Cadi gusaana de guizíʼdinu gucheechenu diidxaʼ jma jneza
1. Xi ejemplu de primé siglu que rusihuinni naquiiñeʼ gúninu stipa pur gucheechenu diidxaʼ jma jneza.
1 Cadi naquiiñeʼ gusaana ca xpinni Cristu de guiziidicaʼ gucheechecaʼ diidxaʼ jma jneza. Nga runi, bisiidiʼ Jesús ca discípulo stiʼ ne gucanebe laacaʼ gucheechecaʼ diidxaʼ jma jneza (Luc. 9:1-5; 10:1-11). Ngaca nga biʼniʼ Áquila ne Priscila dxi gucanecaʼ Apolos «para bisiene chaahui ca laabe stiidxa Dios» (Hech. 18:24-26). Neca maʼ xadxí de cucheeche Timoteu diidxaʼ guluu Pablu gana laa guni stipa ti cadi gusaana de gusiidiʼ jneza «ti guʼya cabe» nanna gusiidiʼ (1 Tim. 4:13-15). Pa maʼ xadxí de cayúninu xhiiñaʼ Señor casi esclavu ra cucheechenu ca diidxaʼ nacubi ne galán o deruʼ yanna cayúninu ni la? naquiiñeʼ guyúbinu gúninu ni jma jneza.
2. Xi zanda gúninu para guizíʼdinu modo rucheeche xcaadxi xpinni Cristu diidxaʼ.
2 Guizíʼdinu de xcaadxi. Ti modo zanda guizíʼdinu gucheechenu diidxaʼ jma jneza nga guidúʼyanu modo rucheeche xcaadxi xpinni Cristu diidxaʼ (Prov. 27:17). Nga runi, ora guireʼnu chigucheechenu diidxaʼ, naquiiñeʼ gucaʼdiáganu ora maʼ caníʼ xcompañérunu. Ne laaca naquiiñeʼ guinábanu conseju cani nanna gucheeche diidxaʼ ne gucaʼdiaga chaahuinu ca conseju gudiicabe laanu (Prov. 1:5). Ñee raca nagana para laanu chigánnanu binni sti biaje, guzulú gúʼndanenu binni Biblia o gucheechenu diidxaʼ sti modo runi ca xpinni Cristu ni la? Guinábanu binnigola ni runi tender grupu stinu o ti publicador ni maʼ xadxí rucheeche diidxaʼ gacané laanu. Cadi guiaandaʼ laanu zanda gacané espíritu santu laanu gucheechenu diidxaʼ jma jneza. Nga runi, cadi gusaananu de guinábanu ni ora guni orarnu (Luc. 11:13).
3. Xi naquiiñeʼ gúninu ora gudiicabe laanu ti conseju neca cadi canábanu ni.
3 Cadi guidxiichinu ora gudiicabe laanu ti conseju neca cadi canábanu ni laacabe (Ecl. 7:9). Cadi gudxíʼbanu laca laanu ne gudiʼnu xquíxepeʼ binni ca, gúninu casi biʼniʼ Apolos, gucaʼdiáganu guiráʼ conseju gudiicabe laanu. Zacá zusihuínninu nácanu binni nuu xpiaaniʼ (Prov. 12:15).
4. Xiñee nabé risaca cadi gusaana de guizíʼdinu gucheechenu diidxaʼ jma jneza.
4 Pa guizíʼdinu gucheechenu diidxaʼ jneza zusisácanu Dios. Para ganda cuʼ Jesús gana ca discípulo stiʼ gucheechecaʼ diidxaʼ jma jneza la? guniʼbe ti ejemplu ra bichaagabe laabe ti lubáʼ uva ne ca xpínnibe ni bibí pur espíritu santu casi ramahuiiniʼ stini, laabe bizeetebe rusiá Bixhózebe laaca para jma gudiicaʼ cuananaxhi (Juan 15:2). Cásica ribeza ti binni napa stale lubáʼ uva gudii ca lubáʼ stiʼ stale ne jma galán la? ngaca nga ribeza Jiobá gúninu ora chigucheechenu diidxaʼ, ribézabe gúninu xhiiñabe jma galán o jma jneza (Heb. 13:15). Xi zabeendunu pa guizíʼdinu gucheechenu diidxaʼ jma jneza yaʼ. Laaca Jesús ricabi laanu: «Zusisaca tu Bixhoze pa iree ndu ni cayuni tu lu xhiiñaʼ» (Juan 15:8).