Ximodo racané reunión raca ante chigucheechenu diidxaʼ laanu

1. Xiñee ridagulisaanu ante chigucheechenu diidxaʼ.

¹ Ti biaje bidagulisaané Jesús 70 de ca discípulo stiʼ ante guseendabe laacaʼ chigucheechecaʼ diidxaʼ (Luc. 10:1-11). Guluube gana laacaʼ ora bisietenaláʼdxibe laacaʼ cadi stúbicaʼ nuucaʼ ne Jiobá nga zaniruʼ lu dxiiñaʼ cayúnicaʼ purtiʼ laa nga «Xpixuaana» ni. Laaca bisiidibe laacaʼ ximodo gúnicaʼ dxiiñaʼ gucuaacaʼ ne biseendabe laacaʼ «chupa chupa». Ca dxi stinu riʼ, laaca racané reunión ni raca ante chigucheechenu diidxaʼ laanu: riguu ni gana laanu, rusiidiʼ ni laanu ne racané ni laanu gatachaahuiʼ dxiiñaʼ rúninu.

2. Pabiáʼ zandaa reunión ni raca ante chigucheechenu diidxaʼ ra guzulú beeu abril.

² Yanna riʼ, 10 o 15 minutu rindaa reunión ni raca ante chigucheechenu diidxaʼ. Biaʼ tiempu ca riguíxhecabe ximodo guiree ca grupu, rábicabe laacaʼ xi territorio checaʼ ne raca ti oración. Peru ra guzulú beeu abril maʼ zandaa reunión riʼ biaʼ 5 o 7 minutu. Ne pa gaca ni despué de sti reunión la? jmaruʼ si qué zandaa ni, purtiʼ maʼ biziidiʼ cani chigucheeche diidxaʼ stale cosa de Dios. Ne jma zapa ca publicador tiempu gucheechecaʼ diidxaʼ pa qué guindaa reunión ca. Laaca huaxiéʼ tiempu zabezadxí ca precursor ne ca publicador ni maca bizulú cucheeche diidxaʼ ante gaca ni.

3. Ximodo naquiiñeʼ gaca reunión ni rápanu ante chigucheechenu diidxaʼ.

³ Reunión ni raca ante chigucheechenu diidxaʼ, naquiiñeʼ gaca ni modo ganda gacané ni ca publicador. Ndaaniʼ stale congregación maʼ bihuinni jma galán guidagulisaa cada grupu ni chigucheeche diidxaʼ gadxé gadxé lugar ti cadi guiaanacaʼ zitu de ra chigaca reunión riʼ ne de ra chigucheechecaʼ diidxaʼ. Zacá jma nagueenda zaguíxhecabe ximodo guiree ca hermanu ne qué zaca nagana para ca binnigola runi tender cada grupu gúʼyacaʼ grupu sticaʼ. Ca binnigola nga gúʼyacaʼ xi caquiiñeʼ congregación para quíxhecaʼ modo guireeche diidxaʼ. Ante gaca oración para guiluxe reunión riʼ, guiráʼ maʼ naquiiñeʼ ganna paraa chigucheeche diidxaʼ ne tu chiné.

4. Xiñee biaʼca risaca reunión raca ante chigucheechenu diidxaʼ né xcaadxi reunión.

⁴ Biaʼca risaca ni né xcaadxi reunión. Cani chigucheeche si diidxaʼ nga rié reunión riʼ, cadi guidubi congregación. Peru cadi pur nga guiníʼ íquenu qué risaca ni o jma risaca xcaadxi reunión que laani. Reunión riʼ naca ni ti regalu stiʼ Jiobá purtiʼ racané ni laanu gannaxhiisaanu ne gúninu ni jneza cásica xcaadxi reunión (Heb. 10:24, 25). Nga runi, dede ante naquiiñeʼ quixheʼ chaahuiʼ cani chiguni reunión riʼ xi chiguiniʼcaʼ ti gusisaca ni Jiobá ne gacané ni ca publicador. Pa ganda la? guiráʼ publicador ni chigucheeche diidxaʼ naquiiñeʼ gúnicaʼ stipa checaʼ reunión riʼ.

Cadi guiníʼ íquenu qué risaca reunión raca ante chigucheechenu diidxaʼ o jma risaca xcaadxi reunión que laani

5. 1) Xi dxiiñaʼ runi superintendente de serviciu para quixhe modo gaca reunión rápanu ante chigucheechenu diidxaʼ. 2) Ximodo naquiiñeʼ guni ca hermana reunión ni raca ante chigucheechenu diidxaʼ.

⁵ Ximodo chuʼ ca hermanu listu para gúnicaʼ ni. Ora chigutiidiʼ tuuxa ti libana la? naquiiñeʼ gudiicabe ni laa dede ante ti gutiidiʼ ni jneza. Zacaca naquiiñeʼ gaca né reunión rápanu ante chigucheechenu diidxaʼ. Pa gadxé gadxé lugar chiguidagulisaa ca grupu ni chigucheecheʼ diidxaʼ la? superintendente stiʼ cada grupu ne cani racané laacaʼ nga naquiiñeʼ gúnicaʼ reunión riʼ. Peru pa ti lugar si chiguidagulisaa guidubi congregación la? superintendente de serviciu zabí tu guni ni. Nuu superintendente de serviciu rudii ti programa guiráʼ hermanu ni raca caber cuee grupu ne laaca rucaa ni lu tableru. Ca hermanu gaca caber guni reunión riʼ naquiiñeʼ gánnacaʼ gusiidicaʼ ne gánnacaʼ quixhe chaahuicaʼ modo guireeche diidxaʼ ti gaca ni jneza, nga runi naquiiñeʼ guiníʼ ique chaahuiʼ superintendente de serviciu tu zanda guni ni. Pa qué guinni nin ti binnigola, nin ti siervu ministerial o nin ti hermanu ni maʼ guyuunisa ni zanda guni reunión ca la? zanda cuí superintendente de serviciu ti hermana ni maʼ xadxí rucheeche diidxaʼ para guni ni. (Biiyaʼ ndaa ra na «Pa ti hermana chiguni reunión riʼ».)

6. Xiñee naquiiñeʼ quixhe chaahuiʼ ni chiguni reunión riʼ ni guiníʼ.

⁶ Ora gudiicabe laanu ti libana lu Scuela stiʼ cani Rucheeche Diidxaʼ o lu Guendaridagulisaa stiʼ Dxiiñaʼ Stinu, rúninu stipa pur guiree ni jneza ne dede ante riguʼnu listu ni chiguininu. Huaxiéʼ si tu nibeza dede óraruʼ maʼ zeʼ reunión oraqueruʼ niníʼ ique xi chiguiníʼ. Zacaca naquiiñeʼ gúninu ora gaca caber laanu cueenu grupu. Cumu jma maʼ huaxiéʼ tiempu chigaca reunión ca la? naquiiñeʼ quixhe chaahuinu ni chiguininu ti gusíʼdinu jneza ne guiluxe ni biaʼ tiempu nexheʼ gaca ni. Ne laaca zusihuínninu cayuʼnuʼ listu pa guyúbinu territorio chuunu ante guzulú reunión ca.

7. Xi zanda guiníʼ binni ni chiguni reunión riʼ.

⁷ Xi zanda guiniʼluʼ luni. Cumu gadxé gadxé modo rireeche diidxaʼ cada lugar la? nga runi qué huayuni mozo ni nuu xpiaaniʼ ti bosqueju para cada reunión riʼ. Lu cuadru «Xi zanda guiniʼluʼ lu reunión raca ante chigucheechenu diidxaʼ», zeeda caadxi cosa ni zanda gacané laanu. Lu reunión riʼ zanda guinábacabe cani cucaadiaga guiniʼcaʼ. Gatigá zanda tiidiʼ ti demostración luni o ti videu ni nuu lu jw.org ni zanda iquiiñenu ora gucheechenu diidxaʼ. Ora maʼ cayuundaʼ binni ni chiguni reunión riʼ xi chiguiníʼ, naquiiñeʼ guiníʼ ique ximodo zanda cuʼ gana ca hermanu ne xi zanda gacané laacaʼ gucheechecaʼ diidxaʼ dxi ca.

Ora maʼ cayuundaʼ ti binni xi chiguiníʼ lu reunión ni raca ante chigucheechenu diidxaʼ, naquiiñeʼ guiníʼ ique ximodo zanda cuʼ gana ca hermanu ne xi zanda gacané laacaʼ gucheechecaʼ diidxaʼ dxi ca

8. Xi zanda guzeetecabe lu reunión ni raca ante chigucheechenu diidxaʼ sábadu ne domingu.

⁸ Stale publicador rusaananecaʼ binni revista Torre stiʼ ni rapa ne ¡Despertad! guiráʼ sábadu. Pa gastiʼ tobi de ca revista riʼ lu stiidxatu ne nuu binni riníʼ diidxastiá lu territorio stitu la? galán gusaananetu ni laacaʼ pa gastiʼ ti congregación runi tender lugar ca. Ne jma naquiiñeʼ gusaanatu ca publicación ni nuu si lu stiidxatu. Cumu stale de cani rucheeche diidxaʼ sábadu qué gápacaʼ tiempu guireecaʼ ndaaniʼ semana la? zándaca guiaandaʼ laacaʼ presentación biʼniʼ ensayarcaʼ dxi biʼniʼ adorarcaʼ Dios né binnilídxicaʼ. Nga runi, galán guzeeteʼ hermanu ni chiguni reunión riʼ ca presentación reeda lu últimu yaza stiʼ Xhiiñaʼ Reinu ni Rúninu. Sti cosa ni zanda gúnibe nga guiniʼbe ximodo guzéʼtenu xiixa noticia o xiixa saa ni raca xquídxinu para gusaananenu binni revista. Laaca zanda guzeetebe xi naquiiñeʼ gúninu para guibiguetaʼ chigánnanu ca binni biaanané ca revista stinu. Ne pa ra cayaca reunión ca nuu ti publicador ni maʼ bizulú cusaana revista rudiʼnu cada beeu la? zanda guinábabe laa guiníʼ ximodo cusaana ni o guiníʼ xiixa experiencia ni uguu gana xcaadxi. Ora guireʼnu ca domingu, laaca zacaca naquiiñeʼ gaca né ca publicación cusaananenu binni lu beeu ca. Lu reunión ni raca ante chigucheechenu diidxaʼ, laaca zanda guiníʼcabe ximodo gusaananenu binni xcaadxi publicación ni riquiiñenu intiica si dxi o ni rudíʼnenu estudiu, casi folletu Ca diidxaʼ sicarú ne Bicaadiaga Dios o libru Xipeʼ.

9. Xi zanda guiníʼcabe lu reunión raca ante chigucheechenu diidxaʼ ca sábadu ne ca domingu pa cayaca xiixa campaña.

⁹ Ora chuʼ xiixa campaña la? ca sábadu ne ca domingu zanda guiníʼcabe ximodo gudiʼnu revista ra gusaananu invitación o tratadu, o xi gúninu pa chuulaʼdxiʼ ti binni gucaadiaga laanu. Sti cosa ni gúnicabe nga guiníʼcabe xiixa experiencia ni gusihuinni pabiáʼ risaca ca campaña rúninu.

10, 11. Xiñee naquiiñeʼ chuʼ ca publicador listu para reunión ca.

¹⁰ Ximodo chuʼ ca publicador listu. Laaca naquiiñeʼ gacané ca publicador para gaca reunión ca jneza. Pa dede ante chúʼcabe listu para gucheechecabe diidxaʼ —zándaca ora guni adorárcabe Dios né binnilídxicabe—, zaníʼcabe xiixa ni gacané xcaadxi publicador. Para chuʼnu listu, naquiiñeʼ guicaanu ca publicación ni caquiiñenu ante guzulú reunión ca. Pa gúninu nga la? qué zandaʼnu para chindanu lu territorio.

¹¹ Laaca naquiiñeʼ gúninu stipa chindanu chupa chonna minutu ante guzulú reunión ca, cásica rúninu ora chuunu xcaadxi reunión. Pa maʼ huadxí chindanu la? zuchíʼñanu xcaadxi ne zándaca zuchianu modo maʼ gudíxhecabe guiree grupu dxi ca. Ximodo nga yaʼ. Stale nga ni ruuyaʼ hermanu cayuni reunión ca ante quixhe chaahuiʼ modo guiree grupu. Casi pa huaxiéʼ tu nuu ora cayaca reunión ca la? zándaca guseendabe guiracaʼ lu ti territorio ra caʼruʼ guiluxe guireeche diidxaʼ. Ne pa zitu nuu territorio la? zándaca guseendabe cani napa carru chinecaʼ cani qué gapa. Ne pa chigucheechecabe diidxaʼ ti lugar ra nuu binni malu la? zándaca guinábabe chupa chonna hermanu gucheechecaʼ diidxaʼ gaxha de ra nuu ca hermana o gucheechenecaʼ laacabe diidxaʼ. Pa guiree ti publicador ni huará, zándaca guseendabe laa lu ti calle ra cadi naquiiñeʼ quibaʼ ra nasoo o guseendabe laa ra nuu ca yoo ni qué gápapeʼ escalera. O zándaca guinábabe ca publicador ni maʼ xadxí rucheeche diidxaʼ guireenecaʼ cani nacubi. Peru, pa maʼ huadxí chindanu la? zándaca zuchaa hermanu ca modo maʼ nexheʼ guiree ca pareja ne zaguixhe chaahuiʼ modo guireʼnu sti biaje. Dxandíʼ, nuu tiru zazaaca xiixa ne pur nga maʼ huadxí zindanu. Peru pa maʼ biaʼnu chindanu huadxí la? zándaca caquiiñeʼ guiníʼ íquenu pa qué rusisácanu reunión ni raca ante chigucheechenu diidxaʼ o pur cadi nexheʼ chaahuiʼ cani rúninu.

12. Xi zanda gúninu pa laanu nga tobi de cani riuulaʼdxiʼ guireené ti hermanu o ti hermana si.

¹² Nuu tiru maca napa ca publicador tu chigucheechenecaʼ diidxaʼ o nuu tu ribeza gabi hermanu ni cayuni reunión ca laa tu chiné. Yanna, pa laanu nga tobi de cani riuulaʼdxiʼ guireené ti hermanu o ti hermana si yaʼ. Xi zanda gúninu para gucheechenenu xcaadxi hermanu diidxaʼ yaʼ (2 Cor. 6:11-13). Ñanda niréʼnenu ti publicador nacubi gatigá ne ñacanenu laa ñuni xhiiñaʼ Dios jneza la? (1 Cor. 10:24; 1 Tim. 4:13, 15.) Ora maʼ cayaca reunión riʼ, galán gucaadiaga chaahuinu guiráʼ ni gábicabe laanu, casi paraa naquiiñeʼ guzulú gucheechenu diidxaʼ. Cadi gacaláʼdxinu guchaʼnu de pareja o territorio ora maʼ biluxe reunión riʼ, jma galán chuunu ra chigucheechenu diidxaʼ.

13. Ximodo zacané reunión ni raca ante chigucheechenu diidxaʼ laanu pa guiranu gacanenu gaca ni jneza.

¹³ «Nabé nayeche bigueta» 70 discípulo biseendaʼ Jesús chigucheeche diidxaʼ (Luc. 10:17). Cumu bidagulisaané Jesús laacabe ante gúnicabe dxiiñaʼ que la? bicaadiaga stale binni laacabe. Zacaca racané reunión ni raca ante chigucheechenu diidxaʼ laanu. Pa guiranu gacanenu gaca reunión riʼ jneza la? zaguu ni gana laanu, zusiidiʼ ni laanu ne zacané ni laanu gatachaahuiʼ dxiiñaʼ rúninu ti güínenu binni «stiidxa Dios de idubi naca guidxilayú» (Mat. 24:14).

Pa ti hermana chiguni reunión riʼ

Naquiiñeʼ guchii ti hermana ique ora guni reunión ca ne napa xidé cuiʼ. Zanda iquiiñebe xiixa tema cásica ñuni ti hermanu ni. Neca qué zusihuínnibe pa cusiidibe, zanda gusiénebe xiixa tema cani chigucheeche diidxaʼ. Pa guinábabe sti hermana ni maʼ guyuunisa guni oración la? laaca naquiiñeʼ guchii ique. Pa málasi guedandá ti hermanu ni maʼ guyuunisa ora cayuni hermana ca reunión riʼ, zábibe hermanu ca gunduuxeʼ ni. Superintendente de serviciu nga naquiiñeʼ guʼyaʼ cadi guizaaca xiixa ni gusituí lú ca hermanu ne gábibe laacaʼ xi naquiiñeʼ gúnicaʼ ti cadi guizaaca cani. Guzéʼtenu ti ejemplu, zándaca nuu ti hombrehuiiniʼ ni maʼ guyuunisa ra cayuni ti hermana reunión ni raca ante chigucheechenu diidxaʼ. Pa guiníʼ ca binnigola caʼruʼ chuʼ hombrehuiiniʼ riʼ listu para guni reunión riʼ, peru zanda guni orarbe la? dede ante zaniʼné superintendente de serviciu guirópacabe ti ganna hermana ca laa chiguni reunión riʼ ne hombrehuiiniʼ ca guni oración. Zándaca cheʼ ti hermanu ni maʼ guyuunisa reunión riʼ, peru qué zanda gúnibe ni ne qué zanda guni orarbe pur xiixa cosa ni nanna ca binnigola si. Ca binnigola naquiiñeʼ gábicaʼ hermana riʼ laa guni reunión ne oración neca nuu hermanu riʼ, peru cadi gábicabe laabe xi bizaaca. Laaca naquiiñeʼ gabi ca binnigola hermanu riʼ xi dxi raca caber ca hermana gúnicaʼ reunión raca ante chigucheechenu diidxaʼ.

Xi zanda guiniʼluʼ lu reunión raca ante chigucheechenu diidxaʼ:

Caadxi presentación ni zeeda lu Xhiiñaʼ Reinu ni Rúninu.
Ti videu ni nuu lu jw.org ni zanda iquiiñenu ora gucheechenu diidxaʼ.
Bisiene ximodo guzulú guinínenu binni, xi naquiiñeʼ guininu para guibiguetaʼ chigánnanu laacaʼ o ximodo zanda gusiénenu binni qué rutoʼno ca publicación stinu peru zanda gudiicaʼ biaʼ naʼ ladxidoʼcaʼ.
Ti textu zeeda lu Biblia ni zanda cuʼ gana laanu o ni gusiidiʼ laanu xiixa ni iquiiñenu ora gucheechenu diidxaʼ.
Xiixa experiencia ni bizaaca neza ra nabézanu o ni biree lu ca publicación stinu.
Xiixa tema biree lu Xhiiñaʼ Reinu ni Rúninu ni zanda gacané laanu.
Xiixa tema nacubi biuundaʼ lu Guendaridagulisaa stiʼ Dxiiñaʼ Stinu.
Ti tema stiʼ revista Torre stiʼ ni rapa ni cusiidiʼ modo gucheechenu diidxaʼ.
Xiixa ni zeeda lu libru Benefíciese ne “Ven, sé mi seguidor” ni cusiene modo gucheechenu diidxaʼ.
Ximodo iquiiñenu jw.org ora gucheechenu diidxaʼ.
Ni zeeda lu ca folletu Ni zacané lii guiéneluʼ Stiidxaʼ Dios ne Cani zaziidiluʼ lu Stiidxaʼ Dios ni zanda iquiiñenu ora gucheechenu diidxaʼ.
Ximodo guzulú guinínenu ca binni qué runi cré Dios ne cani runi cré evolución ne ximodo guinínenu xcaadxi binni.
Xi zanda guininu ora qué náʼ binni gucaadiaga laanu.
Ximodo zanda gacanenu compañeru o compañera stinu gucheeche diidxaʼ jma jneza.
Xi gúninu ora guidxélanu tuuxa ni qué riníʼ stiidxanu.
Bisiene ximodo gucheechenu diidxaʼ pur teléfono, gucheechenu diidxaʼ ra nuu stale binni, gúninu revisita o estudiu.
Ximodo chuʼnu cuidadu laanu ora maʼ canagucheechenu diidxaʼ, ximodo guinínenu binni ti gucaadiaga laanu ne ximodo chuʼnu nayecheʼ lu dxiiñaʼ cayúninu riʼ ne ximodo gusihuínninu runi respetarnu binni.