¿Xiñee nabé rutinde política binni? | ¿Xi caníʼ Biblia de laani?

Lu guidubi naca Guidxilayú cutinde política binni de guiráʼ guidxi. Guca ti encuesta lu iza 2022 ni biʼniʼ Pew Research Center, ra riete «guníʼ 65% de ca binni huaniisi ni nuu ndaaniʼ 19 guidxi nabé cadinde binni purtiʼ gadxé gadxé partidu políticu laacaʼ».

Ra nabézaluʼ, ¿laaca cutinde política binni la? ¿Xiñee cazaaca nga pue? ¿Zanda gaca chaahuiʼ ni la? Biiyaʼ xi caníʼ Biblia de laani.

Qué ziuu binni tobi si pur modo naca

Lu Biblia riete maʼ nabáninu «lu ca últimu dxi», ne ca dxi riʼ nabé feu zaca xpiaʼ stale binni dede qué zanda chuʼcaʼ tobi si.

• «Lu ca últimu dxi ca jma nagana zaca tiempu ne nadipaʼ zaca para binni guni huantar ni. Purtiʼ zuyubi binni puru si para laa […] ne qué zanacaʼ chuʼcaʼ de acuerdu» (2 Timoteo 3:1-3).

Qué ganda guni ca gobiernu ca dxiiñaʼ neca cayuni binni stale stipa para ganda gúnicabe dxiiñaʼ jneza. Nuu tu laa gadxé peʼ modo riníʼ ique, nga runi raca nagana para laa guniné xcaadxi binni dxiiñaʼ para guni chaahuicaʼ xiixa guendanagana. Rusihuinni guiráʼ ni cazaaca riʼ dxandíʼ ni guníʼ Biblia maʼ xadxí.

• «Binni huayuni mandar binni para si gacanacaʼ» (Eclesiastés 8:9).

Peru rabi Biblia laanu nuu xiixa ni zanda guni chaahuiʼ ni: laani nga gobiernu stiʼ Dios, ne ni chiguni mandar lu gobiernu ca nga chindee guiráʼ ni cayuniná binni.

Ti xaíque ni racalaʼdxiʼ gacané binni

Lu Biblia riete de ti xaíque ne gástiruʼ stobi casi laa, ne laasibe nga ni zanda guni chaahuiʼ guiráʼ xixé cosa. Xaíque riʼ nga Jesucristu. Nápabe poder ne maʼ gucuaabe autoridad para guni mandarbe. Ne racaláʼdxibe guibani binni nayecheʼ ne chuʼcaʼ tobi si.

• «Ca dxi guni mandarbe, zadale ca ni nachaʼhuiʼ, ne ziuu stale paz» (Salmo 72:7).

• «Guiráʼ guidxi zuni ni nabe» (Salmo 72:11).

Gástiruʼ sti xaíque casi Jesús, purtiʼ dxandíʼ peʼ rizaaláʼdxibe binni ne racaláʼdxibe gacanebe laacaʼ, jmaruʼ si ca ni huadiʼdiʼ lu xiixa injusticia.

• «Zulabe binni pobre ni cucaa ridxi para gacanécabe laa, ngueca ni cuquiichinácabe laa ne tutiica ni qué gapa tu gacané laa. Ziabe binni ni cuquiichinácabe laa ne binni pobre. Ne zulabe xpida ca binni pobre. Zulabe laacaʼ de ca ni cuquiichináʼ laacaʼ ne de ca binni ni ridinde» (Salmo 72:12-14).

Binibiáʼ xcaadxi cosa de Reinu stiʼ Dios ni nuu guibáʼ ra cayuni mandar Jesús. Ne biiyaʼ ximodo zanda gacané gobiernu ca lii yanna ne ximodo zanda gacaneluʼ gobiernu ca.

• Biiyaʼ videu Xii nga Reinu stiʼ Dios.

• Biindaʼ artículo «Reinu stiʼ Dios: ti gobiernu ni runi ni jneza».