Uyúbirunu ximodo ucheechenu diidxaʼ
1 Nécapeʼ adxé adxé nga modo nabáninu binni ndaaniʼ xquidxi Dios iranu tobi si ni naguixhe íquenu gúninu, usisácanu Jiobá (Sal. 79:13). Yanna, pa huaranu o pa nuu xiixa ni rucueeza laanu de chigucheechenu ca diidxaʼ nacubi ne galán stiʼ Cristu, ximodo zanda uyúbirunu modo ucheechenu diidxaʼ yaʼ.
2 Ora maʼ cayúninu xhiiñanu. Jesús nabé biyubi ximodo iniʼné binni neca guyuu xhiiñabe. Uníʼnebe Mateu ora zidíʼdibe gaxha de ra oficina ra ruquixe impuestu, laaca uníʼnebe Zaqueu ora zebe sti lugar ne laaca uníʼnebe ti samaritana ora caziiláʼdxibe (Mat. 9:9; Luc. 19:1-5; Juan 4:6-10). Laanu laaca zanda gúninu zacá, laga cayúninu xhiiñanu zanda inínenu tutiica binni de ni runi crenu. Jma zudii gana laanu gúninu ni pa nápacanu ti Biblia ne caadxi tratadu o folletu ra nuunu (1 Ped. 3:15).
3 Ñee raca nagana para lii ucheecheluʼ diidxaʼ de yoo pur yoo purtiʼ qué randa rizaluʼ la? Ora chiguuya doctor lii o chiganna xcaadxi binni lii cadi udiiluʼ lugar chécabe sin iníʼneluʼ laacabe de Dios (Hech. 28:30, 31). Pa qué rándapeʼ rireeluʼ ra lídxiluʼ, ñee huayúniluʼ stipa pur ucheecheluʼ diidxaʼ pur teléfono o pur carta la? Ti bizánanu ni rucaa carta ra nuu ca binnilidxi ni cadi naca Testigu, rucaabe ni chuláʼdxicaʼ de ni rusiidiʼ Biblia ne cani rizaacabe ora chigucheechebe diidxaʼ.
4 Ra dxiiñaʼ ne ra scuela. Pa riuuláʼdxinu usisácanu lá Jiobá la? zucaa ni laanu uyúbirunu ximodo ucheechenu diidxaʼ ra rúninu dxiiñaʼ ne ra scuela. Ti hombrehuiiniʼ de xhono iza ni maʼ rucheeche diidxaʼ uniʼbe ra scuela stibe xi biziidibe de Beeu ndaaniʼ revista ¡Despertad! Ora gunna maestra stibe que paraa biziidibe cani uniʼbe que la? uyuulaʼdxiʼ icaa ca revista La Atalaya ne ¡Despertad! cada iree cani. Ra rúniluʼ dxiiñaʼ la? zanda quíxheluʼ libru Xipeʼ ndiʼ cusiidiʼ Biblia ra guʼyaʼ tuuxa ni ti inabadiidxacabe laanu de laani ne zacá inínenu laacabe de Stiidxaʼ Dios.
5 Caníʼ íqueluʼ ximódoruʼ zanda ucheecheluʼ diidxaʼ laga cayúniluʼ xhiiñaluʼ la? Gúninu stipa pur «cadi guiaana dxí nu de usisaca nu Dios» iráʼ dxi neca adxé adxé modo nabáninu (Heb. 13:15).