¿Ñee nuu ti gobiernu ni zuhuaa dxiichiʼ ni zanda guni mandar lu guidubi guidxilayú riʼ la? | ¿Xi caníʼ Biblia de laani?

Nabé cayapa ca gobiernu ni nuu lu guidubi guidxilayú guendanagana. Dede ndaaniʼ ca guidxi ra ruluíʼ nuudxí ca gobiernu ca, riete stale cosa cadi galán de laacaʼ, nabé ridíndecaʼ ora raca ca elección ca, gadxé gadxé ni runi ca políticu ne nabé rucaalú binni laacaʼ.

Lu Biblia riete nuu ti gobiernu ni zuhuaa dxiichiʼ ni zanda guni mandar lu guidubi guidxilayú riʼ. Ne zándaca huayunadiágaluʼ de laani. Laani nga ni bizeeteʼ Jesús lu oración de padrenuestro.

• «Naquiiñeʼ guni orartu sicaríʼ: “Bixhózedu ni nuu guibáʼ, gaca santificar laluʼ. Gueeda Reinu stiluʼ. Gaca ni naluʼ ndaaniʼ guidxilayú, cásica raca ni guibá’”» (Mateo 6:9, 10).

¿Xi rusiidiʼ Biblia de Reinu ca yaʼ?

Nácani ti Reinu ni zuhuaa dxiichiʼ

Cayuni mandar Reinu riʼ guibáʼ.

• Gulee lá Jesús ni «Reinu ni nuu guibáʼ» (Mateo 4:17; 5:3, 10, 19, 20). Nga runi guniʼbe: «Cadi naca Reinu stinneʼ parte de guidxilayú riʼ» (Juan 18:36).

Ziuu Reinu ca lugar stiʼ ca gobiernu ni cayuni mandar lu guidxilayú riʼ yanna.

• Biblia ruzeeteʼ xi chiguni Reinu riʼ: «Zunideni ne zunduuxeni guiráʼ ca reinu ca [ca ni nuu lu guidxilayú riʼ], ne laasini ziaanani para siempre» (Daniel 2:44).

Jesucristu nga Rey stiʼ Reinu ca ne qué ziuu dxi guinitilú ni.

• Biblia ná: «Qué ziuu dxi gusaana de guni mandar, ne qué zanitilú reinu stiʼ» (Daniel 7:13, 14).

Zacané Reinu ca guiráʼ binni gatadxí ladxidoʼcaʼ ne gastiʼ zuchibi laacaʼ.

• Biblia ná: «Zabí cada tobi de laacaʼ xaʼnaʼ lubáʼ uva ne xaʼnaʼ yaga duʼgaʼ stiʼ, ne qué ziuu tu guchibi laacaʼ» (Miqueas 4:4).

Biziidiʼ xcaadxi cosa de Reinu riʼ

Dxi guyuu Jesús lu guidxilayú riʼ biʼniʼ predicarbe «ca noticia galán stiʼ Reinu» (Mateo 9:35). Laaca guniʼbe:

• «Zaca predicar ca noticia galán stiʼ Reinu lu guidubi guidxilayú para gunadiaga guiráʼ xixé guidxi ni, ne oraqueruʼ nga gueeda fin» (Mateo 24:14).

Ca dxi riʼ, maʼ careeche ca noticia galán ni caníʼ de Reinu riʼ lu jma de 240 guidxi ne territorio. ¿Ximodo zacané Reinu ca binni pue? ¿Ximodo zanda gacaneni lii? Cayuni invitardu lii guiziidiluʼ xcaadxi cosa de gobiernu riʼ.

Biiyaʼ videu ni láʼ Xii nga Reinu stiʼ Dios.