Gucheechenu diidxaʼ guiráʼ ora
1. Xiñee nánnanu qué nusaana ca primé xpinni Cristu de nucheechecaʼ diidxaʼ ora tiica si.
1 Ca xpinni Cristu ni bibani lu primé siglu que bicheechecaʼ diidxaʼ né stale gana ratiica nuu binni sin ñaanadxicaʼ (Hech. 5:42). Zándaca ora maʼ zigucheechecabe diidxaʼ de yoo pur yoo laaca guniʼnécabe ca binni ni zidiʼdiʼ lu calle. Ne pa guiluxe gucheechesícabe diidxaʼ chisícabe xiixa luguiaa, nanna dxíchinu laaca guniʼnécabe ca binni nuu raqué. Ca xpinni Cristu riʼ bicheechecaʼ diidxaʼ guiráʼ ora, cásica biʼniʼ Jesús (Mar. 6:31-34).
2. Xi naquiiñeʼ guni cani naca testigu stiʼ Jiobá.
2 Gucheechenu diidxaʼ ora tiica si. Ca xpinni Dios lacaʼ testigu stiʼ Jiobá, lá ni gucuaacabe ca rusihuinni xi dxiiñaʼ rúnicabe ne tu nácacabe (Isa. 43:10-12). Ti testigu stiʼ Jiobá naquiiñeʼ chuʼ listu para guiníʼ de cani runi cré ora tiica, ne cadi ora si maʼ zigucheechecaʼ diidxaʼ de yoo pur yoo (1 Ped. 3:15). Ñee huaníʼ íqueluʼ xcaadxi modo zanda gucheecheluʼ diidxaʼ ne xi zanda guiniʼluʼ la? Ñee rizáneluʼ xiixa libru, revista o xcaadxi guiʼchiʼ ni caníʼ de Biblia para gusaananeluʼ ca binni ni riuulaʼdxiʼ gucaadiaga la? (Pro. 21:5.) Ñee de yoo pur yoo si nga rucheecheluʼ diidxaʼ la? o rúniluʼ ni xcaadxi lugar ora gúʼyaluʼ zanda.
3. Ñee jneza guiníʼ íquenu qué risaca gucheechenu diidxaʼ lu calle, ra ruzuhuaa carru, ra nuu stale negocio ne xcaadxi lugar la?
3 Gucheechenu diidxaʼ ra nuu binni. Apóstol Pablu na bicheeche diidxaʼ ra nuu binni ne de yoo pur yoo (Hechos 20:20). Nga runi, zanda guininu cucheechenu diidxaʼ ra nuu binni nga ora guinínenu laacaʼ lu calle, ra ruzuhuaa carru, ra nuu stale negocio ne xcaadxi lugar. Dxandíʼ, jma rucheechenu diidxaʼ de yoo pur yoo ne nga nga modo jma huayacanenu binni guiziidiʼ de Dios. Peru ca xpinni Cristu ni bibani lu primé siglu que cadi ralidxi si binni bicheechecaʼ diidxaʼ, sínuque yeyúbicaʼ paraa nuucabe. Qué nusaana de nucheechecaʼ diidxaʼ ra tiica nuu binni ne de yoo pur yoo. Ne ngaca nga naquiiñeʼ gúninu ti ganda gucheechenu diidxaʼ jma (2 Tim. 4:5).