«Bitagulisaa guidubi naca guidxi ca»
1. Ximodo zeeda gaca guendaridagulisaa ni chigápanu riʼ casi guendaridagulisaa ni gupa ca israelita bireesicaʼ de Egipto.
1 Despué de biree ca israelita de Egipto, gudxi Jiobá Moisés gutagulisaa guidubi naca guidxi que lu dani Sinaí para gucaadiágacaʼ stiidxabe ne guiziidicaʼ guidxíbicaʼ Dios ne gusiidicaʼ xiiñicaʼ ca ley stiʼ Jiobá (Deut. 4:10-13). Qué lica ñaandaʼ dxi que laacabe purtiʼ gucaneni laacabe iguidxi fe stícabe. Maʼ cadi candaa, zuzulú zadagulisaa ca xpinni Jiobá chonna gubidxa para gusiidibe laacaʼ. Xi zanda gúninu para cueendunu ni galán lu guendaridagulisaa riʼ yaʼ.
2. Xi naquiiñeʼ gúninu para chuʼnu listu dxi chigápanu guendaridagulisaa stinu.
2 Chuʼnu listu. Ante guidagulisaa ca israelita lu dani Sinaí, gudxi Jiobá laacabe chúʼcabe listu (Éx. 19:10, 11). Guiranu laaca naquiiñeʼ chuʼnu listu ne guidúʼyanu xi guiráʼ naquiiñeʼ gúninu dede ante para chuunu guendaridagulisaa riʼ ne cadi ca binni si ni chitiidiʼ luni. Casi nuu tu laa la? naquiiñeʼ guinabaʼ permisu ra runi dxiiñaʼ. Zándaca naquiiñeʼ gúniluʼ cásica biʼniʼ Nehemías. Laabe gucaláʼdxibe nusaanabe dxiiñaʼ de copero ni bíʼnibe para rey Artajerjes ti ganda chebe Jerusalén ne gacanebe para cuiʼ lindaa stiʼ guidxi que sti biaje, peru laabe guníʼ íquebe qué zaná rey que gudii lugar gúnibe ni canábabe laa que. Ngue runi, biʼniʼ Nehemías ti oración ne guca nadxibalú para gudxi rey que xii nga racalaʼdxiʼ. Bidii rey que permisu laabe ne laaca gucané para ganda cuiʼ lindaa que (Neh. 2:1-9). Ñee maʼ gunábaluʼ permisu patrón stiluʼ ra dxiiñaʼ la? Maʼ guníʼ íqueluʼ ximodo cheluʼ ne paraa guiaanaluʼ la? Ca binnigola nuucaʼ para gacanecaʼ lii pa caquiiñeluʼ ni. Gudixhe ique chindaluʼ tempranu ne chuʼluʼ listu ti ganda gucaadiaga chaahuiluʼ cani chiguieeteʼ lu guendaridagulisaa ca (Heb. 2:1).
3. Xi zacané laanu para cuʼnu listu ladxidoʼno dxi gápanu guendaridagulisaa ca.
3 Sti cosa ni naquiiñeʼ gúninu nga cuʼnu listu ladxidoʼno para gucaadiáganu ne guizíʼdinu (Esd. 7:10). Dede ante ziuu programa stiʼ guendaridagulisaa riʼ lu sitiu ni nápanu lu Internet jw.org ne luni zeeda ca tema stiʼ ca libana ni chitidiʼ ne zeeda tobi o chupa textu ra biree ca libana ca. Zanda gúʼndaneluʼ ni familia stiluʼ dxi runi adorartu Dios né binnilídxitu semana chigápatu guendaridagulisaa ca. Nuu de cani rucheeche diidxaʼ runi imprimircaʼ programa riʼ para ganda gucaacaʼ xiixa ni guieeteʼ luni.
4. Ximodo zanda gacané guendaridagulisaa riʼ cani napa xiiñiʼ ti ganda gusiidicaʼ laacabe.
4 Lagusiidiʼ ca xiiñitu. Guendaridagulisaa ni gupa ca israelita lu dani Sinaí que laaca gucaneni laacaʼ gusiidicaʼ xiiñicaʼ (Deut. 4:10). Guendaridagulisaa de chonna gubidxa ca laaca zacaneni cani napa xiiñiʼ gúnicaʼ cásica bíʼnicabe. Naquiiñeʼ cuinécabe xiiñicabe ora maʼ cayaca guendaridagulisaa ca ne gúʼyacabe gucaadiaga chaahuicaʼ. Cada guiluxe guendaridagulisaa ca galán güinécabe ca binnilídxicabe de ni bieeteʼ raqué, ne zaqueca ora guni adorárcabe Dios né binnilídxicabe.
5. Xi zanda cueendunu pa qué guiáʼdxanu guendaridagulisaa riʼ.
5 Dxi bidagulisaa ca israelita lu dani Sinaí que gucaneni laacaʼ gusisácacaʼ ndaayaʼ ni nápacaʼ pur gulí Dios laacaʼ para gácacaʼ xquídxibe (Deut. 4:7, 8). Yanna riʼ, laaca zacané guendaridagulisaa riʼ laanu. Chonna gubidxa chiguidagulisaanu riʼ zeeda gácani casi ñuʼnu ndaaniʼ ti paraísu purtiʼ zazíʼdinu de Jiobá ne ziuʼnu né xcaadxi xpinni Cristu juntu, ne zacá zaxélenu de guidxilayú stiʼ Binidxabaʼ ni zeeda gaca casi ti desiertu (Is. 35:7-9). Cumu guizáʼ maʼ gaxha nuu dxi stiʼ Jiobá la? cadi naquiiñeʼ guiáʼdxanu guendaridagulisaa rápanu guiráʼ iza para cuʼsaanu gana laanu (Heb. 10:24, 25).