Usihuínninu rizaláʼdxinu binni ra guuyadxinu lúcabe ora maʼ caninenu laacabe
1 Ora rucheechenu diidxaʼ ra nuu stale binni ne de yoo pur yoo la? primé ca lúcabe ruuyadxinu ante ininu . Ne oraqueca zánnanu pa cayuuláʼdxicabe ni caninenu laacabe ne laaca zánnanu pa cadxiichicabe o pa nuucabe nayecheʼ purtiʼ lúcabe zusihuinni ni. Ne zaqueca ora guuyadxícabe laanu zannacacabe ximodo nuunu. Sicaríʼ uníʼ ti gunaa ora yeganna ti bizánanu Testigu laabe: «Ni jma rietenalaʼdxeʼ de laabe nga, modo bixídxinebe naa ne dede udixhedxini ladxiduáʼ. Ucalaʼdxeʼ ñannaʼ xiñee». Modo biʼniʼ bizánanu riʼ ucaneni gunaa que ucaadiaga ca diidxaʼ nacubi ne galán que.
2 Ra guuyadxinu lú binni ora chiguininenu laa la? nga nga sti modo ni zacané laanu para uzulú inínenu binni ora ucheechenu diidxaʼ lu calle o ca lugar ra riuu stale binni. Ti bíchinu nabé ruyúbibe ximodo guuyadxí binni lube ora idxiña gaxha de laabe. Ne ora guuyadxísaacabe lúcabe la? bíchinu ca ruxidxi ne ribeeca revista ruluíʼ laacabe. Ne pur modo rúnibe riʼ, randa riníʼnebe stale binni de Stiidxaʼ Dios ne laaca rusaananebe laacaʼ stale libru ne revista.
3 Rudiʼnu cuenta xi caníʼ íquecabe. Ra guuyadxinu lú binni ora maʼ caninenu laa, nga zacané laanu gánnanu xi riníʼ íquecabe. Casi pa tuuxa cadi cayene o qué ñuulaʼdxiʼ xiixa ni ininu la? zahuínnica ni lube, laaca zudiʼnu cuenta pora nga nuu xhiiñabe ne pora nga careebe gana. Ora gúʼyanu nuu binni zacá la? naquiiñeʼ uyúbinu ximodo uchaʼnu de ni caninu. Ra gúninu stipa pur guiénenu xi cayuni sentir binni la? zacané nga laanu usihuínninu rizaláʼdxinu laacabe.
4 Guluinu de ladxidoʼno caree ni caninu ne runi crenu cani. Ndaaniʼ stale guidxi, guʼyadxícabe lú ti binni nga cusihuínnicabe de ladxidóʼcabe caree ni caníʼcabe. Gúʼyanu ximodo bicabi Jesús ca discípulo stiʼ ora unabadiidxaʼ ca laabe «Tu zanda ilá pue». Biblia na: «Biiya dxí Jesús laacabe ne na rabi laacabe: Nabé nagana ndi para binni guidxilayú peru para Dios gasti ni nagana» (Mat. 19:25, 26). Modo uníʼ Jesús que bisihuínnibe dxandíʼ risaca cani caniʼbe que. Zacaca laanu, pa guuyadxinu lú binni ora inínenu laacaʼ de Stiidxaʼ Dios la? zusihuinni nga dxandíʼ de ladxidoʼno caree ni caninu ne runi crenu cani (2 Cor. 2:17; 1 Tes. 1:5).