá ne guyuunisa lu iza 1979, ne jñaaʼ bizulú biindaʼ Biblia dxi mayaca gatiʼ.

Araceli: Dxi bizulú biindané ca Testigu naa Biblia qué lica gapaʼ confianza binni. Peru ra zidiʼdiʼ semana bidieeʼ cuenta maʼ cuchaa modo riníʼ iqueʼ. Ni jma bidxagayaaʼ de laacabe nga rúnicabe guiráʼ ni rusiidicabe. Ra gupaʼ fe maʼ bisaanaʼ de ñacaʼ binni ni qué runi cré gastiʼ ne maʼ bineʼ sentir nayecheʼ. Dede gudxi chupa chonna xpecinuaʼ naa: «Cadi gusaanuʼ neza maʼ guliluʼ ca Araceli».

Ti dxi bineʼ orar Jiobá ne gudxeʼ laa: «Xquíxepeʼ lii Jiobá, purtiʼ qué ñuuyuʼ naa casi tuuxa ni maʼ qué gapa remediu ne purtiʼ stale biaje biyúbiluʼ modo nidxelaʼ gunáʼ nga ni dxandipeʼ rusiidiʼ Biblia». Laaca gunabaʼ bendaʼ Felisa gutiidilaʼdxiʼ naa pur ca diidxaʼ naná ni gudxeʼ laa. Ante que nabé ridindediidxadu peru yanna guizáʼ galán ruidu de cani rusiidiʼ Biblia. Guyuaanisaʼ lu iza 1989 dxi napaʼ 61 iza.

Felisa: Yanna maʼ napaʼ 91 iza, viuda naa ne maʼ huaxiéʼ stipa napaʼ. Peru ruundaʼ Biblia guiráʼ dxi, riaaʼ reunión, pa nazaaca nuaaʼ, ne riuuladxeʼ gucheecheʼ diidxaʼ biaʼ gándatiʼ.

Araceli: Riuuladxeʼ guneʼ predicar guiráʼ sacerdote ne monja ni guidxaagaʼ, zándaca purtiʼ laaca gucaʼ monja. Huasaananiáʼ laacabe stale publicación ne galán modo huayueniáʼ laacabe diidxaʼ. Chupa chonna biaje de yegannaʼ ti cura, gudxi naa: «Nannaʼ napuʼ razón né guiráʼ ni cayaʼbuʼ naa ca Araceli, peru paraa ndiʼ chaaʼ maʼ biooxhuaʼ. Xi guiníʼ ca xpinneʼ ne ca xfamiliaʼ». Para bicabeʼ laabe: «Laga xi guiníʼ Dios yaʼ». Bituí lube, peru qué ñápabe valor para nuyúbirube niziidibe ni dxandíʼ.

Nabé nayecheʼ runeʼ sentir ora guietenalaʼdxeʼ primé biaje gudxi xheelaʼ naa ziné naa ti reunión. Neca maʼ nápabe 80 iza dxiqué, peru de raqué maʼ qué ñaadxabe nin tobi de laacani. Biindanécabe laabe Biblia ne gúcabe publicador ni caʼruʼ chúʼnisa. Nabé galán cani rietenalaʼdxeʼ de dxi bineʼ predicarniáʼ laabe juntu. Gútibe chupa beeu ante ganda dxi chuʼnísabe.

Felisa: Tobi de ca cosa ni jma riguixhedxí ladxiduáʼ nga guuyaʼ maʼ xpinni Cristu guionnaʼ bendaʼ ni jma nahuiiniʼ, neca dxiqué nabé bicaalucaʼ naa. ¡Yanna riʼ, guizáʼ nayecheʼ runi sentirdu ora maʼ nuudu juntu ne maʼ canidu de Dios stidu Jiobá ne de Stiidxabe! Qué huayuu dxi chuʼdu tobi si, casi nuudu yanna ra maʼ bizíʼdidu ni dxandíʼ de Dios.a