Hebreos 4:12 | «Nabani stiidxa’ Dios ne napa poder»

«Nabani stiidxa’ Dios ne napa poder. Jma nadúxhuni que ti espada ni naduxhu’ guiropa ladu, zanda guiaazini dede ra guxhéleni alma de espíritu, ne riaazini dede guxhéleni ra gui’di’ ca dxita ladi binni ne riaazini dede ndaani’ dxita, ne zanda gusihuínnini xi riní’ íquenu ne xi deseu nuu ndaani’ ladxido’no» (Hebreos 4:12, Traducción del Nuevo Mundo).

«Stiidxa’ Dios la? rudii enda nabani laanu, ne nandxó’ ni. Jma naduxhu ni que ti puñal ni naduxhu iropa ladu, purti’ zanda guiaazi ni dede jma guete’, dede ndaani dxita. Ora ma yendá stiidxa be que ndaani ladxidó’ no la? ribee irá ni nuu ndaani ladxidó’ no, ne ni cá lu xquenda biaani nu, para ganna nu ximodo laanu» (Hebreos 4:12, Stiidxa Dios didxazá).

Significadu sti’ Hebreos 4:12

Ca diidxa’ ni guní’ Dios para binni guidxilayú ni zeeda lu Biblia, napa ca ni poder para gusihuínnini xi riní’ íquenu ne xi deseu nuu ndaani’ ladxidoʼno. Ne laaca racaneni laanu gúninu ni jneza.

«Nabani stiidxaʼ Dios». Lu textu ri’, diidxa’ «stiidxa’ Dios» cani’ni de ca ni ma’ bizabiruaa Dios, o ca ni naguixhe íquebe gúnibe ni rieete’ lu Biblia.a Lade ca ni naguixhe ique Dios guni nga zeeda guibani binni ni ruzuuba’ diidxa’ sin qué chu’ dxi gati’ lu Guidxilayú ra ziuu binni tobi si ne zápaca’ guendariuudxí (Génesis 1:28; Salmo 37:29; Apocalipsis 21:3, 4).

¿Xi riní’ «nabani» stiidxa’ Dios ya’? Zanda guininu stiidxa’ Dios o ca ni naguixhe íquebe ruchaani xquendanabani ca binni ni gucaadiaga ca ni purti’ rudii ni esperanza laaca’ ne laaca rudii ni propósitu xquendanabánica’ (Deuteronomio 30:14; 32:47). Stiidxa’ Dios laaca «nabani» purti’ Dios ni nabani ca qué rusaanabe de gúnibe dxiiña’ para gaca’ cumplir guirá’ xixé ca ni bizabiruaabe (Juan 5:17). Maʼ gadxé Dios de binni, purti’ ora Dios guni prometer xiixa la? qué riaandaʼ ni laa ne despué guiníʼ ique maʼ qué zanda guni ni (Números 23:19). Casi pe’ modo guní’ Dios ni: «Zacá zaca diidxaʼ ni maʼ gunieeʼ. Qué zabiguetaʼ ni ra nuaaʼ, sin gaca ni» (Isaías 55:10, 11).

«Stiidxa’ Dios [...] napa poder». Diidxa’ «napa poder» ca laaca zanda gaca traducirni «nápani poder», «nandxó’ ni» o «runi ni guirá’ ni naquiiñe’ gaca’». Nga runi, guirá’ ni riní’ ne ni ruzabiruaa’ Jehováb dxandí’ raca ca ni (Salmo 135:6; Isaías 46:10). Nánnanu zanda guni Dios ca ni ma’ bizabiruaa’, ne zanda gúnibe ni modo laanu qué lica riníʼ íquenu ni (Efesios 3:20).c

Stiidxa’ Dios laaca «napa poder» purti’ racaneni ca binni ni dxandí’ rusisaca ni para guchaaca’ modo laaca’ ne xquendanabánica’. Ca ni rusiidi’ Dios ruchaani modo riní’ íquecabe, modo nabánicabe ne ca ni naguixhe íquecabe (Romanos 12:2; Efesios 4:24). Nga runi, zanda guininu racané stiidxa’ Dios ca ni runi cré zeeda ni de laabe (1 Tesalonicenses 2:13).

«Stiidxa’ Dios[...] jma nadúxhuni que ti espada ni naduxhu’ guiropa’ ladu». Zanda guininu jma naduxhu’ Stiidxa’ Dios que intiica espada, purti’ riaazini dede ndaani’ ladxido’no, laani nga ca ni riní’ íquenu ne ca deseu stinu, ne ca ni rusiidiʼ binni qué zanda guni ca cosa riʼ. Ne nga pe’ nga ni chiguizíʼdinu lu Hebreos 4:12.

«Stiidxa’ Dios [...] zanda guiaazini dede ra guxhéleni alma de espíritu ne riaazini dede guxhéleni ra gui’di’ ca dxita ladi binni». Lu Biblia, diidxa’ «alma» nuu biaje raca significar ni nácanu ne «espíritu» ca nga ni dxandí’ nácanu (Gálatas 6:18). «Stiidxa’ Dios» riaazini «ra gui’di’ dxita» ládinu casi ñácani ti espada, laani nga ca ni riní’ íquenu ne ca ni runi sentirnu. Guirá’ ca ni rusiidi’ Jehová ribeeni ca cosa ni guiruti’ zanda gu’ya’: ni dxandí’ nácanu pur dentru. Ne ndi’ rucaa laanu gucha’nu para gúninu ni jneza. Ne nga rusieche’ laanu ne laaca rusieche’ ni Dios ni Bizá’ laanu.

«Stiidxa’ Dios [...] zanda gusihuínnini xi riní’ íquenu ne xi deseu nuu ndaani’ ladxido’no». Ni runi ti binni ora gu’nda’ Stiidxa’ Dios rusihuínnini ni dxandí’ riní’ ique, dede né ca deseu sti’, ni rucaa laa guni xiixa. Casi nuu biaje ora ti binni rinanda ni ná Stiidxa’ Dios ne ruchaa modo nabani, rusihuinni naca humilde, ne racala’dxi’ gusieche’ Dios ni Bizá’ laa. Peru, pa nisi cuyúbibe paraa cuchee Stiidxa’ Dios, zusihuínnibe nácabe orgulloso ne ruyúbibe puru para laasibe. Zándaca racalá’dxibe gúnibe xiixa ni qué riuula’dxi’ Dios (Jeremías 17:9; Romanos 1:24-27).

Lu ti libru ná rindá stiidxa’ Dios «dede ndaani’ ladxido’no». Ruuya’ Dios modo nácanu, ne gasti’ zanda guca’chinu nezalube. Hebreos 4:13 ná: «Nin tobi de ca cosa ni bizá’ Dios cadi nuu ra naga’chi’, sínuque ruuya’ dxíchibe guirá’ ni, ne laabe cuídxibe cuenta laanu».

Contextu sti’ Hebreos 4:12

Dios nga guní’ xi guicá lu libru sti’ Hebreos, ne apóstol Pablo nga bicaani bia’ lu iza 61 para ca xpinni Cristu ni naca judíu ni nabeza Jerusalén ne Judea.

Lu ca capítulo 3 ne 4, Pablo biluí’ cadi jneza bi’ni’ ca israelita ne ni bí’nicabe ca zanda gacaneni ca xpinni Cristu para cadi gúnica’ zacá (Hebreos 3:8-12; 4:11). Jehová bidii stiidxa’ zabee ca israelita de gácaca’ esclavu ne chinebe laaca’ ti lugar ra guibánica’ sin chu’ tu guniná laaca’ (Deuteronomio 12:9, 10). Peru ca israelita ni biree de Egipto que stale biaje bisihuínnicabe qué gápacabe fe lu ca promesa sti’ Dios, ne biaacabe cadi gúnicabe ni ná ca mandamientu stibe. Pur nga qué ñuucabe lu «descansu» sti’ Dios, o qué ñanda ñaca xhamígucabe laabe ne gúticabe lu desiertu que. Neca guyuu ca ni zá de ca israelita ca lu layú ni bizabiruaa Dios que la? laacabe laaca qué nuzuubacabe stiidxaʼ Jehová stale biaje. Ngue runi despué naná nga modo gudixe guidxi que ni (Nehemías 9:29, 30; Salmo 95:9-11; Lucas 13:34, 35).

Bisiene Pablo caquiiñeʼ guiziidiʼ ca xpinni Cristu modo bichee ca israelita que. Nabé triste modo bilúxecabe peru laanu zanda chuʼnu lu descansu sti’ Dios pa guzú’banu stiidxaʼ ne gusihuínninu nápanu fe lu ca promesa stiʼ (Hebreos 4:1-3, 11).

Para guiene chaahuinu xidé caní’ Carta sti’ Hebreos, biiya’ videu ri’.